Ang mga Pagpakamaayo ni Jehova Para sa Aton “Duta”

“Ang tanan nga ginailigan sang tubig mabuhi.”—EZEQUIEL 47:9.

1, 2. (a) Daw ano ka importante ang tubig? (b) Ano ang ginalaragway sang tubig sa suba sa palanan-awon ni Ezequiel?

ANG tubig isa ka dalayawon nga pluido. Ang tanan pisikal nga kabuhi nagakinahanglan sini. Wala sing isa sa aton ang mabuhi sing malawig kon wala ini. Kinahanglan man naton ini para sa pagpaninlo, sanglit ang tubig makatunaw kag makadula sing mga higko. Busa ginagamit naton ini sa pagtinlo sang aton lawas, sa paglaba sang aton mga panapton, bisan gani sa paghugas sang aton pagkaon. Ang paghimo sini mahimo makaluwas sang aton kabuhi.

² Ginagamit sang Biblia ang tubig agod ilaragway ang espirituwal nga mga aman ni Jehova para sa kabuhi. (Jeremias 2:13; Juan 4:7-15) Lakip sa sining mga aman amo ang pagtinlo sa iya katawhan paagi sa halad-gawad ni Cristo kag sa ihibalo sang Dios nga masapwan sa iya Pulong. (Efeso 5:25-27) Sa palanan-awon ni Ezequiel tuhoy sa templo, ang milagruso nga suba nga nagailig halin sa templo nagalaragway sinang nagahatag-kabuhi nga mga pagpakamaayo. Apang san-o nag-ilig ini nga suba, kag ano ang kahulugan sini para sa aton karon?

Ang Suba Nagailig sa Ginpasag-uli nga Duta

 3. Ano ang naeksperiensiahan ni Ezequiel, subong sang ginreport sa Ezequiel 47:2-12?

³ Subong mga bihag sa Babilonia, ang katawhan ni Ezequiel nagakinahanglan gid sang mga aman ni Jehova. Busa, napalig-on gid si Ezequiel sang makit-an niya ang nagailig nga tubig halin sa santuaryo kag nagailig halin sa templo sa palanan-awon! Gintakus sang isa ka anghel ang suba sing tig-1,000 ka maniko ang bal-ot. Ang kadalumon sini nagalab-ot kutob sa bukobuko tubtob sa tuhod tubtob sa balikawang tubtob sa kadalumon nga kinahanglan languyon. Ang suba nagahatag sing kabuhi kag pertilidad. (Ezequiel 47:2-11) Si Ezequiel ginsilingan: “Sa ubay sang suba sa iya mga pangpang, sa pihak kag pihak nga kilid, nagatubo ang tagsa ka kahoy nga kalan-on.” (Ezequiel 47:12a) Sang nakalab-ot ang sulog sa Patay nga Dagat—isa ka wala sing kabuhi nga linaw sang tubig—ang kabuhi nagtubo! Nagdamo ang mga isda. Nag-uswag ang negosyo sa pangisda.

4, 5. Paano ang tagna ni Joel tuhoy sa isa ka suba kaanggid sa iya ni Ezequiel, kag ngaa importante ini?

⁴ Ining matahom nga tagna mahimo nagpahanumdom sa Judiyong mga tinapok sang isa pa ka tagna nga ginrekord sang nagligad nga kapin sa duha ka siglo: “Magaguwa ang tuburan sa balay ni Jehova, kag magabunyag sa nalupyakan sang Kakahuyan Sang Acasia.”a (Joel 3:18) Ang tagna ni Joel, kaangay sang kay Ezequiel, nagatagna nga may isa ka suba nga magailig halin sa balay sang Dios, ang templo, kag magadala sing kabuhi sa kigas nga duog.

⁵ Tinuig na nga ginapaathag sang Ang Lalantawan nga ang tagna ni Joel natuman sa aton tion.b Sing pat-od, nian, matuod man ini sa kaanggid nga palanan-awon ni Ezequiel. Sa ginpasag-uli nga duta sang katawhan sang Dios karon, subong man sa dumaan nga Israel, ang mga pagpakamaayo ni Jehova matuod gid nga nag-ilig.

Isa ka Mabaskog nga Sulog sang mga Pagpakamaayo

 6. Ang pagwisik sing dugo sa halaran sa palanan-awon nagpahanumdom sa mga Judiyo sing ano?

⁶ Ano ang ginahalinan sang mga pagpakamaayo sa ginpasag-uli nga katawhan sang Dios? Ti, talupangda nga ang tubig nagailig halin sa templo sang Dios. Sa karon man, ang mga pagpakamaayo nagahalin kay Jehova paagi sa iya dakung espirituwal nga templo—ang kahimusan para sa putli nga pagsimba. Ang palanan-awon ni Ezequiel nagadugang sing importante nga detalye. Sa nasulod nga luwang, ang suba nagaagi sa halaran, sa bagatnan nayon sini. (Ezequiel 47:1) Ang halaran yara gid sa sentro sang templo sa palanan-awon. Detalyado nga ginlaragway ini ni Jehova kay Ezequiel kag nagsugo nga wisikan ini sang dugo sang halad. (Ezequiel 43:13-18, 20) Ina nga halaran may daku nga kahulugan para sa tanan nga Israelinhon. Ang ila katipan kay Jehova natukod na antes nagwisik si Moises sing dugo sa halaran sa kunsaran sang Bukid Sinai. (Exodo 24:4-8) Ang pagwisik sing dugo sa halaran sa palanan-awon nagapahanumdom sa ila nga kon makabalik na sila sa ila ginpasag-uli nga duta, ang mga pagpakamaayo ni Jehova magailig tubtob ginatahod nila ang ila katipan upod sa iya.—Deuteronomio 28:1-14.

 7. Ano nga kahulugan ang nakit-an sang mga Cristiano karon tuhoy sa simbuliko nga halaran?

⁷ Sing kaanggid, ang katawhan sang Dios karon ginapakamaayo paagi sa isa ka katipan—isa nga mas maayo, ang bag-ong katipan. (Jeremias 31:31-34) Ini man madugay na nga ginpalig-on paagi sa dugo ni Jesucristo. (Hebreo 9:15-20) Sa karon, katapo man kita sang mga hinaplas, nga may bahin sa sinang katipan, ukon katapo sang “iban nga mga karnero,” nga mga benepisyaryo sini, makita naton ang daku nga kahulugan sang simbuliko nga halaran. Nagasimbulo ini sa kabubut-on sang Dios tuhoy sa halad ni Cristo. (Juan 10:16; Hebreo 10:10) Subong nga ang simbuliko nga halaran yara sa sentro sang espirituwal nga templo, ang halad gawad ni Cristo importante gid para sa putli nga pagsimba. Amo ini ang basihan para sa kapatawaran sang aton mga sala kag busa para sa aton tanan nga mga paglaum para sa palaabuton. (1 Juan 2:2) Sa amo ginatinguhaan naton nga magkabuhi suno sa kasuguan nga naangot sa bag-ong katipan, “ang kasuguan ni Cristo.” (Galacia 6:2) Tubtob ginahimo naton ina, makapanginpulos kita gikan sa mga aman ni Jehova para sa kabuhi.

 8. (a) Ano ang kulang sa nasulod nga luwang sang templo sa palanan-awon? (b) Paagi sa ano makapanghinaw ang mga saserdote sa templo sa palanan-awon?

⁸ Ang isa sinang mga aman amo ang matinlo nga tindog sa atubangan ni Jehova. Sa templo sa palanan-awon, ang nasulod nga luwang wala sing isa ka butang nga prominente sa luwang sang tabernakulo kag sa templo ni Solomon—isa ka daku nga batya, sang ulihi gintawag nga dagat, nga ginapanghinawan sang mga saserdote. (Exodo 30:18-21; 2 Cronica 4:2-6) Ano ang ginagamit sang mga saserdote sa palanan-awon ni Ezequiel sa pagpanghinaw? Ti, inang milagruso nga suba nga nagailig halin sa nasulod nga luwang! Huo, hatagan sila ni Jehova sing paagi agod matigayon ang matinlo, ukon balaan, nga tindog.

 9. Paano ang mga katapo sang mga hinaplas kag sang dakung kadam-an may matinlo nga tindog karon?

⁹ Sa karon man, ang mga hinaplas ginpakamaayo sing matinlo nga tindog sa atubangan ni Jehova. Ginatamod sila ni Jehova subong balaan, ginakabig sila nga matarong. (Roma 5:1, 2) Kamusta ang “dakung kadam-an,” nga nagalaragway sa disaserdotenhon nga mga tribo? Nagasimba sila sa naguwa nga luwang, kag ini man nga suba nagailig sa sina nga bahin sang templo sa palanan-awon. Nagakaigo gid, kon amo, nga nakit-an ni apostol Juan ang dakung kadam-an nga napanaptan sing matinlo, maputi malaba nga mga panapton samtang nagasimba sila sa luwang sang espirituwal nga templo! (Bugna 7:9-14) Ano man ang pagtratar sa ila sa sining mahigko nga kalibutan, makasalig sila nga tubtob nagatuo sila sa halad gawad ni Cristo, ginatamod sila ni Jehova nga matinlo kag putli. Paano sila nagapakita sing pagtuo? Paagi sa pagsunod sa mga tikang ni Jesus, may bug-os nga pagsalig sa halad gawad.—1 Pedro 2:21.

10, 11. Ano ang isa ka importante nga bahin sang simbuliko nga tubig, kag paano ini naangot sa daku nga pagsangkad sang suba?

¹⁰ Subong sang nasambit na, may isa pa ka importante nga bahin ining simbuliko nga tubig—ang ihibalo. Sa ginpasag-uli nga Israel, ginpakamaayo ni Jehova ang iya katawhan sing Makasulatanhon nga mga panudlo paagi sa mga saserdote. (Ezequiel 44:23) Sa kaanggid nga paagi, ginpakamaayo ni Jehova ang iya katawhan karon sing bugana nga panudlo tuhoy sa iya Pulong sang kamatuoran, paagi sa “harianon nga pagkasaserdote.” (1 Pedro 2:9) Ang ihibalo tuhoy kay Jehova nga Dios, tuhoy sa iya mga katuyuan para sa katawhan, kag ilabi na tuhoy kay Jesucristo kag sa Mesianiko nga Ginharian nagailig sing bugana sa sining katapusan nga mga adlaw. Daw ano kadaku sang nagadalom nga pagbaha sang espirituwal nga kaumpawan nga aton ginabaton!—Daniel 12:4.

¹¹ Subong nga ang suba nga gintakus sang anghel nagadalom kag nagadalom, ang nagahatag kabuhi nga mga pagpakamaayo gikan kay Jehova nagdugang man sing daku agod matatapan ang pagdugok sang mga tawo sa aton ginpakamaayo espirituwal nga duta. Ang isa pa ka tagna tuhoy sa pagpasag-uli nagasiling: “Ang diutay mangin isa ka libo, kag ang magamay mangin isa ka gamhanan nga pungsod. Ako, si Jehova, magapadali sini sa iya kaugalingon nga tion.” (Isaias 60:22) Nangin matuod ining mga pinamulong—minilyon ang nagdugok agod magbuylog sa aton sa putli nga pagsimba! Ginhatagan ni Jehova sing bugana nga “tubig” ang tanan nga nagdangop sa iya. (Bugna 22:17) Ginapat-od niya nga ang iya dutan-on nga organisasyon nagapanagtag sing mga Biblia kag mga literatura sa Biblia sa bug-os nga kalibutan, sa ginatos ka lenguahe. Sing kaanggid, ang Cristianong mga miting kag mga kombension ginhimo sa bug-os nga kalibutan agod ang tanan mahatagan sing tulad-kristal katin-aw nga tubig sang kamatuoran. Paano naapektuhan sining mga aman ang mga tawo?

Ang Tubig Nagadala sing Kabuhi!

12. (a) Ngaa ang mga kahoy sa palanan-awon ni Ezequiel nakapatubas sing maayo? (b) Ano ang ginarepresentar sining mabungahon nga mga kahoy sa tion sang katapusan nga mga adlaw?

¹² Ang suba sa palanan-awon ni Ezequiel nagadala sing kabuhi kag kapagros. Sang mahibaluan ni Ezequiel ang tuhoy sa mga kahoy nga nagatubo sa ubay sang suba, ginsugiran sia: “Ang ila dahon indi malayong, ukon mag-untat ang ila pagpamunga. . . . Kag ang ila bunga mangin kalan-on kag ang ila dahon inugbulong.” Ngaa nagapamunga ining mga kahoy sa sining makatilingala nga paagi? “Bangod ang tubig para sa sini—nagahalin mismo sa santuaryo.” (Ezequiel 47:12b) Ining simbuliko nga mga kahoy nagalandong sa tanan nga aman sang Dios para sa pagpasag-uli sang katawhan sa kahimpitan pasad sa halad-gawad ni Jesus. Sa duta sa karon, ang hinaplas nga nagkalabilin nagapanguna sa pag-aman sing espirituwal nga pagkaon kag bulong. Sa tapos mabaton tanan sang 144,000 ang ila langitnon nga padya, ang mga benepisyo gikan sa ila saserdotenhon nga pag-alagad subong kaupod nga mga manuggahom ni Cristo magapadayon sa palaabuton, sa ulihi magadul-ong sa bug-os nga pagdaug sa Adamiko nga kamatayon.—Bugna 5:9, 10; 21:2-4.

13. Anong pag-ayo ang nahimo sa aton mga tion?

¹³ Ang suba sa palanan-awon nagalab-ot sa walay kabuhi nga Patay nga Dagat kag nagaayo sa tanan nga malab-utan sini. Ini nga dagat nagalaragway sa patay sa espirituwal nga palibot. Apang ang kabuhi nagabugana “sa tanan nga duog nga malambutan sang doble-kadaku nga mga suba.” (Ezequiel 47:9) Sing kaanggid, sa katapusan nga mga adlaw, sa bisan diin nga malab-utan sang tubig sang kabuhi ang mga tawo nangin buhi sa espirituwal. Ang una nga nakatigayon liwat sang kabuhi amo ang hinaplas nga nagkalabilin sang 1919. Nabuhi sila liwat sa espirituwal gikan sa tulad-patay, diaktibo nga kahimtangan. (Ezequiel 37:1-14; Bugna 11:3, 7-12) Ining importante nga tubig nakalab-ot sang ulihi sa iban pa nga mga patay sa espirituwal, kag nabuhi man sila kag nangin ang nagadamo nga dakung kadam-an sang iban nga mga karnero, nga nagahigugma kag nagaalagad kay Jehova. Sa indi madugay, ini nga aman magalab-ot sa minilyon sang mga ginbanhaw.

14. Ano ang ginailustrar karon sang mainuswagon nga industriya sa pangisda sa higad sang Patay nga Dagat?

¹⁴ Ang espirituwal nga kapagsik nagaresulta sa pagkamabungahon. Ginailustrar ini sang negosyo sa pangisda nga nag-uswag sa mga baybayon sang dagat nga patay sadto anay. Ginsilingan ni Jesus ang iya mga sumulunod: “Himuon ko kamo nga mga mangingisda sang mga tawo.” (Mateo 4:19) Sa katapusan nga mga adlaw, ang hilikuton nga pagpangisda nagsugod sa pagtipon sa nagkalabilin sang mga hinaplas, apang wala ini magdulog didto. Ang nagahatag-kabuhi nga tubig halin sa espirituwal nga templo ni Jehova, pati ang pagpakamaayo nga sibu nga ihibalo, nakabulig sa mga tawo sa tanan nga pungsod. Bisan diin man nakalab-ot ini nga suba, nagaresulta ini sa espirituwal nga kabuhi.

15. Ano ang nagapakita nga indi tanan magabaton sang mga aman sang Dios para sa kabuhi, kag ano ang ila madangatan?

¹⁵ Sa pagkamatuod, indi tanan nagabaton sa mensahe sang kabuhi karon; ukon batunon ini sang tanan nga mabanhaw sa Milenyo nga Paggahom ni Cristo. (Isaias 65:20; Bugna 21:8) Ginpahibalo sang anghel nga may mga bahin sang dagat nga wala maayo. Ining daw katunggan, walay kabuhi nga mga duog ‘itugyan sa asin.’ (Ezequiel 47:11) Tuhoy sa mga tawo sa aton mga adlaw, indi tanan nga ginhatagan sing nagahatag-kabuhi nga tubig ni Jehova magabaton sini. (Isaias 6:10) Sa Armagedon, ang tanan nga nagpabilin sa walay kabuhi kag nagabalatian sa espirituwal nga kahimtangan itugyan sa asin, buot silingon, pagalaglagon sing dayon. (Bugna 19:11-21) Apang, yadtong padayon nga nagainom sini nga tubig makasalig nga makalampuwas kag makit-an ang katapusan nga katumanan sini nga tagna.

Ang Suba Nagailig sa Paraiso

16. San-o kag paano natuman sing bug-os ang palanan-awon ni Ezequiel tuhoy sa templo?

¹⁶ Kaangay sa iban nga mga tagna tuhoy sa pagpasag-uli, ang palanan-awon ni Ezequiel tuhoy sa templo natuman sing bug-os sa tion sang Milenyo. Sa amo nga tion ang saserdotenhon nga klase wala na diri sa duta. “Mangin mga saserdote sila sang Dios kag ni Cristo, kag magahari sila kaupod niya [sa langit] sing isa ka libo ka tuig.” (Bugna 20:6) Ining langitnon nga mga saserdote makaupod ni Cristo sa pag-aman sing bug-os nga mga benepisyo sang halad gawad ni Cristo. Sa amo, ang matarong nga katawhan maluwas, mapasag-uli sa kahimpitan!—Juan 3:17.

17, 18. (a) Paano ginlaragway ang nagahatag-kabuhi nga suba sa Bugna 22:1, 2, kag san-o ang panguna nga tion sang pag-aplikar sina nga palanan-awon? (b) Sa Paraiso, ngaa ang suba sang tubig sang kabuhi nagsangkad sing daku?

¹⁷ Sa amo, ang suba nga nakita ni Ezequiel magapailig nian sing labing epektibo nga tubig sang kabuhi. Amo ini ang labing maayo nga tion sa pag-aplikar sa tagna nga narekord sa Bugna 22:1, 2: “Ginpakita niya sa akon ang suba sang tubig sang kabuhi, nga matin-aw subong sang kristal, nga nagailig gikan sa trono sang Dios kag sang Kordero sa tunga sang malapad nga dalan sini. Kag sa sini nga pangpang sang suba kag sa sina nga pangpang may mga kahoy sang kabuhi nga nagapatubas sing napulog-duha ka sari sang bunga, nga nagapatubas sang ila bunga kada bulan. Kag ang mga dahon sang mga kahoy bulong sa mga pungsod.”

¹⁸ Sa tion sang Milenyo, ang tanan nga balatian—pisikal, mental, kag emosyonal—magaayo. Maathag ini nga ginlaragway sang “pag-ayo sa mga pungsod” paagi sa simbuliko nga mga kahoy. Bangod sa mga aman nga ginhatag ni Cristo kag sang 144,000, “wala sing pumuluyo ang magasiling: ‘Nagamasakit ako.’” (Isaias 33:24) Kag ang suba magasangkad sing bug-os. Magasangkad ini kag magadalom agod matatapan ang minilyon, ayhan binilyon, ka tawo nga mabanhaw nga magainom sining putli nga tubig sang kabuhi. Gin-ayo sang suba sa palanan-awon ang Patay nga Dagat, nga nagahatag sing kabuhi sa tanan nga ginailigan sini. Sa Paraiso, ang mga lalaki kag mga babayi mabuhi sa bug-os nga kahulugan, gin-ayo gikan sa napanubli nga kamatayon gikan kay Adan kon magtuo sila sa mga benepisyo sang gawad nga ginhatag sa ila. Ang Bugna 20:12 nagatagna nga ang “mga linukot” pagabuksan sa sadtong mga adlaw, nga nagahatag sing dugang nga kasanagan nga magahatag man sing benepisyo sa mga nabanhaw. Sing makapasubo, may pila nga magadumili nga ayuhon, bisan sa Paraiso. Ining mga rebelde ‘itugyan sa asin’ sang dayon nga kalaglagan.—Bugna 20:15.

19. (a) Paano ang pagtunga sa duta matuman sa Paraiso? (b) Ano nga bahin sa Paraiso ang ginalaragway sang siudad? (c) Ano ang importansia sang ginahamtangan sang siudad nga malayo diutay sa templo?

¹⁹ Sa sadto man nga tion, ang pagtunga sa duta sa palanan-awon ni Ezequiel makatigayon sing bug-os nga katumanan. Nakit-an ni Ezequiel ang duta nga gintulunga sing nagakaigo; subong man, ang tagsa ka matutom nga Cristiano makasalig nga makatigayon sia sing duog, sing palanublion, sa Paraiso. Sing kaanggid, ang handum nga makatigayon sing kaugalingon nga balay nga maistaran kag maatipan matuman sa mahim-ong nga paagi. (Isaias 65:21; 1 Corinto 14:33) Ang siudad nga nakita ni Ezequiel nagakaigo nga nagalaragway sa administratibo nga kahimusan nga gintuyo ni Jehova para sa bag-ong duta. Ang hinaplas saserdotenhon nga klase indi na makaupod sang mga tawo sa pisikal nga paagi. Ginapahangop ini sang palanan-awon paagi sa paglaragway sa siudad nga makit-an sa “nadagtaan” nga duta malayo diutay sa templo. (Ezequiel 48:15) Samtang nagagahom ang ­144,000 upod kay Cristo sa langit, ang Hari may mga tiglawas man sa duta. Ang iya tawhanon nga mga sakop makabenepisyo sing daku gikan sa mahigugmaon nga panuytoy kag paggiya sang pangulo nga klase. Apang, ang matuod nga sentro sang panguluhan indi diri sa duta, kundi sa langit. Ang tanan sa duta, lakip ang pangulo nga klase mangin sakop sang Mesianiko nga Ginharian.—Daniel 2:44; 7:14, 18, 22.

20, 21. (a) Ngaa nagakaigo ang ngalan sang siudad? (b) Anong mga pamangkot ang aton ipamangkot sa aton kaugalingon bangod sang aton nahangpan tuhoy sa palanan-awon ni Ezequiel?

²⁰ Talupangda ang katapusan nga mga pinamulong sang tagna ni Ezequiel: “Ang ngalan sang siudad kutob sadto nga adlaw mangin, Didto Mismo si Jehova.” (Ezequiel 48:35) Ini nga siudad wala nagaluntad agod hatagan ang katawhan sing gahom ukon impluwensia; ukon magapatuman ini sing kabubut-on sang isa ka tawo. Siudad ini ni Jehova, nga nagapabanaag sang iya hunahuna kag sang iya mahigugmaon, makatarunganon nga mga paagi. (Santiago 3:17) Makalilipay ini nga nagapasalig sa aton nga pakamaayuhon ni Jehova ang iya organisado nga “bag-ong duta” nga katilingban sang katawhan tubtob sa dayon nga palaabuton.—2 Pedro 3:13.

²¹ Ginakalangkagan bala naton ang palaabuton nga yara sa unahan naton? Sing nagakaigo, nian, maayo nga mamangkot ang tagsa sa aton: ‘Ano ang akon ginahimo sa makadalayaw nga mga pagpakamaayo nga ginapakita sang palanan-awon ni Ezequiel? Matutom ko bala nga ginasakdag ang hilikuton nga ginahimo sang mahigugmaon nga mga manugtatap, pati ang ila sang hinaplas nga nagkalabilin kag sang palaabuton nga mga katapo sang pangulo nga klase? Ginhimo ko bala ang putli nga pagsimba subong sentro sang akon kabuhi? Ginahimuslan ko bala ang tubig sang kabuhi nga nagailig sing bugana karon?’ Kabay nga padayon nga himuon ini sang tagsa sa aton kag magkalipay sa mga aman ni Jehova tubtob sa walay katubtuban!

[Mga footnote]

Paano Mo Sabton?

◻ Ano ang ginalarawan sang tubig nga nagailig gikan sa templo?

◻ Ano nga pag-ayo ang nahimo ni Jehova paagi sa simbuliko nga suba, kag ngaa nga nagdalom ang suba?

◻ Ano ang ginalarawan sang mga kahoy sa higad sang mga pangpang sang suba?

◻ Ano ang ginalarawan sang siudad sa tion sang Milenyo nga Paggahom, kag ngaa nagakaigo ang ngalan sang siudad?

[Mga laragway sa pahina 23]

Ang suba sang kabuhi nagarepresentar sa aman ni Jehova para sa kaluwasan