Sugilanon sang Kabuhi

Ang Diutay nga Sakripisyo Nagdala sa Amon sing Madamo nga Pagpakamaayo

PANUGIRON NANDAY GEORGE KAG ANN ALJIAN

Wala gid kami maghunahuna sang akon asawa nga sa isa ka adlaw masal-an namon ang tinaga nga “manunudlo” sa tinaga nga “ilaga.” Wala gid kami magdumdom nga sa sesentahon nga pangidaron magatuon kami sing makatilingala nga mga letra sa pagpanikasog nga makakomunikar sa mga tawo sa Far East. Apang, amo sini ang ginhimo namon ni Ann sang hingapusan nga mga tuig sang 1980. Isugid namon sa inyo kon paano ang ginhimo namon nga diutay nga sakripisyo sa sulod sang mga tinuig nagdul-ong sa madamo nga pagpakamaayo.

NAGHALIN ako sa isa ka pamilya nga may kaliwat nga Armenianhon kag katapo sang Armenian Church. Si Ann isa anay ka Romano Katoliko. Nagkompromiso kami nga duha sa amon relihioso nga pagtuluuhan sang nagpakasal kami sang 1950. Beinte siete anyos ako sadto, kag si Ann 24. Nag-istar kami sa isa ka apartment sa ibabaw sang akon dry-cleaning shop sa Jersey City, New Jersey, E.⁠U.⁠A. Sadto nga tion mga apat ka tuig na ako sa sini nga negosyo.

Sang 1955 nakabakal kami sing matahom nga tatlo-sing-kuarto nga balay sa Middletown, New Jersey. Yadto nga balay mga 60 kilometros ang kalayuon sa akon negosyo, diin nagatrabaho ako sing anom ka adlaw kada semana. Gab-i na katama ako pirme nagapauli. Nakapakig-angot lamang ako sa mga Saksi ni Jehova kon magkadto sila sa akon shop sa pulupanag-on kag magbilin sing literatura sa Biblia. Interesado gid ako magbasa sa mga literatura. Bisan pa masako gid ako sa akon negosyo, napalambo ko ang daku nga pagtahod sa Biblia.

Wala madugayi nahibaluan ko nga ang estasyon sang radyo sang Watchtower, nga WBBR, nagawaragwag sing mga lektura sa Biblia sa tion nga nagabiyahe ako sakay sa akon salakyan pakadto sa shop kag pauli. Nagpamati ako sing maayo sa sining mga lektura, kag nagdugang ang akon interes tubtob sa punto nga ginpangabay ko ang mga Saksi nga duawon ako. Sang Nobiembre 1957, ginduaw ako sa balay ni George Blanton kag ginsugdan ang pagtuon sa Biblia upod sa akon.

Ang Amon Pamilya Nahiusa sa Putli nga Pagsimba

Ano ang reaksion ni Ann sa sini tanan? Pasugiron naton sia.

“Sang primero, nagpamatok gid ako. Pirme ko ginasamong ang pagtuon ni George sa Biblia amo nga namat-od sia nga magtuon sa iban nga lugar, kag ginhimo niya ini sa sulod sang walo ka bulan. Sa sadto nga tion, nagatambong na si George sa mga miting sa Kingdom Hall kon Domingo. Nian nahibaluan ko nga serioso sia sa pagtuon niya sa Biblia bangod amo lamang ini ang adlaw nga wala sia sing trabaho. Apang, nagpabilin sia nga isa ka maayo nga bana kag amay​—⁠nangin mas maayo pa gani​—⁠kag nagbag-o ang akon panimuot. Sa katunayan, kon kaisa samtang nagapaninlo ako sing lamesa sa sala kag kon wala sing nagatan-aw, ginakuha ko ang magasin nga Magmata! nga pirme ginabilin ni George sa lamesa, kag ginabasa ko ini. Kon kaisa man, ginabasa ni George sa akon ang mga artikulo sa Magmata! nga wala sing direkta nga kaangtanan sa doktrina apang pirme nagapadaku sa Manunuga.

“Isa ka gab-i, sang naglakat si George agod magtuon sing Biblia upod kay Brother Blanton, ginkuha ko ang publikasyon nga ginbutang sang amon dos-anyos nga anak, nga si George, sa lamesa sa tupad sang akon katre. May kaangtanan ini sa paglaum para sa mga patay. Bisan pa kapoy ako, ginbasa ko ini samtang nagahigda bangod bag-o lang napatay ang akon lola, kag masinulub-on gid ako. Gilayon nga nakita ko kag nahangpan ang kamatuoran sa Biblia nga ang mga patay wala nagaantos sa iban nga duog kag nga banhawon sila sa palaabuton. Wala madugayi, nagapungko na ako sa katre, kag malangkagon nga nagabasa kag nagakurit sa mga punto nga luyag ko ipakita kay George kon magpauli na sia halin sa pagtuon sa Biblia.

“Daw indi makapati ang akon bana nga ako yadto. Sang naghalin sia sa balay, nagpamatok ako, kag karon nalangkag gid ako sa dalayawon nga mga kamatuoran sa Biblia nga akon natun-an! Nagpulaw kami tubtob magkaagahon nga nagahambalanay tuhoy sa Biblia. Ginpaathag ni George ang katuyuan sang Dios para sa duta. Ginpangabay ko sia sadto mismo nga gab-i nga sa balay na sia magtuon agod makabuylog ako sa sini.

“Ginpanugda ni Brother Blanton nga magbuylog man sa amon ang mga kabataan. Abi namon bata pa sila para sa sini, kay duha kag apat ka tuig lamang ang edad nila. Apang, ginpakita sa amon ni Brother Blanton ang Deuteronomio 31:​12, nga nagasiling: ‘Tipuna ang katawhan, ang mga lalaki, ang mga babayi, kag ang mga magamay, . . . agod nga magpamati sila kag nga magtuon sila.’ Gin-apresyar namon ini nga panuytoy kag ginpakomento pa gani namon ang kabataan sa tion sang pagtuon sa Biblia. Nagahanda kami sang amon mga komento sing ulupod, apang wala gid namon ginasiling sa ila kon ano ang ila ihambal. Ginbatyag namon nga nakabulig ini sa amon kabataan nga himuon nga ila ang kamatuoran. Ginapasalamatan gid namon ang bulig ni Brother Blanton agod mag-uswag sa espirituwal ang amon pamilya.”

Mga Kabudlayan nga Nagakinahanglan sang Sakripisyo

Karon nga nahiusa na kami sa pagtuon sa Biblia, may mga problema nga nag-utwas. Bangod ang akon shop tuman kalayo, masami nga alas nuebe sa gab-i na ako makapauli. Bangod sini, indi ako makatambong sa mga miting sa tungatunga sang semana, bisan pa nga makatambong ako kon Domingo. Sadto nga tion, nagatambong si Ann sa tanan nga miting kag madasig ang iya pag-uswag. Luyag ko man makatambong sa tanan nga miting kag makadumala sing mapuslanon nga pagtinuon sa pamilya. Nahibaluan ko nga kinahanglan maghimo ako sing pila ka pagsakripisyo. Gani namat-od ako nga palip-uton ang mga inoras sa akon negosyo, bisan pa madula ang iban ko nga mga kostumer.

Maayo gid ang resulta sini. Gintamod namon ang pagtinuon sang pamilya nga serioso subong sang iban nga lima ka semanal nga miting sa Kingdom Hall. Gintawag namon ini nga ikan-om nga miting. Gani nagtalana kami sing isa ka espesipiko nga adlaw kag oras​—⁠kada Mierkoles, alas otso sa gab-i. Kon kaisa pagkaundang sa panihapon, sa tapos makapanghugas sing mga pinggan, ang isa sa amon nagasiling, “Oras na para sa ‘miting’!” Kon wala pa ako, ginasugdan na ni Ann ang pagtinuon, kag ginabuslan ko sia gilayon pag-abot ko.

Ang isa pa ka butang nga nagpabakod kag nagpahiusa sa amon pamilya amo ang ululupod nga pagbasa sa matag-adlaw nga teksto sa aga. Apang, may problema sa pagpatigayon sini. Lainlain ang oras sang amon pagbugtaw. Ginhambalan namon ini kag namat-od nga magbangon kami sing dungan, magpamahaw sa 6:30 sa aga, kag binagbinagon sing tingob ang matag-adlaw nga teksto. Nangin mapuslanon gid ini sa amon. Sang nagdaku na ang amon mga anak, namat-od sila nga mag-alagad sa Bethel. Nabatyagan namon nga ining adlaw-adlaw nga pagbinagbinag nagbulig sa ila espirituwalidad.

Ang mga Pribilehiyo Pagkatapos sang Bawtismo Nagkinahanglan sing Dugang Pa nga Sakripisyo

Ginbawtismuhan ako sang 1962, kag pagkatapos sang 21 ka tuig sa akon negosyo, ginbaligya ko ini kag nag-obra sa amon lugar agod mangin malapit ako sa akon pamilya kag maalagad namon si Jehova nga magkaupod. Nagbukas ini sang dalan para sa madamo nga pagpakamaayo. Nagpahamtang kami sing tulumuron nga tanan kami magsulod sa bug-os tion nga ministeryo. Nagsugod ini sang nahauna nga bahin sang katuigan 1970 sang ang amon subang nga anak, nga si Edward, nangin isa ka bug-os tion nga ministro, ukon regular payunir, pagkatapos niya sa hayskul. Wala magdugay, nagpayunir man ang amon anak nga si George, kag dayon si Ann. Napalig-on gid ako sa ila nga tatlo, bangod ginasugiran nila ako sang ila mga eksperiensia sa pag-alagad sa latagon. Subong pamilya, ginbinagbinag namon kon paano namon mapasimple ang amon kabuhi agod kami tanan mangin bug-os tion sa pag-alagad. Namat-od kami nga ibaligya ang balay. Disiotso ka tuig na kami nga nag-istar sa amo nga balay kag didto na nagdaku ang amon pamilya. Naluyagan gid namon ang amon balay, apang ginpakamaayo ni Jehova ang amon desisyon nga ibaligya ini.

Gin-agda si Edward sa Bethel sang 1972, kag si George, sang 1974. Bisan pa nahidlaw kami ni Ann sa ila, wala namon ginhunahuna nga maayo kuntani kon nagpabilin sila sa amon lugar, nagpangasawa, kag nagpanganak. Sa baylo, nalipay gid kami nga ang amon mga anak nagaalagad kay Jehova sa Bethel.⁠a Nagaugyon kami sa Hulubaton 23:​15, nga nagasiling: “Anak ko, kon ang imo tagipusuon magmaalam, ang akon tagipusuon magakasadya.”

Nag-alagad Kami Subong Espesyal Payunir

Sang ang amon duha ka anak nag-alagad sa Bethel, nagpadayon kami sa pagpayunir. Nian isa ka adlaw sang 1975, nakabaton kami sang sulat nga nagaagda sa amon nga mag-espesyal payunir sa wala matangdo nga teritoryo sa Clinton County, Illinois. Nakibot gid kami! Nagakahulugan ini nga magbiya kami sa New Jersey, diin malapit kami sa amon mga anak sa New York kag diin may mga abyan kami kag mga paryente. Apang, ginkabig namon ini nga isa ka asaynment gikan kay Jehova kag naghimo sing pagsakripisyo, nga nagdul-ong sa bag-o nga mga pagpakamaayo.

Pagkatapos sang binulan nga pagpanghikot sa wala matangdo nga teritoryo, nagsugod kami sa paghiwat sing mga miting sa isa ka pangpubliko nga tinukod sa Carlyle, Illinois. Apang luyag namon ang isa ka permanente nga duog-tilipunan. Ang isa ka utod didto kag ang iya asawa nakakita sing propiedad nga may gamay nga kamalig kag gin-arkilahan namon ini. Gintinluan namon ang bilog nga kamalig pati na ang kasilyas sa gua sini, kag ginhimo ini nga magamay nga duog-tilipunan. Madumduman pa namon ang isa ka kabayo nga interesado sa amon. Pirme ini nagatamwa sa bintana kag nagatan-aw kon ano ang nagakatabo sa miting!

Sang ulihi, naporma ang Kongregasyon sang Carlyle, kag nalipay kami nga may bahin sa sini. Ginbuligan kami sang lamharon nga payunir nga mag-asawa, sanday Steve kag Karil Thompson, nga nagkari man agod magpanghikot sa wala matangdo nga teritoryo. Ang mga Thompson nagpabilin didto sa sulod sang pila ka tuig kag nag-eskwela sang ulihi sa Watchtower Bible School of Gilead kag nagsaylo sa ila asaynment subong misyonero sa Sidlangan nga Aprika, diin nag-alagad sila sa nagalakbay nga hilikuton.

Wala magdugay nangin gutok na ang amon magamay nga duog-tilipunan, kag kinahanglan namon ang mas daku nga tinukod. Ang amo gihapon nga mag-asawa ang nagbulig kag nagbakal sing propiedad nga mas nagakabagay para sa Kingdom Hall. Nalipay gid kami nga pagligad sang pila ka tuig, gin-agda kami sa dedikasyon sang isa ka bag-o ginpatindog nga Kingdom Hall sa Carlyle! Pribilehiyo ko nga maghatag sing pamulongpulong sa dedikasyon. Ang amon asaynment didto isa gid ka makalilipay nga eksperiensia, kag isa ka pagpakamaayo gikan kay Jehova.

Nagbukas ang Isa ka Bag-o nga Teritoryo Para sa Amon

Sang 1979 nakabaton kami sing bag-o nga asaynment, sa Harrison, New Jersey. Nag-alagad kami didto sa sulod sang 12 ka tuig. Nakasugod kami didto sing pagtuon sa Biblia sa isa ka Intsik nga babayi, kag nagdul-ong ini sa madamo pa nga pagtuon sa mga Intsik. Sa amo nga tion, nahibal-an namon nga linibo ka Intsik nga estudyante kag pamilya ang nagapuyo sa amon teritoryo. Bangod sini, napalig-on kami nga magtuon sing Inintsik nga lenguahe. Bisan pa nagakahulugan ini nga maghinguyang sing tion kada adlaw sa pagtuon sa lenguahe, nagresulta ini sa madamo kag makalilipay nga pagtuon sa Biblia upod sa mga Intsik sa amon teritoryo.

Sa sadtong mga tinuig, nakaeksperiensia kami sing madamo nga makahalam-ot nga kahimtangan, ilabi na sa pagtinguha namon nga makahambal sing Inintsik. Isa ka adlaw nagpakilala si Ann subong isa ka “ilaga” sang Biblia sa baylo nga “manunudlo” sang Biblia. Magkaanggid gid ang mga tinaga. Nagyuhum ang tagbalay kag nagsiling: “Magdayon ka. Wala pa gid ako makapakighambal sa ilaga sang Biblia.” Nabudlayan kami gihapon sa amo nga lenguahe.

Dayon gin-asayn kami sa isa pa ka lugar sa New Jersey diin nakapadayon kami sa pagpanghikot sa mga Intsik nga teritoryo. Sang ulihi, gin-agda kami nga magsaylo sa Boston, Massachusetts, diin may nagauswag nga grupo sang mga Intsik sa sulod sang mga tatlo ka tuig. Pribilehiyo gid namon nga buligan ini nga grupo sa sulod sang nagligad nga pito ka tuig kag nalipay gid kami nga makita ini nga nangin isa ka kongregasyon sang Enero 1, 2003.

Mga Pagpakamaayo Bangod Sang Masinakripisyuhon nga Kabuhi

Sa Malaquias 3:​10, mabasa naton ang pangagda ni Jehova sa iya katawhan nga dalhon ang ila mga dulot kag mga halad agod nga iula niya ang iya mga pagpakamaayo tubtob nga wala na sing masudlan. Gin-untatan namon ang negosyo nga interesado gid ako. Ginbaligya namon ang amon balay, nga naluyagan gid namon. Kag gintalikdan man namon ang iban pa nga mga butang. Apang, kon ipaanggid ini sa mga pagpakamaayo, ang mga sakripisyo diutay lang.

Madamo gid nga pagpakamaayo ang gin-ula ni Jehova sa amon! Nalipay kami nga makita ang amon kabataan nga nagbaton sing kamatuoran, nalipay gid kami sa pagpakigbahin sing bug-os tion sa nagaluwas-kabuhi nga ministeryo, kag naeksperiensiahan namon ang pag-atipan ni Jehova sa amon mga kinahanglanon. Matuod gid, ang amon diutay nga sakripisyo nagdala sa amon sing madamo nga pagpakamaayo!

[Nota]

[Retrato sa pahina 25]

Sanday Louise kag George Blanton upod kay Ann, 1991

[Retrato sa pahina 26]

Ang Kingdom Hall sa Carlyle, gindedikar sang Hunyo 4, 1983

[Retrato sa pahina 27]

Upod sa bag-o naporma nga Intsik nga Kongregasyon sa Boston

[Retrato sa pahina 28]

Upod kanday Edward, Connie, George, kag Grace