Indi Magdulog sa Dalaganon Para sa Kabuhi!

“Magdalagan kita nga may pagbatas sang dalaganon nga ginabutang sa aton atubang.”—HEBREO 12:⁠1.

1, 2. Anong makahalawathawat nga mga hitabo ang nagpakunyag sa mga alagad ni Jehova sa sining katapusan nga mga adlaw?

NAGAKABUHI kita sa makahalawathawat kag mabudlay nga mga tion. Kapin sa 80 ka tuig ang nagligad, sang 1914, ginpalingkod si Jesus subong Hari sa langitnon nga Ginharian sang Dios. Nagsugod ang “adlaw sang Ginuo” kag amo man ang “tion sang katapusan” sining sistema sang mga butang. (Bugna 1:​10; Daniel 12:9) Sugod sadto ang dalaganon para sa kabuhi sang mga Cristiano dugang pa nga nangin hilingagawon. Mabaskog nga nagapanikasog ang mga alagad sang Dios agod makadungan sa langitnon nga kangga ni Jehova, ang iya langitnon nga organisasyon, nga padayon nga nagahulag sa pagtuman sang mga katuyuan ni Jehova.​—⁠Ezequiel 1:​4-28; 1 Corinto 9:⁠24.

² Nakasapo bala ang katawhan sang Dios sing kalipay samtang ‘nagadalagan sila sa dalaganon’ padulong sa kabuhi nga walay katapusan? Huo, sa pagkamatuod! Nakunyag sila nga makita ang pagtipon sa mga nagkalabilin sang kauturan ni Jesus, kag nalipay sila sa paghibalo nga ang katapusan nga pagpat-in sa mga nagkalabilin sang 144,000 malapit na matapos. (Bugna 7:​3, 4) Dugang pa, nakunyag sila sa paghantop nga ang tinangdo nga Hari ni Jehova nagahanda na sang iya galab agod anihon “ang alanyon sang duta.” (Bugna 14:​15, 16) Kag daku gid ini nga alanyon! (Mateo 9:37) Tubtob sa karon, kapin sa lima ka milyon ka kalag ang natipon na​—⁠“ang dakung kadam-an nga wala sing tawo nga makaisip, gikan sa tanan nga pungsod, kag mga tribo kag katawhan kag mga hambal.” (Bugna 7:9) Wala sing makapakot kon daw ano gid ka daku ina nga kadam-an sa ulihi, kay wala sing tawo nga makaisip sini.

3. Walay sapayan sang ano nga dapat kita pirme magtinguha sa pagpalambo sing malipayon nga espiritu?

³ Matuod, ginatinguhaan ni Satanas nga masandad kita ukon maghinay samtang madasig kita nga nagadalagan sa dalaganon. (Bugna 12:17) Kag indi nangin mahapos ang pagdalagan bangod sang mga inaway, mga tiggulutom, kag mga pesti, kag iban pa nga sahi sang mga kabudlayan nga nagatanda sa tion sang katapusan. (Mateo 24:​3-9; Lucas 21:​11; 2 Timoteo 3:​1-5) Sa gihapon, ang aton tagipusuon nagalukso sa kalipay samtang nagahingapos ang dalaganon. Nagapanikasog kita nga ipakita ang espiritu nga ginpalig-on ni Pablo sa mga masigka-Cristiano sang iya adlaw nga huptan nila: “Magkalipay kamo pirme sa Ginuo. Sa liwat magasiling ako, Magkalipay!”​—⁠Filipos 4:⁠4.

4. Ano nga sahi sang espiritu ang ginpakita sang taga-Filipos nga mga Cristiano?

⁴ Wala sing duhaduha nga ang mga Cristiano nga ginsulatan anay ni Pablo sadtong mga pulong nagakalipay sa ila pagtuo, kay si Pablo nagsiling sa ila: “Magpadayon kamo sa pagkalipay sa Ginuo.” (Filipos 3:1) Ang mga taga-Filipos isa ka maalwan, mahigugmaon nga kongregasyon nga nagaalagad anay sing makugihon kag mapagsik. (Filipos 1:​3-5; 4:​10, 14-20) Apang indi tanan sang unang-siglo nga mga Cristiano may subong sadto nga espiritu. Halimbawa, ginkabalak-an ang pila sang Judiyong mga Cristiano anay nga ginpadalhan ni Pablo sing tulun-an sang mga Hebreo.

“Magpakita sing Kapin Pa sa Kinaandan nga Pagtalupangod”

5. (a) Ano ang espiritu sang Hebreong mga Cristiano sang maporma ang unang Cristianong kongregasyon? (b) Ilaragway ang espiritu sang pila ka Hebreong Cristiano sang mga 60 C.⁠E.

⁵ Ang unang Cristianong kongregasyon sa maragtas sang kalibutan ginatapuan anay sang kinaugali nga mga Judiyo kag mga proselita kag gintukod yadto sa Jerusalem sang 33 C.⁠E. Ano ang espiritu sini sadto? Dapat lamang basahon sang isa ang una nga mga kapitulo sang tulun-an sang Mga Binuhatan agod mahibaluan ang kapagsik kag kalipay sini, walay sapayan sang paghingabot. (Binuhatan 2:​44-47; 4:​32-34; 5:​41; 6:7) Apang, sa pagligad sang mga tinuig, nagbag-o ang kahimtangan, kag madamo nga Judiyong mga Cristiano ang naghinay sa dalaganon para sa kabuhi. Amo sini ang ginsiling sang isa ka libro tuhoy sa ila kahimtangan sang mga 60 C.⁠E.: “Isa ka kahimtangan nga uyaya kag natak-an na, wala matuman ang ginapaabot, napalantang ang ginalauman, napaslawan bangod wala magtinguha kag halos wala na nagapati sa mga nagakatabo sa adlaw-adlaw. Mga Cristiano sila apang diutay lamang ang apresasyon sa himaya sang langitnon nga pagtawag sa ila.” Paano ini natabo sa hinaplas nga mga Cristiano sadto? Ang pagbinagbinag sa mga bahin sang sulat ni Pablo sa mga Hebreo (ginsulat sang mga 61 C.⁠E.) nagabulig sa pagsabat sina nga pamangkot. Ina nga pagbinagbinag magabulig sa aton tanan karon nga malikawan ang pagkahulog sa kaanggid nga maluya nga kahimtangan sa espirituwal.

6. Ano ang pila ka kinatuhayan sang pagsimba sa idalom sang Kasuguan ni Moises kag sang pagsimba nga napasad sa pagtuo kay Jesucristo?

⁶ Ang Hebreong mga Cristiano nagguwa gikan sa Judaismo, isa ka sistema nga nagpangangkon nga nagatuman sa Kasuguan nga ginhatag ni Jehova paagi kay Moises. Yadtong Kasuguan daw padayon nga nagbalani sa madamong Judiyong mga Cristiano, ayhan bangod sa sulod sang madamong siglo amo lamang ini ang paagi sa pagpalapit kay Jehova, kag isa ini ka makadalayaw nga sistema sang pagsimba, nga may mga saserdote, regular nga mga halad, kag isa ka templo sa Jerusalem nga bantog sa kalibutan. Ang Cristianismo tuhay. Nagakinahanglan ini sing espirituwal nga pagtamod, kaangay sang kay Moises, nga “nagtan-aw sing maayo sa bayad nga [palaabuton pa nga] padya” kag “nagpadayon nga malig-on nga subong sang nakakita sa Isa nga dimakita.” (Hebreo 11:​26, 27) Madamong Judiyong mga Cristiano ang mahimo gid nga kulang sing subong sini nga espirituwal nga pagtamod. Nagkimpangkimpang sila sa baylo nga magdalagan nga may katuyuan.

7. Paano ang sistema nga aton ginguwaan makaapektar sa aton pagdalagan sa dalaganon para sa kabuhi?

⁷ May kaanggid man bala sini nga kahimtangan karon? Indi mapanghiwala nga ang mga kahimtangan lain na karon. Sa gihapon, ang mga Cristiano nagaguwa gikan sa isa ka sistema sang mga butang nga madamo sing ginapabugal. Ang kalibutan nagatanyag sing makakulunyag nga mga kahigayunan, apang sa amo man nga tion, nagadala ini sing mabug-at nga mga salabton sa katawhan. Dugang pa, ang madamo sa aton nagapuyo sa kadutaan diin kinaandan na ang pagkamaduhaduhaon kag diin ang mga tawo makagod kag maiyaiyahon. Kon tugutan naton ang aton kaugalingon nga maimpluwensiahan sina nga sistema, ang ‘mga mata sang aton tagipusuon’ madali magdulom. (Efeso 1:18) Paano kita makadalagan sing maayo sa dalaganon para sa kabuhi kon indi na naton makita sing maathag kon diin kita nagapadulong?

8. Sa anong pila ka paagi nga ang Cristianismo labaw sangsa pagsimba sa idalom sang Kasuguan?

⁸ Agod mapahulag ang Judiyong mga Cristiano, ginpahanumdom sila ni Pablo nga ang Cristianong sistema labaw sa Mosaikong Kasuguan. Matuod, sang ang pungsod sang undanon nga Israel amo anay ang katawhan ni Jehova sa idalom sang Kasuguan, nakighambal sa sini si Jehova paagi sa inspirado nga mga manalagna. Apang, siling ni Pablo, sia sa karon nagapakighambal “paagi sa Anak, nga gintangdo niya nga manunubli sang tanan nga butang, kag paagi sa iya ginhimo niya ang mga sistema sang mga butang.” (Hebreo 1:2) Dugang pa, mas halangdon si Jesus sangsa tanan nga mga hari sa linya ni David, ang iya “mga kaupod.” Mas mataas pa gani sia sangsa mga anghel.​—⁠Hebreo 1:​5, 6, 9.

9. Ngaa kita, kaangay sang Judiyong mga Cristiano sang adlaw ni Pablo, dapat magpakita sing “kapin pa sa kinaandan nga pagtalupangod” sa ginasiling ni Jehova?

⁹ Busa, ginlaygayan ni Pablo ang Judiyong mga Cristiano: “Kinahanglan kita magpakita sing kapin pa sa kinaandan nga pagtalupangod sa mga butang nga aton nabatian, agod nga bisan san-o indi kita maanod palayo.” (Hebreo 2:1) Bisan pa ang pagtuon tuhoy kay Cristo isa anay ka dalayawon nga pagpakamaayo, kapin pa ang kinahanglanon. Dapat nila talupangdon sing maayo ang Pulong sang Dios agod mabatuan nila ang impluwensia sang Judiyong kalibutan sa palibot nila. Dapat man kita magpakita sing “kapin pa sa kinaandan nga pagtalupangod” sa ginasiling ni Jehova bangod sang dalayon nga propaganda nga aton ginaatubang sa sining kalibutan. Nagakahulugan ini nga magpalambo kita sing maayong pamatasan sa pagtuon kag maghupot sing maayo nga iskedyul para sa pagbasa sing Biblia. Subong sang ginsiling ni Pablo sang ulihi sa iya sulat sa mga Hebreo, nagakahulugan man ini nga mangin regular kita sa pagtambong sa mga miting kag sa pagwali sang aton pagtuo sa iban. (Hebreo 10:​23-25) Ina nga hilikuton magabulig sa aton sa pagpabilin nga alisto sa espirituwal agod nga indi naton malipatan ang aton matahom nga paglaum. Kon pun-on naton ang aton hunahuna sing mga painuino ni Jehova, indi kita madaug ukon mabuntol sang bisan ano nga mahimo sa aton sining kalibutan.​—⁠Salmo 1:​1-3; Hulubaton 3:​1-6.

“Padayon Kamo nga Maglinaygayay”

10. (a) Ano ang mahimo matabo sa isa nga wala nagapakita sing kapin pa sa kinaandan nga pagtalupangod sa Pulong ni Jehova? (b) Paano kita ‘padayon nga makalinaygayay’?

¹⁰ Kon indi naton pagtalupangdon sing maayo ang espirituwal nga mga butang, mahimo nga ang mga saad sang Dios daw indi mangin matuod-tuod sa aton. Natabo gani ini sang unang siglo sang ang kongregasyon nahuman lamang sang hinaplas nga mga Cristiano kag buhi pa sadto ang pila sang mga apostoles. Ginpaandaman ni Pablo ang mga Hebreo: “Mag-andam kamo, mga kauturan, basi tubuan ang sin-o man sa inyo sing malaut nga tagipusuon nga wala sing pagtuo paagi sa pagpalayo gikan sa buhi nga Dios; apang padayon kamo nga maglinaygayay sa adlaw-adlaw, samtang matawag pa ini nga ‘Karon,’ kay basi ang sin-o man sa inyo mapatig-a sang malimbungon nga gahom sang sala.” (Hebreo 3:​12, 13) Ang pagsiling ni Pablo nga “mag-andam” nagapadaku sang kinahanglanon nga mangin alisto. May katalagman! Ang pagkawalay pagtuo​—⁠“ang sala”​—⁠mahimo magtubo sa aton tagipusuon, kag mahimo kita magpalayo sa Dios sa baylo nga magpalapit sa iya. (Santiago 4:8) Ginapahanumdom kita ni Pablo nga ‘magpadayon kita sa paglinaygayay.’ Kinahanglan naton ang kainit sang pagpakig-upod sang mga kauturan. “Ang nagapain sang iya kaugalingon nagapangita sang iya makagod nga handum; pamatukan niya ang tanan praktikal nga kaalam.” (Hulubaton 18:1) Ang pagkinahanglan sa sina nga pagpakig-upod nagapahulag sa mga Cristiano karon nga mangin regular sa pagtambong sa mga miting sa kongregasyon, sa mga asambleya, kag sa mga kombension.

11, 12. Ngaa indi kita dapat mangin kontento na sa paghibalo sang sadsaran lamang nga Cristianong mga doktrina?

¹¹ Sa iya sulat sang ulihi, naghatag si Pablo sining dugang pa mapuslanon nga laygay: “Apang bisan pa dapat na kamo kuntani magmanunudlo bangod sang tion, nagakinahanglan kamo liwat nga may magtudlo sa inyo halin sa pamuno sang nahauna nga mga butang sang sagrado nga mga kapahayagan sang Dios; kag nangin subong kamo sang nagakinahanglan sing gatas, indi sing matig-a nga pagkaon. . . . Ang matig-a nga pagkaon para sa mga tawo nga hamtong, sa ila nga paagi sa paggamit nahanas ang ila ikasarang sa paghantop nga makilala ang husto kag sayop.” (Hebreo 5:​12-14) Mahimo nga wala mahanas sang pila ka Judiyong mga Cristiano ang ila paghangop. Nangin mahinay sila sa pagbaton sa dugang pa nga kasanagan tuhoy sa Kasuguan kag sirkumsisyon. (Binuhatan 15:​27-29; Galacia 2:​11-14; 6:​12, 13) Mahimo nga ginpabilihan pa gihapon sang iban ang tradisyonal nga mga buhat subong sang semanal nga Adlaw nga Inugpahuway kag sang balaan nga Adlaw sang Katumbasan kada tuig.​—⁠Colosas 2:​16, 17; Hebreo 9:​1-14.

¹² Busa, si Pablo nagsiling: “Karon nga ginbiyaan na naton ang nahauna nga doktrina tuhoy kay Cristo, mag-uswag kita padulong sa pagkahamtong.” (Hebreo 6:1) Ang manugdalagan nga nagabantay sang iya ginakaon may mas mabakod nga resistensia sa malawig kag mabudlay gid nga palumbaanay. Sing kaanggid, ang Cristiano nga nagabantay sang iya espirituwal nga pagkaon​—⁠indi kontento lamang sa sadsaran, ‘pangunang mga doktrina’​—⁠mas may resistensia nga makapadayon sa dalaganon kag makatapos sini. (Ipaanggid ang 2 Timoteo 4:⁠7.) Nagakahulugan ini nga palambuon naton ang interes sa “kasangkaron kag kalabaon kag kataason kag kadalumon” sang kamatuoran, sa amo magauswag kita padulong sa pagkahamtong.​—⁠Efeso 3:⁠18.

“Kinahanglan Kamo Magbatas”

13. Paano ginpakita sang Hebreong mga Cristiano ang ila pagtuo sang una?

¹³ Pagkatapos gid sang Pentecostes 33 C.⁠E., nagpabilin nga malig-on ang Judiyong mga Cristiano walay sapayan sang mapintas nga pagpamatok. (Binuhatan 8:1) Ayhan ginahunahuna ini ni Pablo sang magsulat sia: “Padayon nga panumduma ninyo ang mga adlaw sang una diin, sa tapos na kamo masanagan, nagbatas kamo sing daku nga pagpakig-away sa idalom sang mga pag-antos.” (Hebreo 10:32) Ginpamatud-an sang ila matutom nga pagbatas ang ila gugma sa Dios kag naghatag ini sa ila sing kahilwayan sa paghambal sa atubangan niya. (1 Juan 4:17) Ginlaygayan sila ni Pablo nga indi pag-ihaboy yadtong kahilwayan sa paghambal bangod sang pagkawalay pagtuo. Ginpalig-on niya sila: “Kinahanglan kamo magbatas, agod nga, sa tapos ninyo mahimo ang kabubut-on sang Dios, mahimo ninyo mabaton ang katumanan sang saad. Kay ‘sa madali na lamang,’ kag ‘sia nga manug-abot magaabot kag indi maglantang.’ ”​—⁠Hebreo 10:​35-37.

14. Anong mga katunayan ang dapat makabulig sa aton sa pagbatas bisan sa tapos sang madamong tinuig nga pag-alagad kay Jehova?

¹⁴ Kamusta naman kita sa karon? Ang kalabanan sa aton makugi sang una naton matun-an ang Cristianong kamatuoran. Yara pa bala sa aton ina nga kakugi? Ukon aton na bala ‘ginbiyaan ang aton nahaunang gugma’? (Bugna 2:4) Nagbugnaw na bala kita, ayhan nalugaw-an diutay ukon tinak-an sa paghulat sa Armagedon? Apang, magdulog kag binagbinaga. Ang kamatuoran makadalayaw gihapon tubtob karon. Si Jesus gihapon ang aton langitnon nga Hari. Ginalauman gihapon naton ang kabuhi nga walay katapusan sa paraiso nga duta, kag yara pa gihapon ang aton kaangtanan kay Jehova. Kag indi gid pagkalimti: “Sia nga manug-abot magaabot kag indi maglantang.”

15. Kaangay ni Jesus, paano ang pila ka Cristiano nagbatas sing mabaskog nga paghingabot?

¹⁵ Busa, nagakaigo gid ang mga pulong ni Pablo nga narekord sa Hebreo 12:​1, 2: “Isikway ta man ang tagsa ka kabug-atan kag ang sala [pagkawalay pagtuo] nga madali magtapik sa aton, kag magdalagan kita nga may pagbatas sang dalaganon nga ginabutang sa aton atubang, samtang nagatulok kita sing maayo sa Pangulo nga Ahente kag Manughimpit sang aton pagtuo, si Jesus. Tungod sa kalipay nga ginbutang sa iya atubang nagbatas sia sing usok sang pag-antos, nga nagatamay sang kahuluy-an, kag naglingkod sa tuo nga kamot sang trono sang Dios.” Madamo nga butang ang ginbatas sang mga alagad sang Dios sa sining katapusan nga mga adlaw. Kaangay ni Jesus, nga nagmatutom tubtob sa masakit nga kamatayon, ang iban sang aton kauturan nga mga lalaki kag mga babayi matutom nga nagbatas sing pinakamabudlay nga paghingabot​—⁠ginbilanggo sa mga kampo konsentrasyon, ginpaantos, ginlugos, kag ginpatay pa gani. (1 Pedro 2:21) Wala bala nagadaku ang aton gugma sa ila kon ginabinagbinag naton ang ila integridad?

16, 17. (a) Anong mga hangkat sa ila pagtuo ang ginapamatukan sang kalabanan nga Cristiano? (b) Ang pagdumdom sa ano magabulig sa aton sa pagdalagan sing padayon sa dalaganon para sa kabuhi?

¹⁶ Apang, ang dugang pa nga ginsiling ni Pablo naaplikar sa kalabanan: “Sa inyo pagpakig-away batok sa sina nga sala wala pa gid kamo makapakigsumpong tubtob sa dugo.” (Hebreo 12:4) Walay sapayan, ang dalanon sang kamatuoran indi nangin mahapos para sa bisan sin-o sa aton sa sining sistema. Ang iban ginaluyahan sing buot bangod sang “nagapamatok nga hambal sang mga makasasala” sa sekular nga trabaho ukon sa eskwelahan, bangod sang pagbatas sa mga yubit ukon pagpamatok sa tentasyon nga magpakasala. (Hebreo 12:3) Ang mabaskog nga mga pagsulay amat-amat nga nagpaluya sa determinasyon sang iban nga huptan ang mataas nga mga talaksan sang Dios. (Hebreo 13:​4, 5) Naapektuhan sang mga apostata ang espirituwal nga pagkabalanse sang pila nga nagapamati sa ila makahililo nga propaganda. (Hebreo 13:9) Ang indi pagsahuay sang mga personalidad nagdula sang kalipay sang iban. Ang sobra nga pagkabuyo sa mga kalingawan kag mga paglipaylipay nagpaluya sa pila ka Cristiano. Kag ang kalabanan gid ginabug-atan sa mga problema sang pagkabuhi sa sining sistema sang mga butang.

¹⁷ Matuod, wala sing isa sa sining mga kahimtangan ang makabig nga ‘pagpakigsumpong tubtob sa dugo.’ Kag mahimo nga ang kabangdanan sang pila sini amo ang aton mismo sayop nga mga desisyon. Apang ini tanan isa ka hangkat sa aton pagtuo. Amo kon ngaa dapat naton pirme dumdumon ang makadalayaw nga huwaran ni Jesus sa pagbatas. Kabay nga indi gid naton pagkalipatan kon daw ano katahom ang aton paglaum. Kabay nga indi gid naton madula ang aton malig-on nga pagpati nga si Jehova “manugpadya sa mga hanuot nga nagapangita sa iya.” (Hebreo 11:6) Nian, makatigayon kita sing espirituwal nga kusog agod padayon nga makadalagan kita sa dalaganon para sa kabuhi.

Makabatas Kita

18, 19. Anong maragtason nga mga hitabo ang nagapahangop nga ang Hebreong mga Cristiano sa Jerusalem namati sa inspirado nga laygay ni Pablo?

¹⁸ Ano ang reaksion sang Judiyong mga Cristiano sa sulat ni Pablo? Mga anom ka tuig sa tapos masulat ang sulat para sa mga Hebreo, ang Judea may pagpakig-away. Sang 66 C.⁠E., ginlikupan sang Romanong hangaway ang Jerusalem, sa amo natuman ang mga pulong ni Jesus: “Kon makita ninyo ang Jerusalem nga nalikupan sang nagkampo nga mga hangaway, nian hibalua ninyo nga ang paghapay sa iya malapit na.” (Lucas 21:⁠20) Apang, para sa kaayuhan sang mga Cristiano nga natabuan nga didto sa Jerusalem sa amo nga tion, si Jesus nagsiling: “Nian ang mga sa Judea magpalagyo sa mga bukid, kag ang mga sa sulod niya magguwa, kag ang mga sa kaumhan dili magsulod sa iya.” (Lucas 21:21) Busa, ang pagpakig-away batok sa Roma nangin pagtilaw: Biyaan bala sadtong Judiyong mga Cristiano ang Jerusalem, ang sentro sang Judiyong pagsimba kag nahamtangan sang mahimayaon nga templo?

¹⁹ Sa hinali, kag sa wala mahibal-i nga rason, nag-isol ang mga Romano. Mahimo gid nga gintamod ini sang relihioso nga mga Judiyo subong pamatuod nga ginaamligan sang Dios ang ila balaan nga siudad. Kamusta naman ang mga Cristiano? Ang maragtas nagasugid sa aton nga nalagyo sila. Nian, sang 70 C.⁠E., nagbalik ang mga Romano kag ginlaglag sing bug-os ang Jerusalem nga nagresulta sa pagkapatay sang madamo. Ang “adlaw ni Jehova” nga gintagna ni Joel nag-abot sa Jerusalem. Apang wala na didto ang matutom nga mga Cristiano. ‘Naluwas’ sila.​—⁠Joel 2:​30-32; Binuhatan 2:​16-21.

20. Ang paghibalo nga malapit na ang dakung “adlaw ni Jehova” dapat magpahulag sa aton sa anong mga paagi?

²⁰ Sa karon, nahibaluan naton nga may isa pa ka “adlaw ni Jehova” nga sa indi madugay magaapektar sa sining bug-os nga sistema sang mga butang. (Joel 3:​12-14) Wala kita makahibalo kon san-o maabot ina nga adlaw. Apang ginapasalig kita sang Pulong sang Dios nga maabot gid ini! Si Jehova nagsiling nga indi ini maglantang. (Habacuc 2:​3; 2 Pedro 3:​9, 10) Busa, “magpakita [kita] sing kapin pa sa kinaandan nga pagtalupangod sa mga butang nga nabatian.” Likawi ang pagkawalay pagtuo, “ang sala nga nagatapik sa aton.” Mangin determinado nga magbatas tubtob kinahanglanon. Dumduma, ang daku tulad-kangga nga langitnon nga organisasyon ni Jehova nagahulag. Tumanon sini ang iya katuyuan. Gani kabay nga magpadayon kita tanan sa pagdalagan kag indi magdulog sa dalaganon para sa kabuhi!

Nadumduman Mo Bala?

◻ Ang pagpamati sa anong pagpalig-on ni Pablo sa mga taga-Filipos magabulig sa aton sa pagbatas sa dalaganon para sa kabuhi?

◻ Ano ang magabulig sa aton agod pamatukan ang huyog sining kalibutan sa pagtublag sa aton?

◻ Paano kita makabuligay agod makabatas sa dalaganon?

◻ Ano ang pila ka butang nga makapahinay sa isa ka Cristiano?

◻ Paano ang huwaran ni Jesus makabulig sa aton sa pagbatas?

[Retrato sa pahina 8, 9]

Kaangay sang mga manugdalagan, indi gid dapat pagtugutan sang mga Cristiano ang bisan anong butang nga tublagon sila

[Retrato sa pahina 10]

Wala sing makapugong sa dakung langitnon nga kangga ni Jehova gikan sa pagtuman sang katuyuan sang Dios