Gamita ang Espirituwal nga mga Tulumuron Agod Himayaon ang Imo Manunuga

“KON ang isa ka tawo wala makahibalo kon diin nga pantalan sia madungka, indi importante ang direksion sang huyop sang hangin.” Ining mga tinaga, nga ginpadungog sa unang-siglo nga pilosopo sa Roma, nagatudlo sa kamatuoran nga agod ang kabuhi may padulungan, kinahanglanon ang mga tulumuron.

Ang Biblia nagaaman sing mga huwaran sang mga indibiduwal nga mahunahunaon sa tulumuron. Sa sulod sang mga 50 ka tuig, si Noe “nagtukod sing arka agod maluwas ang iya panimalay.” Ang manalagna nga si Moises ‘nagtulok sing maayo sa balos nga padya.’ (Hebreo 11:​7, 26) Ang nagbulos kay Moises, nga si Josue, nakabaton sing hatag-Dios nga tulumuron nga lutuson ang duta sang Canaan.​—⁠Deuteronomio 3:​21, 22, 28; Josue 12:7-24.

Sang unang siglo C.⁠E., ang espirituwal nga mga tulumuron ni apostol Pablo walay duhaduha nga naimpluwensiahan sing daku sang mga pinamulong ni Jesus nga “ining maayong balita sang ginharian ibantala sa bug-os napuy-an nga duta.” (Mateo 24:14) Napalig-on sang personal nga mga mensahe kag sang mga palanan-awon gikan kay Ginuong Jesus, lakip ang sugo nga ‘dalhon ang ngalan [ni Jesus] sa mga pungsod,’ si Pablo nangin instrumento sa alagisod nga pagtukod sing Cristianong mga kongregasyon sa Asia Minor kag sa Europa.​—⁠Binuhatan 9:15; Colosas 1:23.

Huo, ang mga alagad ni Jehova sa bug-os nga maragtas pirme nagpahamtang sing dungganon nga mga tulumuron kag nalab-ot nila ini sa kahimayaan sang Dios. Paano kita karon makapahamtang sing espirituwal nga mga tulumuron? Anong mga tulumuron ang mapanikasugan naton, kag anong praktikal nga mga tikang ang mahimo naton agod malab-ot ini?

Importante ang Nagakaigo nga mga Motibo

Sarang mapahamtang ang mga tulumuron sa halos tanan nga hilikuton sang kabuhi, kag may mga tawo man sa sining kalibutan nga mahunahunaon sa tulumuron. Apang, ang teokratikong mga tulumuron tuhay sangsa kalibutanon nga mga ambisyon. Ang panguna nga mga motibo sang madamo nga tulumuron sang kalibutan amo ang sobra nga handum sa manggad kag walay kaayawan nga paghingamo sa posisyon kag gahom. Sayop gid nga panikasugan ang isa ka tulumuron agod makatigayon sing gahom kag kabantugan! Ang mga tulumuron nga nagahimaya kay Jehova nga Dios direkta nga naangot sa aton pagsimba sa iya kag sa mga intereses sang Ginharian. (Mateo 6:33) Ginpahamtang ini nga mga tulumuron bangod sang gugma sa Dios kag sa isigkatawo kag agod mapalambo ang diosnon nga debosyon.​—⁠Mateo 22:37-39; 1 Timoteo 4:7.

Dapat nga putli ang aton mga motibo samtang nagapahamtang kita kag nagapanikasog para sa espirituwal nga mga tulumuron, para sa dugang pa nga mga pribilehiyo sa pag-alagad ukon para sa personal nga pag-uswag sa espirituwalidad. Apang, bisan pa ang nagakaigo nga mga tulumuron indi matigayon kon kis-a. Paano kita makapahamtang sing mga tulumuron nga posible gid nga malab-ot naton?

Kinahanglan ang Mabaskog nga Handum

Binagbinaga kon paano natapos ni Jehova ang pagtuga sa uniberso. Sa mga pulong nga, “may kagab-ihon kag may kaagahon,” gintandaan ni Jehova ang alagisod nga hut-ong sang pagpanuga. (Genesis 1:​5, 8, 13, 19, 23, 31) Sa ginsuguran sang tagsa ka hut-ong sang pagpanuga, nahibaluan gid niya sing maayo kon ano ang iya katuyuan ukon tulumuron, sa sina nga adlaw. Kag gintuman sang Dios ang iya katuyuan sa pagtuga sing mga butang. (Bugna 4:11) “Ang iya [Jehova] kalag nagahandum sini, kag himuon niya ini,” siling sang patriarka nga si Job. (Job 23:13) Mahimo gid nga nalipay si Jehova nga makita “ang tanan nga butang nga ginhimo niya” kag magsiling “tama gid [ini] kaayo”!​​—⁠Genesis 1:31.

Agod matuman ang aton mga tulumuron, dapat may mabaskog man kita nga handum nga himuon ini. Ano ang magabulig sa aton agod mapalambo ining mabaskog nga handum? Bisan sang ang duta wala pa sing porma kag wala sing sulod, nakita na ni Jehova ang mangin resulta​—⁠isa ka matahom nga hiyas sa kahawaan, nga nagahimaya kag nagapadungog sa iya. Sing kaanggid, ang aton handum nga tapuson ang aton ginabuko mapalambo man paagi sa pagpamalandong sa mga resulta kag mga benepisyo sang paglab-ot sa tulumuron. Amo sini ang naeksperiensiahan sang 19-anyos nga si Tony. Indi gid niya malipatan ang iya una nga impresyon sang pagbisita niya sa isa ka sanga talatapan sang mga Saksi ni Jehova sa Nakatundan nga Europa. Sugod sadto, ang pamangkot nga pirme ginahunahuna ni Tony amo, ‘Ano ayhan ang pagkabuhi kag pag-alagad sa isa ka duog kaangay sini?’ Wala gid madula sa hunahuna ni Tony ini nga posibilidad, kag padayon niya nga gintinguhaan ini nga tulumuron. Malipayon gid sia nga sang pila ka tuig sang ulihi naaprobahan sia nga mag-alagad sa sanga talatapan!

Ang aton pagpakig-upod sa iban nga nakalab-ot na sang isa ka tulumuron makapukaw man sang aton handum nga lab-uton ini. Si Jayson nga nagapangidaron sing 30 anyos, indi gid luyag nga mag-alagad sa latagon sang sia pamatan-on pa. Apang pagkagradwar niya sa hayskul, malangkagon sia nga nagpayunir, sa amo nangin bug-os tion sia nga manugbantala sang Ginharian. Ano ang nakabulig kay Jayson nga mapalambo ang handum nga magpayunir? Nagsabat sia: “Ang pagpakigsugilanon sa mga payunir kag ang pagpakig-upod sa ila sa ministeryo nakaimpluwensia sa akon sing daku.”

Ang Pagsulat sang Aton mga Tulumuron Makabulig sa Aton Agod Malab-ot Ini

Nagaathag ang mga butang nga mabudlay hangpon kon isulat naton ini. Si Solomon nagsiling nga ang nagakaigo nga mga pulong mahimo mangin gamhanan subong sang mga pangtuslok sa baka sa paghatag sing direksion sa kabuhi. (Manugwali 12:11) Kon isulat naton ang mga tinaga, nagatudok ini sa aton hunahuna kag tagipusuon. Ngaa suguon pa abi ni Jehova ang mga hari sang Israel nga maghimo sing personal nga kopya sang kasuguan? (Deuteronomio 17:18) Busa, sarang man naton masulat ang aton mga tulumuron kag ang paagi nga malab-ot ini, ginalista ang mga balagbag nga mahimo mag-abot kag lakip man ang mga paagi agod malandas ini. Makabulig man nga hibaluon naton ang mga topiko nga dapat naton tun-an, ang kalantip nga dapat naton tigayunon, kag ang mga indibiduwal nga makabulig kag makasakdag sa aton.

Ang pagpahamtang sing espirituwal nga mga tulumuron para sa iya kaugalingon may makapapag-on nga epekto kay Geoffrey, isa ka madugay na nga espesyal payunir sa isa ka naligwin nga teritoryo sa isa ka pungsod sa Asia. Sing makapasubo, wala ginapaabot nga napatay ang iya asawa. Pagkatapos makapasibu, nagdesisyon si Geoffrey nga ihugod sing bug-os ang iya kaugalingon sa iya pagpayunir paagi sa pagpahamtang sing mga tulumuron. Pagkatapos masulat ang iya mga plano, mapinangamuyuon nga nagpahamtang sia sing tulumuron nga makasugod sing tatlo ka bag-o nga pagtuon sa Biblia sa katapusan sang bulan. Kada adlaw, ginarepaso niya ang iya hilikuton, kag kada napulo ka adlaw, ginausisa niya ang iya pag-uswag. Nalab-ot bala niya ang iya tulumuron? Sa iya ginreport nga apat ka bag-o nga pagtuon sa Biblia, malipayon nga nagsabat sia sing huo!

Magpahamtang sing mga Tulumuron nga Malab-ot sa Malip-ot Lang nga Tion Subong mga Palatandaan

Ang iban nga mga tulumuron mahimo nga sa primero daw tuman gid ka budlay malab-ot. Para kay Tony, nga ginsambit kaina, ang pag-alagad sa sanga talatapan sang mga Saksi ni Jehova daw damgo lamang. Ini bangod kay balingag ang iya estilo sang pagkabuhi, kag wala pa gani sia makadedikar sa Dios. Apang nagdesisyon si Tony nga ipahisuno ang iya kabuhi sa mga dalanon ni Jehova kag nagpahamtang sia sing tulumuron nga makalipikar para sa bawtismo. Pagkatapos mabawtismuhan, nagpahamtang sia sing tulumuron nga makaauxiliary payunir kag makaregular payunir, nga ginatandaan ang mga petsa sa iya kalendaryo kon san-o niya sugdan ini. Sang nakapayunir na sia sa pila ka tion, ang pag-alagad sa sanga talatapan daw indi na isa ka damgo lamang.

Maayo man kon bahinbahinon naton ang aton madugay pa nga mga tulumuron sa pila ka tulumuron nga malab-ot sa malip-ot lang nga tion. Ang una nga mga tulumuron mahimo himuon subong sarang malab-ot nga mga marka samtang ginatinguhaan mo ang malawig pa nga tulumuron. Ang regular nga pagrepaso sang aton pag-uswag sa sini nga mga marka makabulig agod mahuptan naton nga nakasentro ang aton hunahuna. Ang sulitsulit nga pagpangamuyo kay Jehova tuhoy sa aton mga plano makabulig man sa aton nga magpadayon. “Indi mag-untat sa pagpangamuyo,” laygay ni apostol Pablo.​—⁠1 Tesalonica 5:17.

Kinahanglan ang Determinasyon kag Pagkamapinadayunon

Walay sapayan sang aton maayo nga mga plano kag sang mabaskog nga handum nga himuon ini, ang iban nga mga tulumuron indi gid malab-ot. Mahimo nga nalugaw-an gid ang disipulo nga si Juan Marcos sang wala sia pagpaupda ni apostol Pablo sa ikaduha nga paglakbay ni Pablo subong misyonero! (Binuhatan 15:37-40) Dapat makatuon sing leksion si Marcos gikan sa sining kapaslawan kag ipasibu ang iya tulumuron para sa dugang pa nga pag-alagad. Amo gid ang iya ginhimo. Sang ulihi, positibo nga ginsambit ni Pablo si Marcos kag suod nga nagpakig-upod sia kay apostol Pedro sa Babilonia. (2 Timoteo 4:11; 1 Pedro 5:13) Walay duhaduha nga ang iya pinakadaku nga pribilehiyo amo ang pagsulat sing inspirado nga rekord tuhoy sa kabuhi kag ministeryo ni Jesus.

Sa aton pagpanikasog para sa espirituwal nga mga tulumuron, makaeksperiensia man kita sing mga kapaslawan. Sa baylo nga mangampo, dapat naton repasuhon kag timbangtimbangon kon bala rasonable pa ang aton tulumuron kag dayon pasibuon ini kon kinahanglanon. Kon may mga balagbag, dapat kita mangin determinado sa pagpadayon. “Itugyan kay Jehova ang imo mga buluhaton kag ang imo mga plano pagalig-unon,” pasalig sa aton sang maalam nga si Hari Solomon.​—⁠Hulubaton 16:3.

Apang kon kaisa, bangod sang mga sirkunstansia, mahimo nga indi realistiko ang pila ka tulumuron. Halimbawa, ang mapigaw nga panglawas ukon mga obligasyon sa pamilya mahimo magapugong sa aton sa paglab-ot sa pila ka tulumuron. Indi gid naton pagkalipatan ang kamatuoran nga ang pinakapadya amo gid ang kabuhi nga walay katapusan​—⁠sa langit ukon sa Paraiso nga duta. (Lucas 23:43; Filipos 3:​13, 14) Paano ini matigayon? “Sia nga nagahimo sang kabubut-on sang Dios nagapabilin sing dayon,” sulat ni apostol Juan. (1 Juan 2:17) Bisan pa indi magtugot ang aton kahimtangan nga malab-ot ang isa ka partikular nga tulumuron, sarang gihapon kita “magkahadlok sa matuod nga Dios kag magtuman sa iya mga sugo.” (Manugwali 12:13) Ang espirituwal nga mga tulumuron nagabulig sa aton nga magpabilin nga nakasentro sa paghimo sang kabubut-on sang Dios. Busa, gamiton naton ini agod himayaon ang aton Manunuga.

[Kahon sa pahina 22]

Espirituwal nga mga Tulumuron nga Mabinagbinag

○ Pagbasa sa Biblia adlaw-adlaw

○ Pagbasa sa tagsa ka gua sang Ang Lalantawan kag Magmata!

○ Pagpauswag sa kalidad sang aton mga pangamuyo

○ Pagpakita sang mga bunga sang espiritu

○ Paglab-ot sa dugang pa nga pag-alagad

○ Mangin labi pa ka epektibo sa pagbantala kag pagpanudlo

○ Pagpauswag sang mga ikasarang subong sang pagpanaksi sa telepono, di-pormal nga pagpanaksi kag pagpanaksi sa duog sang negosyo