Mga Gulang, Maghukom sing Matarong

“Pamati kamo sang mga panumbong sa tunga sang inyo mga utod, dapat kamo maghukom sing matarong.”—DEUTERONOMIO 1:16.

1. Tuhoy sa paghukom, ano nga pagtugyan sing awtoridad ang natabo, kag ano ang ginapahangop sini sa tawhanon nga mga hukom?

SUBONG supremo nga Hukom, gintugyan ni Jehova ang hudisyal nga awtoridad sa iya Anak. (Juan 5:27) Gani, subong Ulo sang Cristianong kongregasyon, ginagamit ni Cristo ang matutom kag mainandamon nga ulipon nga klase kag ang Nagadumala nga Hubon sini sa pagtangdo sing mga gulang, nga kon kaisa magapanghikot subong mga hukom. (Mateo 24:45-47; 1 Corinto 5:12, 13; Tito 1:5, 9) Subong salili nga mga hukom, obligado sila nga sundon sing maayo ang halimbawa sang langitnon nga mga Hukom, si Jehova kag si Cristo Jesus.

Si Cristo—Ang Huwaran nga Hukom

2, 3. (a) Anong Mesianiko nga tagna ang nagapakita sing mga kinaiya ni Cristo subong isa ka Hukom? (b) Anong partikular nga mga punto ang takus nga talupangdon?

² Tuhoy kay Cristo subong isa ka Hukom, nasulat sing matagnaon: “Kag magadulog sa iya ang espiritu ni Jehova, ang espiritu sang kaalam kag paghangop, ang espiritu sang laygay kag kusog, ang espiritu sang ihibalo kag sang kahadlok kay Jehova; kag magakalipay sia sa kahadlok kay Jehova. Indi sia magahukom suno sa panulok sang iya mga mata, ukon magahusay suno sa pagpamati sang iya mga idulungog. Kundi magahukom sia nga may pagkamatarong sa mga imol.”—Isaias 11:2-4.

³ Talupangda sa amo nga tagna ang mga kinaiya nga naghimo kay Cristo nga “hukman ang napuy-an nga duta sa pagkamatarong.” (Binuhatan 17:31) Nagahukom sia suno sa espiritu ni Jehova, suno sa diosnon nga kaalam, paghangop, laygay, kag ihibalo. Talupangda, man, nga nagahukom sia sa kahadlok kay Jehova. Sa amo, ang “lingkuranan sang hukmanan sang Cristo” nagarepresentar, “sa lingkuranan sang hukmanan sang Dios.” (2 Corinto 5:10; Roma 14:10) Mahalungon nga ginahukman niya ang mga butang suno sa paagi nga hukman sila sang Dios. (Juan 8:16) Wala sia nagahukom suno lamang sa panagway ukon sa sugidsugid. Nagahukom sia sing matarong sa mga mahagop kag mga kubos. Daw ano ka dalayawon nga Hukom! Kag daw ano ka dalayawon nga huwaran para sa dihimpit nga mga tawo nga gintawag agod magpanghikot sa isa ka hudisyal nga ikasarang sa karon!

Dutan-on nga mga Hukom

4. (a) Ano ang isa sa mga hilikuton sang 144,000 sa sulod sang Milenyo nga Paggahom ni Cristo? (b) Anong tagna ang nagapakita nga ang pila ka hinaplas nga mga Cristiano itangdo subong mga hukom samtang yari pa sa duta?

⁴ Ginapakita sang mga Kasulatan nga ang diutay nga kadamuon sang mga hinaplas nga Cristiano, sugod sa 12 ka apostoles, mangin kaupod nga mga hukom ni Cristo Jesus sa sulod sang Milenyo. (Lucas 22:28-30; 1 Corinto 6:2; Bugna 20:4) Ang nagkalabilin sang hinaplas nga mga katapo sang espirituwal nga Israel sa duta ginhukman man kag ginpasag-uli sang 1918-19. (Malaquias 3:2-4) Tuhoy sining pagpasag-uli sa espirituwal nga Israel, gintagna ang subong sini: “Kag iuli ko ang imo mga hukom subong sang una, kag ang imo mga manuglaygay subong sang sa kamunuan.” (Isaias 1:26) Gani, subong sang iya ginhimo “sa kamunuan” sang undanon nga Israel, ginhatagan ni Jehova ang ginpabalik nga mga nagkalabilin sing matarong nga mga hukom kag manuglaygay.

5. (a) Sin-o ang ginbutang “subong mga hukom” pagkatapos sang pagpasag-uli sa espirituwal nga Israel, kag paano sila ginlaragway sa tulun-an sang Bugna? (b) Sin-o karon ang nagabulig sa mga hinaplas nga manugtatap sa hudisyal nga hilikuton, kag paano sila ginhanas nga mangin maayo nga mga hukom?

⁵ Una anay, ang ‘maalam nga mga tawo’ nga “ginbutang subong mga hukom” mga hinaplas tanan nga mga tigulang nga lalaki, ukon mga gulang. (1 Corinto 6:4, 5) Ginalaragway sa libro sang Bugna ang matutom, talahuron hinaplas nga mga manugtatap subong yara sa tuo nga kamot ni Jesus, kon sayuron, yara sa idalom sang iya kontrol kag panuytoy. (Bugna 1:16, 20; 2:1) Kutob sang 1935 ang mga hinaplas nakabaton sing matutom nga pagsakdag sang nagadamo nga “dakung kadam-an,” nga ang paglaum amo ang makalampuwas gikan sa “dakung kapipit-an” kag mabuhi sing dayon sa paraiso nga duta. (Bugna 7:9, 10, 14-17) Samtang nagahilapit ang “kasal sang Kordero,” dugang kag dugang sini sa ila ang ginatangdo sang hinaplas nga Nagadumala nga Hubon sa pag-alagad subong mga gulang kag mga hukom sa sobra sa 66,000 ka kongregasyon sang mga Saksi ni Jehova sa bug-os nga duta.a (Bugna 19:7-9) Paagi sa pinasahi nga mga eskwelahan, ginahanas sila sa pag-uyat sing mga salabton sa “bag-ong duta” nga katilingban. (2 Pedro 3:13) Ang ginhiwat nga Kingdom Ministry School sang talipuspusan nga bahin sang 1991 sa madamo nga pungsod, nagpadaku sing nagakaigo nga pag-uyat sa hudisyal nga mga kaso. Ang mga gulang nga nagaalagad subong mga hukom obligado nga ilugon si Jehova kag si Cristo Jesus, nga ang mga paghukom matuod kag matarong.—Juan 5:30; 8:16; Bugna 19:1, 2.

Mga Hukom nga ‘Nagagawi sa Kahadlok’

6. Ngaa ang mga gulang nga nagaalagad sa hudisyal nga mga komite dapat nga ‘maggawi sa kahadlok?’

⁶ Kon si Cristo mismo nagahukom sa kahadlok kay Jehova kag sa bulig sang Iya espiritu, himuon ini ilabi na sang dihimpit nga mga gulang! Kon gintangdo nga mag-alagad sa isa ka hudisyal nga komite, kinahanglan nga ‘maggawi sila nga may kahadlok,’ “nagapanawag sa Amay nga nagahukom sing alangay” nga buligan sila sa paghukom sa pagkamatarong. (1 Pedro 1:17) Dapat nila dumdumon nga nagauyat sila sang kabuhi sang mga tawo, sang ila “kalag,” nga “subong amo ang magahatag sing husay.” (Hebreo 13:17) Bangod sini, pat-od nga manabat man sila kay Jehova bangod sa pila ka hudisyal nga sala nga ila mahimo. Sa iya komentaryo sa Hebreo 13:17, si J. H. A. Ebrard nagsulat: “Obligasyon sang mga manugbantay nga bantayan ang mga kalag nga yara sa idalom sang iya pagtatap, kag . . . magaatubang sia sing salabton sa ila tanan, kag sa sadtong nadula bangod sang iya kakulangan. Isa ini ka balaan nga pulong. Dapat binagbinagon sang tagsa ka ministro sang pulong, nga boluntaryo niya nga ginbaton ining daku [serioso] responsable nga katungdanan.”—Ipaanggid ang Juan 17:12; Santiago 3:1.

7. (a) Ano ang dapat tandaan sang modernong adlaw nga mga hukom, kag ano dapat ang ila tulumuron? (b) Ano nga mga leksion ang makuha sang mga gulang sa Mateo 18:​18-20?

⁷ Dapat dumdumon sang mga gulang nga nagaalagad sa hudisyal nga katungdanan nga ang matuod nga mga Hukom sang tagsa ka kaso amo si Jehova kag si Cristo Jesus. Dumduma kon ano ang ginsugo sa mga hukom sadto sang Israel: “Talupangda ang inyo ginahimo kay wala kamo nagahukom tungod sa tawo kundi tungod kay Jehova; nagaupod sia sa inyo sa paghukom. Busa, karon, mangin sa inyo ang kahadlok kay Jehova . . . Himua ini agod indi kamo magmalinapason.” (2 Cronica 19:6-10) Upod ang matinahuron nga kahadlok, ang mga gulang nga nagahukom sa isa ka kaso dapat nga maghimo sang ila labi nga masarangan agod pat-uron nga si Jehova ‘kaupod nila may kahilabtanan sa paghukom.’ Dapat nga ipakita sing sibu sang ila desisyon ang paagi sang pagtamod ni Jehova kag ni Cristo tuhoy sa amo nga butang. Ang ila simbuliko nga ‘pagagapuson’ (napamatud-an nga nakasala) ukon ‘hubaran’ (napamatud-an nga wala sing sala) sa duta mangin amo dapat ang butang nga nagapos ukon nahubaran na sa langit—subong ginapakita sa kon ano ang nasulat sa inspirado nga Pulong sang Dios. Kon mangamuyo sila kay Jehova sa ngalan ni Jesus, si Jesus mangin sa “tunga nila” sa pagbulig sa ila. (Mateo 18:18-20, footnote; Ang Lalantawan, Pebrero 15, 1988, pahina 9) Dapat nga ipakita sang kahimtangan sa tion sang hudisyal nga paghusay nga sa pagkamatuod yara si Cristo sa tunga nila.

Bug-os Tion nga mga Manugbantay

8. Ano ang pangunang katungdanan sang mga gulang sa panong subong sang ginhatag nga huwaran ni Jehova kag ni Jesucristo? (Isaias 40:​10, 11; Juan 10:​11, 27-29)

⁸ Ang mga gulang wala nagahukom sing bug-os tion. Mga bug-os tion nga manugbantay sila. Mga manug-ayo sila, indi mga manugsilot. (Santiago 5:13-16) Ang sadsaran nga ideya sa likod sang Griegong tinaga para sa manugtatap (e·piʹsko·pos) amo ang matinatapon nga pag-ulikid. Ang Theological Dictionary of the New Testament nagasiling: “Nagadugang sa tinaga nga manugbantay [sa 1 Pedro 2:25], ang termino nga [e·piʹsko·pos] nagapahangop sang matinatapon nga hilikuton sa pagbantay ukon pag-amlig.” Huo, ang ila una nga salabton amo ang pagbantay sa mga karnero kag pag-amlig sa ila, nagahupot sa ila sa sulod sang panong.

9, 10. (a) Paano ginpadaku ni Pablo ang pangunang katungdanan sang mga gulang, kag gani anong pamangkot ang maayo nga binagbinagon? (b) Ano ang ginapahangop sang mga tinaga ni Pablo sa Binuhatan 20:⁠29, gani paano mabuhinan sang mga gulang ang kadamuon sang hudisyal nga mga kaso?

⁹ Nagapamulong sa mga gulang sa kongregasyon sang Efeso, ginpatuhoy mismo ni Pablo ini sa ila: “Tatapa ang inyo kaugalingon kag ang bug-os nga panong, nga sa ila ginhimo kamo sang balaan nga espiritu nga mga manugtatap, sa pagbantay sa kongregasyon sang Dios, nga iya ginbakal sa dugo sang iya kaugalingon nga Anak.” (Binuhatan 20:28) Ginpadaku ni Pablo ang pagbantay, indi ang pagsilot. Maayo nga pamalandungan sang pila ka gulang ang masunod nga pamangkot: ‘Makapain bala kita sing pila ka kinahanglanon nga tion para sa pag-usisa kag pag-uyat sang hudisyal nga mga kaso kon gingamit naton ang mas madamo nga tion kag panikasog sa pagbantay nga hilikuton?’

¹⁰ Matuod, nagpaandam si Pablo batok sa “mapintas nga mga lobo.” Apang wala bala niya ginsabdong sila bangod sang ‘indi pagtatap sa panong sing may kalulo’? (Binuhatan 20:29) Kag bisan ginpahangop niya nga dapat tabugon sang matutom nga mga manugtatap ining mga “lobo,” wala bala ginapakita sang iya mga pulong nga dapat tatapon sang mga gulang ang iban nga mga katapo sang panong sing “may kalulo”? Kon magluya sa espirituwal ang isa ka karnero kag magdulog sa pag-alagad sa Dios, ano ang ginakinahanglan niya—pagsakit ukon pagbulong, silot ukon pagbantay? (Santiago 5:14, 15) Gani, ang mga gulang dapat tayuyon nga mag-iskedyul sing tion para sa pagbantay nga hilikuton. Mahimo ini makahatag sing makalilipay nga resulta sang paghinguyang sing malip-ot nga panahon sa nagakunsumo sang tion nga hudisyal nga mga kaso sang nakasala nga mga Cristiano. Sa pagkamatuod, ang panguna nga katungdanan sang mga gulang amo ang pag-aman sing tuburan sang paumpaw kag pabugnaw, nian nagadala sing paghidait, kalinong, kag kalig-unan sa tunga sang katawhan ni Jehova.—Isaias 32:1, 2.

Nagaalagad Bilang Maalwan nga mga Manugbantay kag mga Hukom

11. Ngaa kinahanglan sang mga gulang nga nagaalagad sa hudisyal nga mga komite ang walay pagpasulabi kag ang “kaalam gikan sa ibabaw”?

¹¹ Ang maid-id nga pagbantay antes makahimo sing sala ang isa ka Cristiano mahimo makabuhin sa kadamuon sang hudisyal nga mga kaso sa tunga sang katawhan ni Jehova. (Ipaanggid ang Galacia 6:1.) Walay sapayan, bangod sang tawhanon nga sala kag pagkadihimpit, kinahanglan nga uyatan kon kaisa sang mga manugtatap ang mga kaso sang pagpakasala. Ano nga mga prinsipyo ang dapat nga magtuytoy sa ila? Wala ini magbag-o kutob sang panahon ni Moises ukon sa una nga mga Cristiano sadto. Ang mga pulong ni Moises nga ginpatuhoy sa mga hukom sang Israel naaplikar sa gihapon: “Pamati kamo sa mga panumbungon sa tunga sang inyo mga utod, maghukom kamo sing matarong . . . Wala kamo sing pasulabihon sa tawo sing paghukom.” (Deuteronomio 1:16, 17) Ang pagkawalaypinasulabi isa ka kinaiya sang “kaalam gikan sa ibabaw,” ang kaalam nga importante gid para sa mga gulang nga nagaalagad sa hudisyal nga mga komite. (Santiago 3:17; Hulubaton 24:23) Ina nga kaalam makabulig sa ila nga mahangpan ang kinatuhayan sa tunga sang kaluyahon kag pagkamalauton.

12. Sa anong kahulugan ang mga hukom kinahanglan nga indi lamang mangin matarong nga mga tawo kundi mga maayo man?

¹² Ang mga gulang “dapat nga maghukom sing may pagkamatarong,” nahisanto sa mga talaksan ni Jehova sa husto kag sala. (Salmo 19:9) Apang, samtang nagatinguha nga mangin matarong nga mga tawo, dapat man sila magtinguha nga mangin maayo nga mga tawo, sa kahulugan sang ginhimo nga pagpatuhay ni Pablo sa Roma 5:7, 8. Nagakomento sa sining mga bersikulo sa artikulo sini nga “Righteousness,” ang libro nga Insight on the Scriptures nagasiling: “Ginapakita sang paggamit sing Griegong tinaga nga ang isa ka tawo nga takus sing, ukon kilala sa, kaayuhan isa ka mainayuhon (napahulag sa paghimo sing maayo ukon sa pagdala sing kaayuhan sa iban) kag maalwan (aktibo sa pagpabutyag sing pagkaayo). Wala lamang sia nabalaka sa paghimo sang kon ano ang ginapangayo sang katarungan kundi nagahimo sing labaw pa sa sini, ginapahulag sia sang maayo nga konsiderasyon sa iban kag sang handum nga hatagan sing benepisyo kag buligan sila.” (Tomo 2, pahina 809) Ang mga gulang nga matarong kag maayo magatratar sang mga nakasala upod ang malulo nga patugsiling. (Roma 2:4) Dapat nga luyag nila ipakita ang kaluoy kag gugma. Dapat nila himuon ang ila masarangan nga mabuligan ang nakasala nga makita ang kinahanglanon nga maghinulsol, bisan nga sa una daw wala sia nagasabat sa ila mga panikasog.

Nagakaigo nga Panimuot sa Tion sang mga Paghusay

13. (a) Kon ang isa ka gulang nagaalagad subong isa ka hukom, wala sia nagauntat subong ano? (b) Anong laygay ni Pablo ang naaplikar man sa hudisyal nga mga paghusay?

¹³ Kon ginapangayo sang kahimtangan ang isa ka hudisyal nga paghusay, dapat dumdumon sang mga gulang nga sa gihapon mga manugbantay sila, nagatatap sa karnero ni Jehova, sa idalom sang “maayo nga manugbantay.” (Juan 10:11) Ang laygay nga ginhatag ni Pablo para sa tayuyon nga bulig sa mga karnero sa idalom sang kabudlayan naaplikar sa kaangay nga kusog sa tion sang hudsiyal nga mga paghusay. Sia nagsulat: “Mga kauturan, kon ang isa ka tawo masapwan sa bisan anong paglapas, kamo nga may espirituwal nga mga kalipikasyon magpasag-uli sa iya sa espiritu sang kalulo, samtang nagabantay kamo sa inyo kaugalingon, basi kon kamo man pagsulayon. Magdinalhanay kamo sang inyo mga lulan, kag sa amo matuman ang kasuguan ni Cristo.”—Galacia 6:1, 2.b

14. Paano tamdon sang mga manugtatap ang hudisyal nga mga paghusay, kag ano dapat ang ila panimuot sa isa nga nakasala?

¹⁴ Sa baylo nga tamdon ang ila kaugalingon subong superyor nga mga hukom nga takus sa pagpadapat sang silot, dapat tamdon sang mga gulang nga nagaalagad sa isa ka hudisyal nga komite ang paghusay subong isa ka bahin sang ila pagbantay nga hilikuton. Isa sa mga karnero ni Jehova ang yara sa kagamo. Ano ang ila mahimo agod luwason sia? Ulihi na bala para mabuligan ining karnero nga nagsipak sa panong? Lauman naton nga indi. Ang mga gulang dapat maghupot sing positibo nga pagtamod tuhoy sa pagpakita sing kaluoy sa diin ini nagakabagay. Indi kinahanglan nga panubuon nila ang mga talaksan ni Jehova kon nahimo ang serioso nga sala. Apang ang ila pagkaalisto sa mga kahimtangan nga sarang hatagan sing konsiderasyon makabulig sa ila nga ipakita ang posible nga kaluoy. (Salmo 103:8-10; 130:3) Sing makapasubo, ang iban nga nakasala tuman ka batinggilan sa ila panimuot amo nga ang mga gulang mapilitan nga ipakita ang kalig-on, apang indi ang katigdas.—1 Corinto 5:13.

Ang Katuyuan sang Hudisyal nga mga Paghusay

15. Kon mag-utwas ang isa ka serioso nga problema sa tunga sang mga indibiduwal, ano anay ang kinahanglan nga pat-uron?

¹⁵ Kon mag-utwas ang serioso nga problema sa tunga sang mga indibiduwal, pat-uron sang maalamon nga mga gulang kon bala ang mga nadalahig nagtinguha nga husayon ang bagay sing pribado, suno sa espiritu sang Mateo 5:23, 24 ukon Mateo 18:15. Kon napaslawan ini, ayhan ang laygay sang isa ukon duha ka gulang nagakaigo na. Ang hudisyal nga aksion kinahanglan lamang kon ang sala nga nahimo daku nga makadul-ong sa pagdisfellowship. (Mateo 18:17; 1 Corinto 5:11) Kinahanglan nga may yara sing nagakaigo Makasulatanhon nga sadsaran sa paghuman sing isa ka hudisyal nga komite. (Tan-awa Ang Lalantawan, Septiembre 15, 1989, pahina 18.) Kon nakahuman na, dapat pilion ang labing kalipikado nga mga gulang para sa isa ka partikular nga kaso.

16. Ano ang ginatinguhaan nga matigayon sang mga gulang paagi sa hudisyal nga mga paghusay?

¹⁶ Ano ang luyag matigayon sang mga gulang paagi sa hudisyal nga mga paghusay? Una, imposible ang maghukom sing matarong kon indi mahibaluan ang kamatuoran. Subong sa Israel, dapat nga ‘sayasaton sing tul-id’ ang serioso nga mga butang. (Deuteronomio 13:14; 17:4) Gani ang isa ka tulumuron sang paghusay amo ang pagpangita sing mga pamatuod sa kaso. Apang mahimo ini kag dapat himuon upod ang gugma. (1 Corinto 13:4,6, 7) Kon mahibaluan na ang mga kamatuoran, himuon sang mga gulang kon ano ang ginakinahanglan agod amligan ang kongregasyon kag huptan sa sulod sini ang mataas nga mga talaksan ni Jehova kag ang hilway nga pag-ilig sang iya espiritu. (1 Corinto 5:7,8) Walay sapayan, isa sang mga katuyuan sang paghusay nga luwason, kon posible, ang isa nga nakasala.—Ipaanggid ang Lucas 15:8-10.

17. (a) Paano dapat tamdon ang akusado nga tawo sa tion sang paghusay, kag sa ano nga katuyuan? (b) Ano ang ginapangayo sini sa bahin sang mga katapo sang hudisyal nga komite?

¹⁷ Indi dapat tamdon sing tuhay ang akusado nga tawo kundi subong isa ka karnero sang Dios. Dapat sia tamdon sing may kalulo. Kon nahimo ang isa ka sala (ukon mga sala), ang katuyuan sang matarong nga mga hukom amo ang pagbulig sa nakasala nga makabalik, nga mahangpan ang iya sayop nga dalanon, nga makahinulsol, kag nian agod nga masabnit sia gikan “sa siod sang Yawa.” Nagakinahanglan ini sang “arte sang pagtudlo,” “nagatudlo nga may kalulo.” (2 Timoteo 2:24-26; 4:2) Kumusta kon ang nakasala nian magkilala nga sia nakasala, tinagipusuon nga ginasubuan, kag nagapangayo sing kapatawaran kay Jehova? (Ipaanggid ang Binuhatan 2:37.) Kon ang komite kumbinsido nga sinsero nga luyag niya nga mabuligan, sing masami, indi kinahanglan nga idisfellowship sia—Tan-awa The Watchtower, Enero 1, 1983, pahina 31, parapo 1.

18. (a) San-o kinahanglan magpakita sing kalig-on ang hudisyal nga komite sa pagdisfellowship sa isa nga nakasala? (b) Sa anong makatandog tagipusuon nga kahimtangan dapat nga manikasog ang mga gulang para sa nagtalang nga karnero?

¹⁸ Sa pihak nga bahin, kon ang mga miembro sang hudisyal nga komite nagaatubang sing maathag nga kaso sang apostasya, hungod nga pagrebelde batok sa mga kasuguan ni Jehova, ukon sing daku nga kalautan, ang ila katungdanan amo ang pag-amlig sa iban nga mga katapo sang kongregasyon paagi sa pagdisfellowship sa dimahinulsulon nga makasasala. Ang hudisyal nga komite indi obligado nga mag-atubang sa nakasala sa liwat kag liwat ukon magbutang sang mga tinaga sa iya baba, nagapilit sa iya nga maghinulsol, kon maathag nga wala sia sing diosnon nga kasubo.c Sang sini lang nga tinuig, mga 1 porsiento sang kadamuon sang mga manugbantala ang gindisfellowship sa bug-os nga kalibutan. Nagakahulugan nga sa tagsa isa ka gatos ka karnero nga yara sa toril, isa ang nagakadula—bisan temporaryo lamang. Kon binagbinagon ang tion kag panikasog nga ginhinguyang sa pagdala sang isa ka tawo pasulod sa toril, indi bala nga makapaluya nga mahibaluan nga linibo ang ‘nagabalik kay Satanas’ tuigtuig?—1 Corinto 5:5.

19. Ano ang indi gid pagkalipatan sang mga gulang sa hudisyal nga komite, gani ano dapat ang ila tulumuron?

¹⁹ Dapat dumdumon sang mga gulang nga nagauyat sing isa ka hudisyal nga kaso nga ang kalabanan nga kaso sang sala sa kongregasyon nagadalahig sing kaluyahon indi sing pagkamalauton. Indi nila dapat pagkalipatan ang ilustrasyon ni Jesus tuhoy sa nadula nga karnero, nga iya gintakpan sa sining mga pulong: “Nagasiling ako sa inyo nga sa among bagay may kalipay sa langit tungod sa isa ka makasasala nga nagahinulsol labi pa sa kasiaman kag siam nga matarong nga wala nagakinahanglan sing paghinulsol.” (Lucas 15:7) Sa pagkamatuod, “indi luyag ni Jehova . . . nga malaglag ang bisan sin-o kundi nagahandum nga ang tanan makadangat sa paghinulsol.” (2 Pedro 3:9) Sa bulig ni Jehova, kabay nga himuon sang tanan nga hudisyal nga komite sa bug-os nga kalibutan ang ila masarangan nga makahatag sing kalipay sa langit paagi sa pagbulig sa mga nakasala nga makita ang kinahanglanon nga maghinulsol kag matuytuyan ang ila mga tiil pabalik sa makitid nga dalan nga nagadul-ong sa kabuhi nga walay katapusan.—Mateo 7:13, 14.

[Mga footnote]

Mga pamangkot sa Repaso

◻ Sa pagsunod sa halimbawa sang Dakung Manugbantay kag Maayong Manugbantay, ano dapat ang pangunang interes sang mga gulang?

◻ Sa anong paagi nga mahimo sang mga gulang nga buhinan ang kadamuon sang hudisyal nga mga kaso?

◻ Sa anong kahulugan ang mga hukom indi lamang kay matarong kundi maayo man?

◻ Paano dapat tamdon ang nakasala sa tion sang paghusay, kag sa anong katuyuan?

◻ Ngaa ang pagdisfellowship amo ang katapusan nga tikang?

[Laragway sa pahina 16]

Kon ginahimo ang abanse nga pagbantay,madamo sing hudisyal nga mga kaso ang mahimo nga malikawan

[Laragway sa pahina 18]

Bisan sa tion sang hudisyal nga paghusay, ang mga gulang magtinguha sa pagtadlong sa isa nga nakasala sa espiritu sang kalulo