Ang Katapusan nga mga Adlaw—Ano ang Masunod?

“Ginasiling ko sa inyo ang kamatuoran, ining kaliwatan indi gid magataliwan tubtob mahanabo ining tanan nga butang.”—Jesucristo, Mateo 24:34, New International Version.

SI Jesus, sang ginapaathag “ang tanda . . . sang katapusan sang sistema sang mga butang,” nagsiling sa iya natingala nga mga disipulo sang mga pulong nga ginbalikwat sa ibabaw. (Mateo 24:3) Karon ano ang buot silingon ni Jesus sang tinaga nga “kaliwatan”? Kag anong mga hitabo ang magadul-ong sa katapusan sang sistema sang mga butang? Sa iban nga mga pulong, anong mga hitabo ang bantayan naton sa malapit nga palaabuton?

Daw Ano Kalawig Nagadugay ang Isa ka Kaliwatan?

Ginpakita sang The American Legion Magazine nga 4,743,826 ka lalaki kag babayi sa E.U. ang nagpakigbahin sa Inaway Kalibutanon I. Apang sang 1984 272,000 lamang ang nabilin nga buhi, kag nagakapatay sila sa promedyo nga siam kada oras. Nagakahulugan bala ina, nian, nga ang kaliwatan sang 1914 nadula na?

Ang Griegong tinaga para sa kaliwatan amo ang geneá, nga gingamit nanday Mateo, Marcos, kag Lucas sa ila pagrekord sang mga ginpamulong ni Jesus. May nanuhaytuhay ini nga aplikasyon suno sa konteksto. Apang, ang The New International Dictionary of New Testament Theology nagalaragway sini subong: “Ang mga nabun-ag sa isa ka tion . . . Naangot sa sini ang kahulugan: ang grupo sang mga katubotubo sang isa, isa ka dag-on.” Ang A Greek-English Lexicon of the New Testament nagasiling: “Ang kabug-osan sang mga natawo sa isa ka tion, nga napasangkad sa paglakip sa tanan nga nagakabuhi sa isa ka tion sang kaliwatan, mga katubotubo.” Ining depinisyon nagalakip sa tanan nga natawo sa palibot sang tion sang isa ka maragtason nga hitabo kag sa tanan nga nagakabuhi sadtong tion.

Si J. A. Bengel nagsiling sa iya New Testament Word Studies: “Ang mga Hebreo . . . nagaisip sang kapitoan kag lima ka tuig subong isa ka kaliwatan, kag ang mga tinaga, indi magataliwan, nagapahangop nga ang daku nga bahin sadtong kaliwatan [sang adlaw ni Jesus], apang indi ang kabug-osan sini, indi magataliwan antes ang tanan matuman.” Nagmatuod ini sang tuig 70 C.E. sang ginlaglag ang Jerusalem.

Sa karon man, ang kalabanan sang kaliwatan sang 1914 nagtaliwan na. Apang, minilyon pa ang nagakabuhi sa duta nga natawo sadto nga tuig ukon antes sini. Kag bisan pa naga­diutay ang ila kadamuon, ang mga pulong ni Jesus magamatuod, “ining kaliwatan indi magtaliwan tubtob nga tanan ining butang matuman.” Isa pa ini ka rason sa pagpati nga ang tulad-makawat nga adlaw ni Jehova malapit na. Gani, anong mga hitabo ang dapat bantayan sang alisto nga mga Cristiano?

“Paghidait kag Kalig-onan”sa Indi Madugay?

“Kamo gid nakahibalo nga ang adlaw ni Jehova magaabot subong sang makawat sa kagab-ihon. Kon magasiling sila: ‘Paghidait kag kalig-onan!’ nian sa hinali ang kalaglagan magaabot sa ila.”—1 Tesalonica 5:2, 3.

Sugod sang matapos ang Inaway Kalibutanon II sang 1945, ang katawhan nag-uyauya sa bibi sang inaway kay ang duha ka nagakontrahanay nga kagamhanan, ang Estados Unidos kag ang Unyon Sobyet, nagbangigay. Ang krisis sa misil sa Cuba sang 1962 isa sadto ka makatalagam nga pag-engkwentrohanay. Apang ginkuha sang Unyon Sobyet ang iya mga misil gikan sa Cuba, kag hipos nga ginkuha sang Estados Unidos ang iya mga misil gikan sa Turkey. Isa lamang ini sang madamo nga pamatuod sang ginatawag nga Cold War.

Ang pagbuhin sing armas nangin isa ka tema nga ginabaisan sa sulod sang mga dekada kag sa masami natapos nga isa lamang ka propaganda para sa duha ka pungsod. Karon, sa nagahingapos nga mga binulan sang pagka­presidente ni Presidente Reagan kag sa nagainit nga atmospera sang glasnost (prangka) nga pagsulundan ni Sekretaryo Gorbachev, daw may yara serioso nga paghambalanay nahanungod sa pagbuhin sa nuklear nga mga armas. Kon bala amo ini ang una nga tikang sa pagpahanabo sing ginabuko nga paghidait kag kalig-onan para sa kalibutan sa kabilugan, indi naton mapaktan. Apang nahisuno sa tagna sang Biblia, amo ina ang ginahulat sang mga Cristiano. Kon matabo ini, ano dayon?

Ang mahalungon nga mga estudyante sang Biblia indi madaya “kon magsiling sila: ‘Paghidait kag kalig-onan!’”—kon bala gikan sa Nasyones Unidas ukon gikan sa dalagku nga mga kagamhanan. Maathag nga ginapakita sang Biblia nga ang matuod nga paghidait kag kalig-onan magagikan lamang sa matarong nga paggahom, ang Ginharian nga pangulohan sang Dios paagi kay Cristo.

Bangod sina ang bug-os globo nga pagpahibalo sing paghidait kag kalig-onan sang mga lider sang kalibutan mangin amo ang sinyales sa paghikot sang Dios, “subong sang makawat sa kagab-ihon,” nga magapakibot sa wala nagatuo nga kalibutan. Huo, “hinali nga kalaglagan” ang magaabot sa eklesiastiko kag politikal nga mga kagamhanan nga nagsikway kay Jehova kag sa iya mga saksi. Paano naton nahibaluan ini?

Desidido nga Aksion sang Nagasakay sa Kabayo nga Maputi

Balik liwat sa palanan-awon tuhoy sa apat ka manugkabayo sang Apokalipsis, may isa ka manugsakay nga wala naton masambit—ang nahauna, nga nagasakay sa kabayo nga maputi. Ginalaragway sia sang manunulat sa Biblia: “Nakita ko, kag, yari karon! ang kabayo nga maputi; kag ang nagasakay sa sini may pana; kag ginhatagan sia sing korona, kag naglakat sia nga nagapangdaug kag sa pagtapos sang iya pagpangdaug.” Amo man ini gihapon ang ginalaragway sa kapitulo 19 sang Bugna: “Yari karon! ang kabayo nga maputi. Kag ang nagasakay sa sini gintawag nga Matutom kag Matuod, kag nagahukom sia kag nagapakig-away sa pagkamatarong. . . . Kag gikan sa iya baba nagaguwa ang espada nga matalom, nga sa sini lab-on niya ang mga pungsod, kag gahuman niya sila sa bilugon nga salsalon.” Kag sin-o ining isa? Ang amo gihapon nga rekord nagasugid sa aton nga sia may ngalan nga nasulat, “Hari sang mga hari kag Ginuo sang mga ginuo.” Amo ini ang ginbanhaw nga Anak sang Dios, si Cristo Jesus.—Bugna 6:2; 19:11-16.

Ano, nian, ang nagakinahanglan sa paghikot sining “Hari sang mga hari”? Ang punto malab-ot nga sa diin “ang hari sang aminhan” (ang batok kapitalista nga kampo) kag “ang hari sang bagatnan” (ang kapitalista nga mga pungsod sa idalom sang proteksion sang Estados Unidos), nga ginpadaku sa Daniel kapitulo 11, magadulog sa isa kag isa. (Subong gintagna sang Daniel 11:40, “ang hari sang aminhan” nakasulod na sa madamo nga kadutaan, labi na kutob sang 1945.)a

Gani, ano pa ang dapat matabo antes manghilabot ang Dios agod laglagon ang sistema sang mga butang karon?

Ginapakita sang tagna sa Biblia nga sa pila ka punto ang radikal nga politikal nga mga elemento sa Nasyones Unidas magaliso batok sa nagapanghilabot nga mga relihion sang kalibutan kag ibuyagyag sila, kag laglagon ang ila gahom kag pagkontrol sa mapinatihon sa disparatis nga katawhan.—Bugna 17:16, 17.b

Wala sing duhaduha nga ang mangin resulta sining pagkalaglag sang dimatuod nga mga relihion sang kalibutan amo ang pagsalakay sa mga Saksi ni Jehova. Nian bangod sini magabalos sa pag-atake ang Hari ni Jehova, ang Manugkabayo sa maputi nga kabayo. (Ezequiel 38:10-12, 21-23) Kag ano ang ginasiling sang Daniel 2:44 nahanungod sa resulta? “Sa mga adlaw sadto nga mga hari [politikal nga mga kagamhanan karon] magapatindog ang Dios sang langit sing ginharian nga dili gid malaglag. . . . Dugmukon sini kag papason ini tanan nga ginharian, kag ini magapadayon tubtob sa walay katubtuban.” Huo, ang inaway sang Armagedon sang Dios batok sa kitaon nga politikal nga mga elemento ni Satanas sa duta magaresulta sa bug-os nga kadalag-an para kay Jehova kag sa iya Hari sang mga hari.—Bugna 16:14-16; 19:17-21.

Ano ang magasunod? Ti, ang madugay na nga handum sang mahigugmaon sa paghidait, mahinadlukon sa Dios nga mga Cristiano—ang Milenyo nga Paggahom sang Ginharian nga pangulohan sang Dios sa matinumanon nga katawhan! Nian matuman ang mahimayaon nga mga saad sang Bugna 21:3, 4: “Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.”

Kon luyag mo sing dugang pa nga impormasyon nahanungod sinang talalupangdon nga mga tagna sa Biblia kag kon ano ang kahulugan sini para sa aton sing indibiduwal, pakigkitai palihog ang mga Saksi ni Jehova sa inyo duog ukon sulati ang mga manugbalhag sining magasin sa inyo pungsod.

[Footnotes]

[Kapsion sa pahina 14]

Kaliwatan—“Ang kabug-osan sang mga natawo sa isa ka tion, nga napasangkad sa paglakip sa tanan nga nagakabuhi sa isa ka tion.”—“A Greek-English Lexicon of the New Testament”

[Kapsion sa pahina 16]

Ginapakita sang tagna sa Biblia nga ang radikal nga politikal nga mga elemento sa Nasyones Unidas magaliso batok sa nagapanghilabot nga mga relihion sang kalibutan

[Laragway sa pahina 15]

Sa tapos sang Armagedon, sa bag-ong kalibutan sang Dios nga may paghidait kag pagkamatarong, ‘ang nahaunang mga butang nagtaliwan na.’—Bugna 21:3, 4