Magapadayon Bala Kamo sa Pagbantay?

1, 2. (a) Ano ang ginsiling ni Jesus tuhoy sa katapusan nga mga adlaw? (b) Ano nga mga pamangkot ang aton binagbinagon?

TUMALAGSAHON gid nga magpungko didto sa Bukid sang mga Olibo—diin makita ang templo sang Jerusalem—sang ginhambal ni Jesus ang isa sa iya makakulunyag gid nga mga tagna. Sanday Pedro, Andres, Santiago, kag Juan nagapamati gid kay Jesus sang ginasugid niya sa ila ang tagna nga madugay pa matabo. Madamo sia sing ginsugid sa ila tuhoy sa katapusan nga mga adlaw sining malaut nga sistema sang kalibutan, ang tion nga magagahom sia sa Ginharian sang Dios. Ginsilingan niya sila nga sa sina nga tion, ang iya “matutom kag mainandamon nga ulipon” magarepresentar sa iya sa duta agod maghatag sa iya mga alagad sing suno sa tion nga espirituwal nga pagkaon.—Mat. 24:45-47.

² Dayon, sa amo man nga tagna, ginsaysay ni Jesus ang parabola tuhoy sa napulo ka birhen. (Basaha ang Mateo 25:1-13.) Binagbinagon naton ini nga mga pamangkot: (1) Ano ang panguna nga ginatudlo sina nga parabola? (2) Paano gin-aplikar sang matutom nga mga hinaplas ang laygay sa parabola, kag ano ang mga resulta? (3) Paano ang kada isa sa aton makabenepisyo sa parabola ni Jesus?

 3. Sang una, paano ginapaathag sang aton mga literatura ang parabola tuhoy sa napulo ka birhen, kag ano ang posible nga resulta sini?

³ Natun-an naton sang nagligad nga artikulo nga sa sulod sang mga dekada, ang matutom nga ulipon amat-amat nga nagapaathag sang Kasulatan. Mas ginapadaku nila ang praktikal nga mga leksion sangsa simbuliko kag matagnaon nga mga kahulugan sini. Sang una, ang aton mga literatura nagahatag kon kaisa sing simbuliko nga mga kahulugan bisan sa magagmay nga mga detalye sa parabola ni Jesus tuhoy sa napulo ka birhen, lakip na ang mga suga, lana, mga suludlan, kag iban pa. Apang, posible ayhan nga bangod sini naglisa kita sa simple kag importante nga leksion nga ginatudlo sang parabola? Ang sabat sa sini importante gid.

 4. Sa parabola, paano naton makilala (a) ang nobyo? (b) ang mga birhen?

⁴ Tan-awon naton ang panguna nga ginatudlo ni Jesus sa sini nga parabola. Una, binagbinaga ang panguna nga mga karakter. Sin-o ang nobyo sa parabola? Maathag nga ginatumod ni Jesus ang iya kaugalingon. Isa ka bes, ginpatuhuyan pa gani ni Jesus ang iya kaugalingon subong nobyo! (Luc. 5:34, 35) Sin-o naman ang mga birhen? Sa parabola, nagsiling si Jesus nga dapat handa gid ang mga birhen kag nagasiga ang ila mga suga sa pag-abot sang nobyo. Talupangda nga amo man sini ang ginsiling ni Jesus sa iya “diutay nga panong” sang hinaplas nga mga sumulunod: “Magpanapot kamo kag maghanda kag pasigaha ang inyo mga suga, kag mangin kaangay kamo sang mga tawo nga nagahulat sa pagbalik sang ila agalon halin sa punsion sa kasal.” (Luc. 12:32, 35, 36) Dugang pa, si apostol Pablo kag si apostol Juan nagpaanggid sa hinaplas nga mga sumulunod sang Cristo sa matinlo nga mga birhen. (2 Cor. 11:2; Bug. 14:4) Maathag nga ang parabola ni Jesus sa Mateo 25:1-13 isa ka laygay kag paandam sa iya hinaplas nga mga sumulunod.

 5. Paano ginapakita ni Jesus kon sa ano nga hut-ong sang tion nagapatuhoy ang iya parabola?

⁵ Masunod, binagbinaga ang hut-ong sang tion. Sa ano nga hut-ong sang tion nagapatuhoy ang laygay ni Jesus? Ginasugiran kita ni Jesus kon san-o ini matabo sa katapusan sang parabola: “Nag-abot man ang nobyo.” (Mat. 25:10) Subong sang ginbinagbinag sa Hulyo 15, 2013 nga isyu sini nga magasin, ang tagna ni Jesus sa Mateo kapitulo 24 kag 25 nagaunod sing walo ka pagpatuhoy sa iya ‘pag-abot,’ kag sa tagsa ka pagpatuhoy, pareho nga Griegong tinaga ang gingamit. Sa tagsa sini, si Jesus nagapatuhoy sa tion sang dakung kapipit-an, sa diin magaabot sia sa pagpadapat sang paghukom kag paglaglag sa sining sistema sang mga butang sang kalibutan. Gani maathag nga ini nga parabola maaplikar sa katapusan nga mga adlaw, pero ang talipuspusan sini mahanabo sa dakung kapipit-an.

 6. Suno sa konteksto, ano ang panguna nga ginatudlo sang parabola?

⁶ Ano ang panguna nga ginatudlo sang parabola? Binagbinagon naton ang konteksto. Bag-o lang ginsugid ni Jesus ang parte sa iya “matutom kag mainandamon nga ulipon.” Ina nga ulipon gamay lang nga grupo sang hinaplas nga mga lalaki nga manguna sa mga sumulunod sang Cristo sa katapusan nga mga adlaw. Ginpaandaman ni Jesus ini nga mga lalaki nga dapat magpabilin sila nga matutom. Dayon bilang pagpasangkad, ginsaysay niya ini nga parabola agod laygayan ang tanan niya nga hinaplas nga sumulunod sa katapusan nga mga adlaw nga ‘magpadayon sa pagbantay’ agod indi nila mawasi ang ila hamili nga padya. (Mat. 25:13) Binagbinagon naton ini nga parabola kag tan-awon kon paano gin-aplikar sang mga hinaplas ang laygay sini.

 7, 8. (a) Ano ang duha ka kinaiya sang mainandamon nga mga birhen nga nagapakita nga handa sila? (b) Paano napamatud-an sang mga hinaplas nga handa sila?

⁷ Ginpadaku sa parabola ni Jesus nga ang mainandamon nga mga birhen handa sa pag-abot sang nobyo, indi pareho sa mga buangbuang. Ngaa? Bangod sa duha ka kinaiya: ang kahanda kag ang pagkaalisto. Ang mga birhen, nga ginpapulaw agod hulaton ang pag-abot sang nobyo, kinahanglan nga padayon nga nagapasiga sang ila suga kag mangin alisto pirme tubtob sa sinang makalilipay nga okasyon. Apang, indi pareho sa mga buangbuang, ang lima ka birhen handa gid kag nagdala sang ila mga suga kag sang dugang nga lana sa ila mga suludlan. Napamatud-an bala nga handa man ang matutom nga mga hinaplas?

⁸ Huo! Sa katapusan nga mga adlaw, ang hinaplas nga mga Cristiano nanghikot pareho sadtong mainandamon nga mga birhen, nga handa sa pagtuman sing matutom sang ila asaynment tubtob sa katapusan. Nangin matutom gid sila sa pag-alagad, bisan nahibaluan nila sa umpisa pa lang nga bangod sang ila asaynment, madamo sila sing isakripisyo nga mga butang nga ginatanyag sang kalibutan ni Satanas. Gindedikar nila ang ila kabuhi kay Jehova lamang kag sa pag-alagad sa iya, indi bangod sa partikular nga petsa ukon sa gintalana nga tion, kundi bangod ginahigugma nila sia kag mainunungon sila sa iya kag sa iya Anak. Ginahuptan nila ang ila integridad kag ginasikway ang espiritu sining malaut nga kalibutan kag ang materyalistiko, imoral, kag maiyaiyahon nga panimuot sini. Gani pirme sila handa, padayon nga nagasiga subong mga suga, kag wala nabalaka bisan pa daw naatrasar ang Nobyo.—Fil. 2:15.

 9. (a) Ngaa nagpaandam si Jesus tuhoy sa kinaugali nga huyog nga tuyhon? (b) Ano ang ginhimo sang mga hinaplas sang may nagsinggit: “Yari na ang nobyo”? (Tan-awa man ang footnote.)

⁹ Ang ikaduha nga kinaiya nga nakabulig sa mga birhen nga mangin handa amo ang pagkaalisto. Posible bala nga tuyhon ang kada isa sa mga hinaplas nga Cristiano sa malawig nga tion sang pagpulaw? Posible. Talupangda nga nagsiling si Jesus nga ang napulo ka birhen ‘gintuyo tanan kag natulugan’ bangod daw naatrasar ang nobyo. Nahibaluan gid ni Jesus nga bisan ang isa handa gid kag nalangkag mahimo maapektuhan sia sang kaluyahon sang unod. Ginpamatian sang matutom nga mga hinaplas ini nga paandam kag nagatinguha gid sila nga makapabilin nga alisto kag mabinantayon. Sa parabola, ang tanan nga birhen nakabati sang pagsinggit: “Yari na ang nobyo!” Pero ang mga alisto lamang ang nakabatas tubtob sa katapusan. (Mat. 25:5, 6; 26:41) Kamusta naman ang matutom nga mga hinaplas karon? Sa katapusan nga mga adlaw, naghulag sila pasad sa malig-on nga ebidensia, nga subong bala nagasinggit, “Yari na ang nobyo”—manug-abot na sia. Nagbatas man sila kag nagpabilin nga handa sa pag-abot sang Nobyo.a Apang, ang hingapusan nga bahin sang parabola nagapatuhoy sa mas espesipiko nga hut-ong sang tion. Ngaa?

10. Ano nga pamangkot ang nagautwas sa pagsabtanay sang mainandamon kag sang buangbuang nga mga birhen?

¹⁰ Ayhan ang makalilibog gid nga bahin sang parabola yara sa hingapusan, sang nagasabtanay ang buangbuang kag ang mainandamon nga mga birhen. (Basaha ang Mateo 25:8, 9.) Ini nga pagsabtanay nagapautwas sing pamangkot: “San-o nahanabo sa maragtas sang katawhan sang Dios nga ang mga matutom wala magbulig sa mga nagapangayo sini?” Mahibaluan naton ang sabat sini kon binagbinagon naton liwat ang hut-ong sang tion. Dumduma nga nahangpan na naton nga si Jesus, nga amo ang Nobyo, magaabot agod maghukom sa hingapusan nga bahin sang dakung kapipit-an. Kon amo, indi ayhan nga ini nga bahin sang parabola nagapadaku sa kon ano ang mahanabo antes sinang hingapusan nga paghukom? Daw amo gid, kay sa sina nga tion mabaton na sang mga hinaplas ang katapusan nga pagmarka sa ila.

11. (a) Ano ang matabo antes magsugod ang dakung kapipit-an? (b) Ano ang ginapahangop sang pagsiling sang mainandamon nga mga birhen sa mga buangbuang nga magkadto sila sa mga nagabaligya sang lana?

¹¹ Gani, antes magsugod ang dakung kapipit-an, nabaton na sang tanan nga matutom nga hinaplas sa duta ang katapusan nga pagmarka sa ila. (Bug. 7:1-4) Kon mabaton na nila ini, pat-od na ang pagtawag sa ila. Pero hunahunaa ang mga tinuig antes magsugod ang kapipit-an. Ano ang matabo sa mga hinaplas nga wala makapabilin nga mabinantayon, ukon wala nakahupot sang ila integridad? Madula nila ang ila langitnon nga padya. Gani, indi nila mabaton ang katapusan nga pagmarka sa ila antes magsugod ang kapipit-an. Sa sina nga tion, ang iban nga matutom pagahaplasan. Kon magsugod na ang kapipit-an, makibot gid ining mga buangbuang sa kalaglagan sang Babilonia nga Daku. Sa sini lamang nga tion nila marealisar nga indi sila handa sa pag-abot sang Nobyo. Bangod ulihi na ang tanan, ano ang matabo kon mangayo sila sing bulig? Ang parabola ni Jesus nagahatag sa aton sing masubo nga sabat. Ang mainandamon nga mga birhen wala maghatag sang ila lana sa mga buangbuang, sa baylo ginsilingan sila nga magkadto sa mga nagabaligya sang lana. Apang, dumduma nga “tungang-gab-i na.” May makita pa bala sila nga nagabaligya sing lana sa sina nga oras? Wala na.

12. (a) Sa tion sang dakung kapipit-an, ano ang matabo sa mga hinaplas nga wala maghupot sang ila integridad antes sang katapusan nga pagmarka? (b) Ano ang madangatan sang mga tawo nga nangin kaangay sang buangbuang nga mga birhen?

¹² Sing kaanggid, sa tion sang dakung kapipit-an, indi makabulig ang matutom nga mga hinaplas sa kay bisan sin-o nga nangin indi matutom. Wala na sing mabulig sa ila. Ulihi na ang tanan. Kon amo, ano na lang ang matabo sa ila? Ginapaathag ni Jesus kon ano ang natabo sa buangbuang nga mga birhen sang naglakat sila: “Nag-abot man ang nobyo. Ang nakahanda nga mga birhen nag-upod sa iya sa punsion. Kag pagsulod gid nila, ginsiraduhan dayon ang puertahan.” Kon magkari ang Cristo sa iya himaya sa hingapusan sang kapipit-an, tipunon niya ang iya matutom nga mga hinaplas sa langit. (Mat. 24:31; 25:10; Juan 14:1-3; 1 Tes. 4:17) Masiraduhan gid sing puertahan ang mga tawo nga indi matutom kaangay sang buangbuang nga mga birhen. Daw subong bala nga magapakiluoy sila: ‘Ginuo, Ginuo, buksi kami!’ Apang ang mabaton nila nga sabat pareho sa nabaton nga sabat sang tulad-kanding nga mga tawo sa tion sang paghukom: “Wala ako makakilala sa inyo.” Makapasubo gid!—Mat. 7:21-23; 25:11, 12.

13. (a) Ngaa indi kinahanglan maghinakop nga madamo sa hinaplas nga mga sumulunod sang Cristo ang mangin indi matutom? (b) Ngaa ang paandam ni Jesus makabig man nga pagpabutyag sang iya pagsalig? (Tan-awa ang piktyur sa umpisa sini nga artikulo.)

¹³ Base sa nabinagbinag na, ano ang aton mahinakop? Ginapahangop bala ni Jesus nga madamo sang iya hinaplas nga mga alagad ang mangin indi matutom kag dapat buslan? Indi. Dumduma nga antes sini, ginpaandaman niya ang iya “matutom kag mainandamon nga ulipon” nga indi sila mangin malaut nga ulipon. Indi buot silingon nga ginapaabot niya nga matabo ini. Sing kaanggid, ini nga parabola nagahatag sing mabaskog nga paandam. Subong nga ang lima ka birhen buangbuang kag ang lima mainandamon, ang tagsa ka hinaplas sarang gid makapili kon bala mangin handa sila kag alisto ukon mangin buangbuang kag indi matutom. Amo man sini ang punto ni apostol Pablo sa ginsiling niya sa pareho niya nga hinaplas nga mga Cristiano. (Basaha ang Hebreo 6:4-9; ipaanggid ang Deuteronomio 30:19.) Talupangda nga ang paandam ni Pablo matigdas, apang mahigugmaon niya nga ginpabutyag ang iya pagsalig nga may “mas maayo nga mga butang” nga matigayon ang iya Cristianong mga kauturan sa palaabuton. Sing kaanggid, ang paandam sa parabola ni Jesus ginhatag upod ang mahigugmaon nga pagsalig. Nahibaluan sang Cristo nga ang tagsa niya ka hinaplas nga alagad makapabilin nga matutom kag mabaton nila ang makalilipay nga padya!

14. Ngaa makabenepisyo man ang “iban nga mga karnero” sa parabola tuhoy sa napulo ka birhen?

¹⁴ Bangod ang parabola sang napulo ka birhen ginpatuhoy ni Jesus sa iya hinaplas nga mga sumulunod, magahinakop bala kita nga indi makabenepisyo sa sini ang “iban nga mga karnero” sang Cristo? (Juan 10:16) Indi! Dumduma nga ang ginatudlo sang parabola simple lang: “Magpadayon kamo sa pagbantay.” Naaplikar lamang bala ini sa mga hinaplas? Nagsiling anay si Jesus: “Ang ginasiling ko sa inyo, ginasiling ko man sa tanan: Magpadayon kamo nga magbantay.” (Mar. 13:37) Ginapatuman ni Jesus nga ang tanan niya nga sumulunod maghanda sang ila tagipusuon sa pag-alagad sing matutom kag dapat man sila magbantay. Gani ginasunod sang tanan nga Cristiano ang ginahimo sang mga hinaplas, ginailog nila ang ila maayo nga halimbawa, kag ginauna ang ministeryo sa ila kabuhi. Dumdumon man naton nga ang buangbuang nga mga birhen nangayo sing lana sa mga mainandamon. Ang ila nalugaw-an nga pagpangayo nagapahanumdom sa aton nga wala sing isa nga puede mangin matutom para sa aton, magpabilin sa kamatuoran para sa aton, ukon magbantay para sa aton. Ang kada isa sa aton manabat sa matarong nga Hukom nga gintangdo ni Jehova. Dapat kita mangin handa. Kay magaabot sia sa indi madugay!

15. Ngaa ang palaabuton nga kasal sang Cristo sa iya nobya makalilipay gid para sa tanan nga matuod nga Cristiano?

¹⁵ Ang tanan nga Cristiano mahimo man makabenepisyo sa panguna nga hitabo sa parabola ni Jesus. Sin-o bala sa aton ang indi interesado sa mahanabo nga kasal? Ang mga hinaplas didto na sa langit; pagkatapos sang Armageddon, mangin nobya sila sang Cristo. (Bug. 19:7-9) Sa sina nga tion, ang tanan sa duta makabenepisyo sa sining langitnon nga kasal, tungod nagapasalig ini sing isa ka himpit nga gobierno para sa tanan. Ano man ang aton paglaum sa palaabuton, sa langit man ukon sa duta, mangin determinado kita nga sundon ang importante nga leksion sa parabola tuhoy sa napulo ka birhen. Ihanda naton ang aton tagipusuon kag magpabilin kita nga malig-on kag alisto pirme, agod matigayon naton ang mahimayaon nga palaabuton nga gin-aman ni Jehova para sa aton!