Hupti sing Tudok sa Hunahuna ang Adlaw ni Jehova

“Sa katapusan nga mga adlaw magaabot ang mga mayubiton.”​—⁠2 PEDRO 3:⁠3.

1. Anong balatyagon sang pagkahilingagawon ang nabatyagan sang isa ka modernong-adlaw nga Cristiano?

ANG isa ka bug-os tion nga ministro sa sulod sing kapin sa 66 ka tuig nagsulat: “Pirme ako nagabatyag sing pagkahilingagawon. Pirme ko ginahunahuna nga ang Armagedon tuman na kalapit. (Bugna 16:​14, 16) Kaangay sang akon amay, kag sang akon lolo, nagkabuhi ako suno sa ginsugo ni apostol [Pedro], ‘ginahuptan sing tudok sa hunahuna ang presensia sang adlaw ni Jehova.’ Pirme ko ginatamod ang ginsaad nga bag-ong kalibutan subong isa ka ‘katunayan bisan nga wala makita.’ ”​—⁠2 Pedro 3:​11, 12; Hebreo 11:​1; Isaias 11:​6-9; Bugna 21:​3, 4.

2. Ano ang buot silingon nga huptan sing tudok sa hunahuna ang adlaw ni Jehova?

² Ang ekspresyon ni Pedro nga “hupti sing tudok sa hunahuna” tuhoy sa adlaw ni Jehova nagakahulugan nga wala naton ini ginadula sa aton hunahuna. Indi naton dapat kalimtan nga ang adlaw sang paglaglag ni Jehova sa sining sistema sang mga butang subong panugod sang iya pagtukod sang iya ginsaad nga bag-ong kalibutan tuman na kalapit. Dapat ini mangin matuod gid sa aton nga subong nga daw nakita naton ini sing maathag, nga yara lamang ini sa unahan naton. Amo sina anay ka matuod sa mga manalagna sang Dios, kag masami nila ginasiling nga ini malapit na.​—⁠Isaias 13:​6; Joel 1:​15; 2:​1; Abdias 15; Sofonias 1:​7, 14.

3. Ano ang maathag nga nagpahulag sa laygay ni Pedro tuhoy sa adlaw ni Jehova?

³ Ngaa ginapalig-on kita ni Pedro nga tamdon ang adlaw ni Jehova subong nga malapit na ini kaayo? Bangod ginayubit sang iban ang ideya sang ginsaad nga presensia ni Cristo diin pagasilutan ang mga malauton. (2 Pedro 3:​3, 4) Sa amo, sa kapitulo 3 sang iya ikaduha nga sulat, nga pagabinagbinagon naton karon, ginasabat ni Pedro ang mga panumbungon sining mga mayubiton.

Mahigugmaon nga Pangabay nga Dapat Dumdumon

4. Ano ang luyag ni Pedro nga dumdumon naton?

⁴ Ang gugma ni Pedro sa iya mga kauturan ginapakita sa iya sulitsulit nga pagtawag sa ila sa sini nga kapitulo subong “mga hinigugma.” Mahigugmaon nga nagapangabay sa ila nga indi pagkalimtan ang gintudlo sa ila, si Pedro nagsugod sa pagsiling: “Mga hinigugma, . . . ginapukaw ko ang inyo bunayag nga hunahuna sa pagpahanumdom sa inyo, nga dapat ninyo dumdumon ang mga hulubaton nga ginhambal anay sang balaan nga mga manalagna kag ang sugo sang Ginuo kag Manluluwas paagi sa inyo mga apostoles.”​—⁠2 Pedro 3:​1, 2, 8, 14, 17; Judas 17.

5. Ano ang ginsiling sang pila ka manalagna tuhoy sa adlaw ni Jehova?

⁵ Anong “mga hulubaton nga ginahambal anay sang balaan nga mga manalagna” ang luyag ni Pedro nga dumdumon sang mga bumalasa? Ti, yadtong tuhoy sa presensia ni Cristo sa paggahom sa Ginharian kag tuhoy sa paghukom sa mga didiosnon. Ginpatuhuyan anay ni Pedro ining mga hulubaton. (2 Pedro 1:​16-​19; 2:​3-​10) Ginpatuhuyan ni Judas si Enoc, nga amo ang una nga ginrekord nga manalagna nga nagpaandam tuhoy sa daku nga paghukom sang Dios sa mga malauton. (Judas 14, 15) Ginsunod sang iban nga manalagna si Enoc, kag indi luyag ni Pedro nga kalimtan naton ang ila ginsulat.​—⁠Isaias 66:​15, 16; Sofonias 1:​15-​18; Zacarias 14:​6-9.

6. Anong mga pinamulong ni Cristo kag sang iya mga apostoles ang nagpaathag sa aton tuhoy sa adlaw ni Jehova?

⁶ Dugang pa, ginsugiran ni Pedro ang iya mga bumalasa nga dumdumon “ang sugo sang Ginuo kag Manluluwas.” Ang sugo ni Jesus nagalakip sa laygay: “Andam kamo sa inyo mga kaugalingon basi ang inyo mga tagipusuon mabug-atan sa pagpatuyang . . . kag yadtong adlaw magaabot sa inyo sing hinali subong sang siod.” “Padayon kamo nga magbantay, magpadayon kamo nga nagamata, kay wala ninyo mahibalui kon san-o ang gintalana nga tion.” (Lucas 21:​34-​36; Marcos 13:33) Ginasugo man kita ni Pedro nga pamatian ang ginasiling sang mga apostoles. Halimbawa, si apostol Pablo, nagsulat: “Ang adlaw ni Jehova magaabot subong sang isa ka makawat sa kagab-ihon. Busa, indi kita magtulog kaangay sang iban, apang magpadayon kita nga nagamata kag magbut-anan.”​—⁠1 Tesalonica 5:​2, 6.

Ang mga Handum Sang mga Mayubiton

7, 8. (a) Ano nga sahi sang mga tawo yadtong nagayubit sa nagapaandam nga mensahe sang Dios? (b) Ano ang ginapangangkon sang mga mayubiton?

⁷ Subong sang ginsiling na, ang rason sang paglaygay ni Pedro amo nga may pila ka tawo nga nangin mayubiton sa sinang mga paandam, bisan gani ang mga Israelinhon sang una nga mga tion nangin mayubiton man sa mga manalagna ni Jehova. (2 Cronica 36:⁠16) Si Pedro nagapaathag: “Una sa tanan kinahanglan hibaluon ninyo ini, nga sa katapusan nga mga adlaw ang mga mayubiton magaabot nga may pagyubit, nga nagasunod sang ila kaugalingon nga kailigbon.” (2 Pedro 3:3) Si Judas nagasiling nga ang mga handum sining mga mayubiton “para sa didiosnon nga mga butang.” Ginatawag niya sila nga “sapatsapaton nga mga tawo, nga wala sing espirituwalidad.”​—⁠Judas 17-19.

⁸ Ang butig nga mga manunudlo nga ginsiling ni Pedro nga “nagasunod sa unod upod ang handum nga dagtaan ini” mahimo nga nagalakip sa sining mga mayubiton nga wala sing espirituwalidad. (2 Pedro 2:​1, 10, 14) Mayubiton nga ginpamangkot nila ang matutom nga mga Cristiano: “Diin bala ang saad sang iya presensia? Kay kutob sang pagtulog sang aton mga katigulangan sa kamatayon, ang tanan nagapadayon subong nga amo sila kutob sa ginsuguran sang pagpanuga.”​—⁠2 Pedro 3:⁠4.

9. (a) Ngaa wala ginasapak sang mga mayubiton ang pagkahilingagawon nga masapwan sa Pulong sang Dios? (b) Paano ang paghupot sing tudok sa hunahuna sang adlaw ni Jehova isa ka pangamlig sa aton?

⁹ Ngaa may amo sini nga pagyubit? Ngaa nagasiling sila nga ang presensia ni Cristo indi gid matabo, nga ang Dios wala nagapasilabot sa mga hilikuton sang tawo kag indi gid magapasilabot? Ti, paagi sa dipagsapak sa pagkahilingagawon nga yara sa Pulong sang Dios, ining sapatsapaton nga mga mayubiton nagatinguha nga paluyahon ang iban kag sa amo nagahimo sa ila nga mahapos mabiktima sang makagod nga mga pagsulay. Daw ano kadaku nga pagpalig-on sa aton karon nga magpabilin nga nagamata sa espirituwal! Kabay nga huptan naton sing tudok sa hunahuna ang adlaw ni Jehova kag pirme dumdumon nga ang iya mga mata nagatulok sa aton! Sa amo mapahulag kita nga mag-alagad sing makugi kay Jehova kag huptan ang aton moral nga kaputli.​—⁠Salmo 11:​4; Isaias 29:​15; Ezequiel 8:​12; 12:​27; Sofonias 1:⁠12.

Hungod kag Makahuluya

10. Paano ginpamatud-an ni Pedro nga sayop ang mga mayubiton?

¹⁰ Wala ginsapak sadtong mga mayubiton ang isa ka importante nga katunayan. Wala nila ini ginasapak sing hungod kag gintinguhaan nga malipatan ini sang iban. Ngaa? Agod mas mahapos nila nga masulay ang mga tawo. “Kay, suno sa ila handum,” sulat ni Pedro, “ining kamatuoran naglagpas sa ila igtalupangod.” Anong kamatuoran? “Nga may mga langit kutob sang una pa kag duta nga nagatindog nga malig-on gikan sa tubig kag sa tunga sang tubig paagi sa Pulong sang Dios; kag paagi sa sining mga pamaagi ang kalibutan sadto nga tion nalaglag sang malapawan ini sang tubig.” (2 Pedro 3:​5, 6) Huo, gindula ni Jehova ang malauton sa duta sa tion sang Anaw sadtong mga adlaw ni Noe, isa ka kamatuoran nga ginpadaku man ni Jesus. (Mateo 24:​37-​39; Lucas 17:​26, 27; 2 Pedro 2:5) Gani, kabaliskaran sa ginasiling sang mga mayubiton, ang tanan nga butang wala magpadayon “sing pareho gid kutob sang pagpanuga.”

11. Anong abanse nga mga pagpaabot sang unang mga Cristiano ang nagdul-ong sa iban nga yubiton sila?

¹¹ Mahimo nga ginyubit sang mga mayubiton ang matutom nga mga Cristiano bangod daw wala pa ini matuman nga mga ginapaabot. Wala madugay antes mapatay si Jesus, ang iya mga disipulo “naghunahuna nga ang ginharian sang Dios magaabot sa gilayon.” Nian, pagkatapos sang iya pagkabanhaw namangkot sila kon bala tukuron gilayon ang Ginharian. Subong man, mga napulo ka tuig antes ginsulat ni Pedro ang iya ikaduha nga sulat, ang iban “nagkalangkag” sa “isa ka sugidsugid nga mensahe” ukon “isa ka sulat,” nga kuno halin kay apostol Pablo ukon sa iya mga kaupdanan, “nga nagasiling nga ang adlaw ni Jehova nag-abot na.” (Lucas 19:​11; 2 Tesalonica 2:​2; Binuhatan 1:6) Apang, yadtong mga pagpaabot sang mga disipulo ni Jesus indi sayop, kundi abanse lamang. Ang adlaw ni Jehova magaabot gid!

Ang Pulong Sang Dios Masaligan

12. Paano ang Pulong sang Dios napamatud-an nga masaligan sa mga tagna sini tuhoy sa “adlaw ni Jehova”?

¹² Subong sang ginpakita na, ang mga manalagna antes sang Cristianismo masami nagapaandam nga ang adlaw sang pagtimalos ni Jehova malapit na. Ang diutay nga katumanan sang “adlaw ni Jehova” nag-abot sang 607 B.C.E. sang gintimalusan ni Jehova ang iya balingag nga katawhan. (Sofonias 1:​14-18) Sang ulihi, ang iban nga mga pungsod, lakip ang Babilonia kag Egipto, nakaeksperiensia sing kaanggid nga “adlaw ni Jehova.” (Isaias 13:​6-9; Jeremias 46:​1-​10; Abdias 15) Ang katapusan sang unang siglo nga Judiyong sistema sang mga butang gintagna man, kag natuman ini sang ginlaglag sang mga hangaway sang Roma ang Judea sang 70 C.⁠E. (Lucas 19:​41-​44; 1 Pedro 4:7) Apang ginapatuhuyan ni Pedro ang isa ka palaabuton nga “adlaw ni Jehova,” ang isa nga mas daku pa sangsa bug-os globo nga Anaw!

13. Anong maragtason nga halimbawa ang nagapakita sing kasiguruhan sang katapusan sang sistema sang mga butang?

¹³ Ginsugdan ni Pedro ang iya paglaragway sinang nagapakari nga kalaglagan, nga nagasiling: “Apang paagi sa amo man nga pulong.” Bag-o lang niya ginsiling nga “paagi sa pulong sang Dios,” ang antes sang Baha nga duta nagatindog “gikan sa tubig kag sa tunga sang tubig.” Ining kahimtangan, nga ginalaragway sa rekord sang Biblia tuhoy sa pagpanuga, amo ang gintunaan sang Anaw sang ang tubig nagbuhos suno sa luyag, ukon sa pulong sang Dios. Si Pedro nagapadayon: “Sa amo man nga pulong [sang Dios] ang mga langit kag ang duta nga amo karon gintigana sa kalayo, nga gintipigan nga sa adlaw sang paghukom kag kalaglagan sang mga tawo nga didiosnon.” (2 Pedro 3:​5-7; Genesis 1:​6-8) Ginapamatud-an ini sang masaligan nga pulong ni Jehova! Laglagon niya ang “mga langit kag ang duta”​—⁠ining sistema sang mga butang​—⁠sa kalayuhon nga kasingkal sang iya dakung adlaw! (Sofonias 3:8) Apang san-o?

Kalangkag sa Pag-abot Sang Katapusan

14. Ngaa makasalig kita nga nagakabuhi kita karon sa “katapusan nga mga adlaw”?

¹⁴ Luyag mahibaluan sang mga disipulo ni Jesus kon san-o magaabot ang katapusan, gani ginpamangkot nila sia: “Ano ang tanda sang imo presensia kag sang konklusion sang sistema sang mga butang?” Maathag nga ginapamangkot nila kon san-o matapos ang Judiyong sistema, apang ang sabat ni Jesus panguna nga nasentro kon san-o pagalaglagon ang karon nga ‘mga langit kag duta.’ Gintagna ni Jesus ang mga butang subong sang dakung inaway, kakulang sing pagkaon, mga linog, balatian, kag krimen. (Mateo 24:​3-14; Lucas 21:​5-36) Kutob sang tuig 1914, nakit-an naton ang katumanan sang tanda nga ginhatag ni Jesus para sa “konklusion sang sistema sang mga butang” subong man ang mga butang nga ginsambit ni apostol Pablo nga magapakilala sa “katapusan nga mga adlaw.” (2 Timoteo 3:​1-5) Sa pagkamatuod, mabaskog gid ang pamatuod nga nagakabuhi kita sa tion sang katapusan sining sistema sang mga butang!

15. Ano ang luyag himuon sang mga Cristiano walay sapayan sang paandam ni Jesus?

¹⁵ Ang mga Saksi ni Jehova nalangkag gid sa paghibalo kon san-o mahanabo ang adlaw ni Jehova. Bangod sa ila kalangkag gintinguhaan anay nila nga bulubantaon kon san-o ini magaabot. Apang sa paghimo sini, napaslawan sila, subong sa una nga mga disipulo ni Jesus, sa pagpamati sa paandam sang ila Agalon nga “wala naton mahibaluan kon san-o ang gintalana nga tion.” (Marcos 13:​32, 33) Ginyubit sang mga mayubiton ang matutom nga mga Cristiano bangod sang ila abanse nga mga pagpaabot. (2 Pedro 3:​3, 4) Apang, ang adlaw ni Jehova pat-od nga magaabot, siling ni Pedro, suno sa Iya tion.

Kinahanglan Matigayon ang Pagtamod ni Jehova

16. Anong laygay ang maalamon naton nga pamatian?

¹⁶ Kinahanglan nga matigayon naton ang pagtamod ni Jehova tuhoy sa tion, subong sang ginapahanumdom sa aton karon ni Pedro: “Apang, indi ninyo pagkalimti ining kamatuoran, mga hinigugma, nga ang isa ka adlaw kay Jehova subong sang isa ka libo ka tuig kag ang isa ka libo ka tuig subong sang isa ka adlaw.” Daw ano kalip-ot kon ipaanggid ang kalawigon sang aton kabuhi nga 70 ukon 80 ka tuig! (2 Pedro 3:​8; Salmo 90:​4, 10) Gani kon ang katumanan sang mga saad sang Dios daw nagapalantang, dapat naton batunon ang laygay sang manalagna sang Dios: “Bisan kon ini [ang gintalana nga tion] magpalantang, paabuta ini; kay sa pagkamatuod magaabot ini. Indi ini magpalantang.”​—⁠Habacuc 2:⁠3.

17. Walay sapayan nga ang katapusan nga mga adlaw nagpadayon sing malawig sangsa ginapaabot sang madamo, sa ano kita dapat magsalig?

¹⁷ Ngaa ang katapusan nga mga adlaw sining sistema nagpadayon sing malawig sangsa ginpaabot? Bangod sang isa ka maayo nga rason, subong sang masunod nga ginapaathag ni Pedro: “Si Jehova indi mahinay kon tuhoy sa iya saad, subong sang ginakabig sang iban nga tawo nga kahinayon, kundi mapailubon sia sa inyo bangod indi niya luyag nga malaglag ang bisan sin-o kundi nagahandum nga ang tanan makadangat sa paghinulsol.” (2 Pedro 3:9) Ginatan-aw ni Jehova kon ano ang pinakamaayo sa bug-os nga katawhan. Ang iya ginakabalak-an amo ang kabuhi sang mga tawo, subong sang iya ginasiling: “Wala ako nalipay sa kamatayon sang isa nga malauton, kundi nga ang malauton magbiya sa iya dalanon kag padayon nga magkabuhi.” (Ezequiel 33:11) Sa amo makasalig kita nga ang katapusan magaabot sa husto gid nga tion agod tumanon ang katuyuan sang aton maalamon, mahigugmaon nga Manunuga!

Ano ang Magataliwan?

18, 19. (a) Ngaa determinado si Jehova nga laglagon ining sistema sang mga butang? (b) Paano ginlaragway ni Pedro ang katapusan sining sistema, kag ano sa aktuwal ang malaglag?

¹⁸ Bangod ginahigugma gid ni Jehova yadtong nagaalagad sa iya, laglagon niya yadtong nagatuga sing kabudlayan sa ila. (Salmo 37:​9-11, 29) Ginasambit ang subong sang ginsiling ni Pablo kaina, nga ining kalaglagan magaabot sa wala ginapaabot nga tion, si Pedro nagsulat: “Ang adlaw ni Jehova magaabot subong sang makawat, diin ang mga langit magataliwan nga may nagabiti nga gahod, apang ang mga elemento bangod sang tuman nga kainit nagakatunaw, kag ang duta kag ang mga binuhatan sa sini mapadayag.” (2 Pedro 3:​10; 1 Tesalonica 5:2) Ang literal nga mga langit kag duta wala malaglag sa tion sang Anaw, kag indi man ini malaglag sa tion sang adlaw ni Jehova. Ano, nian ang “magataliwan,” ukon malaglag?

¹⁹ Ang tawhanon nga mga panguluhan nga naggahom sa tawo kaangay sang “mga langit” matapos kag amo man ang “duta,” ukon tawhanon didiosnon nga katilingban. Ang “nagabiti nga gahod” ayhan nagapatuhoy sa madasig nga pagkadula sang mga langit. “Ang mga elemento” nga nagahuman karon sa garok nga katilingban sang tawo “matunaw,” ukon malaglag. Kag ang “duta,” lakip ang “mga binuhatan sa sini,” “mapadayag.” Ibuyagyag sing lubos ni Jehova ang malaut nga buhat sang mga tawo samtang ginapahanabo niya ang takus nga katapusan sang bug-os nga sistema sang kalibutan.

Padayon nga Isentro ang Inyo Igtalupangod sa Inyo Paglaum

20. Paano ang ihibalo tuhoy sa mga mahanabo sa palaabuton makaapektar sa aton kabuhi?

²⁰ Sanglit malapit na ining dramatiko nga mga hitabo, si Pedro nagasiling nga dapat kita madalahig “sa balaan nga mga pagginawi kag mga buhat sang diosnon nga debosyon, nagahulat kag ginahuptan sing tudok sa hunahuna ang presensia sang adlaw ni Jehova.” Wala sing duhaduha sa sini! “Ang mga langit nga yara sa kalayo matunaw kag ang mga elemento bangod sang tuman nga kainit matunaw!” (2 Pedro 3:​11, 12) Ang katunayan nga ining dramatiko nga mga hitabo mahimo matabo buwas dapat mag-apektar sa tagsa naton ka ginaplano ukon ginahimo.

21. Ano ang magabulos sa karon nga mga langit kag duta?

²¹ Ginasugiran kita karon ni Pedro kon ano ang magabulos sa daan nga sistema, nga nagasiling: “Apang may bag-ong mga langit kag bag-ong duta nga aton ginahulat suno sa iya saad, diin magapuyo ang pagkamatarong.” (2 Pedro 3:​13; Isaias 65:17) Abaw, daw ano nga kaumpawan! Si Cristo kag ang iya 144,000 nga kaupod nga manuggahom nga magahuman sa “bag-ong” panguluhan nga “mga langit,” kag ang mga tawo nga makalampuwas sa katapusan sining kalibutan magahuman sa “bag-ong duta.”​—⁠1 Juan 2:​17; Bugna 5:​9, 10; 14:​1, 3.

Hupti ang Pagkahilingagawon kag ang Moral nga Kaputli

22. (a) Ano ang makabulig sa aton nga malikawan ang espirituwal nga dagta ukon kasawayan? (b) Anong katalagman ang ginapaandam ni Pedro?

²² “Busa, mga hinigugma,” padayon ni Pedro, “sanglit ginahulat ninyo ining mga butang, himua ninyo ang inyo bug-os nga masarangan nga masapwan niya nga wala sing dagta kag walay kasawayan sa paghidait. Dugang pa, kabiga ninyo ang pagbatas sang aton Ginuo subong kaluwasan.” Ang paghulat sing malangkagon kag pagtamod sa daw bisan anong pagpalantang sang adlaw ni Jehova subong ekspresyon sang pagpailob sang Dios makabulig sa aton nga malikawan ang espirituwal nga dagta ukon kasawayan. Apang, may katalagman! Si Pedro nagpaandam nga sa mga sulat sang “aton hinigugma nga utod nga si Pablo . . . may pila ka butang nga mabudlay mahangpan, nga ginapatiko sang mga wala matudluan kag indi malig-on, subong man sang ila ginahimo sa iban pa nga bahin sang Kasulatan, sa ila kaugalingon nga kalaglagan.”​—⁠2 Pedro 3:​14-16.

23. Ano ang nagahinakop nga laygay ni Pedro?

²³ Maathag nga ginpatiko sang butig nga mga manunudlo ang mga sulat ni Pablo tuhoy sa dibagay nga kaluoy sang Dios, ginagamit ini subong balibad sa lugak nga pagginawi. Ayhan amo ini ang ginahunahuna ni Pedro sang ginsulat niya ang iya nagahingapos nga laygay: “Busa kamo, mga hinigugma, nga nakatigayon sining abanse nga ihibalo, magmabinantayon kamo agod indi kamo mapahilayo kaupod nila paagi sa mga kalapasan sang mga tawo nga nagapamatok sa kasuguan kag madula ang inyo kaugalingon nga kalig-on.” Nian ginhinakpan niya ang iya sulat nga nagasugo: “Apang padayon kamo nga magtubo sa dibagay nga kaluoy kag sa ihibalo tuhoy sa aton Ginuo kag Manluluwas nga si Jesucristo.”​—⁠2 Pedro 3:​17, 18.

24. Anong panimuot ang dapat matigayon sang tanan nga alagad ni Jehova?

²⁴ Sing maathag, luyag palig-unon ni Pedro ang iya mga kauturan. Luyag niya nga ang tanan makatigayon sing panimuot subong sang ginpabutyag sang matutom 82-anyos nga Saksi nga ginkutlo sa panugod: “Nagkabuhi ako suno sa sugo sang apostol, ‘ginahuptan sing tudok sa hunahuna ang presensia sang adlaw ni Jehova.’ Pirme ko ginatamod ang ginsaad nga bag-ong kalibutan subong isa ka ‘katunayan bisan nga wala makita.’ ” Kabay nga magkabuhi man kita sa amo nga paagi.

Paano Mo Sabton?

◻ Ano ang kahulugan sing “paghupot sing tudok sa hunahuna” sang adlaw ni Jehova?

◻ Ano ang hungod nga ginasikway sang mga mayubiton, kag ngaa?

◻ Sa anong rason ginyubit sang mga mayubiton ang matutom nga mga Cristiano?

◻ Anong pagtamod ang dapat naton huptan?

[Kapsion sa pahina 23]

Hupti sing tudok sa hunahuna ang adlaw ni Jehova . . .

[Kapsion sa pahina 24]

. . . kag ang bag-ong kalibutan nga magaabot