Dapat Kita Mangin Balaan sa Tanan nga Paggawi

1, 2. (a) Ano ang ginapaabot sa katawhan sang Dios sa ila paggawi? (b) Ano nga mga pamangkot ang sabton sa sini nga artikulo?

GINTUYTUYAN ni Jehova si apostol Pedro agod ipakita ang kaangtanan sang pagkabalaan nga ginpadaku sa libro sang Levitico sa kinahanglanon naton nga mangin balaan sa aton paggawi subong mga Cristiano. (Basaha ang 1 Pedro 1:14-16.) Ginapaabot sang “Isa nga Balaan,” si Jehova, nga ang mga hinaplas kag ang “iban nga mga karnero” magahimo sang ila bug-os nga masarangan nga mangin balaan sa tanan nila nga paggawi—indi lamang sa pila ka paggawi.​—Juan 10:16.

² Ang padayon nga pag-usisa sa bilidhon nga espirituwal nga mga impormasyon sa Levitico mapuslanon gid, kag ang pag-aplikar sang aton natun-an makabulig sa aton nga mapamatud-an nga balaan sa tanan naton nga paggawi. Binagbinagon naton ang mga pamangkot subong sang: Paano naton dapat tamdon ang pagkompromiso? Ano ang ginatudlo sa aton sang Levitico parte sa pagsakdag sa pagkasoberano ni Jehova? Ano ang matun-an naton parte sa pagdulot sing mga halad?

3, 4. (a) Ngaa indi dapat ikompromiso sang mga Cristiano ang mga kasuguan kag mga prinsipio sang Biblia? (b) Ngaa indi kita dapat magbalos ukon maghinakit?

³ Agod mapahamut-an naton si Jehova, dapat naton sundon sing maayo ang iya mga kasuguan kag prinsipio, nga wala gid nagabaton sing panimuot nga indi balaan kag nagakompromiso sa sini. Bisan pa wala na kita napaidalom sa Mosaikong Kasuguan, ang mga ginapatuman sini makabulig sa aton nga mahibaluan kon ano ang kalahamut-an kag indi sa panan-aw sang Dios. Halimbawa, ang mga Israelinhon ginsugo: “Dili ka magtimalus ukon magtago sing bisan anong dumut batok sa mga anak sang imo katawohan, kondi higugmaon mo ang imo isigkatawo subong sang imo kaugalingon: Ako amo ang GINOO.”​—Lev. 19:18.

⁴ Si Jehova nagapaabot nga likawan naton ang pagbalos, kag luyag niya nga indi kita maghinakit. (Roma 12:19) Kon balewalaon naton ang mga kasuguan kag mga prinsipio sang Dios, malipay ang Yawa, kag mahimo mapakahuy-an naton si Jehova. Bisan hungod nga ginasakit sang iban ang aton balatyagon, indi naton pagtugutan ang aton kaugalingon nga mangin suludlan sang paghinakit. Ginhatagan kita sang Dios sing pribilehiyo nga mangin “daga nga mga suludlan” nga nagaunod sing bahandi sang ministeryo. (2 Cor. 4:1, 7) Ang daw asido nga mga paghinakit indi nagakabagay sa sini nga mga suludlan!

 5. Ano ang matun-an naton sa kasaysayan parte kay Aaron kag sa kamatayon sang iya mga anak? (Tan-awa ang piktyur sa umpisa sini nga artikulo.)

⁵ Masubo gid ang natabo sa pamilya ni Aaron suno sa Levitico 10:1-11. Mahimo nga naglalain gid sila sang ginlamon sang kalayo gikan sa langit ang mga anak ni Aaron nga sanday Nadab kag Abihu sa tabernakulo. Pagtilaw gid sa pagtuo ni Aaron kag sa iya mga pamilya ang indi paglalaw sa ila napatay nga mga miembro sang pamilya! Ginapamatud-an mo bala ang imo kaugalingon nga balaan kon parte sa indi pagpakig-upod sa miembro sang imo pamilya ukon sa iban nga gin-disfellowship?​—Basaha ang 1 Corinto 5:11.

6, 7. (a) Kon nagadesisyon kon bala makigbahin sa kasal sa simbahan, ano nga mga punto ang dapat naton binagbinagon? (Tan-awa ang footnote.) (b) Paano naton ipaathag sa aton indi Saksi nga mga paryente ang aton panindugan parte sa kasal sa simbahan?

⁶ Mahimo indi kita makaatubang sing pagtilaw nga kaangay kay Aaron kag sa iya pamilya. Pero paano kon gin-imbitar kita nga magtambong kag makigbahin sa kasal sa simbahan sang paryente naton nga indi Saksi? Wala sing espesipiko nga sugo sa Kasulatan nga nagadumili sa aton nga magtambong, pero may mga prinsipio bala sa Biblia nga nadalahig sa paghimo sini nga desisyon?a

⁷ Mahimo matingala ang aton mga paryente nga indi Saksi sa aton determinasyon nga pamatud-an ang aton kaugalingon nga balaan sa sina nga sitwasyon. (1 Ped. 4:3, 4) Siempre, ginatinguhaan man naton nga indi sila maakig, pero mas maayo nga ipaathag naton ini sa ila sa mainayuhon apang prangka nga paagi. Mas maayo nga himuon naton ini antes sang okasyon. Puede naton sila mapasalamatan kag silingon nga nalipay gid kita kay gin-imbitar nila kita nga makigbahin sa kasal. Dayon mahimo kita magsiling nga gusto naton mangin malipayon sila sa ila espesyal nga adlaw kag indi naton luyag nga mahuy-an sila kag ang ila mga bisita bangod indi kita magpakigbahin sa relihioso nga seremonya. Isa ini ka paagi nga malikawan naton nga magkompromiso sang aton mga pagpati kag pagtuo.

 8. Paano ginapadaku sang libro sang Levitico ang pagkasoberano ni Jehova?

⁸ Ang libro sang Levitico nagapadaku sang pagkasoberano ni Jehova. Sobra sa 30 ka beses nga mabasa naton nga ang mga kasuguan sa Levitico naghalin kay Jehova. Ginbaton ini ni Moises, kag gintuman ang ginsugo ni Jehova sa iya. (Lev. 8:4, 5) Dapat man naton tumanon pirme kon ano ang ginapahimo sang aton Soberano, nga si Jehova. Para mahimo ini, ginabuligan kita sang organisasyon sang Dios. Pero mahimo nga matilawan ang aton pagtuo kon nagaisahanon kita, pareho kay Jesus sang ginsulay sia sa kahanayakan. (Luc. 4:1-13) Kon magkonsentrar kita sa pagkasoberano sang Dios kag magsalig sa iya, wala sing bisan sin-o nga magpakompromiso sa aton kag magsiod sa aton paagi sa kahadlok.​—Hulu. 29:25.

 9. Ngaa ginkaugtan sa tanan nga pungsod ang katawhan sang Dios?

⁹ Subong mga sumulunod sang Cristo kag mga Saksi ni Jehova, ginahingabot kita sa mga pungsod sa bilog nga kalibutan. Mapaabot ini, kay si Jesus nagsiling sa iya mga disipulo: “Itugyan kamo sang mga tawo sa kapipit-an kag patyon kamo, kag dumtan kamo sang tanan nga pungsod tungod sa akon ngalan.” (Mat. 24:9) Apang bisan pa sa sina nga kaakig, nagapadayon kita sa pagbantala sang Ginharian kag sa pagpamatuod nga balaan sa atubangan ni Jehova. Mga bunayag kita, may matinlo nga kabuhi, kag nagatuman sa mga kasuguan, pero ngaa ginakaugtan kita? (Roma 13:1-7) Bangod si Jehova ang aton Soberanong Ginuo! ‘Sia lamang’ ang ginahatagan naton sing sagrado nga pag-alagad kag wala gid kita nagakompromiso sa iya matarong nga mga kasuguan kag mga prinsipio.​—Mat. 4:10.

10. Ano ang natabo sang nagkompromiso ang isa ka utod?

¹⁰ “Indi [man kita] bahin sang kalibutan.” Gani, neutral kita parte sa mga inaway kag pulitika sa kalibutan. (Basaha ang Juan 15:18-21; Isaias 2:4.) Ang pila nga nagdedikar sa Dios nagkompromiso sang ila neutralidad. Madamo sa ila ang naghinulsol kag nakapasag-uli sang ila kaangtanan sa aton maluluy-on nga Amay sa langit. (Sal. 51:17) Ang iban wala naghinulsol. Halimbawa, sang Bug-os Kalibutan nga Inaway II, gintipon sang mga opisyal ang 160 naton ka kauturan nga indi makatarunganon nga ginbilanggo. Nagaedad sila sing 45 anyos paubos kag naghalin sa tanan nga prisuhan sa Hungary kag gindala sa isa ka banwa. Ginmanduan sila nga magserbisyo sa militar. Nanindugan ang matutom nga mga kauturan sa ila pagpangindi, pero siam sa ila ang nagpanumpa sa militar kag nagsuksok sang uniporme. Pagligad sang duha ka tuig, ang isa nga nagkompromiso nangin katapo sang firing squad nga naasayn sa pagpatay sa matutom nga mga Saksi. Lakip sa ila ang iya mismo nga utod! Pero sang ulihi, ang pamahog nga pagpatay wala madayon.

11, 12. Paano ang ginpatuman ni Jehova nga paagi sang paghalad sa dumaan nga Israel may kahulugan sa mga Cristiano subong?

¹¹ Suno sa Mosaikong Kasuguan, ang mga Israelinhon magadulot sang espesipiko nga mga halad. (Lev. 9:1-4, 15-21) Ang mga halad kinahanglan nga wala sing kasawayan bangod nagarepresentar ini sa himpit nga halad ni Jesus. Isa pa, sa kada dulot, ukon halad, may espesipiko nga pamaagi nga kinahanglan sundon. Halimbawa, binagbinaga ang ginapatuman sa iloy nga bag-o lang nagbata. Ang Levitico 12:6 nagsiling: “Kon matuman ang mga adlaw sang iya pagpaninlo, tungud sa anak nga lalaki ukon tungud sa anak nga babayi, magdala sia sa sacerdote sing cordero nga isa ka tuig nga sa halad-nga-sinonog, kag kuyabog nga salampati ukon tukmo nga sa halad-tungud-sa-sala sa ganhaan sang layanglayang nga tiliponan.” Espesipiko ang ginapatuman sang Dios, pero ang iya pagkamahigugmaon kag pagkamakatarunganon maathag nga makita sa Kasuguan. Kon indi makasarang ang iloy sang isa ka karnero, mahimo sia magdulot sang duha ka tukmo ukon kuyabog nga salampati. (Lev. 12:8) Bisan pa imol, ini nga sumilimba ginpalangga kag gin-apresyar pareho sang nagadulot sing mas malahalon. Ano ang aton matun-an sa sini?

¹² Ginpalig-on ni apostol Pablo ang mga masigkatumuluo nga magdulot sa Dios sing “halad sang pagdayaw.” (Heb. 13:15) Ang aton mga bibig dapat dayag nga magpahayag sang balaan nga ngalan ni Jehova. Ang apa nga mga kauturan nagagamit sing sign language para mahatag ina nga pagdayaw sa Dios. Ang mga Cristiano nga indi makagua sa ila balay nagadayaw sa iya paagi sa pagpanaksi sa mga sulat, pagpanaksi sa telepono, kag pagpanaksi sa mga nagaatipan kag mga nagabisita sa ila. Ang aton halad sang pagdayaw​—ang pagdayaw kay Jehova paagi sa pagpahibalo sang iya ngalan kag pagbantala sang maayong balita—​nagadepende sa aton panglawas kag ikasarang. Pero dapat amo ini ang aton pinakamaayo.​—Roma 12:1; 2 Tim. 2:15.

13. Ngaa dapat naton ireport ang aton pag-alagad sa latagon?

¹³ Kinabubut-on naton nga ginahatag sa Dios ang aton personal nga mga halad sang pagdayaw bangod ginahigugma naton sia. (Mat. 22:37, 38) Pero ginapangabay kita nga ireport ang aton nahimuan sa ministeryo. Gani, ano dapat ang aton pagtamod sa sini nga kahimusan? Ang aton ginareport kada bulan naangot sa aton diosnon nga debosyon. (2 Ped. 1:7) Siempre, indi kita dapat magbatyag nga ginpilit kita sa paghinguyang sing madamo nga oras sa ministeryo agod lang makahatag sing mas mataas nga report sa pagpakigbahin sa latagon. Amo ini ang rason kon ngaa ang manugbantala sang Ginharian nga yara sa nursing home ukon indi na makasarang mahimo magreport sing 15 minutos imbes nga inoras. Ginaapresyar ni Jehova ina nga mga minuto subong pinakamaayo nga dulot sang manugbantala kag subong ekspresyon sang Iya gugma kag apresasyon sa indi matupungan nga pribilehiyo sa pag-alagad subong Iya mga Saksi. Pareho sang mga Israelinhon sadto nga indi makasarang sa pagdulot sang mas malahalon nga mga halad, ang hamili nga mga alagad ni Jehova nga may mga limitasyon makahatag gihapon sang ila report. Kag ang aton indibiduwal nga mga report malakip sa kabilugan nga report sa bilog nga kalibutan, nga nagabulig sa organisasyon para makaplano sing abanse sa palaabuton nga mga hilikuton sa pagbantala. Gani, mabug-at gid bala ang ginapangabay sa aton nga magreport?

14. Ngaa dapat naton usisaon ang aton mga kinabatasan sa pagtuon?

¹⁴ Sa tapos mabinagbinag ang pila ka espirituwal nga bahandi gikan sa Levitico, ayhan maghunahuna ka, ‘Mas nahangpan ko na karon ang mga rason kon ngaa ini nga libro ginlakip sa Pulong sang Dios.’ (2 Tim. 3:16) Mas determinado ka na karon nga mangin balaan, indi lang bangod ginapatuman ini ni Jehova kundi bangod takus sia sang imo panikasog nga pahamut-an sia. Ayhan ang imo natun-an sa sining duha ka artikulo parte sa Levitico nagpabaskog sang imo handum nga tun-an pa gid ang bug-os nga Kasulatan. (Basaha ang Hulubaton 2:1-5.) Usisaa sing maayo ang imo mga kinabatasan sa pagtuon. Pat-od nga gusto mo gid nga batunon ni Jehova ang imo mga halad sang pagdayaw. Ginatugutan mo bala ang mga programa sa telebisyon, video games, sports, ukon mga kalingawan nga magtublag sa imo kag magpugong sa imo espirituwal nga pag-uswag? Kon amo, mas maayo nga pamalandungan mo ang pila sa ginsiling ni apostol Pablo nga narekord sa libro sang Hebreo.

15, 16. Ngaa prangka gid si Pablo sang nagsulat sia sa Hebreo nga mga Cristiano?

¹⁵ Prangka gid si Pablo sang nagsulat sia sa iya masigka-Hebreo nga mga Cristiano. (Basaha ang Hebreo 5:7, 11-14.) Direkta sila nga ginhambalan sang apostol nga “nangin mahinay” sila sa ila pagpamati. Ngaa ginprangka sila ni Pablo? Ginpakita niya ang gugma kag kabalaka ni Jehova sa mga Cristiano nga nagapanikasog nga maluwas paagi sa espirituwal nga gatas. Importante ang paghibalo sa panguna nga mga doktrina sang Cristianismo. Pero kinahanglan “ang matig-a nga kalan-on” para mag-uswag sa espirituwal nga pagkahamtong subong Cristiano.

¹⁶ Imbes mangin manunudlo na sa iban, ang mga Hebreo kinahanglan pa tudluan. Ngaa? Bangod wala sila nagkaon sang “matig-a nga kalan-on.” Pamangkuta ang imo kaugalingon: ‘Husto bala ang akon pagtamod sa matig-a nga espirituwal nga kalan-on? Nagakaon bala ako sini? Ukon wala na bala ako nagapangamuyo kag nagatuon sing maayo sa Biblia? Kon amo, mahimo bala nga may problema ako sa akon mga kinabatasan sa pagtuon?’ Indi lang nga bantalaan naton ang mga tawo kundi tudluan naton sila kag himuon nga mga disipulo.​—Mat. 28:19, 20.

17, 18. (a) Ngaa dapat regular kita nga magkaon sang matig-a nga espirituwal nga kalan-on? (b) Parte sa Cristianong mga miting, paano naton mahimo tamdon ang pag-inom sing alkoholiko nga mga ilimnon?

¹⁷ Mahimo nga madamo sa aton ang nabudlayan sa pagtuon sing Biblia. Siempre, wala ginapakonsiensia ni Jehova ang iya katawhan para pahulagon sila nga magtuon. Madugay na kita nga nagdedikar kay Jehova ukon bag-o lang, dapat padayon kita nga magkaon sing matig-a nga espirituwal nga kalan-on. Importante ini kon gusto naton mangin balaan.

¹⁸ Para mangin balaan, dapat naton usisaon sing maayo ang Kasulatan kag himuon ang ginapangabay sang Dios sa aton. Binagbinaga ang mga anak ni Aaron nga sanday Nadab kag Abihu, nga ginpatay bangod nagdulot sila sing “kalayo nga dibalaan,” ayhan samtang hubog. (Lev. 10:1, 2) Talupangda kon ano ang ginsiling sang Dios kay Aaron. (Basaha ang Levitico 10:8-11.) Buot bala silingon sini nga dapat indi kita mag-inom sing bisan ano nga alkoholiko nga ilimnon antes magtambong sa Cristianong mga miting? Binagbinaga ini nga mga punto: Wala kita napaidalom sa Kasuguan. (Roma 10:4) Sa pila ka lugar, ang aton mga masigkatumuluo nagainom sing alkoholiko nga ilimnon sing haganhagan sa tion sang pagkaon antes magtambong sa mga miting. Apat ka kopa sang alak ang gingamit sa tion sang Paskua. Sang ginsugdan ang Memoryal, ginpainom ni Jesus ang iya mga apostoles sing alak nga nagrepresentar sang iya dugo. (Mat. 26:27) Ginapakamalaut sang Biblia ang pag-inom sing madamo kag ang pagpahubog. (1 Cor. 6:10; 1 Tim. 3:8) Kag bangod sang ila konsiensia, madamo nga Cristiano ang mahimo indi gid mag-inom sing alkoholiko nga mga ilimnon antes makigbahin sa bisan ano nga sahi sang sagrado nga pag-alagad. Pero, lainlain ang kahimtangan sa tagsa ka pungsod, kag ang importante para sa mga Cristiano amo ang paghibalo sang “katuhayan [sang] balaan kag dibalaan” agod makagawi sila nga balaan nga nagapahamuot sa Dios.

19. (a) Ano ang dapat naton hunahunaon pirme parte sa aton pangpamilya nga pagsimba kag personal nga pagtuon? (b) Ano ang determinado mo nga himuon parte sa pagpamatuod sang imo kaugalingon nga balaan?

¹⁹ Madamo pa nga espirituwal nga bahandi ang imo madiskobrehan kon usisaon mo ini sa Pulong sang Dios. Panginpusli ang matigayon nga mga kagamitan sa pagpanalawsaw para mapauswag ang inyo pangpamilya nga pagsimba kag personal nga pagtuon. Pauswaga ang imo ihibalo parte kay Jehova kag sa iya mga katuyuan. Magpalapit pa gid sa iya. (Sant. 4:8) Mangamuyo sa Dios pareho sang ginhimo sang salmista nga nag-amba: “Buksi ang akon mga mata, agud nga makakita ako sing makatilingala nga mga butang gikan sa imo kasogoan.” (Sal. 119:18) Indi gid pag-ikompromiso ang mga kasuguan kag mga prinsipio sang Biblia. Mangin handa sa pagtuman sa supremo nga kasuguan sang “Isa nga Balaan,” si Jehova, kag mangin makugi sa pagpakigbahin sa “balaan nga hilikuton nga pagbantala sing maayong balita sang Dios.” (1 Ped. 1:15; Roma 15:16) Pamatud-i ang imo kaugalingon nga balaan sa sining mabudlay nga katapusan nga mga adlaw. Kabay pa nga tanan kita mangin balaan sa aton paggawi, sa amo masakdag naton ang pagkasoberano sang aton balaan nga Dios, si Jehova.