Pamatii Kon Ano ang Ginasiling sang Espiritu sa mga Kongregasyon

“Tuguti ang isa nga may dulunggan sa pagpamati sa ginasiling sang espiritu sa mga kongregasyon.”​—⁠BUGNA 3:⁠22.

Ang impormasyon sa mga pahina 10 tubtob 21 ginpresentar sa Balaan nga Katarungan nga mga Kombension sang mga Saksi ni Jehova sang 1988 subong nagabukas nga mga pamulongpulong sang simposium nga natig-uluhan “Ang Gintangdo nga Tion Malapit Na.”

 1. Anong mga pulong sang Bugna ang maayong balita sa sining makapasubo nga dag-on, kag ano ang “tagna” kag “ang gintangdo nga tion” nga ginpatuhuyan?

SANG nagligad nga mga tuig ang isa ka sosyologo sa Estados Unidos nagkomento nga ang katawhan sa sadto nga duta may sobra nga kahimtangan apang wala sing bastante nga kalipay. Ang katawhan, dugang niya, “nakasapo nga ang kalipay naglikaw sa ila. Ang paraiso nga ginsaad nila sa ila kaugalingon wala sing unod.” Bangod sini, ang mga pulong ni apostol Juan sa Bugna 1:3 maayong balita, kay ginasugiran niya kita kon paano makasapo sing kalipay. Si Juan nagsulat: “Malipayon ang nagabasa sing mabaskog kag ang mga nagapamati sang mga pulong sang tagna, kag nagabantay sang mga butang nga nasulat sa sini; kay malapit na ang gintangdo nga tion.” Ang “tagna” nga iya ginapatuhuyan amo ang isa nga narekord sa tolon-an sang Bugna. Kag “ang gintangdo nga tion” amo ang tion nga matuman ining tagna sang Bugna. Ang mga pulong ni Juan may daku gid nga kahulugan para sa aton karon.

 2. Ano mahimo gid ang ginapaligban ni Juan samtang nagahingapos ang nahaunang siglo?

² Kapin sa 60 ka tuig antes niya ginsulat ang tolon-an sang Bugna, didto si Juan sang Pentecostes sang gintukod ang hinaplas nga Cristianong kongregasyon. Karon, sang 96 C.⁠E., yadtong kongregasyon nagtubo gikan sa orihinal nga 120 ka katapo sini tubtob sa isa ka daku, internasyonal nga organisasyon. Apang may mga problema nga naeksperiensiahan. Subong ginpaandam ni Jesus, ni Pablo, kag ni Pedro, ang mga apostasya kag mga sekta nagsugod sa paglutaw, kag mahimo gid nga nagpalibog si Juan kon ano ang yara sa palaabuton.​—⁠Mateo 13:​24-30, 36-43; Binuhatan 20:​29, 30; 2 Pedro 2:​1-3.

 3. Garantiya sang ano ang mga palanan-awon nga nakita kag ginrekord ni Juan sa Bugna?

³ Handurawa, nian, ang iya kalipay sang makabaton sia sing “bugna ni Jesucristo, nga ginhatag sang Dios sa iya, agod ipakita sa iya mga ulipon ang mga butang nga mahanabo sing madali.” (Bugna 1:1) Sa isa ka paagisod sang makatilingala nga mga palanan-awon, nakita ni Juan nga ang mga katuyuan ni Jehova matuman kag nga ang pagbatas sang matutom nga mga Cristiano pagapadyaan. Nakabaton man sia sing mga mensahe gikan kay Jesus para sa pito ka kongregasyon; sa epekto, amo ini ang katapusan nga talangkod nga laygay ni Jesus sa mga Cristiano sa wala pa Sia mag-abot nga may himaya sang Ginharian.

Ang Pito ka Kongregasyon

 4. (a) Ano ang salabton sang matutom nga Cristianong mga kongregasyon? (b) Ano ang ginapahangop sang kamatuoran nga ang hinaplas nga mga gulang nakita subong pito ka bituon sa kamot nga too ni Cristo?

⁴ Ining pito ka kongregasyon sang hinaplas nga mga Cristiano ginlaragway subong pito ka kandelero, kag ang hinaplas nga mga gulang sa sulod nila ginlaragway subong pito ka bituon sa kamot nga too ni Cristo. (Bugna 1:​12, 16) Sa sining maathag nga laragway, nakita ni Juan nga ang matutom nga Cristianong mga kongregasyon dapat mangin mga kapawa, kaangay sang nagasiga nga mga kandelero sa madulom nga kalibutan. (Mateo 5:​14-16) Ang pag-uyat ni Jesus sa mga gulang sa iya kamot nga too nagapakita nga ginapangunahan niya ang mga gulang, ginatuytuyan kag ginagamhan sila.

 5. Sa kay sin-o ginpatuhoy ang mga mensahe sa pito ka kongregasyon sang adlaw ni Juan?

⁵ Ginsilingan ni Jesus si Juan: “Ang imo nakita isulat sa isa ka tolon-an kag ipadala sa pito ka kongregasyon, sa Efeso kag sa Smirna kag sa Pergamo kag sa Tiatira kag sa Sardis kag sa Filadelfia kag sa Laodicea.” (Bugna 1:11) Ining mga kongregasyon nagluntad gid sang adlaw ni Juan, kag mapat-od naton nga sang matapos ni Juan ang pagsulat sa Bugna, ang tagsa ka kongregasyon nakabaton sing kopya. Apang talupangda ang ginasiling sang Diction­ary of the Bible ni Hastings nahanungod sa Bugna: “Wala gid sing iban nga tolon-an sa B[ag-ong] T[estamento] nga napamatud-an gid sing subong sina sang ika-2 nga sig[lo].” Nagakahulugan ini nga ang tolon-an sang Bugna nakilal-an kag ginbasa indi lamang sang mga Cristiano sa pito ka kongregasyon kundi sang madamo pa nga luyag magtuon sa mga pulong sang tagna. Sa pagkamatuod, ang laygay ni Jesus para sa tanan sang hinaplas nga mga Cristiano.

 6, 7. (a) San-o ang mga pulong sang Bugna naaplikar una sa tanan, kag paano naton nahibaluan ini? (b) Sin-o sa karon ang ginalaragway sang pito ka bituon kag sang pito ka kongregasyon?

⁶ Apang ining mga mensahe sa pito ka kongregasyon may masangkad pa nga aplikasyon. Sa Bugna 1:​10, si Juan nagasiling: “Paagi sa inspirasyon nag-abot ako sa adlaw sang Ginuo.” Ining bersikulo isa ka importante nga yabi sa paghangop sa Bugna. Ginapakita sini nga ini naaplikar una sa tanan sa “adlaw sang Ginuo,” nga nagsugod sang mangin Hari si Jesus sang 1914. Ining paghangop ginpalig-on sang mga mensahe ni Jesus sa pito ka kongregasyon. Sa sining mga mensahe makasapo kita sing mga ekspresyon subong sining mga pulong sa Pergamo: “Kadtuan ko ikaw sa labing madali.” (Bugna 2:​16; 3:​3, 11) Pagligad sang 96 C.⁠E., si Jesus wala ‘magkadto’ sa isa ka talalupangdon nga paagi tubtob sang ginpalingkod sia sa trono subong Hari sang 1914. (Binuhatan 1:​9-11) Nian, sa katumanan sang Malaquias 3:​1, ‘nagkadto’ sia liwat sang 1918, sang magkadto sia sa templo ni Jehova sa paghukom una sa panimalay sang Dios. (1 Pedro 4:17) Sia ‘magakadto’ sing makaisa pa, sa malapit nga palaabuton, kon “magtimalos [sia] sa mga wala nagakilala sa Dios kag sa mga wala nagatuman sa maayong balita nahanungod sa aton Ginuong Jesus.”​—⁠2 Tesalonica 1:​7, 8; Mateo 24:​42-44.

⁷ Ginahunahuna ini, nahangpan naton nga ang pito ka kongregasyon nagalaragway sa tanan nga kongregasyon sang hinaplas nga mga Cristiano pagligad sang 1914, kag ang pito ka bituon nagalaragway sa tanan sang hinaplas nga mga gulang sa sadtong mga kongregasyon. Dugang pa, ang mga gulang sa “iban nga mga karnero” sa pagpasangkad, yara man sa kamot nga too sang pagkontrol ni Jesus. (Juan 10:16) Kag ang laygay sa pito ka kongregasyon naaplikar sa prinsipio sa tanan nga kongregasyon sang katawhan sang Dios karon sa bug-os nga kalibutan, lakip ang mga ginahuman sang mga Cristiano nga may dutan-on nga paglaum.

 8. Ano nga kahimtangan ang nasapwan ni Jesus sang magkadto sia sa pag-usisa sa nagapangangkon nga mga Cristiano sang 1918?

⁸ Sang magkadto si Jesus agod usisaon ang nagapangangkon nga mga Cristiano sang 1918, nasapwan niya ang hinaplas nga mga Cristiano sa duta nga nagatinguha sing lakas sa pagbantay sa mga pulong sang tagna. Kutob sang katuigan 1870 ginpaandaman nila ang katawhan tuhoy sa pagkaimportante sang tuig 1914. Nag-antos sila sing daku sa mga kamot sang Cristiandad sa tion sang nahaunang kalibutanon nga inaway, kag sang 1918 ang ila hilikuton halos nagdulog sang ang nagapanguna nga mga opisyal sang Watch Tower Society ginbilanggo sa butig nga mga panumbungon. Apang ang ila naeksperiensiahan sadtong tion nagbagay sa mga tagna sa Bugna sa isa ka makatilingala nga kadakuon. Kag ang ila determinasyon sa pagpamati sa mga pulong ni Jesus sa pito ka kongregasyon nagpakilala sa ila nga indi maduhaduhaan subong ang lamang nga mga Cristiano nga nagadala sing kapawa sa sining madulom nga kalibutan. Sa karon, ining nagkalabilin amo ang nagahuman sang Juan nga klase nga nagakabuhi agod makita kag magpakigbahin sa mga katumanan sang madamo nga bahin sang Bugna.

Laygay kag Komendasyon

 9, 10. Ang katumanan sang anong mga pulong ni Jesus nagdala sing dakung kalipay sa modernong adlaw nga mga Cristiano? Ipaathag.

⁹ Sa Bugna 3:​8, si Jesus nagsiling sa kongregasyon sa Filadelfia: “Nakilala ko ang imo mga buhat​—⁠yari karon! ginbutang ko sa imo atubangan ang ganhaan nga nabuksan, nga wala sing makatakop​—⁠nakahibalo ako nga may diutay ka lamang nga gahom, kag walay sapayan nagbantay ka sang akon pulong kag wala magpanghiwala sang akon ngalan.” Maathag nga ang mga Cristiano sa Filadelfia nangin aktibo, kag karon ang ganhaan sang kahigayunan ginbuksan para sa ila.

¹⁰ Ang modernong-adlaw nga katumanan sining mensahe nagpahalipay gid sa katawhan sang Dios. Sa tapos sang ila mabudlay nga mga eksperiensia sang 1918, ginpasag-uli sila sa espirituwal, kag sang 1919 ginbuksan ni Jesus ang ganhaan sang kahigayunan para sa ila. Nagsulod sila sa sina nga ganhaan sang ginbaton nila ang komisyon nga ibantala ang maayong balita sang Ginharian sa tanan nga pungsod. Bangod ang espiritu ni Jehova yara sa ila, wala sing bisan ano nga makaupang sining hilikuton, kag ining matutom nga mga Cristiano may dakung pribilehiyo sa pagtuman sang daku nga bahin sang tanda sang presensia ni Jesus. (Mateo 24:​3, 14) Subong resulta sang ila matutom nga pagbantala, ang nagkalabilin sang 144,000 gintawag kag ginhaplas, kag ang “dakung kadam-an” gintipon sa daku nga mga kadamuon. (Bugna 7:​1-3, 9) Daw ano nga kalipay ang gindala sini sa katawhan sang Dios!

11. Paano ang mga sektaryan nagtinguha sa paghigko sa organisasyon ni Jehova sang adlaw ni Juan, kag paano nila ginhimo ina sa aton adlaw?

¹¹ May makaagaw bala sining kalipay sa ila? Huo. Halimbawa, ang mga gulang sa Pergamo, walay sapayan sang maayong rekord sang pagbatas, wala makapugong sang panudlo sang sekta ni Nicolaus nga makasulod sa kongregasyon. (Bugna 2:15) Ang sektaryanismo nagbaskog. Sing kaanggid, sa sining katapusan nga mga adlaw, ang pila ka indibiduwal nag-apostata kag nagtinguha sa paghigko sa organisasyon ni Jehova. Ang mga gulang sa kabilugan nagsumpong sa ila, apang, sing makapasubo, may pila nga napatalang. Kabay nga indi gid naton pagtugutan ang mga apostata nga agawon sa aton ang aton kalipay!

12. (a) Ano ang Balaam kag Jezebel nga impluwensia? (b) Nagtinguha bala si Satanas nga pasudlon ang Balaam ukon Jezebel nga impluwensia sa Cristianong kongregasyon sa modernong mga tion?

¹² Nagpaandam si Jesus sa kongregasyon sa Pergamo batok sa mga “nagahupot sang pagtolon-an ni Balaam.” (Bugna 2:14) Ano ining pagtolon-an? May isa sa Pergamo nga nagahigko sa mga Cristiano didto sa pareho nga paagi nga ginhigkuan ni Balaam ang mga Israelinhon sa kahanayakan: paagi sa pagpalig-on sa ila “sa pagkaon sang mga butang nga nahalad sa mga idolo kag sa paghimo sing pagpakighilawas.” (Numeros 25:​1-5; 31:8) Ginpaandaman ni Jesus ang kongregasyon sa Tiatira batok sa “babayi nga si Jezebel.” Ini nga babayi nagatudlo man sa mga Cristiano “sa paghimo sing pagpakighilawas kag sa pagkaon sang mga butang nga nahalad sa mga idolo.” (Bugna 2:20) Gintinguhaan bala ni Satanas nga ipasulod ang Balaam ukon Jezebel nga impluwensia sa kongregasyon karon? Gintinguhaan niya sa pagkamatuod, tubtob sa kasangkaron nga halos 40,000 kada tuig ang ginasikway (disfellowshipped), sa masami bangod sang imoralidad. Daw ano ka makapasubo! Ang tulad-Balaam nga mga lalaki kag tulad-Jezebel nga mga babayi nagrebelde batok sa mga gulang kag nagtinguha sa paghigko sa kongregasyon. Kabay nga sumpungon naton inang dimatinlo nga mga impluwensia sa aton bug-os nga kusog!​—⁠1 Corinto 6:​18; 1 Juan 5:⁠21.

13. (a) Ilaragway ang indi pagkahamuot ni Jesus sa pagkaalabaab. (b) Ngaa maalabaab ang mga taga­Laodicea, kag paano naton malikawan ining kaluyahon karon?

¹³ Sa Bugna 3:​15, 16, si Jesus nagsiling sa kongregasyon sa Laodicea: “Nahibaluan ko ang imo mga binuhatan, nga ikaw indi mabugnaw ukon mainit. Luyag ko kuntani nga mabugnaw ka ukon mainit. Gani, bangod maalabaab ka lang, indi mainit ukon mabugnaw, ibuga ko ikaw.” Daw ano ka maathag nga paglaragway sang indi pagkahamuot ni Jesus sa pagkaalabaab! Sia nagpadayon: “Nagasiling ka: ‘Manggaranon ako kag may madamo nga pagkabutang kag wala nagakinahanglan sing bisan ano.’ ” Huo, nahaylo sa materyalismo ang mga Cristiano sa Laodicea. Nagpaayaw sila sa ila kaugalingon kag wala magsapak. Apang si Jesus nagsiling sa ila: “Wala ka makahibalo nga ikaw ang kailo kag makaluluoy kag imol kag bulag kag hubo.” (Bugna 3:17) Luyag bala naton mangin “kailo kag makaluluoy kag imol kag bulag kag hubo” sa mga mata ni Jesus? Sa pagkamatuod indi! Gani sumpungon gid naton sa tanan nga paagi ang pagkamateryalistiko ukon pagkaalabaab.​—⁠1 Timoteo 6:​9-12.

Magbatas Tubtob sa Katapusan

14. (a) Anong mga kabudlayan ang naatubang sang kongregasyon sa Smirna? (b) Ano ang modernong mga kaanggid sang mga naeksperiensiahan sang Smirna?

¹⁴ Ang kongregasyon nga indi maalabaab amo ang sa Smirna. Sa sining mga Cristiano, si Jesus nagsiling: “Nahibaluan ko ang imo mga pag-antos kag kaimulon​—⁠apang manggaranon ikaw⁠—​kag ang pagpasipala batok sa imo sang mga nagapaka-Judiyo, apang indi sila mga Judiyo kundi sinagoga ni Satanas. Dili pagkahadluki ang dali na lang nimo antuson. Yari karon! Ang Yawa dali na lang magsulod sang iban sa inyo sa bilangguan, agod nga matilawan kamo, kag may kapipit-an kamo sing napulo ka adlaw.” (Bugna 2:​8-10) Nagabagay gid ini sa eksperiensia sang mga Cristiano karon! Ang modernong mga Cristiano, sang hinaplas kag sang iban nga mga karnero, nagbatas man sing mapintas nga pagpamatok gikan sa “sinagoga ni Satanas” karon, ang Cristiandad. Kutob sang nahauna nga inaway kalibutanon tubtob karon, linibolibo ka mga lalaki, mga babayi, kag kabataan ang ginsakit, ginbilanggo, ginpaantos, ginlugos, ukon ginpatay bangod wala nila ginkompromiso ang ila integridad.

15, 16. (a) Paano mangin malipayon ang hinaplas nga mga Cristiano walay sapayan nga nagaantos sing paghingabot? (b) Anong pinasahi nga mga padya ang nagahulat sa iban nga mga karnero nga nagabulig sa ila nga mangin malipayon man?

¹⁵ Nagadala bala sing kalipay ina nga mga eksperiensia? Ang mga eksperiensia indi makalilipay. Apang kaangay sang mga apostoles, ang matutom nga mga Cristiano nga nagabatas sa mga pagtilaw nagaagom sing nasulod nga kalipay kay ‘naisipan [sila] nga takus pakahuy-an bangod sa ngalan [ni Jesus].’ (Binuhatan 5:41) Kag nagapabilin sila nga malipayon bisan ano man ang himuon sa ila sang mga kaaway bangod nahibaluan nila nga malapit na ang gintangdo nga tion agod padyaan ang ila integridad, kag ang padya mangin daku gid. Si Jesus nagsiling sa mga Cristiano sa Smirna: “Magpakatutom ka tubtob sa kamatayon, kag hatagan ko ikaw sang korona sang kabuhi.” (Bugna 2:10) Kag sa mga sa Sardis nagsiling sia: “Ang nagadaug panaptan sing mga panapton nga maputi; kag indi ko pagpanason ang iya ngalan sa tolon-an sang kabuhi.”​—⁠Bugna 3:⁠5.

¹⁶ Matuod, ining mga saad espisipiko nga naaplikar sa hinaplas nga mga Cristiano, nga nagapahanumdom sa ila sang padya nga dimamalatyon nga langitnon nga kabuhi nga nagahulat sa ila. Apang ang mga sa iban nga mga karnero ginapalig-on man sining mga pulong. May padya man si Jehova para sa ila, kon magmakugi sila kag magbatas. May yara sila mahimayaon nga paglaum nga makapanubli sing walay katapusan nga kabuhi sa paraiso nga duta sa idalom sang Ginharian sa mga kamot ni Cristo. Masapwan nila didto ang Paraiso nga wala masapwi sang katawhan sining kalibutan.

17. Anong mga pulong ang ginhinakop ni Jesus sa tagsa ka mensahe, kag ano ang kahulugan sang iya mga pulong para sa aton karon?

¹⁷ Ginhinakpan ni Jesus ang tagsatagsa sang iya mensahe sa mga kongregasyon sining mga pulong: “Tuguti ang isa nga may dulunggan sa pagpamati sa ginasiling sang espiritu sa mga kongregasyon.” (Bugna 3:22) Huo, dapat naton pamatian kag tumanon ang mga pulong sang Pangulong Manugbantay. Dapat naton likawan ang pagkadimatinlo kag apostasya, kag dapat naton huptan ang aton kakugi. Ang aton pagbaton sing padya nasandig sa sini. Kag kon binagbinagon naton ang dugang pa nga impormasyon sa Bugna, kapin pa nga mangin determinado kita sa paghimo gid sina.

Ang mga Pat-in sang Linukot

18. (a) Ano ang nabaton ni Jesus sa langitnon nga palasyo? (b) Ano ang kahulugan sang pagpangabayo sang tatlo ka manugkabayo sa Bugna kapitulo 6 para sa katawhan nga nagakabuhi karon?

¹⁸ Sa kapitulo 4 kag 5, halimbawa, nakita ni Juan ang makadalayaw nga palanan-awon sang langitnon nga palasyo ni Jehova. Ang Kordero sang Dios, si Jesucristo yadto didto, kag nakabaton sia sing linukot nga may pito ka pat-in. Sa kapitulo 6, ginbuksan ni Jesus ang anom sang pito ka pat-in, sing isa-isa. Sang mabuksan ang nahauna, nakita ang manugkabayo sa isa ka maputi nga kabayo. Ginkoronahan sia kag nangabayo nga “nagapangdaug kag sa pagtapos sang iya pagdaug.” (Bugna 6:⁠2) Amo ini si Jesus, ang bag-o makoronahan nga Hari. Sang ginsugdan niya ang iya madaugon kag harianon nga pagpangabayo sang 1914, ang adlaw sang Ginuo nagsugod. Sang ginbuksan ang masunod nga tatlo ka pat-in, tatlo pa ka kabayo upod ang ila mga manugkabayo ang naglutaw. Makahaladlok sila, nga nagalaragway sa inaway sang tawo, tiggulutom, kag kamatayon bangod sang mga pesti kag iban pa nga mga kabangdanan. Ginapamatud-an nila ang daku nga tagna ni Jesus nga ang iya langitnon nga presensia nga may harianon nga gahom pagatandaan sa duta sang dalagku nga mga inaway, mga tiggulutom, mga pesti, mga linog, kag iban pa nga mga kalamidad. (Mateo 24:​3, 7, 8; Lucas 21:10, 11) Sa pagkamatuod, dapat pamatian sang mga Cristiano ang mga pulong ni Jesus sa pito ka kongregasyon agod mabatas nila ina nga tion.

19. (a) Sa tion sang presensia ni Cristo, anong padya ang ginhatag sa matutom nga hinaplas nga mga Cristiano nga napatay na? (b) Anong makahaladlok nga mga hitabo ang ginlandong sang ginbuksan ang ikan-om nga pat-in, nga nagadul-ong sa anong pamangkot?

¹⁹ Sa pagbukas sa ikalima nga pat-in, ginpakita ang isa ka hitabo sa dimakita nga kalangitan. Ang hinaplas nga mga Cristiano nga napatay sing matutom ginpanghatagan sing maputi nga panapton. Sing maathag, bangod ang presensia ni Cristo karon isa gid ka katunayan, ang langitnon nga pagkabanhaw nagsugod na. (1 Tesalonica 4:​14-17; Bugna 3:5) Nian ginbuksan ang ikan-om nga pat-in, kag “ang duta,” ang dutan-on nga sistema sang mga butang ni Satanas, gintay-ug sang isa ka mabaskog nga linog. (2 Corinto 4:4) “Ang langit” ang tawhanon nga paggahom nga ginakontrol ni Satanas ginlukot kaangay sang isa ka daan nga linukot, agod ihaboy. Ang hinadlukan kag rebelyuso nga mga tawo nagsinggit sa mga igang: “Tiphag kamo sa amon kag tagua kami sa nawong sang Isa nga nagalingkod sa trono, kag sa kasingkal sang Kordero, kay nag-abot ang dakung adlaw sang ila kasingkal, kag sin-o bala ang sarang makabatas sini?”​—⁠Bugna 6:​13, 14, 16, 17.

20. Sin-o ang makabatas sa tion sang dakung adlaw sang kasingkal ni Jehova kag sang Kordero?

²⁰ Kag sin-o bala ang makabatas? Ti, ginsabat na ni Jesus ina nga pamangkot. Ang mga ‘nagapamati sa ginasiling sang espiritu sa mga kongregasyon’ amo ang makabatas sa dakung adlaw sang kasingkal. Kag sa pagpalig-on sini, nahibal-an pa ni Juan ang pagpat-in sa katapusan nga mga katapo sang 144,000 kag ang pagtipon sa dakung kadam-an gikan sa tanan nga pungsod agod maluwas sa “dakung kapipit-an.” (Bugna 7:​1-3, 14) Apang karon na ang tion nga buksan ang ikapito nga pat-in sang linukot kag dugang pa nga dramatiko nga mga palanan-awon ang ipakita kay Juan kag, paagi sa iya, ipakita man sa aton. Ipaathag sang masunod nga artikulo ang pila sini.

Nadumduman Mo Bala?

◻ Ano ang kaangtanan ni Jesus kag sang mga gulang sa kongregasyon?

◻ Ano nga mga problema ang nag-atubang sa mga gulang sa Pergamo kag sa Tiatira, kag paano ang kaanggid man nga mga problema nag-apektar sa mga kongregasyon karon?

◻ Anong daku nga sayop ang nahimo sang kongregasyon sa Laodicea, kag paano naton malikawan ina nga sayop karon?

◻ Paano ang mga Cristiano dapat magbatas sa sining ika-20 nga siglo, kag anong mga saad ni Jesus ang nakabulig sa ila sa paghimo sini?

◻ Paano naton malikawan ang kasubo kag pagkawalay paglaum nga maeksperiensiahan sang mga pungsod sa Armagedon?

[Mga piktyur sa pahina 13]

Ang pila sang matutom nga mga Cristiano nga nag-antos sa mga kampo konsentrasyon sang Nazi

[Credit Line]

DÖW, Vienna, Austria