Gawad sa Baylo sang Madamo

SANG Marso 31, 1970, isa ka eroplano ang gin-hijack malapit sa Mount Fuji sa Japan. Ginbihag sang siam ka miembro sang grupo nga kilala subong Japanese Red Army Faction ang kapin sa 120 ka pasahero kag empleyado kag nagpangabay sing maayo nga paglakbay pakadto sa North Korea.

Sang naghugpa ang eroplano sa Seoul, Republika sang Korea, ang bise-ministro sang transportasyon sang Japan nga si Shinjiro Yamamura nagboluntaryo nga ibutang sa katalagman ang iya kabuhi tungod sa mga bihag. Nagpasugot nga batunon sia subong garantiya sang ila kaugalingon nga kaluwasan, ginbuy-an sang mga hijackers ang tanan nga bihag luwas sa piloto. Nian naglupad sila pakadto sa Pyongyang, diin nag-ampo sila sa mga awtoridad sang North Korea. Sang ulihi si Mr. Yamamura kag ang piloto nagbalik sa Japan nga wala maano.

Sa sining hitabo, ang isa ka tawo gingamit subong baylo sa kabuhi sang kapin sa 120 ka bihag. Magabulig ini sa pagpahangop sa aton kon paano ang isa ka tawo sarang makahatag sang iya kabuhi subong gawad sa baylo sang madamo. Apang agod mahangpan ang doktrina sang Biblia tuhoy sa gawad, usisaon naton sing maayo pa ining topiko.

Una, kinahanglan naton tun-an sing tul-id ang ginhalinan sang sala. “Paagi sa isa ka tawo nagsulod ang sala sa kalibutan kag paagi sa sala ang kamatayon, kag gani ang kamatayon naglaton sa tanan nga tawo kay ang tanan nakasala,” paathag sang Biblia. (Roma 5:12) Paano ina natabo? Ang tawo nga ginsambit didto amo si Adan, ang una nga tawo nga gintuga. Mabasa mo ang maragtason nga kasaysayan tuhoy sa pagtuga sa iya kag kon ano ang nagdul-ong sa pagtalikod niya gikan sa talaksan sang Dios. Ginsaysay ini sa nahaunang tatlo ka kapitulo sang tulun-an sang Genesis sa Biblia.

Ginapakita sinang kasaysayan nga may isa ka manugsugyot sa likod sang una nga pagpakasala ni Adan. Agod mapaayawan ang iya handum sa gahom, yadtong manugsugyot nagbuko sa pagdominar kay Adan kag sa mahimo nga mangin mga anak niya. Ang manugsugyot amo si Satanas nga Yawa. Gintawag man sia nga “dumaan nga man-ug” bangod gingamit niya ang man-ug sa pagdul-ong kay Adan sa sala. (Bugna 12:9) Bisan pa ang mahigugmaon nga Manunuga sang katawhan nagsugo kay Adan nga tahuron ang Iya kinamatarong sa pagpamat-od kon ano ang maayo kag kon ano ang malain, ginsulay sang man-ug ang asawa ni Adan, nga si Eva, nga maglapas sa Dios. Nian ginhaylo niya ang iya bana nga maglapas. Bangod sina, ginpahayag ni Adan ang kahilwayan gikan sa Dios, hungod nga nangin makasasala, kag makaliton lamang sina nga sahi sang kabuhi sa iya mga anak.

Nagaantos gihapon kita sa mga resulta. Paano? Ti, ang Manunuga makatarunganon nga nagsugo nga kon sanday Adan kag Eva hungod nga magalapas, kamatayon ang resulta. Busa, bangod sang pagpakasala, ginbaligya ni Adan ang bug-os nga katawhan sa kahiulipnan sang sala kag kamatayon.—Genesis 2:17; 3:1-7.

Paano magawad ang katawhan gikan sa sinang makasasala nga kahimtangan? Si Jesucristo nagkari sa duta “sa paghatag sang iya kalag nga gawad sa baylo sang madamo,” kag nagbukas ini sang dalan sa paggawad sa katawhan.—Mateo 20:28.

Pagtabon kag Paghilway

Ginapakita sang Biblia nga ang proseso sang paggawad sa katawhan nagalakip sang duha ka tikang: (1) pagbakal liwat kag (2) paghilway. Nahanungod sa Griegong tinaga (lyʹtron) nga ginbadbad “gawad,” ang eskolar sang Biblia nga si Albert Barnes nagsulat: “Ang tinaga nga gawad literal nga nagakahulugan sang isa ka bili nga ginbayad sa paggawad sa mga bihag. Sa inaway, kon ang mga bilanggo gindala sang kaaway, ang kuwarta nga ginapangayo para sa ila kahilwayan ginatawag nga gawad; kon sayuron, amo ini ang paagi agod mahilway sila. Gani ang bisan ano nga nagahilway kay bisan sin-o gikan sa kahimtangan sang silot, ukon pag-antos, ukon sala, ginatawag nga gawad.”

Huo, “ang bisan ano nga nagahilway kay bisan sin-o” sarang mapatuhuyan subong lyʹtron. Gani ining Griegong tinaga nagapatalupangod sang buhat ukon proseso sang paghilway.a

Gingamit ni apostol Pablo ang may kaangtanan nga tinaga nga an·tiʹly·tron sa pagpadaku sang kabilihanan sang bili nga ginbayad subong gawad. Sa 1 Timoteo 2:6, sia nagsulat nga “[si Jesus] naghatag sang iya kaugalingon” subong “katumbas nga gawad tungod sa tanan.” Nagakomento sa sini, ang Greek and English Lexicon to the New Testament ni Parkhurst nagasiling: “Nagakaigo ini nga nagakahulugan sa bili nga paagi sini ang mga bihag gingawad gikan sa kaaway; kag sa sinang sahi sang pagbaylo diin ang kabuhi sang isa gingawad paagi sa kabuhi sang iban.” Ginapadaku diri ang katumbas nga kinaugali ukon ang pagkaepektibo sang gawad nga bili nga ginbayad sa pagbalanse sang talaksan sang katarungan. Paano makabig ang halad-gawad ni Jesus subong “katumbas nga gawad”?

Katumbas nga Gawad

Ginbaligya ni Adan ang bug-os nga katawhan, lakip kita, sa sala kag kamatayon. Ang bili, ukon silot, nga ginbayad niya amo ang iya himpit tawhanon nga kabuhi, upod ang paglaum nga magkabuhi sing dayon. Agod matabunan ini, isa pa ka himpit tawhanon nga kabuhi—ang katumbas nga gawad—ang dapat ibayad. Apang, wala sing isa nga natawo gikan sa dihimpit nga mga tawo ang makahatag sang ginakinahanglan nga himpit tawhanon nga kabuhi. (Job 14:4; Salmo 51:5) Apang, sa iya kaalam, ginbuksan sang Dios ang dalan paguwa gikan sining kabudlayan. Ginliton niya ang himpit nga kabuhi sang iya bugtong nga Anak gikan sa mga langit pakadto sa taguangkan sang isa ka ulay, nagtugot nga mabun-ag sia subong isa ka himpit nga tawo. (Lucas 1:30-38; Juan 3:16-18) Ining panudlo tuhoy sa ulay nga pagbun-ag kay Jesus indi isa ka sugilanon nga ginhimuhimo agod pakataason ang tagpasad sang isa ka relihion. Sa baylo, nagapaathag ini sang makatarunganon nga tikang sa pag-aman sang Dios sing gawad.

Agod mahimo ang paggawad, si Jesus dapat maghupot sing matinlo nga rekord sa tanan nga tion nga yari sia sa duta. Ginhimo niya ini. Nian napatay sia sa isa ka mahalaron nga kamatayon. Sa sining paagi, ginbayad ni Jesus ang bili sang iya himpit tawhanon nga kabuhi subong gawad sa pagtubos sa katawhan. (1 Pedro 1:19) Gani makasiling kita sing husto nga “ang isa napatay tungod sa tanan.” (2 Corinto 5:14) Huo, “subong nga kay Adan ang tanan nagakalamatay, amo man kay Cristo ang tanan buhion.”—1 Corinto 15:22.

Isa ka Tawo sa Baylo sang Madamo

Sa kaso sang pag-hijack nga ginsambit kaina, ang mga bihag wala sing mahimo agod hilwayon ang ila kaugalingon, bisan pa manggaranon sila. Kinahanglan ang bulig gikan sa guwa, kag ang tawo nga nagaalagad subong baylo dapat magsunod sang pila ka kondisyon. Amo man sa mas masangkad nga paagi may kaangtanan sa gawad nga ginkinahanglan sa paggawad sa katawhan. Ang salmista nagsulat: “Ang . . . nagapabugal sang ila kaugalingon sa kadam-an sang ila manggad, wala sa ila sing sarang nga mas-a makatubos sang iya utod, ukon makahatag sa Dios sing gawad sa iya; (kay ang gawad nga bili sang ila kalag mahal kag ini kulang sa gihapon).” (Salmo 49:6-8) Sa pagkamatuod, kinahanglan ang bulig gikan sa guwa para sa katawhan. Ang kabuhi sang isa ka tawo mahimo mangin bastante na sa pagtubos sa tanan nga katawhan lamang nga masunod niya ang mga kondisyon nga ginakinahanglan sa pagtimbang sang talaksan sang katarungan sang Dios. Si Jesucristo amo lamang ang himpit nga tawo nga nakasunod sang mga kalipikasyon.

Si Jehova nga Dios nag-aman sing kahilwayan sang katawhan paagi sa pagbayad sang gawad paagi kay Jesucristo. Apang labi pa ang nahimo sang Dios. Ginhatag niya ang pamatbat nga kamatayon kay Satanas nga Yawa, ang isa nga nagdul-ong sa katawhan sa sala. (Bugna 12:7-9) Sa dili madugay bilangguon ni Jehova inang isa nga nakasala kag sa ulihi himuon ang paghukom paagi sa ‘pagtagbong sa iya sa linaw nga kalayo kag asupre,’ nga nagasimbulo sa dayon nga kalaglagan. (Bugna 20:1-3, 7-10, 14) Paagi sa pagdula sining malaut nga espiritu nga tinuga kag paagi sa pagpadapat sang gawad, ang katawhan magaagom sing kahilwayan indi lamang gikan sa hugot nga pagpanguyapot sang sala kag kamatayon kundi gikan man sa impluwensia ni Satanas. Bangod kay nahilway na kag paagi sa pag-aplikar sing bug-os sang bili sang halad-gawad ni Cristo, ang matinumanon nga katawhan magauswag padulong sa tawhanon nga kahimpitan.

Ang Kahimusan sa Gawad kag Ikaw

Sang mahibaluan ang tuhoy sa halad-gawad ni Jesucristo, madamo sa Sidlangan ang nag-apresyar sing tudok sang ginhimo sang Dios para sa ila. Si Kazuo isa ka halimbawa. Ang iya kabuhi nahugod sa pagsimhot kag pagpahubog paagi sa thinner sang pintura. Sang nagamaneho sa idalom sang impluwensia sini, pirme niya naguba ang iya salakyan. Ang iya tatlo ka abyan naghikog sa tapos nila ginguba ang ila panglawas. Si Kazuo nakatilaw man hikog. Sang ulihi, nagsugod sia sa pagtuon sang Biblia. Natandog sang kamatuoran nga natun-an niya, namat-od sia nga tinluan ang iya kabuhi. Ginbatuan niya ang iya batasan sang pag-abuso sa iya lawas paagi sa thinner sang pintura, kag madamo sing balagbag. Nabudlayan sia bangod sang iya undanon nga handum kag sang handum nga himuon kon ano ang matarong. Malipayon gid sia nga nakapangamuyo sia sa Dios sing kapatawaran paagi sa bili sang halad-gawad ni Jesucristo! Paagi sa pagpangamuyo kag pagbulig sang Cristianong mga abyan, nadaug ni Kazuo ang iya bisyo kag nagaalagad karon kay Jehova subong isa ka malipayon nga ministro nga may matinlo nga konsiensia.

Nadumduman mo bala si Chisako, nga ginsambit sa pamuno sang naunang artikulo? Paagi sa pagtuon sa Biblia, nahangpan man niya ang mahigugmaon nga kahimusan tuhoy sa gawad. Natandog gid sia sang natun-an niya nga ginhatag sang Dios ang iya Anak agod hilwayon ang katawhan gikan sa sala. Gindedikar ni Chisako ang iya kabuhi kay Jehova. Bisan sa karon, sa edad nga 77, nagahinguyang sia sing mga 90 ka oras kada bulan sa pagsugid sa iban nahanungod sa daku nga gugma ni Jehova kag sa dibagay nga kaluoy nga ginapakita niya.

Ang gawad dapat man nga mangin importante sa imo. Paagi sa sini, ang Dios magabukas sang dalan padulong sa matuod nga kahilwayan sang katawhan—kahilwayan gikan sa sala kag kamatayon. Ang makalilipay nga palaabuton sang kabuhi nga dayon sa isa ka paraiso nga duta nagahulat sa unahan para sa mga nagabaton sang halad-gawad ni Jesucristo. Pakig-anguti palihog ang mga Saksi ni Jehova kag usisaa kon paano mo matigayon ang kahilwayan gikan sa sala kag kamatayon paagi sa mahigugmaon nga kahimusan sang gawad.

[Footnote]

[Ginkuhaan sang Laragway sa pahina 5]

Sa maayong kabubut-on sang Mainichi Shimbun