Ipakita ang Kaalam sa Paghambal

‘TANI wala ko na lang ‘to ginhambal!’ Nasiling mo na bala ini? Matuod, indi gid mahapos nga kontrolon ang aton dila. Puede naton antaon ang halos tanan nga sapat, siling sang Biblia, “apang, wala sing tawo nga makaanta sa dila.” (Santiago 3:7, 8) Buot bala silingon nga mapinagusto na lang kita sa aton ginahambal? Indi! Binagbinaga ang pila ka prinsipio sa Biblia nga makabulig sa aton nga kontrolon ining gamay pero gamhanan nga bahin sang aton lawas.

● “Ang tawo nga palahambal madali makasala. Maalamon ang tawo nga makahibalo magpugong sang iya baba.” (Hulubaton 10:19, APD) Kon palahambal ka, daku ang tsansa nga makahambal ka sing sala ukon masakit nga tinaga. Ang indi makontrol nga dila daw pareho sang kalayo. Madasig ini magpalapta sing makahalalit nga mga kutsokutso kag pasipala. (Santiago 3:5, 6) Pero kon ‘pirme naton bantayan ang aton baba,’ ukon mamensar anay antes maghambal, mabinagbinag naton kon ano ang mangin epekto sini sa iban. Gani, makilala kita nga mahalungon sa aton ginahambal kag respetuhon kita kag saligan sang iban.

● “Mangin maabtik sa pagpamati, mahinay sa paghambal, mahinay sa pagpangakig.” (Santiago 1:19) Kon nagapamati kita sing maayo sa ginasiling sang iban, mapakita naton nga indi lang kita interesado sa ila kundi ginatahod man naton sila. Bangod sini, manamian sila sa aton. Pero ano abi kon may maghambal sing masakit nga magpaakig sa aton? Dapat tinguhaan naton nga mangin “mahinay sa pagpangakig” kag indi magbalos. Mahimo naakig lang sia bangod sa pila ka rason, kag mangayo man sing pasaylo sa aton. Nabudlayan ka bala nga kontrolon ang imo kaakig? Ipangamuyo ini sa Dios. Pamatian gid niya ang imo sinsero nga mga pangabay.—Lucas 11:13.

● “Ang dila nga malulo makabali sang tul-an.” (Hulubaton 25:15, NW) Indi pareho sa ginapatihan sang kalabanan, ang kalulo nagapakita sing kabakod. Halimbawa, ang malulo nga sabat makapahaganhagan sa mga nagapamatok nga daw pareho katig-a sang tul-an, bangod sa ila kaakig ukon pag-ihig-ihig. Ang matuod, indi mahapos nga magpakita sing kalulo kon akig na ang imo ginaistorya. Gani pamensara ang mga benepisyo kon sundon mo ang ginasiling sang Biblia kag ang mga resulta kon indi mo ini pagsundon.

Ang mga prinsipio sa Biblia matuod gid nga ‘kaalam gikan sa hitaas.’ (Santiago 3:17) Kon magpakita kita sing kaalam sa aton paghambal, ang aton mga tinaga mangin matinahuron, manami pamatian, kag makapalig-on pareho sa “bulawan nga mga mansanas sa pilak nga suludlan,” sa nagakaigo nga tion.—Hulubaton 25:11, APD.