Mga Pamangkot Gikan sa mga Bumalasa

◼ Ano ang nagakaigo nga himuon sang kongregasyon kon ang isa magabiya sa matuod nga Cristianong pagtuo kag magabuylog sa lain nga relihion?

Kon kaisa natabo ina anay sang nahaunang siglo. Busa, halangpunon nga nagakahanabo ina kon kaisa sa karon. Kon matabo ini, ang kongregasyon nagakaigo nga magahulag sa pag-amlig sa espirituwal nga katinlo sang matutom nga mga Cristiano nga yari sa sini.

Ang isa ka diksionaryo nagasaysay sang apostasya subong “ang pagsikway sang isa sang relihion, prinsipio, partido sa politika, kbp.” Ang isa pa nagasiling: “Apostasya . . . 1 : pagsikway sa relihioso nga pagtuo 2 : pagbiya sa nagligad nga katutom.” Sing nahisuno, si Judas Iscariote nakahimo sing isa ka dagway sang apostasya sang ginbiyaan niya ang pagsimba kay Jehova nga Dios paagi sa pagluib kay Jesus. Sang ulihi, ang iban pa nangin mga apostata paagi sa pagsikway sang matuod nga pagtuo bisan nga samtang si apostol Juan kag ang iban pa dumaan nga mga disipulo buhi pa. Si Juan nagsulat: “Naghalin sila sa aton, apang indi sila tagaaton; kay kon sila tagaaton, nagpadayon kuntani sila kaupod naton.”—1 Juan 2:19.

Ano ang himuon kon matabo man ina karon? Ang mga gulang, ukon mga manugbantay, sang kongregasyon mahimo makahibalo nahanungod sa isa ka bawtismado nga Cristiano nga wala na makig-upod sa katawhan ni Jehova kag hayag nga nakig-upod sa iban nga relihion. Nahisuno sa pinamulong ni Jesus nga magkabalaka sa nagtalang nga karnero, ang espirituwal nga mga manugbantay dapat mangin interesado sa pagbulig sa kasubong sina nga tawo. (Mateo 18:12-14; ipaanggid ang 1 Juan 5:16.) Apang kamusta kon ang mga manugbantay nga gintangdo sa pag-atipan sa sina nagpamat-od nga ang tawo indi na luyag nga magpahilabot sa katawhan ni Jehova kag determinado sa pagpabilin sa butig nga relihion?

Nian ipahibalo lamang nila sa kongregasyon nga indi na sia makig-upod pa (disassociated) kag gani indi na sia isa ka Saksi ni Jehova. Ina nga tawo mahimo nga ‘nagbiya sang iya nagligad nga katutom,’ apang indi na kinahanglan himuon ang bisan anong pormal nga buhat sa pag-disfellowship. Ngaa? Bangod nag-untat na sia sa pagpakig-upod (disassociate) sa kongregasyon. Ayhan wala sia nagapanikasog nga huptan ang pagpakig-angot sa iya anay mga kauturan agod hayluhon sila nga sundon sia. Para sa ila bahin, ang matutom nga mga kauturan wala nagapanikasog sa pagpakig-upod sa iya, sanglit ‘naghalin sia sa ila, kay indi sia taga-ila.’ (1 Juan 2:19) Inang nag-untat na sa pagpakig-upod nga tawo (disassociated) nga ‘naghalin sa aton’ ayhan magapadala sing mga sulat ukon literatura nga nagapadaku sang butig nga relihion ukon apostasya. Magapakita ina nga ang indibiduwal pat-od nga ‘indi tagaaton.’

Apang, ang Kasulatan nagapaandam nga ang iban magatinguha sa pagpabilin sa tunga sang katawhan sang Dios kag dira tinguhaan nga patalangon ang iban. Si apostol Pablo naglaygay: “Gikan sa inyo gid magalutaw ang mga tawo nga nagapamulong sing mga butang nga balingag, sa pagpasunod sa ila sang mga disipulo.” (Binuhatan 20:30) Talangkod nga ginpaandaman niya ang mga Cristiano nga ‘tandaan ang mga ginakabangdanan sang pagbinahinbahin kag kasandaran nga nagatudlo sing tuhay sa naton-an nila, kag likawan sila.’—Roma 16:17, 18.

Gani kon may isa nga mangin dimatuod nga manunudlo sa tunga sang matuod nga Cristiano, kaangay ni Himeneo kag Fileto sang adlaw ni Pablo, ang mga manugbantay sang panong dapat maghimo sing nagaamlig nga mga tikang. Kon ginasikway niya ang ila mahigugmaon nga laygay kag ginapadayon ang pagpauswag sa isa ka sekta, ang komite sang mga gulang sarang maka-disfellowship, ukon makapaguwa, sa iya bangod sang apostasya. (2 Timoteo 2:17; Tito 3:10, 11) Ang indibiduwal nga mga utod nga lalaki kag babayi sa kongregasyon magasunod sa laygay ni Pablo nga “likawan” ang isa nga nagatinguha sa “pagtuga sing pagbinahinbahin.” Si Juan naglaygay man: “Kon may tawo nga nagaabot sa inyo kag wala nagadala sining pagtolon-an, dili pagbatona sia sa inyo balay kag dili pag-abiabiha sia.”—2 Juan 10.

◼ Sang ang mga Judiyo nagpauli sa Jerusalem gikan sa pagkaulipon sa Babilonia, naglakbay bala sila sing mga 500 ka milya (800 km) ukon 1,000 ka milya (1,600 km)?

Mga 500 ka milya ang kalayuon sang dumaan nga Babilonia sa Jerusalem. Ina nga paglakbay nagakahulugan sing pagtabok sa tuman kalain nga alagyan, lakip ang pag-agi sa tuman kalawig ka duta nga kaging ukon desyerto. Ang isa pa ka ruta nga doble ang kalayuon amo ang pagtaklad sa nalupyakan sang Eufrates sa Haran, kag ang pagdulhog sa Damasco pasulod sa Dutang Ginsaad. Ang naulihi amo ang ruta nga ginlakbay ni Abraham sang gindala niya ang iya pamilya halin sa Ur pakadto sa Canaan.—Genesis 11:31–12:5.

Wala ginalaragway sang Biblia ang ruta nga ginlakbay sang mga Judiyo sang magpauli sila sa Jerusalem gikan sa pagkaulipon sa Babilonia. (Esdras 8:1-32; 7:7-9) Gani ang duha ka numero mahimo nga posible kag mahimo gamiton kon nagasambit sang paglakbay. Ang labi ka importante amo ang kamatuoran nga ang nagpalauli nga mga Judiyo nahilway sa mga pagtuluohan kag mga buhat sang Babilonia sang mag-agi sila sa “Alagyan sang Pagkabalaan.”—Isaias 35:8-10; ipaanggid ang pahina 153-7 sang libro Man’s Salvation out of World Distress at Hand! nga ginbalhag sang 1975.