“Himua ang Tanan Para sa Himaya sang Dios”

SUBONG dedikado nga mga alagad sang Dios, obligado kita nga ipakita ang himaya ni Jehova sa tanan naton nga ginahambal kag ginahimo. Si apostol Pablo naghatag sing giya nga prinsipio sang nagsulat sia: “Bisan nagakaon kamo ukon nagainom ukon bisan ano ang inyo ginahimo, himua ang tanan para sa himaya sang Dios.” (1 Cor. 10:31) Nalakip sa sini ang pagsunod naton sa matarong nga mga talaksan ni Jehova, nga nagapabanaag sang iya himpit nga personalidad. (Col. 3:​10) Dapat kita mangin manug-ilog sang Dios, subong balaan nga katawhan.​—Efe. 5:​1, 2.

² Agod ipatalupangod ini sa mga Cristiano, si apostol Pedro nagsulat: “Subong matinumanon nga mga anak, untati na ninyo ang pagpadihon sa mga kailigbon nga yara anay sa inyo sang wala pa kamo sing nahibaluan, sa baylo mangin balaan kamo sa tanan ninyo nga paggawi subong sang Isa nga Balaan nga nagtawag sa inyo, kay nasulat na: ‘Dapat mangin balaan kamo, tungod balaan ako.’” (1 Ped. 1:14-16) Kaangay sang Israel sang una, ang tanan sa Cristianong kongregasyon dapat magpabilin nga balaan. Nagakahulugan ini nga dapat sila magpabilin nga wala sing higko, kag matinlo gikan sa kahigkuan sang sala kag mga buhat sang kalibutan. Sa amo, napain sila para sa sagrado nga pag-alagad.​—Ex. 20:5.

³ Mahuptan ang pagkabalaan paagi sa pagsunod sa mga kasuguan kag prinsipio ni Jehova, nga maathag nga ginasambit sa Balaan nga Kasulatan. (2 Tim. 3:​16) Paagi sa pagtuon sa Biblia, ginatudluan kita tuhoy kay Jehova kag sa iya dalanon, kag nagasuod kita sa iya. Paagi sa pagtuon naton sa Biblia, nakumbinsi kita nga dapat naton unahon sa aton kabuhi ang pagpangita sa Ginharian kag ang paghimo sang kabubut-on ni Jehova. (Mat. 6:​33; Roma 12:2) Nagakinahanglan ini nga isuklob naton ang bag-o nga personalidad.​—Efe. 4:​22-​24.

⁴ Ang pagsunod sa matarong nga mga talaksan ni Jehova indi pirme mahapos. Ang aton kaaway, nga si Satanas nga Yawa, nagatinguha nga talikdan naton ang kamatuoran. Mabudlay ini kon kaisa bangod sang malaut nga impluwensia sang kalibutan kag sang aton makasasala nga huyog. Agod magkabuhi suno sa aton dedikasyon, kinahanglan nga makig-away kita sa espirituwal. Ang Kasulatan nagasiling sa aton nga indi kita dapat makibot kon pamatukan kita ukon tilawan. Dapat kita mag-antos tungod sa pagkamatarong. (2 Tim. 3:​12) Pero mahimo kita mangin malipayon kon ginatilawan kita, kay nakahibalo kita nga pamatuod ini nga ginahimo naton ang kabubut-on sang Dios.—1 Ped. 3:14-16; 4:12, 14-16.

⁵ Bisan pa himpit si Jesus, natun-an niya ang pagkamatinumanon paagi sa mga butang nga gin-antos niya. Wala gid sia nagpadaug sa mga pagsulay ni Satanas ukon nagpalambo sang kalibutanon nga ambisyon. (Mat. 4:​1-​11; Juan 6:​15) Wala gid gani sia nagpamensar nga magkompromiso. Bisan gindumtan sia sang kalibutan bangod sang iya katutom, ginsunod gid niya ang matarong nga mga talaksan ni Jehova. Wala madugay antes sia mapatay, ginpaandaman ni Jesus ang iya mga disipulo nga dumtan man sila sang kalibutan. Halin sadto tubtob subong, ang mga sumulunod ni Jesus nakaeksperiensia sing kapipit-an, apang nagpakaisog sila kay nahibaluan nila nga nadaug sang Anak sang Dios ang kalibutan.​—Juan 15:19; 16:33; 17:16.

⁶ Agod indi kita mangin bahin sang kalibutan, dapat naton sundon ang matarong nga mga talaksan ni Jehova, subong sang ginhimo sang aton Agalon. Luwas sa paglikaw sa pulitika kag sa mga isyu sa katilingban, dapat naton batuan ang nagalain sini nga moral. Serioso gid naton nga ginasunod ang laygay sang Santiago 1:21: “Isikway ang tanan nga kahigkuan kag ang tanan nga agi sang kalainan, kag mapainubuson nga tuguti ang Dios nga itanom sa inyo ang iya pulong nga makaluwas sa inyo.” Paagi sa pagtuon kag pagtambong sa mga miting, maeksperiensiahan naton ang ‘pagtanom sang pulong’ sang kamatuoran sa aton hunahuna kag tagipusuon, kag indi na naton paghandumon ang mga tanyag sang kalibutan. Si disipulo Santiago nagsulat: “Wala bala kamo makahibalo nga ang pagpakig-abyan sa kalibutan pagpakig-away sa Dios? Gani, ang bisan sin-o nga luyag mangin abyan sang kalibutan nagahimo sang iya kaugalingon nga kaaway sang Dios.” (Sant. 4:4) Bangod sini, ang Biblia nagaunod sing laygay nga huptan naton ang matarong nga mga talaksan ni Jehova kag magpabilin nga nahamulag sa kalibutan.

⁷ Ang Pulong sang Dios nagapaandam sa aton batok sa paghimo sing makahuluya kag imoral nga paggawi. Nagasiling ini sa aton: “Ang seksuwal nga imoralidad kag ang tanan nga sahi sang kahigkuan ukon kakagod indi gid paghinambitan sa tunga ninyo, kay indi ini nagakaigo sa mga tawo nga balaan.” (Efe. 5:3) Gani indi gid naton pagpamensaron ang mga butang nga malaw-ay, makahuluya, ukon malain, kag indi gid naton pagtugutan nga ang aton paghambalanay makadangat sa sini. Sa amo, ginapamatud-an naton nga luyag naton sundon ang matinlo kag matarong nga mga talaksan ni Jehova sa moralidad.

⁸ Magluwas sa espirituwal kag moral nga katinlo, ginakilala man sang mga Cristiano ang importansia sang pisikal nga katinlo. Sa dumaan nga Israel, ang Dios sang pagkabalaan nagapatuman nga ang kampo dapat huptan nga matinlo. Dapat man nga matinlo kita agod si Jehova ‘wala sing makita sa aton nga indi maayo.’—Deut. 23:14.

⁹ Sa Biblia, naangot gid ang pagkabalaan kag pisikal nga katinlo. Halimbawa, si Pablo nagsulat: “Mga hinigugma, . . . tinluan naton ang aton kaugalingon sa tanan nga nagapahigko sang lawas kag tagipusuon, agod mangin mas balaan kita samtang nagakahadlok sa Dios.” (2 Cor. 7:1) Gani, ang mga Cristiano dapat manikasog nga huptan nga matinlo ang ila lawas paagi sa regular nga pagpaligo kag paglaba sang ila mga panapton. Bisan pa indi palareho ang mga kahimtangan sa lainlain nga pungsod, kinaandan na nga may bastante kita nga habon kag tubig agod mahuptan nga matinlo ang aton lawas kag ang aton kabataan.

¹⁰ Bangod sang aton pagpanaksi, masami nga kilala kita sa aton komunidad. Ang paghupot sing mahipid, matinlo, kag mahim-ong nga puluy-an, sa sulod kag sa gua, isa na ka panaksi sa aton mga kaingod. Mahimo ini sang bug-os nga pamilya. Ang mga utod nga lalaki dapat mangin interesado ilabi na sa puluy-an kag sa palibot sini, kay ang matinlo nga ugsaran kag namentinar sing maayo nga puluy-an may maayo nga impresyon sa iban. Ini, lakip ang ila pagpanguna sa espirituwal, nagapakita nga ang mga ulo sang pamilya nagadumala sing maayo sa ila panimalay. (1 Tim. 3:​4, 12) Ang mga utod nga babayi may responsibilidad man sa pag-atipan sang mga gamit, ilabi na sa sulod sang puluy-an. (Tito 2:​4, 5) Ginahimo sang nahanas sing maayo nga kabataan ang ila bahin paagi sa paghupot sang ila kaugalingon kag sang ila kuarto nga mahipid kag matinlo. Sa amo, ang bug-os nga pamilya nagabuligay sa pagpalambo sang talaksan sang katinlo nga nagakabagay sa bag-o nga kalibutan sa idalom sang Ginharian sang Dios.

¹¹ Madamo sa katawhan ni Jehova karon ang may salakyan nga ginagamit pakadto sa mga miting. Sa pila ka lugar, ang salakyan kinahanglanon gid sa ministeryo. Dapat huptan ang salakyan nga matinlo kag namentinar sing maayo. Ang aton puluy-an kag salakyan dapat nagapamatuod nga bahin kita sang matinlo kag balaan nga katawhan ni Jehova. Naaplikar man ini nga prinsipio sa aton bag kag Biblia nga ginagamit sa pagpanaksi.

¹² Ang aton pamayo kag pamustura dapat huptan nga nagahisanto sa mga prinsipio sang Dios. Wala gid kita nagaatubang sa prominente nga tawo kon ang aton panapton mahigko ukon indi nagakaigo. Mas labi na gid kon ginarepresentar naton si Jehova sa ministeryo ukon sa plataporma! Ang aton pamustura kag pamayo mahimo makaimpluwensia sa pagtamod sang iban sa pagsimba kay Jehova. Indi gid nagakaigo nga indi kita maugdang sa iban ukon kon wala kita sing konsiderasyon sa ila. (Miq. 6:8; 1 Cor. 10:31-​33; 1 Tim. 2:​9, 10) Gani, kon nagahanda kita nga makigbahin sa ministeryo ukon magtambong sa mga miting, sirkito nga asembleya, kag kombension, dapat naton dumdumon ang ginasiling sang Kasulatan tuhoy sa pisikal nga katinlo kag maugdang nga hitsura. Luyag naton pirme padunggan kag himayaon si Jehova.

¹³ Naaplikar man ini kon nagaduaw kita sa ulong talatapan ukon sa mga sanga talatapan sang mga Saksi ni Jehova. Dumduma nga ang ngalan nga Bethel nagakahulugan sing “Balay sang Dios.” Gani, dapat mamayo kita kag maggawi subong nga nagatambong kita sa mga miting sa Kingdom Hall.

¹⁴ Bisan sa paglingawlingaw, luyag naton nga maugdang ang aton pamayo kag pamustura. Pamangkuton naton ang aton kaugalingon, ‘Mahuya bala ako kon amo sini ang akon pamayo kon magpanaksi ako sing di-pormal?’

¹⁵ Ang pagpahuway kag pagliwaliwa kinahanglanon agod magpabilin nga mapagros. Isa ka bes, ginhagad ni Jesus ang iya mga disipulo sa isa ka baw-ing nga lugar para “magpahuway sing makadali.” (Mar. 6:​31) Ang pagpahuway kag ang maayo nga pagliwaliwa ukon paglingawlingaw makahatag sa aton sing makalilipay nga tion. Makapaumpaw ini sa aton agod mapadayon naton ang aton mga hilikuton.

¹⁶ Bangod tuman kadamo ang kalingawan subong, ang mga Cristiano dapat mangin mapilion, kag magpakita sing diosnon nga kaalam sa ila ginahimo. Bisan pa ang kalingawan may nagakaigo nga lugar sa aton kabuhi, indi ini ang pinakaimportante. Ginapaandaman kita nga “sa katapusan nga mga adlaw,” ang mga tawo mangin “mahigugmaon sa kinasadya sa baylo nga mahigugmaon sa Dios.” (2 Tim. 3:1, 4) Kalabanan sa ginatawag karon nga pagliwaliwa kag kalingawan indi nagakaigo sa mga luyag magsunod sa matarong nga mga talaksan ni Jehova.

¹⁷ Ginpamatukan sang mga Cristiano sang unang siglo ang indi maayo nga kahimtangan sang mahuyugon sa kinalipay nga kalibutan sa palibot nila. Sa Romano nga mga palaguaon, ang mga tumalan-aw ginalingaw paagi sa pagtan-aw sa pag-antos sang iban. Ang kasingki, pagpaagay sing dugo, kag seksuwal nga imoralidad nangin palaguaon para sa mga pumuluyo, apang ang mga Cristiano sadto naglikaw sa sini. Sa karon, makita man sa kalabanan nga kalingawan sang kalibutan ang kaangay sini kag ang pagpaayaw sa malain nga tawhanon nga handum. Dapat naton ‘padayon nga bantayan sing maayo’ ang aton paglakat, nga ginalikawan ang malaw-ay nga kalingawan. (Efe. 5:​15, 16; Sal. 11:5) Kag bisan pa ang kalingawan mismo mahimo nga indi malaw-ay, ang kabug-usan nga espiritu sini mahimo nga makahalalit.​—1 Ped. 4:​1-4.

¹⁸ May maayo nga mga sahi sang pagliwaliwa kag kalingawan nga puede himuon sang mga Cristiano. Madamo ang nakabenepisyo sa pagsunod sa laygay sang Kasulatan kag balanse nga mga panugda sang aton mga publikasyon.

¹⁹ Kon kaisa, ang iban nga pamilya mahimo maagda sa balay para sa Cristianong pag-inupdanay. Ukon mahimo man maagda ang kauturan sa sinalusalo sa kasal ukon sa kaangay sini nga okasyon. (Juan 2:2) Ang mga nangagda amo ang responsable sa kon ano ang nagakatabo. Maathag nga kinahanglan nga mangin mainandamon sa daku nga mga pagtinipon. Kon kaisa, bangod mas relaks sa sini nga mga pagtinipon, ang iban nagagawi sing indi nagakaigo para sa isa ka Cristiano, paagi sa sobra nga pagkaon kag pag-inom kag paghimo pa gani sang mas mabug-at nga sala. Bangod sini, nahangpan sang mahinantupon nga mga Cristiano nga mas maayo kon limitahan ang kadamuon sang ginaagda kag ang kalawigon sini nga mga pagtinipon. Kon may iserbe nga alkoholiko nga mga ilimnon, dapat ini mangin haganhagan lamang. (Fil. 4:5) Kon ginapanikasugan gid nga ang pagtinipon mangin maayo kag makapaumpaw sa espirituwal, ang pagkaon kag ilimnon indi na mangin pinakaimportante nga butang.

²⁰ Maayo nga mangin maabiabihon. (1 Ped. 4:9) Kon ginaagda ang iban sa aton puluy-an para magkaon, mamahaw, magrelaks, kag mag-inupdanay, luyag naton dumdumon ang mga imol sa kongregasyon. (Luc. 14:12-​14) Kon bisita kita sa sini nga mga okasyon, ang aton paggawi dapat nahisanto sa laygay nga masapwan sa Marcos 12:31. Nagakaigo nga magpakita pirme sing apresasyon sa pagkamainayuhon sang iban.

²¹ Ang mga Cristiano nagakalipay sa bugana nga dulot sang Dios kag sa paghibalo nga ‘makakaon sila kag makainom kag magakalipay sa tanan nga ginpangabudlayan nila.’ (Man. 3:​12, 13) Kon ginahimo naton “ang tanan para sa himaya sang Dios,” ang nangagda subong man ang bisita magakalipay sa pagdumdom sa sini nga mga pagtinipon kay napaumpawan sila sa espirituwal.

²² Ang kabataan sang mga Saksi ni Jehova nakabenepisyo sa pagkuha sing sadsaran nga sekular nga edukasyon. Samtang nagaeskwela, interesado sila nga makatuon sa pagbasa kag sa pagsulat. Ang iban pa nga ginatudlo sa eskwelahan mapuslan sang mga pamatan-on samtang ginalab-ot nila ang espirituwal nga mga tulumuron. Sa tion nga nagaeskwela pa sila, ginapanikasugan nila nga ‘dumdumon ang ila Daku nga Manunuga’ paagi sa pag-una sang espirituwal nga mga butang.​—Man. 12:1.

²³ Kon nagaeskwela ka pa, dapat ka maghalong nga indi makig-upod sing indi kinahanglanon sa kalibutanon nga mga pamatan-on. (2 Tim. 3:​1, 2) Bangod naghatag si Jehova sing kinahanglanon nga pangamlig, daku ang mahimo mo agod mapamatukan ang impluwensia sang kalibutan. (Sal. 23:4; 91:​1, 2) Gani agod maamligan ang imo kaugalingon, panginpusli ang mga aman ni Jehova.​—Sal. 23:5.

²⁴ Agod magpabilin nga nahamulag sa kalibutan samtang nagaeskwela, kalabanan sang pamatan-on nga Saksi nagdesisyon nga indi makigbahin sa mga extracurricular activity. Mahimo nga indi ini mahangpan sang imo mga klasmeyt kag manunudlo. Apang, ang pagpahamuot sa Dios amo ang pinakaimportante. Nagakahulugan ini nga dapat mo sundon ang imo nahanas sa Biblia nga konsiensia kag manindugan nga indi madalahig sa kalibutanon nga paindis-indis ukon sa nasyonalismo. (Gal. 5:​19, 26) Paagi sa pagpamati sa laygay gikan sa Kasulatan sang diosnon nga mga ginikanan kag sa maayo nga pagpakig-upod sa kongregasyon, kamo nga mga pamatan-on makapanindugan sa matarong nga mga talaksan ni Jehova.

²⁵ Ang mga ulo sang pamilya may obligasyon gikan sa Kasulatan nga amanan ang ila panimalay. (1 Tim. 5:8) Bisan pa sini, nahibaluan nila nga subong mga ministro, ang ila sekular nga trabaho ikaduha lamang sa intereses sang Ginharian. (Mat. 6:​33; Roma 11:13) Paagi sa pagkabuhi nga may diosnon nga debosyon kag pagkakontento sa pagkaon kag panapton, ginalikawan nila ang mga kabalaka kag siod sang materyalistiko nga pagkabuhi.​—1 Tim. 6:​6-​10.

²⁶ Ang mga prinsipio sang Kasulatan dapat dumdumon sang tanan nga dedikado nga Cristiano nga may sekular nga trabaho. Ang bunayag nga pag-aman sa aton kaugalingon nagakahulugan nga indi kita makigbahin sa hilikuton nga nagalapas sa kasuguan sang Dios ukon sang pungsod. (Roma 13:1, 2; 1 Cor. 6:​9, 10) Alisto man kita pirme sa katalagman sang malain nga kaupdanan. Subong mga soldado sang Cristo, wala kita nagaentra sa mga negosyo nga supak sa mga talaksan sang Dios, nagakompromiso sang aton Cristianong neutralidad, ukon nagabutang sa katalagman sang aton espirituwalidad. (Isa. 2:4; 2 Tim. 2:4) Dapat nga wala man kita sing kaangtanan sa relihion nga kaaway sang Dios, ang “Babilonia nga Daku.”​—Bug. 18:​2, 4; 2 Cor. 6:​14-​17.

²⁷ Ang pagsunod sa matarong nga mga talaksan sang Dios magapugong sa aton nga hingalitan ang aton teokratiko nga pagpakig-upod agod pasanyugon ang pagnegosyo ukon iban pa nga personal nga interes. Ang katuyuan sang aton pagpakig-upod sa iban sa Cristianong mga miting, asembleya, kag kombension para lamang sa pagsimba kay Jehova. Nagakaon kita sa iya espirituwal nga lamesa kag nagakalipay nga “makapalig-unay.” (Roma 1:​11, 12; Heb. 10:24, 25) Ini nga pag-updanay dapat huptan nga nasentro sa espirituwal nga mga butang.

²⁸ Ginapatuman man sang matarong nga mga talaksan ni Jehova para sa iya katawhan nga ‘tipigan nila ang paghiusa nga nabaton nila paagi sa balaan nga espiritu.’ (Efe. 4:​1-3) Sa baylo nga tinguhaan nga pahamut-an ang kaugalingon, ang kada isa nagapanikasog nga himuon ang maayo para sa iban. (1 Tes. 5:15) Pat-od gid nga amo ini ang panimuot nga nakita mo sa inyo kongregasyon. Bisan ano man ang aton rasa, nasyonalidad, tindog sa katilingban, ikasarang sa pangabuhi, ukon edukasyon, kita tanan ginatuytuyan sang isa lamang ka matarong nga talaksan. Bisan ang mga taga-gua nakatalupangod sining maayo gid nga kinaiya sang katawhan ni Jehova.​—1 Ped. 2:​12.

²⁹ Agod ipadaku pa ang sadsaran sang paghiusa, si apostol Pablo nagsulat: “May isa ka lawas, kag isa ka espiritu, kaangay nga may isa ka paglaum nga sa sini gintawag kamo; isa ka Ginuo, isa ka pagtuo, isa ka bawtismo; isa ka Dios kag Amay sang tanan, nga labaw sa tanan kag nagapanghikot paagi sa tanan kag nagapanghikot man sa tanan.” (Efe. 4:4-6) Ginapadaku sini nga dapat nahiusa man kita sa aton paghangop sa sadsaran kag sa mas madalom nga mga panudlo sang Biblia bilang pagkilala sa pagkasoberano ni Jehova. Pat-od gid nga ginhatag ni Jehova sa iya katawhan ang putli nga lenguahe sang kamatuoran, nga nagabulig sa ila sa pag-alagad sa iya sing nahiusa.​—Sof. 3:9.

³⁰ Ang paghiusa kag paghidait sang Cristianong kongregasyon tuburan sang kaumpawan para sa tanan nga nagasimba kay Jehova. Naeksperiensiahan naton ang katumanan sang saad ni Jehova: “Tingbon ko sila nga may paghiusa, pareho sang mga karnero sa toril.” (Miq. 2:12) Luyag naton huptan ining mahidaiton nga paghiusa paagi sa pagsunod sa matarong nga mga talaksan ni Jehova.

³¹ Malipayon ang mga ginbaton sa matinlo nga kongregasyon ni Jehova! Ang matawag sa ngalan ni Jehova takus gid sa tanan nga sakripisyo nga kinahanglan naton himuon. Samtang ginahuptan naton ang aton hamili nga kaangtanan kay Jehova, manikasog gid nga sundon ang iya matarong nga mga talaksan kag irekomendar ini sa iban.​—2 Cor. 3:​18.