Indi Magpadaug sa Kabalaka

“INDI gid kamo magkabalaka tuhoy sa masunod nga adlaw, kay ang masunod nga adlaw may iya kaugalingon nga kabalaka. Tuman na para sa tagsa ka adlaw ang iya kalainan.” (Mateo 6:34) Inang laygay nga ginhatag ni Jesucristo praktikal gid para sa aton tanan nga nagakabuhi karon sa madasig-sing-lakat kag mahuol nga katilingban.

Apang, sa pagkamatuod, mahimo bala nga indi kita magkabalaka sa aton mga problema, desisyon, obligasyon, kag mga responsabilidad? Minilyon ka tawo ang nagabatyag sing kapung-aw, kasubo, kag kabug-atan. Amo sina kon ngaa ang mga bulong nga pangpakalma kag pangpalinong isa ka multimilyones-dolyares nga negosyo.

Kon Paano Mahibaluan ang Kinatuhayan

Kinahanglan naton nga magplano kag maghanda para sa aton mga obligasyon, asaynment, desisyon, kag problema—ginadalian man ini ukon wala. Ang Biblia nagapalig-on sa aton nga ‘maglingkod kag bantaon ang kabilihanan’ antes magpasimpalad sa isa ka daku nga proyekto. (Lucas 14:28-30) Nagalakip ini sing maayo nga pagtulutimbang sa mga pililian, pag-usisa sa mahimo nga mga epekto sang resulta, kag sa pagbulubanta sa kabilihanan may kaangtanan sa oras, kusog, kag kuwarta.

Samtang mahalungon nga dapat ginahunahuna sang isa kon ano ang mahimo nga matabo, indi mahimo ukon maayo nga pamensaron ang tanan nga mga madangatan. Halimbawa, agod mapahilayo sa peligro ang imo pamilya, mahimo nimo mabinagbinag kon ano ang imo himuon pananglit nga masunog ang inyo balay. Mahimo magbakal kag magbutang ka sing alarma nga awtomatiko nga magahuni kon may aso kag sing mga pamatay sunog. Mahimo man magplano kag mag-ensayo sing mga ruta nga mapalagyuhan sa nagkalainlain nga mga bahin sang balay. Apang ano ang kinatuhayan sa ulot sang makatarunganon, praktikal nga pagplano kag sang sobra, indi nagakaigo nga pagkabalaka? Ina nga mga kabalaka nagaumpisa kon magsugod ka nga mabudlayan bangod sang wala katapusan nga paghaumhaom sa mahimo matabo, ang kalabanan sini bunga sang sobra nga imahinasyon. Mahimo dag-on ikaw sang makatulublag nga mga panghunahuna, papatihon ka nga may yara ikaw nalimtan ukon kulang pa ang imo nahimo agod maamligan ang imo pamilya. Inang tuga-sang-kaugalingon nga kabudlayan mahimo nga mabug-at gid sa imo hunahuna sa bagay nga indi ka makatulog bangod sina.

Si Moises sa Atubangan ni Paraon

Si Jehova nga Dios naghatag sing isa ka mabudlay nga tulumanon sa iya manalagna nga si Moises. Una, si Moises dapat mag-atubang sa mga Israelinhon kag hayluhon sila nga gintangdo sia ni Jehova nga pangunahan sila pagguwa sa Ehipto. Masunod, dapat mag-atubang si Moises kay Paraon kag pangabayon sia nga palakton ang mga Israelinhon. Sa katapusan, dapat pangunahan ni Moises ang minilyon ka panong sa kahanayakan padulong sa duta nga ginapuy-an sang kaaway nga mga katawhan. (Exodo 3:1-10) Ining tanan daw makahaladlok gid, apang ginkabalak-an gid bala sing dinagakaigo ni Moises inang responsabilidad?

Sing maathag, si Moises nabalaka sa pila ka hulusayon. Namangkot sia kay Jehova: “Kon ako mag-abot sa katawhan sang Israel kag magsiling sa ila, ‘Ang Dios sang inyo katigulangan nagpadala sa akon sa inyo,’ kag sila magsiling sa akon, ‘Ano bala ang iya ngalan?’ Ano bala ang isiling ko sa ila?” Si Jehova naghatag sa iya sing sabat. (Exodo 3:13,14) Nabalaka man si Moises kon ano ang matabo kon indi magpati si Paraon sa iya. Sa liwat, ginsabat ni Jehova ang manalagna. Isa pa ka problema—gin-ako ni Moises nga sia “indi madagmit sa paghambal.” Paano ini malubad? Si Jehova nag-aman kay Aaron nga maghambal para kay Moises.—Exodo 4:1-5,10-16.

Nakahanda bangod nasabat na ang iya mga pamangkot kag may pagtuo sa Dios, si Moises nagtuman sang ginsugo ni Jehova. Sa baylo nga paantuson ang iya kaugalingon sing makahaladlok nga mga panghunahuna kon ano ang basi nga matabo kon atubangon niya si Paraon, si Moises “naghimo sing amo gid.” (Exodo 7:6) Kon nagpadaug sia sa mga kabalaka, nagpaluya kuntani ini sang iya pagtuo kag kaisog nga kinahanglanon sa pagtuman sa iya tulumanon.

Ang balanse nga paagi ni Moises sa pagtuman sa iya mga tulumanon isa ka halimbawa sang ginasiling ni apostol Pablo nga “maligdong sing hunahuna” (2 Timoteo 1:7; Tito 2:2-6) Kon si Moises wala magpakita sing maligdong nga hunahuna, mahapos kuntani sia madaug sang iya mabug-at nga tulumanon kag mahimo nga wala niya ini ginbaton.

Pagkontrol sa Imo Panghunahuna

Paano ka nagagawi kon nagaatubang ka sing mga pagtilaw sa imo pagtuo ukon sing mga kabudlayan sa adlaw-adlaw? Nagakalisang ka bala sa paghunahuna lamang sa mga balagbag kag mga kabudlayan nga yara sa unahan? Ukon ginatamod mo bala ini sa balanse nga paagi? Subong sang ginasiling sang iban, ‘Magtabok ka sa taytay kon didto ka na.’ Basi indi naman kinahanglanon nga magtabok sa sinang ginahunahuna nga taytay! Ngaa paligban ang butang nga basi indi man matabo? Ang Biblia nagasiling: “Ang kabalaka sa tagipusuon sang isa ka tawo magapakuko sini.” (Hulubaton 12:25) Ang resulta sa masami amo nga ang isa magapabuyanbuyan sa paghimo sing desisyon, kag nagaawat tubtob ulihi na ang tanan.

Ang labing malubha amo ang halit sa espirituwal nga mahimo bangdan sang di-nagakaigo nga pagkabalaka. Si Jesus nagsiling nga ang apresasyon sa “pulong sang ginharian” mahimo malumos sing bug-os bangod sang malalangon nga gahom sang manggad kag sang “kabalaka sining sistema sang mga butang.” (Mateo 13:19,22) Subong nga ang mga tunok makapugong sa binhi nga magtubo kag magbunga, ang di-makontrol nga kabalaka mahimo man magpugong sa aton sa pag-uswag sa espirituwal kag sa pagpamunga sa kadayawan sang Dios. Ang tuga-sang-kaugalingon, makahalalit nga kalisang nagapugong pa sa iban sa pagdedikar sang ila kaugalingon kay Jehova. Nagapalibog sila, ‘Ano ayhan kon indi ako magakabuhi suno sa akon dedikasyon?’

Si apostol Pablo nagsugid sa aton nga sa aton espirituwal nga pagpakig-away, ginatinguhaan naton nga dalhon “ang tagsa ka hunahuna sa pagkabihag agod mangin matinumanon kay Cristo.” (2 Corinto 10:5) Ang aton panguna nga kaaway, si Satanas nga Yawa, malipay gid sa paghingalit sa aton mga kabalaka agod palas-ayon kita kag paluyahon sa pisikal, emosyonal, kag espirituwal. Eksperto sia sa paggamit sa mga duhaduha sa pagsiod sa wala nagahalong. Amo sina kon ngaa nagpaandam man si Pablo sa mga Cristiano nga indi ‘paghatagan sing lugar ang Yawa.’ (Efeso 4:27) Subong “dios sining sistema sang mga butang,” si Satanas madinalag-on nga “nagbulag sang mga painuino sang mga ditumuluo.” (2 Corinto 4:⁠4) Kabay nga indi naton sia pagtugutan nga kontrolon ang aton panghunahuna!

Matigayon ang Bulig

Kon ang isa ka bata nagaatubang sing mga problema, sarang sia makakadto sa isa ka mahigugmaon nga amay kag makabaton sing panuytoy kag paumpaw. Sing kaanggid, mahimo kita makadangop sa aton langitnon nga Amay nga si Jehova para sa aton mga problema. Sa katunayan, si Jehova nagaagda sa aton nga ihaboy ang aton mga lulan kag mga kabalaka sa iya. (Salmo 55:22) Kaangay sang isa ka bata nga wala na nagakabalaka pagkatapos niya mabaton ang pasalig sang iya amay, indi lamang naton dapat ihaboy ang aton mga lulan kay Jehova kundi ipatumbaya na lang naton ini sa iya.​—Santiago 1:6.

Paano naton ihaboy ang aton mga kabalaka kay Jehova? Ang Filipos 4:​6, 7 nagasabat: “Indi kamo magkabalaka sa bisan ano nga butang, kundi sa tagsa ka butang paagi sa pangamuyo kag pag-ampo nga may pagpasalamat ipakilala sa Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magatipig sang inyo mga tagipusuon kag sang inyo mga painuino sa kalalangan ni Cristo Jesus.” Huo, bilang mga sabat sa aton padayon nga mga pangamuyo kag mga pakitluoy, si Jehova makahatag sa aton sing nasulod nga kalinong nga magaamlig sa aton mga panghunahuna gikan sa pagkatublag sa di-kinahanglanon nga mga kabalaka.​—Jeremias 17:7,8; Mateo 6:25-34.

Apang, agod makapanghikot nahisuno sa aton mga pangamuyo, indi naton dapat ipain ang aton kaugalingon sa pisikal man ukon sa hunahuna. (Hulubaton 18:1) Sa baylo, ginapanugda nga binagbinagon naton ang mga prinsipio kag mga panuytoy sa Biblia nga may kaangtanan sa aton problema, sa amo malikawan naton ang pagsalig sa aton kaugalingon nga paghangop. (Hulubaton 3:5, 6) Ang mga lamharon kag mga tigulang mahimo makadangop sa Biblia kag sa mga publikasyon sang Watch Tower para sa madamo nga impormasyon nga nagahinun-anon sa paghimo sing mga desisyon kag paglubad sa mga problema. Dugang pa, sa Cristianong kongregasyon, yara ang maalam kag eksperiensiado nga mga gulang kag iban pa nga mga hamtong nga Cristiano nga pirme handa magsugilanon sa aton. (Hulubaton 11:14; 15:22) Yadtong wala nadalahig sa emosyon sa aton problema kag may panghunahuna sang Dios tuhoy sini masami nga makabulig sa aton nga tamdon sing lain ang aton problema. Kag bisan indi sila ang magadesisyon para sa aton, mangin daku sila nga tuburan sang pagpalig-on kag suporta.

“Maghulat sa Dios”

Indi mapanghiwala sang isa nga ang pag-atubang sa aton mga problema sa adlaw-adlaw tuman na nga makapahuol bisan indi na ini pagdugangan paagi sa pagpalibog sa ginahunahuna lamang nga mga kabalaka. Kon ang kabalaka sa kon ano ang mahimo nga matabo magapabatyag sa aton sing pagkahangawa kag di-pagkahamtang, nian magdangop kita kay Jehova sa pangamuyo kag pakitluoy. Magsalig sa iya Pulong kag organisasyon para sa panuytoy, kaalam, kag kaligdong sing hunahuna. Aton matalupangdan nga bisan ano man nga sirkunstansia ang mag-utwas, may matigayon nga bulig agod malubad ini.

Ginabug-atan kag ginaligban, ang salmista nag-amba: “Ngaa bala nadulaan ka sing paglaum, O kalag ko, ngaa bala nagakabalaka ka sa sulod nakon? Maghulat sa Dios, kay dayawon ko pa sia subong ang akon daku nga kaluwasan kag akon Dios.” (Salmo 42:11) Mangin kaangay man sina dapat ang aton balatyagon.

Huo, magplano para sa kon ano ang makatarunganon nga mapaabot, kag itugyan ang wala ginapaabot kay Jehova. ‘Ihaboy ninyo sa iya ang tanan ninyo nga kabalaka, kay sia nagaulikid sa inyo.’—1 Pedro 5:7.

[Laragway sa pahina 23]

Ikaw bala, kaangay ni David, nagahaboy sang imo lulan kag kabalaka kay Jehova?