Mga Gulang—Mangin Malulo sa Panong sang Dios!

“Malulo kami sa tunga ninyo, subong sang iloy nga nagabatiti sang iya mga magamay.”​—⁠1 TESALONICA 2:⁠7.

 1. Ngaa ang tagsa ka matutom nga Saksi ni Jehova nagabatyag sing kalig-onan?

SI Jehova amo ang Dakung Manugbantay. Nagaaman sia sing bugana para sa iya kaangay sang karnero nga mga alagad kag nagatuytoy sa ila sa “mga banas sang pagkamatarong” tungod sang iya balaan nga ngalan. Gani, ang mga nagahimo sang iya kabubut-on wala sing ikahadlok nga malain kag makakadto sa ila maluluy-on nga Dios para sa paumpaw. Sa pagkamatuod, ang tagsa ka matutom nga Saksi ni Jehova may maayong rason sa pagbatyag nga malig-on sa mahigugmaon nga pag-ulikid sang Dios.​—⁠Salmo 23:​1-4.

 2. Subong nagapabanaag sa himaya sang Dios, anong mga kinaiya ang ginapakita ni Jesus?

² Si Jesucristo “nagapabanaag sang himaya [sang Dios] kag nagadala sang larawan gid sang iya kinaugali.” (Hebreo 1:​1-4) Gani si Jesus, ang Maayong Manugbantay, nagapakita man sing gugma kag kaluoy. (Juan 10:​14, 15) Halimbawa, sang isa ka okasyon “nakita niya ang dakung kadam-an, kag naluoy sia sa ila, kay subong sila sang mga karnero nga walay manugbantay. Kag nagsugod sia sa pagpanudlo sa ila sing madamo nga butang.”​—⁠Marcos 6:⁠34.

 3. (a) Kaangay nanday Jehova nga Dios kag Jesucristo, anong mga kinaiya ang dapat ipakita sang Cristianong kabulig nga mga manugbantay? (b) Anong laygay kag paandam ang ginhatag ni apostol Pedro sa mga manug­tatap?

³ Ang tanan nga mga Cristiano dapat ‘mag-ilog sa Dios kag maggawi sa gugma subong nga si Cristo man naghigugma sa ila.’ (Efeso 5:​1, 2) Gani dapat sila mangin mahigugmaon kag maluluy-on. Labi na gid ang kabulig nga mga manugbantay sang panong sang Dios. Si apostol Pablo nagsiling: “Tatapa ang inyo mga kaugalingon kag ang bug-os nga panong, nga sa ila ginhimo kamo sang balaan nga espititu nga mga manugtatap, sa pagbantay sang kongregasyon sang Dios nga ginbakal niya sang dugo sang iya kaugalingon nga Anak. Nahibaluan ko nga sa makataliwan na ako sudlon kamo sang mga lobo nga mapintas nga indi mangin malulo sa panong, kag gikan sa inyo gid magalutaw ang mga tawo nga nagapamulong sing mga butang nga balingag sa pagpasunod sa ila sang mga disipulo.”​—⁠Binuhatan 20:​28-30.

 4. (a) Sang ulihi, ano ang natabo nahisuno sa paandam ni Pablo sa Binuhatan 20:​29, 30? (b) Anong mga pamangkot ang nagakaigo karon nga binagbinagon?

⁴ Sang ulihi, ang apostata nga “mga lobo nga mapintas” naglutaw kag ‘nangin dimalulo sa panong.’ Apang malipayon gid kita nga ang mga gulang sa tunga sang mga Saksi ni Jehova indi mapintas! Apang, ano nga sahi sang pagtratar ang ginapaabot sang mga masigkatumuluo nga batunon gikan sa sining gintangdo sang espiritu nga mga manugtatap? Kag paano mapakita sinang mga tinangdoan ang kalulo sa mga karnero ni Jehova?

Indi Magpakaginuo sa Panong

 5. (a) Paano masunson ginatratar sang kalibutanon nga mga lider ang ila mga sakop? (b) Paano ginpakita ni Jesus nga ang kapintas wala sing duog sa tunga sang iya mga sumulunod?

⁵ Makatarunganon nga mapaabot naton nga tratuhon kita sang Cristianong mga gulang sa maluluy-on nga paagi. Indi sila kaangay sang kalibutanon nga mga gumalahom, nga masunson nagapakaginuo sa ila mga sakop. Halimbawa, ginakunokuno nga si Carlomagno nga Frankish nga hari (nga naggahom sang 768-814 C.⁠E.) “nagpuwersa sa mga Sax­on, sa idalom sang kasakit sang kamatayon, nga magpabawtismo, nagtagudili sang pinakamabug-at nga mga silot sa mga nagalapas sang Kuwarisma, kag bisan diin naggamit sang kusog agod makahaylo.” (The History of the Christian Church, ni Wil­liam Jones) Ang kapintas wala sing lugar sa tunga sang mga sumulunod ni Jesus, kay sia nagsiling: “Nahibaluan ninyo nga ang mga punoan sang mga pagano nagapakaginuo sa ila, kag ang ila mga kadalagkuan nagagamit sing pagbulut-an sa ila. Indi mangin subong sini sa inyo, kundi ang bisan sin-o sa inyo nga buot mangin daku mangin alagad ninyo, kag ang bisan sin-o sa inyo nga buot mangin nahauna mangin ulipon ninyo, subong nga ang Anak sang tawo wala magkari nga alagdon kundi sa pag-alagad, kag sa paghatag sang iya kabuhi nga gawad sang madamo.”​—⁠Mateo 20:​25⁠–​28, An American Translation.

 6. (a) Nahanungod sa mga gulang, anong sadsaran nga mga rason ang nagalutaw? (b) Ano ang makatarunganon nga ginapaabot sang kongregasyon sa mga gulang, kag paano dapat nila dapat tamdon ang ila kaugalingon?

⁶ Ang Cristianong lalaki nga ‘nagahandum sang palangakoan sang manugtatap nagahandum sing maayong hilikuton.’ (1 Timoteo 3:1) Kon binagbinagon naton ini kag ang laygay ni Jesus nga bag-o lang ginsitar, ining sadsaran nga mga rason nagalutaw: (1) ang Cristianong mga gulang indi dapat mangin mapintas sa iban; (2) ang mga may responsabilidad sa tunga sang mga sumulunod ni Jesus dapat mangin ulipon nila, indi mga agalon nila; kag (3) ang mga lalaki nga nagahandum sang palangakoan sang pagkamanugtatap dapat magtamod sini subong “maayong hilikuton,” indi subong mataas nga posisyon. (Hulubaton 25:​27; 1 Corinto 1:31) Ang tinaga nga “gulang” wala nagapakataas kay bisan sin-o labaw sa iban nga mga sumilimba ni Jehova. Sa baylo, ang kongregasyon may rason sa pagpaabot sa tanan nga mga gulang nga mangin hamtong sa espirituwal, eksperiensiado, kag mapainubuson nga mga lalaki nga nagapanguna sa balaan nga pag-alagad. Sa pagkamatuod, dapat tamdon sang mga gulang ang ila kaugalingon subong mapainubuson nga mga ulipon ni Jehova nga Dios, ni Jesucristo, kag sang mga masigka Cristiano.​—⁠Roma 12:​11; Galacia 5:⁠13; Colosas 3:​24.

 7. (a) Paano dapat iaplikar sang mga gulang ang 2 Corinto 1:​24 kon nagapakig-angot sa iban? (b) Ano dapat ang himuon sang mga gulang nahanungod sa mga instruksion nga nabaton gikan sa Nagadumala nga Hubon?

⁷ Ang mapainubuson nga pagpaulipon tungod sa iban kinaugali nga nagapugong sa isa ka gulang nga “magpakaginuo” sa ila. Kag daw ano kaayo nga ang aton mga manugtatap nagapakita sang panimuot nga pareho kay Pablo! Ginsilingan niya ang mga Cristiano sa Corinto: ‘Indi nga nagahari kami sa inyo pagtuo, kundi nagapangabudlay kami kaupod ninyo sa inyo kalipay.’ (2 Corinto 1:24) Sing nahisuno, ang mahigugmaon nga nagadumala wala nagapabug-at sa mga masigkatumuluo sang dinagakaigo tawhanon nga mga regulasyon. Sa baylo, ang mga manugtatap sa tunga sang mga Saksi ni Jehova ginagahoman sang Makasulatanhon nga mga prinsipio kag nagahimo sing malulo kag mapuslanon nga pag-alagad. Nagapakita man sila sing tudok nga pagtahod sa panong sang Dios paagi sa gilayon nga pagsunod sa mga instruksion nga nabaton gikan sa Nagadumala nga Hubon sang mga Saksi ni Jehova.​—⁠Binuhatan, kapitulo 15.

 8. Ano ang panimuot ni Pablo sa mga masigkatumuluo, kag paano ini dapat magaapektar sa ika-20 ka siglo nga mga gulang?

⁸ Bangod malulo si Pablo sa panong sang Dios, sarang niya masilingan ang mga Cristiano sa Tesalonica: “Malulo kami sa tunga ninyo, subong sang iloy nga nagabatiti sang iya mga magamay. Gani, sanglit nga nagahandum sa inyo sing mahigugmaon, nahamuot kami sa pagpaambit sa inyo indi lamang sang maayong balita sang Dios kundi man sang amon mga kalag, bangod nga nangin mahal gid kamo sa amon.” (1 Tesalonica 2:​7, 8) Si Pablo nagpanghikot subong sang nagabatiti nga iloy, nga nagahigugma sang iya mga anak sing tudok sa bagay nga ginauna niya ang ila kaayuhan sang sa iya kag malulo sa ila. Dapat gid ini magpahulag sa ika-20 ka siglo nga mga gulang nga mangin malulo sa panong sang Dios!

Mga Tuburan sang Paumpaw kag Kapahuwayan

 9. Anong mga kahimtangan sang karon nga katawhan ni Jehova ang gintagna sa Isaias 32:​1, 2?

⁹ Nagatudlo sa sining adlaw sang paggahom sa Ginharian ni Jesucristo, si manalagna Isaias nagtagna nga ang isa ka hari “magahari sa pagkamatarong” kag ang “mga prinsipe” magagahom sa “katarungan.” Gani, ang mga gulang sa teokratikong organisasyon karon nagatatap sang intereses sang natukod na nga Ginharian sa langit​—⁠isa gid matuod ka prinsipenhon nga pag-alagad! Naaplikar sa sining responsable nga mga lalaki ang dugang matagnaon nga pulong ni Isaias: “Ang isa ka tawo mangin subong sang palalipdan sang hangin kag palanagoan sa unos, subong sang mga ilig sang tubig sa duog nga kigas, subong sang landong sang daku nga igang sa duta nga makalalapyo.”​—⁠Isaias 32:​1, 2.

10. Tuburan sang ano dapat ang kada gulang sa tunga sang mga Saksi ni Jehova?

¹⁰ Indi kaangay sang mapintas nga relihiosong mga lider sang Cristiandad, ang mga gulang sa tunga sang mga Saksi ni Jehova mga tuburan sang paumpaw kag kapahuwayan. Subong hubon sang gulang nga mga lalaki, ginapauswag nila ang paghidait, kalinong, kag kalig-onan sa tunga sang katawhan ni Jehova. Sing indibiduwal, ang kada gulang mahimo makaamot sa sining maayo nga kahimtangan paagi sa pagkamangin malulo sa panong sang Dios.

Sa Katarungan kag Pagkamatarong

11. (a) Ano ang kabilugan nga kahimtangan nga nagluntad sa tunga sang unang-siglo nga mga Cristiano ang nagaluntad sa kalabanan nga mga kongregasyon sang mga Saksi ni Jehova karon? (b) Ano ang responsabilidad sang mga manugtatap sa kongregasyon, kag ngaa?

¹¹ Bisan pa nag-utwas ang mga problema sa pila ka Cristianong kongregasyon sang unang-siglo, ang ila kabilugan nga kahimtangan mahidaiton, nahiusa, kag masadya. (1 Corinto 1:​10-12; 3:​5-9; Efeso 1:​2; Santiago 2:​1-9; 3:​2-12; 4:​11, 12; 1 Juan 1:​3, 4) Ang maayong espirituwal nga kahimtangan nagaluntad man sa kalabanan nga mga kongregasyon sang mga Saksi ni Jehova karon bangod sang pagpakamaayo sang Dios, sang pagpangulo ni Cristo, kag sang matutom nga pagpangabudlay sang gintangdo nga mga manugtatap. Agod masiguro ang paghidait, paghiusa, kag kasadya sa kongregasyon, ining mga lalaki nagapangayo sang bulig sang Dios kag makugi nga nagapanikasog sa paghupot sang organisasyon sang Dios nga matinlo, sa moral kag sa espirituwal. (Isaias 52:11) Ang dimatinlo nga organisasyon indi gid mahimo nga mangin mahidaiton kag malipayon, kag pat-od gid nga indi ini makatigayon sang kahamuot kag pagpakamaayo sang Dios. Sia “putli pa sing mga mata sang sa magtulok sa malaut,” sa pagpasapayan sa sala. (Habacuc 1:13) Sa tunga sang iban nga mga butang, nian, ang mga gulang ginapaabot sa pagtatap sa hudisyal nga mga butang sa matarong kag Makasulatanhon nga paagi. Apang anong iban nga mga butang ang dumdumon kon nagatatap sina nga mga kaso?

12. Bisan pa ang mga gulang indi kinahanglan maghilabot sa personal nga mga butang nga wala nagalapas sa mga kasuguan kag mga prinsipio sang Biblia, ano ang dapat himuon nahisuno sa Galacia 6:​1?

¹² Una, kon nahanungod sa personal nga dipaghangpanay, mahimo posible para sa mga indibiduwal nga mahusay ini sing pribado. (Mateo 18:​15-17) Sanglit ang mga gulang indi ‘mga agalon sang aton pagtuo,’ wala ginapaabot nga hilabtan nila ang personal nga mga butang nga wala nagalapas sing mabug-at sa mga kasuguan ukon mga prinsipio sang Biblia. Natural, kon may ebidensia nga ang isa nakahimo sing “sayop nga tikang sa wala pa niya ini mamulalungi,” yadtong may espirituwal nga kalipikasyon dapat “magpasag-uli sa iya sa espiritu nga malulo.”​—⁠Galacia 6:⁠1.

13. Paano ginapakita sang Kasulatan nga ang mga gulang dapat magpanghikot sa ebidensia sang sala, indi sa sugidsugid lamang?

¹³ Ang mga gulang magaalagad para sa “katarungan,” pirme wala sing ginadampigan. Gani dapat sila magpanghikot sa ebidensia sang sala, indi sa sugidsugid lamang. Si Pablo naglaygay: “Dili magbaton sing panumbong batok sa isa ka tigulang, luwas sa pagpamatuod sang duha ukon tatlo ka saksi.” (1 Timoteo 5:19) Suno sa talaksan ni Jehova, sa dumaan nga Israel ang isa nga ginsumbong sang isa ka mabug-at nga sala ginapatay ‘sa baba sang duha ukon tatlo ka saksi, indi sang isa.’ Dugang pa, ang ginsumbong mahimo may kahigayunan sa pag-atubang sa nagasumbong sa iya, kag kon ang ebidensia bastante, ‘ang kamot sang mga saksi magauna sa iya sa pagpatay sa iya.’​—⁠Deuteronomio 17:​6, 7.

14. (a) Ano ang sayop nga gintinguhaan nga himuon ni Diotrefes? (b) Ano ang ginapaabot sang Dios sa mga gulang kon sila nagauyat sang hudisyal nga mga ­problema?

¹⁴ Dapat may maayong Makasulatanhon nga sadsaran para sa hudisyal nga buhat. Malipayon gid kita nga ang mga manugtatap sa kongregasyon indi subong kay Diotrefes nga bugalon sang unang siglo C.⁠E.! Gintinguhaan niya sing sayop nga ‘subulon gikan sa kongregasyon’ ang maluyag sa pagbaton sing maabiabihon sa nagalakbay nga mga utod. Wala gintamod ni apostol Juan ini kag ang iban pa nga sayop nga butang sing mamag-an kundi nagpaandam: “Kon magkara ako, dumdumon ko ang ginahimo niya.” (3 Juan 9, 10) Busa, dapat siguraduhon sang karon nga hudisyal nga komite nga may sadsaran sa Biblia ang ginahimo nila nga pag-disfellowship kay bisan sin-o.⁠a Sa pagkamatuod, ginapaabot sang Dios sa Cristianong mga gulang nga mangin makatarunganon sa pagpakig-angot sa iban. Huo, ang nagadumala sang hilikuton sa dutan-on nga organisasyon ni Jehova dapat “mga tawo nga sangkol, nga mahadlukon sa Dios, mga tawo nga maminatud-on.”​—⁠Exodo 18:⁠21.

15. Ano ang mahimo sang pangamuyo sa hudisyal nga mga kasaba?

¹⁵ Dapat pangayuon sang tagsa ka Cristianong hudisyal nga komite ang bulig ni Jehova sa tinagipusuon nga pangamuyo. Ang pagpakigkita sa utod nga lalaki ukon babayi nga ginsumbong sang mabug-at nga sala dapat buksan sang pangamuyo. Sa katunayan, nagakaigo mangamuyo sa bisan anong tion sa sulod sang paghambalanay kon nagautwas ang isa ka partikular nga kinahanglanon para sa bulig sang Dios.​—⁠Santiago 5:​13-18.

16. Sa anong paagi dumalahan sang mga gulang ang hudisyal nga mga kasaba, kag ngaa?

¹⁶ Nahibaluan sang mga gulang nga ang isa ka masigkatumuluo nga ginsumbong sang sala “karnero” sa panong sang Dios kag dapat mangin malulo sa iya. (Ipaanggid ang Ezequiel 34:​7-14.) Ang literal nga mga karnero nagakinahanglan sing malulo nga pag-atipan, kay sila mahinadlukon nga mga tinuga nga nagasalig sa ila manugpahalab para sa proteksion. Gani, kamusta ang malaragwayon nga mga karnero sa lokal nga kongregasyon? Walay duhaduha nga nagabatyag sila nga malig-on sa pagtatap sang Dakung Manugbantay, si Jehova nga Dios, kag sang Maayong Manugbantay, si Jesucristo. Apang ang kabulig nga mga manugbantay sang panong dapat magpanghikot sa mga paagi nga makahatag sing nasulod nga paghidait kag kalig-onan sa kaangay sang karnero nga mga alagad ni Jehova. Nian, kon isa ikaw ka Cristianong kabulig nga manugbantay, ang imo kauturan nga lalaki kag babayi nagabatyag bala nga malig-on kag malinong sa imo pagtatap? Matuod, ang mga gulang dapat manguyapot sing malig-on sa mga kasuguan kag mga prinsipio sang Biblia. Apang ginakinahanglan sang Kasulatan nga pakig-angotan nila ang karnero sing mahigugmaon kag dumalahan ang hudisyal nga kasaba sa kalma, ­mahim-ong, malulo, kag mapatugsilingon nga paagi.

17. Anong Makasulatanhon nga mga punto ang dapat dumdumon sang mga gulang, labi na sa tion sang hudisyal nga mga kasaba?

¹⁷ Bangod dihimpit, “sa madamong butang kita tanan nakasayop” sa aton ginahambal. (Santiago 3:2) Ang kada isa sa aton nagakinahanglan sang kaluoy sang Dios kag sang “katumbas nga halad.” (1 Juan 1:​8⁠–​2:​2; Salmo 130:3) Gani dapat tamdon sing mapainubuson sang Cristianong kabulig nga manugbantay ang iya kaugalingon. Dapat man niya dumdumon ang ginsiling ni Jesus: “Ang buot ninyo nga himuon sa inyo sang mga tawo, himoa man ninyo sa ila ang subong.” (Lucas 6:31) Labi na gid nga dapat iaplikar ini nga laygay sa hudisyal nga mga kasaba. Ang kalipikado sa espirituwal nga mga lalaki dapat magatinguha sa pagpasag-uli sa nakasala nga Cristiano ‘sa espiritu nga malulo, samtang nagaandam sa ila kaugalingon, basi kon sila man pagsulayon.’​—⁠Galacia 6:​1; 1 Corinto 10:⁠12.

18. (a) Ano ang mahimo magaresulta kon ang mga gulang dimalulo sa tion sang hudisyal nga mga kasaba? (b) Nahisanto sa Marcos 6:​42, batok sa paghimo sang ano dapat mag-andam ang mga gulang kag ang iban nga mga Cristiano?

¹⁸ Kon ang mga gulang mangin dimalulo sa tion sang hudisyal nga mga kasaba, mahimo ini magahalit sa sinang mga indibiduwal. Apang bisan pa wala nagaresulta ang emosyonal ukon pisikal nga halit, mahimo may daku ini nga espirituwal nga halit, kag ang kalipikasyon sang mga manugtatap mahimo man pangduhaduhaan. (Ipaanggid ang Santiago 2:⁠13.) Busa, sa tion sang hudisyal nga mga kasaba kag sa tanan iban pa nga tion, ang mga gulang dapat mangin malulo kag dapat mag-andam batok sa pagpasandad sa iban. Sa pagkamatuod, ang tanan nga mga Cristiano dapat maghalong sa sining bahin, kay si Jesus nagsiling: “Ang bisan sin-o nga nagapasandad sa isa sining mga magamay nga nagatuo sa akon, maayo pa sa iya nga bitayan sa liog sing dakung bato sang galingan kag itagbung sa dagat.” (Marcos 9:42) Ang naibabaw nga galingan tuman kadaku sa bagay nga ang kusog sang sapat amo ang kinaandan nga kinahanglan sa pagliso sini, kag wala sing itagbung sa dagat nga may amo sina kabug-at sa liog ang mabuhi. Sa pagkamatuod, nian, ang gulang dapat maghalong nga indi magsandad nga mahimo magaresulta sa mapinadayunon espirituwal nga halit sa iya kaugalingon kag sa bisan sin-o nga nasandad.​—⁠Filipos 1:​9-11.

Padayon nga Mangin Malulo

19. Anong laygay ang ginhatag ni Pedro sa mga masigka gulang, kag ano ang labot sang nagakaigo nga pagsunod sa sini sa ila mga paglaum?

¹⁹ Ginpakita ni apostol Pedro nga ang mga masigka manugtatap magabantay sa panong sang nagsulat sia: “Tatapa ninyo ang panong sang Dios nga gintugyan sa inyo, indi sa pilit, kundi sing kinabubut-on; indi tungod sa didungganon nga daug, kundi sa may pagkahanda; nga wala nagapakaginuo sa mga panublion sang Dios kundi mangin mga huwaran sa panong. Kag kon magpahayag ang pangulo nga manugbantay magabaton kamo sang wala pagkalaya nga purungpurong sang himaya.” (1 Pedro 5:​2-4) Paagi lamang sa pag-aplikar sina nga laygay kag sa pagpakita sing kalulo sa panong sang Dios nga ang gintangdo nga mga manugtatap makatigayon sing langitnon nga padya subong dimamalatyon espirituhanon nga mga tinuga kag nga ang mga gulang nga may dutan-on nga paglaum makabaton sang dayon nga kabuhi sa nagapakari tugob-globo nga Paraiso.

20. (a) Paano dapat pakig-angotan sang Cristianong kabulig nga mga manugbantay ang ila mga masigkatumuluo? (b) Ano ang balatyagon mo nahanungod sa huwaran nga pag-alagad kag mahigugmaon nga pag-ulikid sang mahigugmaon nga mga gulang?

²⁰ Si Jehova nga Dios kag si Jesucristo lunsay mahigugmaon kag maluluy-on nga mga Manugbantay. Gani samtang malig-on nga ginasunod sang Cristianong kabulig nga mga manugbantay ang balaan nga mga pagsulundan, dapat sila magpakita sang gugma kag kaluoy sa pagpakig-angot sa ila kaangay sang karnero nga mga masigkatumuluo. Sa pagkamatuod, ang tanan matutom nga mga Saksi ni Jehova nagaapresyar sing tudok sang huwaran nga pag-alagad sinang nagasakripisyo sang kaugalingon nga mga gulang nga nagaatipan sang ila alatipanon kag malulo sa panong sang Dios. Ina nga apresasyon, ginaupdan sang nagakaigo nga pagtahod, sarang mapakita paagi sa pagkamatinumanon sa nagapanguna sa tunga naton.

[Footnote]

Ano ang Panghunahuna Mo?

◻ Paano ginpakita ni Jesus nga ang pagkadimalulo wala sing lugar sa tunga sang iya mga sumulunod?

◻ Ano dapat ang himuon sang mga gulang sa mga instruksion nga nabaton gikan sa Nagadumala nga Hubon?

◻ Suno sa Isaias 32:​1, 2, tuburan sang ano dapat ang mga gulang?

◻ Paano ginapakita sang Kasulatan nga ang mga gulang indi dapat magpanghikot sa sugidsugid lamang?

◻ Paano dapat tratuhon sang Cristianong kabulig nga mga manugbantay ang panong?

[Piktyur sa pahina 18]

Ang tinagipusuon nga pangamuyo importante kon ang hudisyal nga komite nagapakigkita sa masigkatumuluo