‘Kaligdong sa Hunahuna’ Samtang Nagahilapit ang Katapusan

“Ang katapusan sang tanan nga butang malapit na. Busa, magmaligdong sa hunahuna.”​—⁠1 PEDRO 4:⁠7.

1. Ano ang nadalahig sa mangin may ‘kaligdong sa hunahuna’?

ANG pinamulong ni apostol Pedro sa ibabaw dapat nga may daku nga epekto sa kon paano nagakabuhi ang mga Cristiano. Apang, wala ginsugo ni Pedro ang iya mga bumalasa nga likawan ang kalibutanon nga mga responsabilidad kag mga kabalaka sa kabuhi; ukon ginpalig-on niya ang kakugmat bangod sa nagapakari nga kalaglagan. Sa baylo, sia naglaygay: “Magmaligdong sa hunahuna.” Ang ‘kaligdong sa hunahuna’ nagalakip sang pagpakita sing maayo nga desisyon, subong nga mabinatyagon, mainandamon, makatarunganon sa aton panghambal kag binuhatan. Nagakahulugan ini sing pagtugot sa Pulong sang Dios sa pagtuytoy sang aton panghunahuna kag mga binuhatan. (Roma 12:2) Sanglit nagakabuhi kita sa tunga sang “kaliwatan nga tiko kag balingag,” ang maligdong nga hunahuna kinahanglanon agod malikawan ang mga problema kag mga kabudlayan.​—⁠Filipos 2:⁠15.

2. Paano ang pagkamapailubon ni Jehova nakabulig sa mga Cristiano karon?

² Ang ‘kaligdong sa hunahuna’ nagabulig man sa aton nga matigayon ang mahunahunaon kag realistiko nga pagtamod sa aton kaugalingon. (Tito 2:​12; Roma 12:3) Kinahanglanon ini bangod sang pinamulong nga narekord sa 2 Pedro 3:​9: “Si Jehova indi mahinay may kaangtanan sa iya saad, subong sang pagbanta sang iban nga tawo nga pagkahinay, kundi mapailubon sia sa inyo bangod indi niya luyag nga ang bisan sin-o malaglag kundi maluyag nga ang tanan makadangat sa paghinulsol.” Talupangda nga si Jehova mapailubon, indi lamang sa mga ditumuluo, kundi sa “inyo” man​—⁠nga mga katapo sang Cristianong kongregasyon. Ngaa? Bangod “indi niya luyag nga ang bisan sin-o malaglag.” Ayhan ang iban kinahanglan pa nga maghimo sing mga pagbalhin kag mga pagbag-o agod makalipikar para sa dulot nga kabuhi nga walay katapusan. Busa tan-awon naton ang mga patag diin ang pila ka pagbag-o mahimo nga kinahanglanon.

‘Kaligdong sa Hunahuna’ sa Aton Personal nga mga Kaangtanan

3. Anong mga pamangkot ang mahimo ipamangkot sang mga ginikanan sa ila kaugalingon may kaangtanan sa ila mga kabataan?

³ Ang puluy-an dapat nga mangin isa ka duog nga may paghidait. Apang para sa iban “isa [ini] ka balay nga puno sing . . . mga binangig.” (Hulubaton 17:1) Kamusta ang inyo pamilya? Ang inyo bala puluy-an hilway sa “kaakig kag sininggitanay kag mapasipalahon nga mga hambal”? (Efeso 4:31) Kamusta ang inyo mga kabataan? Nagabatyag bala sila nga ginahigugma kag ginaapresyar? (Ipaanggid ang Lucas 3:⁠22.) Nagahinguyang bala kamo sing tion nga tudluan kag hanason sila? ‘Nagadisiplina bala kamo sa pagkamatarong’ sa baylo nga sa kasingkal kag kaakig? (2 Timoteo 3:16) Sanglit ang mga kabataan “palanublion gikan kay Jehova,” interesado gid sia kon paano sila ginapakig-angutan.​—⁠Salmo 127:⁠3.

4. (a) Ano ang resulta kon pakig-angutan sing mapintas sang bana ang iya asawa? (b) Paano mapalig-on sang mga asawa ang paghidait upod sa Dios kag ang kalipay sa bug-os nga pamilya?

⁴ Kamusta ang aton tiayon? “Ang mga bana dapat maghigugma sang ila mga asawa subong sang ila kaugalingon nga mga lawas. Ang nagahigugma sang iya asawa nagahigugma sang iya kaugalingon, kay walay tawo nga nagadumot sang iya kaugalingon nga unod; kundi nagapakaon kag nagapalangga sini, subong sang ginahimo man ni Cristo sa kongregasyon.” (Efeso 5:​28, 29) Wala lamang ginabutang sa katalagman sang maabusuhon, mapiguson, ukon dirasonable nga tawo ang kalinong sang iya puluy-an kundi ginapaluya ang iya kaangtanan upod sa Dios. (1 Pedro 3:7) Kamusta ang mga asawa? Sila man dapat “magpasakop sa ila mga bana subong nga sa Ginuo.” (Efeso 5:22) Ang paghunahuna tuhoy sa nagapahamuot sa Dios sarang makabulig sa asawa nga pasapayanan ang mga kakulangan sang iya bana kag magpasakop sa iya nga wala sing kaugot. Kon kaisa, ang asawa mahimo magpabutyag sing hilway sang iya opinyon. Ang Hulubaton 31:​26 nagasiling tuhoy sa isa ka sangkol nga asawa: “Nagabuka sia sang iya baba sa kaalam, kag ang kasuguan sang mahigugmaon nga kaluoy yara sa iya dila.” Paagi sa pagpakig-angot sa iya bana sing malulo kag matinahuron, ginahuptan niya ang paghidait upod sa Dios, kag ginapalig-on ang kalipay sa bug-os nga pamilya.​—⁠Hulubaton 14:⁠1.

5. Ngaa dapat sundon sang mga pamatan-on ang laygay sang Biblia nahanungod sa paagi sang pagpakig-angot sa ila mga ginikanan?

⁵ Mga pamatan-on, paano ninyo ginapakig-angutan ang inyo mga ginikanan? Nagagamit bala kamo sing mamulayon, dimatinahuron nga hambal nga masunson nga ginatugot sang kalibutan? Ukon ginasunod bala ninyo ang sugo sang Biblia: “Mga anak, magmatinumanon sa inyo mga ginikanan nga may paghiusa sa Ginuo, kay ini matarong: ‘Tahura ang imo amay kag ang imo iloy’; nga amo ang nahaunang sugo nga may saad: ‘Agod nga magmaayo sa imo kag magkabuhi ka sing malawig sa duta’ ”?​—⁠Efeso 6:​1-3.

6. Paano naton matinguhaan ang paghidait upod sa mga masigkasumilimba?

⁶ Ginapakita man naton ang ‘kaligdong sa hunahuna’ kon ‘ginapangita naton ang paghidait kag ginatinguhaan ini’ upod sa mga masigkasumilimba. (1 Pedro 3:11) Ang mga dipag-ugyunay kag mga dipaghangpanay nagautwas sa tion kag tion. (Santiago 3:2) Kon ang kaakig ginatugutan nga maglala, ang paghidait sang bug-os nga kongregasyon mahimo nga mabutang sa katalagman. (Galacia 5:15) Gani lubara gilayon ang mga sinuay; mangita sing mahidaiton nga mga solusyon.​—⁠Mateo 5:​23-25; Efeso 4:​26; Colosas 3:​13, 14.

Ang ‘Kaligdong sa Hunahuna’ kag mga Responsabilidad sa Pamilya

7. (a) Paano ginapalig-on ni Pablo ang pagpakita sing ‘kaligdong sa hunahuna’ sa magagmay nga mga butang? (b) Ano ang dapat nga mangin panimuot sang Cristianong mga bana kag mga asawa tuhoy sa mga responsabilidad sa pamilya?

⁷ Ginlaygayan ni apostol Pablo ang mga Cristiano nga “magkabuhi nga may kaligdong sa hunahuna.” (Tito 2:12) Makawiwili nga, sa konteksto, ginalaygayan ni Pablo ang mga babayi nga “higugmaon ang ila mga bana, nga higugmaon ang ila mga anak, nga mangin maligdong sing hunahuna, putli, mga manugpangabudlay sa puluy-an.” (Tito 2:​4, 5) Ginsulat ina ni Pablo sang mga tuig 61-64 C.⁠E., pila ka tuig antes ang katapusan sang Judiyong sistema sang mga butang. Apang, ang magagmay nga mga butang, subong sang hilikuton sa balay, importante gihapon. Busa dapat huptan sang mga bana kag mga asawa ang maayo, positibo nga pagtamod sa ila mga responsabilidad sa balay agod nga “ang pulong sang Dios indi mapasipalahan.” Ang isa ka ulo sang pamilya nangayo sing pasaylo sa isa ka bisita bangod sang makahuluya nga hitsura sang iya puluy-an. Nagpaathag sia nga gubaon ini “bangod nagapayunir sia.” Makadalayaw nga makahimo kita sing mga sakripisyo tungod sa Ginharian, apang dapat kita maghalong nga wala naton ginasakripisyo ang kaayuhan sang aton mga pamilya.

8. Paano maatipan sang mga ulo sang pamilya ang mga kinahanglanon sang ila pamilya sa timbang nga paagi?

⁸ Ang Biblia nagalaygay sa mga amay nga unahon ang ila mga pamilya, nagasiling nga ang isa nga wala nagaaman para sa iya pamilya ‘nagpanghiwala sang pagtuo kag malain pa sa tawo nga wala sing pagtuo.’ (1 Timoteo 5:8) Ang talaksan sang pagkabuhi nagalainlain sa bug-os nga kalibutan, kag maayo nga huptan nga maugdang ang materyal nga mga handum. “Indi ako paghatagi sing kaimulon ukon kamanggaran,” pangamuyo sang manunulat sang Hulubaton 30:⁠8. Walay sapayan, indi dapat patumbayaan sang mga ginikanan ang materyal nga mga kinahanglanon sang ila mga kabataan. Maalamon bala, halimbawa, nga hungod nga dingutan sing sadsaran nga mga kinahanglanon sa kabuhi ang pamilya agod matuman ang teokratikong mga pribilehiyo? Indi bala ini makapaakig sa mga kabataan? Sa pihak nga bahin, ang Hulubaton 24:​27 nagasiling: “Amana ang imo hilikuton sa guwa sang ganhaan, kag ihanda mo ini sa imo sa latagon. Pagkatapos sina dapat mo man palig-unon ang imo panimalay.” Huo, samtang ang pagkabalaka sa materyal nga mga butang may kaugalingon nga duog, ang ‘pagpalig-on sa panimalay’​—⁠sa espirituwal kag emosyonal​—⁠kinahanglanon.

9. Ngaa maalamon para sa mga ulo sang pamilya nga binagbinagon ang posibilidad sang ila kamatayon ukon pagbalatian?

⁹ Naghimo ka na bala sing mga aman para sa imo pamilya sa tion nga mapatay ka sa wala ginapaabot? Ang Hulubaton 13:​22 nagasiling: “Ang isa nga maayo nagabilin sing panublion sa mga anak sang iya anak.” Dugang sa panublion nga ihibalo tuhoy kay Jehova kag kaangtanan sa iya, ang mga ginikanan dapat mangin interesado nga maamanan sing materyal ang ila kabataan. Sa madamong kadutaan ang responsable nga mga ulo sang pamilya nagatinguha nga makasupot, makahimo sing legal nga testamento sa kon kay sin-o magakadto ang iya mga pagkabutang kag makatigayon sing seguro. Ti, ang katawhan sang Dios indi eksepsion sa “tion kag wala ginapaabot nga hitabo.” (Manugwali 9:11) Ang kuwarta “pangamlig,” kag masunson nga malikawan ang kabudlayan bangod sang mahalungon nga pagplano. (Manugwali 7:12) Sa mga kadutaan diin ang pagpabulong wala ginabayaran sang gobierno, ang iban mahimo mamat-od sa pagtigana sing pundo para sa mga kinahanglanon sa panglawas ukon maghimo sing kahimusan para sa pila ka sahi sang seguro sa kapagros.⁠a

10. Paano ang Cristianong mga ginikanan ‘makatipon’ para sa ila mga anak?

¹⁰ Ang Kasulatan nagasiling man: “Ang mga anak indi dapat magtipon para sa ila mga ginikanan, kundi ang mga ginikanan para sa ila mga anak.” (2 Corinto 12:14) Sa kalibutan kinaandan na para sa mga ginikanan nga magtipon sing kuwarta para sa palaabuton nga edukasyon kag pagminyo sang ila mga anak agod mahatagan sila sing maayo nga panugod sa kabuhi. Nahunahuna mo na bala ang pagtipon para sa espirituwal nga palaabuton sang imo anak? Ibutang naton, halimbawa, nga ang isa ka hamtong nga bata nagapanikasog nga makasulod sa bug-os tion nga ministeryo. Walay sapayan nga ang bug-os tion nga mga alagad indi dapat mangayo ukon magpaabot sing pinansial nga bulig gikan sa iban, ang mahigugmaon nga mga ginikanan mahimo mamat-od nga ‘buligan sia suno sa iya mga kinahanglanon’ agod makapabilin sia sa bug-os tion nga pag-alagad.​—⁠Roma 12:​13; 1 Samuel 2:​18, 19; Filipos 4:​14-18.

11. Ang realistiko bala nga pagtamod sa kuwarta pagpakita sing kakulang sing pagtuo? Ipaathag.

¹¹ Ang realistiko nga pagtamod sa kuwarta wala nagapakita sing kakulang sing pagtuo nga ang malauton nga sistema ni Satanas malapit na matapos. Isa lamang ini ka pagpakita sing “praktikal nga kaalam” kag maayo nga desisyon. (Hulubaton 2:​7; 3:21) Si Jesus nagsiling anay nga “ang mga anak sining sistema sang mga butang labing maalam sa praktikal nga paagi . . . sangsa mga anak sang kapawa” sa ila paggamit sa kuwarta. (Lucas 16:8) Indi katingalahan, nian, nga nakita sang iban ang kinahanglanon nga maghimo sing mga pagbag-o sa kon paano nila ginagamit ang ila mga pagkabutang, agod maatipan nila sing mas maayo ang mga kinahanglanon sang ila mga pamilya.

‘Kaligdong sa Hunahuna’ sa Aton Pagtamod sa Edukasyon

12. Paano gintudluan ni Jesus ang iya mga disipulo nga makigbagay sa bag-ong mga sirkunstansia?

¹² “Ang danyag sining kalibutan nagabalhin,” kag ang daku nga mga pagbalhin sa ekonomiya kag mga pag-uswag sa teknolohiya madasig nga nagakahanabo. (1 Corinto 7:31) Apang, gintudluan ni Jesus ang iya mga disipulo nga mangin mapasibusibuon. Sang ginpadala niya sila sa ila nahaunang pagbantala nga hilikuton, nagsiling sia sa ila: “Dili kamo magbalon sing bulawan ukon pilak ukon saway sa inyo mga wagkus, ukon balalunan sa inyo panlakatan, ukon duha ka bayo, ukon sandalyas ukon sungkod; kay ang mamumugon takus sa iya kalan-on.” (Mateo 10:​9, 10) Apang, sang ulihi nga mga okasyon, si Jesus nagsiling: “Ang may puyopuyo dalhon niya ini, kag subong man ang balalunan.” (Lucas 22:36) Ano ang nagbalhin? Ang mga sirkunstansia. Ang relihioso nga kahimtangan nangin mas dimaabiabihon, kag karon dapat sila magbalon para sa ila kaugalingon.

13. Ano ang pangunang katuyuan sang edukasyon, kag paano masuportahan sang mga ginikanan ang ila mga anak may kaangtanan sini?

¹³ Subong man sa karon, ayhan kinahanglan nga binagbinagon sang mga ginikanan ang karon nga mga kahimtangan sa ekonomiya. Halimbawa, ginapat-od bala ninyo nga ang inyo mga anak makabaton sing nagakaigo nga edukasyon? Ang pangunang katuyuan sang edukasyon amo ang pagsangkap sa pamatan-on nga mangin isa ka epektibo nga ministro ni Jehova. Kag ang labing importante nga edukasyon sa tanan amo ang espirituwal nga edukasyon. (Isaias 54:13) Ang mga ginikanan dapat man mabalaka sa ikasarang sang ila mga anak nga suportahan ang ila kaugalingon sa pinansial. Gani hatagi ang inyo mga anak sing panuytoy, buligi sila sa pagpili sing nagakaigo nga mga butang nga tun-an sa eskwelahan, kag hambali upod sa ila kon bala nagakaigo ang pagkuha sing dugang pa nga edukasyon ukon indi. Ina nga mga desisyon isa ka responsabilidad sang pamilya, kag indi dapat mulayon sang iban ang dalanon nga ginahimo. (Hulubaton 22:6) Kamusta yadtong namat-od nga patun-on ang ila mga anak sa puluy-an?⁠b Walay sapayan nga madamo ang nakahimo sing dalayawon, natukiban sang iban nga ang pag-eskwela sa puluy-an mas mabudlay sangsa ginahunahuna nila, kag ang ila mga anak wala makabaton sing nagakaigo nga edukasyon. Gani kon ginabinagbinag ninyo ang pag-eskwela sa puluy-an, pat-ura nga ginaisip ninyo ang bili, ginatulutimbang sing realistiko kon bala may ikasarang kamo kag disiplina sa kaugalingon nga tapuson ini.​—⁠Lucas 14:⁠28.

‘Indi Pagpangitaa ang Dalagku nga mga Butang’

14, 15. (a) Paano nawasi ni Baruc ang iya espirituwal nga pagkatimbang? (b) Ngaa binuang para sa iya nga ‘pangitaon ang dalagku nga mga butang’?

¹⁴ Sanglit ang katapusan sining sistema wala pa mag-abot, ang iban mahimo nga mahuyog nga panikasugan kon ano ang mahatag sang kalibutan​—⁠bantog nga mga karera, daku sing suweldo nga mga obra, kag manggad. Binagbinaga ang sekretaryo ni Jeremias, nga si Baruc. Nanalambiton sia: “Kailo ako karon, kay si Jehova nagdugang sing kasubo sa akon kasakit! Ginalapyo ako sa akon pag-ugayong, kag wala ako sing pahuway.” (Jeremias 45:3) Si Baruc ginlapyo. Ang pag-alagad subong sekretaryo ni Jeremias isa ka mabudlay kag makakalapoy nga obra. (Jeremias 36:​14-26) Kag halos wala sing katapusan ang kahuol. Mga 18 ka tuig ini antes ginlaglag ang Jerusalem.

¹⁵ Ginsilingan ni Jehova si Baruc: “Yari karon! Ang akon ginpatindog gub-on ko, kag ang akon gintanom gabuton ko, nga amo, ang bug-os nga duta. Apang tuhoy sa imo, nagapangita ka sing mga butang nga dalagku para sa imo kaugalingon. Indi ka magpangita.” Nadulaan sing timbang si Baruc. Nagsugod sia sa ‘pagpangita sing mga butang nga dalagku para sa iya kaugalingon,’ ayhan sing manggad, kabantugan, ukon materyal nga kalig-unan. Sanglit ‘ginagabot [ni Jehova], bisan ang bug-os mismo nga duta,’ ano ang kapuslanan sang pagpangita sining mga butang? Busa ginhatag ni Jehova kay Baruc ining nagapahunahuna nga pahanumdom: “Magapadala ako sing kalamidad sa tanan nga unod . . . , kag ang imo kabuhi ihatag ko sa imo subong nga inagaw sa tanan nga duog diin ka nagakadto.” Ang materyal nga mga pagkabutang indi makalampuwas sa kalaglagan sang Jerusalem! Gingarantiya lamang ni Jehova ang pagluwas sa iya “kalag subong nga inagaw.”​—⁠Jeremias 45:​4, 5.

16. Anong leksion ang matun-an sang katawhan ni Jehova karon gikan sa eksperiensia ni Baruc?

¹⁶ Ginpamatian ni Baruc ang pagtadlong ni Jehova, kag, suno sa ginsaad ni Jehova, si Baruc nakalampuwas. (Jeremias 43:​6, 7) Daw ano ka daku nga leksion para sa katawhan ni Jehova karon! Indi ini ang tion sa ‘pagpangita sing mga butang nga dalagku para sa aton kaugalingon.’ Ngaa? Bangod “ang kalibutan nagataliwan kag amo man ang kailigbon sini.”​—⁠1 Juan 2:⁠17.

Ang Labing Maayo nga Paggamit sa Nabilin nga Tion

17, 18. (a) Ano ang reaksion ni Jonas sang naghinulsol ang mga taga-Nineve? (b) Anong leksion ang gintudlo ni Jehova kay Jonas?

¹⁷ Paano, nian, naton magamit sing labing maayo ang nabilin nga tion? Magtuon gikan sa eksperiensia ni manalagna Jonas. “Nagkadto [sia] sa Nineve . . . , kag padayon sia nga nagapahayag kag nagasiling: ‘Kap-atan pa ka adlaw, kag ang Nineve laglagon.’ ” Sa kakibot ni Jonas, ang mga taga-Nineve namati sa iya mensahe kag naghinulsol! Wala paglaglaga ni Jehova ang siudad. Ang reaksion ni Jonas? “O Jehova, kuhaa sa akon, palihug, ang akon kalag, kay maayo pa sa akon nga mapatay sangsa mabuhi.”​—⁠Jonas 3:​3, 4; 4:⁠3.

¹⁸ Nian gintudluan ni Jehova si Jonas sing isa ka importante nga leksion. “Nag-aman [sia] sing tangantangan nga tanom, nga magtubo ini sa ibabaw ni Jonas, agod mangin handong ini sa iya ulo . . . Kag si Jonas nagkasadya sing daku bangod sang tangantangan nga tanom.” Apang, ang kalipay ni Jonas makadali lamang kay ang tanom gilayon nga nalaya. Si Jonas “nagapangakig” tungod sang iya pagkawalay kasulhayan. Ginpadaku ni Jehova ang Iya punto, nga nagasiling: “Ikaw, sa imo bahin, nahilak sa tangantangan nga tanom . . . Indi bala ako mahilak sa Nineve nga dakung siudad, nga may kapin sa isa ka gatos kag duha ka pulo ka libo ka tawo nga wala gid makahibalo sang kinatuhayan sa ulot sang ila kamot nga tuo kag sang ila wala, luwas pa sa madamong sapat?”​—⁠Jonas 4:​6, 7, 9-11.

19. Anong maiyaiyahon nga panghunahuna ang luyag naton likawan?

¹⁹ Daw ano ka maiyaiyahon ang pangatarungan ni Jonas! Nahilak sia sa tanom, apang wala sia maluoy sa mga taga-Nineve​—⁠sa mga tawo nga, sa espirituwal nga paghambal, ‘wala makahibalo sang kinatuhayan sa ulot sang ila kamot nga tuo kag sa ila wala.’ Mahimo man naton kalangkagan ang kalaglagan sining malauton nga kalibutan kag nagakaigo gid ini! (2 Tesalonica 1:8) Apang, samtang nagahulat, katungdanan naton nga buligan ang mga tawo nga bunayag sing tagipusuon nga, sa espirituwal nga paghambal, wala ‘makahibalo sang ila kamot nga tuo gikan sa ila wala.’ (Mateo 9:​36; Roma 10:​13-15) Gamiton mo bala ang malip-ot nga tion nga nabilin agod buligan ang mas madamo nga tawo kon mahimo sa pagtigayon sing hamili nga ihibalo tuhoy kay Jehova? Anong hilikuton ang makatumbas sa kalipay nga makabulig sa isa nga makatigayon sing kabuhi?

Magpadayon sa Pagkabuhi nga May ‘Kaligdong sa Hunahuna’

20, 21. (a) Ano ang pila ka paagi nga mapakita naton ang ‘kaligdong sa hunahuna’ sa palaabuton nga mga adlaw? (b) Anong mga pagpakamaayo ang magaabot bangod sang pagkabuhi nga may ‘kaligdong sa hunahuna’?

²⁰ Samtang ang sistema ni Satanas padayon nga nagatugdang padulong sa kalaglagan, pat-od gid nga nagaatubang kita sing bag-ong mga hangkat. Ang 2 Timoteo 3:​13 nagatagna: “Ang mga tawo nga malauton kag mga impostor labi nga magalain.” Apang indi ‘malapyo kag pagpunawon ang inyo mga kalag.’ (Hebreo 12:3) Magsalig kay Jehova para sa kusog. (Filipos 4:13) Tun-i ang mangin mapasibusibuon, ang makigbagay sa sining nagalain nga mga kahimtangan, sa baylo nga panumdumon ang nagligad. (Manugwali 7:10) Gamita ang praktikal nga ihibalo, nagadungan sa panuytoy nga ginaaman sang “matutom kag mainandamon nga ulipon.”​—⁠Mateo 24:​45-47.

²¹ Kon pila pa ka tion ang nabilin wala kita makahibalo. Apang, makasiling kita nga may pagsalig nga “ang katapusan sang tanan nga butang malapit na.” Sa wala pa mag-abot ina nga katapusan, magkabuhi kita nga may ‘kaligdong sa hunahuna’ sa aton mga pagpakig-angot sa isa kag isa, sa kon paano naton ginaatipan ang aton mga pamilya, kag sa aton sekular nga mga responsabilidad. Paagi sa sini, makasalig kita tanan nga masapwan kita sa ulihi nga “walay mantsa kag walay dagta kag may paghidait”!​—⁠2 Pedro 3:⁠14.

[Mga footnote]

Mga Punto Para sa Repaso

◻ Paano naton mapakita ang ‘kaligdong sa hunahuna’ sa aton personal nga mga kaangtanan?

◻ Paano naton mapakita ang pagkatimbang sa pag-atipan sa aton mga responsabilidad sa pamilya?

◻ Ngaa dapat mangin interesado ang mga ginikanan sa sekular nga edukasyon sang ila mga anak?

◻ Anong mga leksion ang matun-an naton gikan kanday Baruc kag Jonas?

[Kapsion sa pahina 18]

Kon wala ginapakig-angutan sing maayo sang bana kag asawa ang isa kag isa, ginapaluya nila ang ila kaangtanan kay Jehova

[Kapsion sa pahina 20]

Ang mga ginikanan dapat mangin interesado sa edukasyon sang ila mga anak