Bugna

6 Kag nakita ko sang ginhukas sang Kordero+ ang isa sa pito ka selyo,+ kag nabatian ko ang isa sa apat ka buhi nga tinuga+ nga ang tingog kaangay sang daguob, nga nagsiling: “Kari!” 2 Kag nakita ko ang isa ka puti nga kabayo,+ kag ang nagasakay sa sini may pana. Ginhatagan sia sang korona,+ kag naglakat sia nga nagapangdaug agod lutuson sing bug-os ang iya mga kaaway.+

3 Sang ginhukas niya ang ikaduha nga selyo, nabatian ko ang ikaduha nga buhi nga tinuga+ nga nagsiling: “Kari!” 4 May isa pa nga naggua, isa ka kabayo nga daw kalayo ang kolor, kag ang isa nga nagasakay sa sini gintugutan sa pagkuha sing paghidait sa duta agod magpinatyanay sila, kag ginhatagan sia sing isa ka daku nga espada.+

5 Sang ginhukas niya ang ikatlo nga selyo,+ nabatian ko ang ikatlo nga buhi nga tinuga+ nga nagsiling: “Kari!” Kag nakita ko ang isa ka itom nga kabayo, kag ang isa nga nagasakay sa sini may timbangan sa iya kamot. 6 May nabatian ako nga daw tingog nga naghalin sa tunga sang apat ka buhi nga tinuga nga nagsiling: “Isa ka quart* sang trigo para sa isa ka denario*+ kag tatlo ka quart* sang sebada para sa isa ka denario; kag indi pagpabay-i nga maubos ang lana sang olibo kag ang alak.”+

7 Sang ginhukas niya ang ikap-at nga selyo, nabatian ko ang tingog sang ikap-at nga buhi nga tinuga+ nga nagsiling: “Kari!” 8 Kag nakita ko ang isa ka maluspad nga kabayo, kag ang isa nga nagasakay sa sini may ngalan nga Kamatayon. Kag ang Lulubngan* nagasunod sa iya. Kag ginhatagan sila sing awtoridad sa ikap-at nga bahin sang duta, sa pagpamatay paagi sa malaba nga espada kag paagi sa kakulang sa kalan-on+ kag paagi sa makamamatay nga balatian kag paagi sa mabangis nga mga sapat sa duta.+

9 Sang ginhukas niya ang ikalima nga selyo, nakita ko sa idalom sang halaran+ ang mga kalag*+ sang mga ginpamatay bangod sa pulong sang Dios kag bangod sa ila pagpanaksi.+ 10 Nagsinggit sila sing mabaskog: “Soberanong Ginuo nga balaan kag matuod,+ san-o mo pa bala hukman kag itimalos ang amon dugo batok sa mga nagaistar sa duta?”+ 11 Kag ang kada isa sa ila ginhatagan sing puti kag malaba nga panapton,+ kag ginsilingan sila nga maghulat sa malip-ot pa nga tion, tubtob makompleto ang kadamuon sang ila mga masigkaulipon kag mga kauturan nga malapit na patyon kaangay nila.+

12 Kag nakita ko sang ginhukas niya ang ikan-om nga selyo, kag naglinog sing mabaskog; kag ang adlaw nag-itom subong sang itom nga sako* kag ang bulan nangin subong sang dugo,+ 13 kag ang mga bituon sa langit nahulog sa duta subong sang hilaw nga mga igos* sang higuera nga nagakataktak kon ginahuyop sang mabaskog nga hangin. 14 Kag ang langit nagtaliwan subong sang ginlukot nga linukot,+ kag ang tagsa ka bukid kag isla nakuha sa nahamtangan sini.+ 15 Dayon ang mga hari sang duta, mataas nga mga opisyal, mga kumander sang militar, mga manggaranon, mga makusog, kag ang tagsa ka ulipon lakip ang hilway nga tawo nagpanago sa mga kueba kag sa tunga sang mga igang sang mga bukid.+ 16 Kag padayon sila nga nagasiling sa mga bukid kag sa mga igang: “Tiphagi kami+ kag tagua sa nawong sang Isa nga nagapungko sa trono+ kag sa kasingkal sang Kordero,+ 17 bangod nag-abot na ang daku nga adlaw sang ila kasingkal,+ kag sin-o bala ang makatindog?”+