Bag-o nga Programa sa Sirkito nga Asambleya

Luyag kita papatihon sang kalibutan nga ang presente nga sistema sang mga butang magapabilin sing dayon. Apang, tuhay ang ginasugid sa aton sang Pulong sang Dios. (1 Juan 2:15-17) Ginabuligan kita sini nga mahangpan nga ang ‘pagtipon sang bahandi sa duta’ wala gid sing kapuslanan. Agod nga mapalig-on ang katawhan sang Dios, ang programa sa sirkito nga asambleya nga magasugod sa Pebrero, 2007 magapasangkad sang tema nga “Magtipon Kamo . . . Sing mga Bahandi sa Langit.”—Mat. 6:19, 20.

Nalakip ang pagkamateryalistiko sa ginpatuhuyan sang Efeso 2:2 nga “awtoridad sang hangin, ang espiritu nga nagapanghikot karon sa mga anak sang pagkadimatinumanon.” Subong nga ang literal nga hangin yara bisan diin kag gilayon nga mahaklo, “ang espiritu sang kalibutan” nagalatom man sa sining sistema. (1 Cor. 2:12) Sanglit mabaskog gid ang impluwensia sini, masiling nga may “awtoridad” ini. Ang bag-o nga programa sang sirkito nga asambleya magabulig sa aton agod malikawan ang pagkamateryalistiko sini nga kalibutan kag nga unahon pirme ang aton mga prioridad. (Mat. 6:33) Dugang pa, mabuligan kita sang programa nga magsalig kay Jehova samtang ginatuman naton ang aton ministeryo bisan pa sang mga pag-ipit kag mga paghingabot sa aton.

Pat-ura nga presente kamo sa duha ka adlaw kag ‘mahatagan ninyo ini sing labaw pa sa kinaandan nga igtalupangod.’ (Heb. 2:1) Magnota sing malip-ot sa mga punto nga mahimo mo maaplikar sa imo kabuhi kag sa imo ministeryo. Paagi sa pagtambong sugod sa umpisa tubtob sa katapusan sa sining bugana sa espirituwal nga programa, mapalig-on kag mapabakod ka nga padayunon ang ‘pagtipon sing mga bahandi sa langit’!