Pamangkot sang mga Pamatan-on . . .

Paano Ko Mahimo ang Kamatuoran nga Akon?

“Ginpadaku ako nga isa sang mga Saksi ni Jehova, kag nagapati ako nga kon ginpadaku ka sa sini nga paagi, kilala mo gid si Jehova. Sayop gid ako!”​—⁠Antoinette.

“ANO ang kamatuoran?” Si Poncio Pilato, ang tawo nga nagtugyan kay Jesus agod patyon, nagpamangkot sining bantog nga pamangkot. (Juan 18:38) Apang, maathag nga gintuyo ni Pilato nga tapuson​—⁠indi nga buksan​—⁠sang iya maduhaduhaon nga pamangkot ang tampad nga paghambalanay. Indi gid sia interesado sa “kamatuoran.” Apang kamusta ikaw? Interesado ka bala sa kamatuoran?

Siniglo na nga ginapalibugan sang mga pilosopo kon ano gid ang kamatuoran, kag diutay kaayo ang resulta sang ila mga panikasog. Apang, mahimo mo masapwan ang sabat sa pamangkot ni Pilato. Gintudlo ni Jesucristo nga ang Pulong sang Dios kamatuoran. Ginpatuhuyan man niya ang iya kaugalingon subong “ang kamatuoran.” Kag si apostol Juan nagsulat: “Ang kamatuoran nag-abot paagi kay Jesus.” (Juan 1:​17; 14:6; 17:17) Ang kabug-usan sang Cristianong mga panudlo, nga sang ulihi nangin bahin sang Biblia, ginatawag man kon amo nga “ang kamatuoran” ukon “ang kamatuoran sang maayong balita.” (Tito 1:​14; Galacia 2:​14; 2 Juan 1, 2) Nalakip sa sining Cristianong mga panudlo ang mga butang subong sang personal nga ngalan sang Dios, pagtukod sa Ginharian sang Dios, pagkabanhaw, kag ang gawad ni Jesus.​—⁠Salmo 83:​18; Mateo 6:​9, 10; 20:28; Juan 5:​28, 29.

Linibo ka pamatan-on ang ginatudluan sang Cristianong mga ginikanan tuhoy sa kamatuoran sa Biblia. Apang nagakahulugan bala ini nga “nagalakat [sila] sa kamatuoran”? (3 Juan 3, 4) Indi. Halimbawa, ang 20-anyos nga si Jennifer ginpadaku subong isa sang mga Saksi ni Jehova. Sia naghinumdom: “Ginapaupod ako sang akon iloy sa mga kombension sang mga Saksi kag nagapasat-om nga magpabawtismo ako. Apang sa akon kaugalingon nagasiling ako, ‘Indi ko gid luyag nga mangin isa ka Saksi. Luyag ko lamang maglipaylipay!’ ”

Ginapatihan sang pila ka pamatan-on ang ginatudlo sa ila, apang wala sila sing madalom nga paghangop sa ginatudlo sang Biblia. Ang katalagman? Nagpaandam si Jesus nga ang pila ka indibiduwal “wala sing gamot sa ila kaugalingon.” Ini sila mahimo “magpadayon sa diutay nga tion; nian kon mag-utwas ang kapipit-an ukon paghingabot bangod sang pulong, nagakasandad sila.” (Marcos 4:​17) Mahimo mapaathag sang iban ang ila pasad-sa-Biblia nga mga pagpati sa pila ka kasangkaron, apang wala pa nila makilala ang Dios sing personal. Siling sang isa ka lamharon nga babayi nga si Aneesa: “Wala gid ako sing matuod nga kaangtanan kay Jehova sang bata pa ako . . . Sa banta ko nasandig ini sing daku sa kaangtanan sang akon mga ginikanan sa iya.”

Ano ang imo kahimtangan tuhoy sini? Si Jehova bala Dios lamang sang imo mga ginikanan? Ukon, kaangay sang salmista sa Biblia, makasiling ka bala: “Nagasalig ako sa imo, O Jehova. Nagasiling ako: ‘Ikaw ang akon Dios’ ”? (Salmo 31:14) Mahimo nga kinahanglan ang kaisog sa pag-atubang sa kamatuoran. Ang pamatan-on nga si Alexander nagsiling: “Para sa akon, ang bunayag nga pag-usisa sa kaugalingon amo ang una nga tikang.” Pagkatapos mausisa ang kaugalingon, ayhan marealisar mo nga wala mo gid mapamatud-an ang kamatuoran (ang kabug-usan sang Cristianong pagpanudlo) sa imo kaugalingon. Mahimo nga kulang ka sing malig-on nga pagpati, kag gani ang imo kabuhi daw wala sing katuyuan, wala sing matuod nga direksion.

Sa Cristianong mga miting sang mga Saksi ni Jehova, masami nila ginaamba ang ambahanon nga natig-uluhan sa Ingles “Make the Truth Your Own.”a Mahimo nga nagakaigo ining laygay sa imo. Apang paano mo ini mahimo? Diin ka masugod?

Pamatud-i Ini sa Imo Kaugalingon

Sa Roma 12:​2, makita naton ang laygay ni apostol Pablo: ‘Pamatud-i sa inyo kaugalingon ang maayo kag kalahamut-an kag himpit nga kabubut-on sang Dios.’ Apang paano mo ini mahimo? Paagi sa pagtigayon sing “sibu nga ihibalo sang kamatuoran.” (Tito 1:⁠1) Wala ginbaton sang mga pumuluyo sang una sa siudad sang Berea ang ila nabatian nga wala sing pagpangduhaduha. Sa baylo, “[gin-usisa nila] sing maayo ang Kasulatan adlaw-adlaw kon bala matuod gid ini nga mga butang” nga ila natun-an.​—⁠Binuhatan 17:⁠11.

Nakita sang lamharon nga Cristiano nga si Erin ang kinahanglanon nga himuon man ini. Sia naghinumdom: “Nagpanalawsaw ako. Ginpamangkot ko ang akon kaugalingon, ‘Paano ko mahibaluan nga amo ini ang matuod nga relihion? Paano ko mahibaluan nga may Dios nga si Jehova?’ ” Ngaa indi mo sugdan ang imo personal nga programa sa pagtuon? Mahimo ikaw magsugod sa pasad-sa-Biblia nga libro nga Ang Ihibalo nga Nagadul-ong sa Kabuhi nga Walay Katapusan.b Basaha ini sing maayo. Basaha ang tanan nga ginsambit nga teksto sa Kasulatan kag talupangda ang kaangtanan sini sa kon ano ang ginasiling. Ayhan makibot ka sa paghibalo kon daw ano ka tuhay ang imo ginabatyag tuhoy sa kamatuoran kon ikaw mangin “manugpangabudlay nga wala sing dapat ikahuya, nga nagagamit sing matadlong sang pulong sang kamatuoran”!​—⁠2 Timoteo 2:​15.

Si apostol Pedro nagsiling nga ang pila ka butang sa Biblia “mabudlay hangpon,” kag masapwan mo nga matuod ini. (2 Pedro 3:16) Apang ang espiritu sang Dios makabulig sa imo nga mahangpan bisan ang mabudlay nga mga topiko. (1 Corinto 2:​11, 12) Mangamuyo sing bulig sang Dios kon mabudlayan ikaw sa paghangop sa pila ka butang. (Salmo 119:​10, 11, 27) Tilawi nga magpanalawsaw sing dugang sa mga publikasyon sang Watch Tower Society. Kon indi mo mapat-od kon paano ini himuon, mangayo sing bulig. Mahimo nga makabulig sa imo ang imo mga ginikanan ukon ayhan ang pila ka hamtong nga mga katapo sang Cristianong kongregasyon.

Dumduma, wala ikaw nagatuon agod ipadayaw sa iban ang imo ihibalo. Ang pamatan-on nga si Collin nagapaathag: “Mahibaluan mo ang mga kinaiya ni Jehova.” Maghinguyang sing tion sa pagpamalandong sa imo nabasa agod nga magtudok ini sa imo tagipusuon.​—⁠Salmo 1:​2, 3.

Ang pagpakig-upod sa kongregasyon sa Cristianong mga miting makabulig man sa imo. Subong sang ginsulat ni apostol Pablo, ang kongregasyon amo ang “haligi kag pamakod sang kamatuoran.” (1 Timoteo 3:​15) Ang iban nga pamatan-on nagareklamo nga ang Cristianong mga miting makatalaka. “Apang kon wala ikaw nagahanda para sa mga miting,” pahanumdom sang pamatan-on nga si Collin, “nian indi ka makabenepisyo sa sini.” Gani ihanda ang imo mga leksion sing abanse. Labi nga makawiwili ang mga miting kon nagapakigbahin ka​—⁠indi lamang tumalambong.

Tuman Kasako nga Indi Makatuon?

Ibutang ta, mabudlay ang pagpangita sing tion sa pagtuon bangod sang tanan nga hilikuton sa eskwelahan kag sa balay. Ang pamatan-on nga si Susan nagsulat: “Sa sulod sang mga tinuig nabudlayan ako bangod nahibaluan ko nga dapat ako maghanda sa mga miting kag magtuon sing personal, apang wala ko gid ini mahimo.”

Natun-an ni Susan nga ‘baklon ang tion’ gikan sa indi tanto ka importante nga mga hilikuton. (Efeso 5:​15, 16) Una, ginlista niya ang tanan nga butang nga kinahanglan niya sa pagtuon. Dayon, nag-iskedyul sia sing tion sa pagtuon sini. Apang ginlakip man niya sa iya iskedyul ang pila ka tion sa paglingawlingaw. Sia nagapanugyan: “Indi pag-iskedyula ang tagsa ka libre nga tion. Tanan kita nagakinahanglan sing tion sa pagrelaks.’ ” Mahimo nga ang pagtigayon sing iskedyul magamadinalag-on man sa imo.

Ipaambit ang Imo Natun-an

Ang paggamit sang imo natun-an labi nga makabulig sa paghimo sini nga mangin bahin nimo. Tinguhai nga tudluan ang iban. Ang salmista nagsiling: “Ang akon baba magapamulong sing kaalam, kag ang pagpamalandong sang akon tagipusuon mangin sa paghangop.”​—⁠Salmo 49:⁠3.

Kon wala mo ginakahuya ang maayong balita, indi ka magpangalag-ag sa pagpaambit sini sa imo mga kabutho kag sa iban nga imo masumalang. (Roma 1:16) Paagi sa paghimulos sining mga kahigayunan sa pagsugid sing kamatuoran sa iban, ginagamit mo ang imo natun-an; kag sa sining paagi mapatudok mo ang kamatuoran sa imo hunahuna kag tagipusuon.

Bantayi ang Imo Pagpakig-upod

Ang pila ka Cristiano sang unang siglo nag-uswag sing maayo sa espirituwal. Apang wala magdugay ginsulatan sila ni apostol Pablo, nga nagapamangkot: “Sin-o ang nag-upang sa inyo sa padayon nga pagtuman sa kamatuoran?” (Galacia 5:⁠7) Kaangay man sini ang natabo sa pamatan-on nga si Alex. Gintu-ad niya nga ang iya mga panikasog nga tun-an ang Pulong sang Dios ginpaluya sang iya “pag-upod-upod sa malain nga mga kaupod.” Agod mag-uswag ka sa espirituwal, mahimo kinahanglan mo man ang pila ka pagbag-o tuhoy sini.

Sa kabaliskaran, ang maayo nga kaupdanan makabulig gid sa imo nga mag-uswag. Ang Hulubaton 27:17 nagasiling: “Ang salsalon nagapatalom sang salsalon. Sa amo ang tawo nagapatalom sang nawong sang iban.” Mangita sing maayo nga mga huwaran​—⁠mga tawo nga nagaaplikar sing kamatuoran sa ila kabuhi. Mahimo mo sila masapwan sa inyo mismo puluy-an. Ang pamatan-on nga si Jennifer nagahinumdom: “Si Lolo amo ang akon labing maayo nga huwaran. Tatlo ka oras pirme ang iya ginahinguyang sa paghanda para sa amon pagtinuon sang kongregasyon sa Biblia kon Domingo. Ginatan-aw niya ang tagsa ka kasulatan sa leksion sa nanuhaytuhay nga badbad sang Biblia kag ginatan-aw ang mga tinaga sa iya diksionaryo. Lantip sia sa indi masyado nahibaluan nga mga kamatuoran sa Biblia. Mapamangkot mo sia sing bisan ano, kag makita niya ang sabat.”

Kon mahimo mo ang kamatuoran nga imo gid, nakapanag-iya ikaw sing malahalon nga butang​—⁠isa ka butang nga indi mo gid pag-ibaylo sa bisan ano nga bili. Gani indi pagtamda ang kamatuoran subong “relihion [lamang] sang akon mga ginikanan.” Dapat nga ang imo pagpati kaangay sa iya sang salmista nga nagsiling: “Kon bayaan ako sang akon amay kag sang akon iloy, si Jehova mismo ang magasapupo sa akon.” (Salmo 27:10) Paagi sa paghibalo gid sa mga ginatudlo sang Biblia, sa pagpati sa sini, sa pagpaambit sang imo mga pagpati sa iban kag, labaw sa tanan, sa pagkabuhi suno sa sining mga pagpati, mapasundayag mo nga ginahimo mo ang kamatuoran nga imo.

[Mga footnote]

[Piktyur sa pahina 13]

Pamatud-i ang kamatuoran sa imo kaugalingon paagi sa imo pagpanalawsaw kag personal nga pagtuon