Samuela Iharuana

7 King be sibona ena ruma dekenai ia noho+ bona Iehova ese ia be ena inai taudia ibounai amo laga-ani ia henia, unai neganai 2 king be peroveta tauna Natana dekenai ia gwau:+ “Lau be sida rumana lalonai lau noho,+ to Dirava momokanina ena Maua be palai rumana lalonai ia noho.”+ 3 Natana be king dekenai ia gwau: “Oi lao bona emu kudouna ena ura hegeregerena oi kara, badina Iehova be oi ida.”+

4 Unai hanuaboi ai, Iehova be Natana ia hereva henia, ia gwau: 5 “Oi lao bona egu hesiai tauna Davida dekenai oi gwau, ‘Iehova be inai bamona ia hereva: “Do lau noho rumana ta do oi haginia, a?+ 6 Israela taudia be Aigupito amo lau hakaua mai dinana amo ema bona hari,+ lau be ruma ta dekenai lau noho lasi, to gabu idauidau ai lau be palai ruma bona Palai Dubu lalonai lau noho.+ 7 Israela taudia ida lau noho negadia ibounai lalonai, lau ese egu taunimanima Israela taudia naria totona lau abia hidi iduhu gunalaia taudia dekenai, nega ta lau gwau lasi, ‘Dahaka dainai lau totona sida rumana ta umui haginia lasi?’”’ 8 Vadaeni egu hesiai tauna Davida dekenai inai oi gwauraia, ‘Tuari oreadia edia Iehova* be inai bamona ia gwau: “Lau ese rei gabudia amo oi lau abia, oibe, mamoe oreana naria gaukarana amo oi lau abia,+ egu taunimanima Israela taudia oi gunalaia totona.+ 9 Bona oi lao gabudia ibounai dekenai lau be oi ida,+ bona emu vairana amo emu inai taudia ibounai do lau haorea,*+ bona emu ladana do lau habadaia,+ tanobada ena dagi bada taudia edia ladana hegeregerena. 10 Lau ese egu taunimanima Israela taudia totona gabu ta do lau abia hidi bona unuseniai do idia noho, bona gau ta ese edia noho do ia hadikaia lasi. Bona kara dika taudia ese do idia hahisidia lou lasi, guna idia karaia bamona.+ 11 Lauegu taunimanima totona hahemaoro taudia lau abia hidi negana amo,+ unai lau karaia. Bona emu inai taudia ibounai amo oi dekenai laga-ani do lau henia.+

“‘“Danu, Iehova ese oi ia hamaoroa, Iehova be oi totona ruma ta* do ia haginia.+ 12 Oi mase+ bona oi be emu sene taudia ida idia guria hebou neganai, lau ese emu natuna* ta, emu natuna korikorina be king ai do lau halaoa, bona iena basileia do lau haginia goada momokani.+ 13 Ia ese egu ladana totona ruma ta do ia haginia,+ bona lau ese ena basileia ena terona do lau haginia goada ela bona hanaihanai.+ 14 Lau be iena tamana ai do lau lao, bona ia be egu natuna ai do ia lao.+ Kerere ia karaia neganai, lau ese ia do lau hamaoromaoroa,* bona ia panisia totona ia do lau kwadia, taunimanima ese idia karaia bamona.+ 15 Ia dekenai egu lalokau* do lau kokia lasi, Saulo amo lau kokia hegeregerena,+ ia be emu vairana amo lau abia siri. 16 Emu lohia besena bona emu basileia be do idia noho ela bona hanaihanai, emu terona be do ia gini goada ela bona hanaihanai.”’”+

17 Natana ese Davida dekenai inai hereva ibounai bona matahanai ibounai ia gwauraia.+

18 Unai neganai King Davida be ia vareai bona Iehova vairanai ia tui diho, ia gwau: “Siahu Ibounai Lohiabadana Iehova e, lau be daika? Bona egu bese taudia be anina lasi, dahaka dainai ai totona gau momo herea oi karaia vadaeni?+ 19 Siahu Ibounai Lohiabadana Iehova e, ena be ai totona gau momo herea oi karaia vadaeni, to ma oi ese lau oi hamaoroa, lau, emu hesiai tauna, egu bese be do ia noho ela bona vaira negai danu. Siahu Ibounai Lohiabadana Iehova e, taunimanima ta ese unai do ia haidaua lasi. 20 Siahu Ibounai Lohiabadana Iehova e, oi ese lau, emu hesiai tauna Davida, oi diba namonamo dainai, oi dekenai ma dahaka do lau hereva?+ 21 Emu hereva dainai bona emu ura hegeregerena, oi ese inai kara badadia ibounai oi karaia vadaeni bona emu hesiai tauna dekenai oi hahedinaraia.+ 22 Unai dainai Siahu Ibounai Lohiabadana Iehova e, oi be hereadae.+ Ta be oi bamona lasi,+ bona Dirava ta ia noho lasi to oi sibona,+ emai taiana amo ai kamonai herevadia ibounai ese unai ia hamomokania. 23 Bona tanobada ai edena bese be emu bese Israela taudia bamona?+ Dirava e, oi be oi lao bona idia oi ruhaia emu taunimanima bamona,+ bona idia totona hoa kara badadia oi karaia,+ unai amo oi sibona totona ladana bada oi abia.+ Oi ese bese idauidau bona edia dirava oi luludia raka-lasi, emu taunimanima totona unai oi karaia, idia be Aigupito amo oi ruhaia. 24 Oi ese Israela taudia be emu bese korikorina ai oi halaoa ela bona hanaihanai.+ Bona oi, Iehova e, oi be edia Dirava ai oi lao.+

25 “Iehova Dirava e, mani emu hesiai tauna bona ena bese taudia totona oi karaia gwauhamatana be nega ibounai oi hamomokania, bona mani emu gwauhamata hegeregerena oi kara.+ 26 Namona be emu ladana idia hanamoa ela bona hanaihanai,+ unai amo taunimanima idia gwau diba, ‘Tuari oreadia edia Iehova be Israela ena Dirava,’ bona mani emu hesiai tauna Davida ena bese oi haginia goada.+ 27 Badina oi, tuari oreadia edia Iehova, Israela ena Dirava e, oi ese emu hesiai tauna dekenai oi hahedinaraia vadaeni oi gwau, ‘Lau ese oi totona ruma ta* do lau haginia.’+ Unai dainai emu hesiai tauna be mai gari lasi ida oi dekenai inai guriguri ia gwauraia. 28 Bona Siahu Ibounai Lohiabadana Iehova e, oi be Dirava momokanina, bona emu hereva be hereva momokani,+ oi ese inai gau namodia be emu hesiai tauna dekenai oi gwauhamatalaia. 29 Unai dainai namona be oi moale emu hesiai tauna ena bese oi hanamoa totona, bona namona be oi vairanai ia noho ela bona hanaihanai.+ Badina Siahu Ibounai Lohiabadana Iehova e, oi gwauhamata vadaeni, bona namona be emu hesiai tauna ena bese oi hanamoa ela bona hanaihanai.”+