Iosua

11 Hasoro ena king Iabina ese unai sivarai ia kamonai neganai, ia ese inai taudia dekenai hereva ia siaia: Madona ena king, Iobaba,+ bona Simarona ena king, Akasapa,+ 2 not kahana ena ororo gabudiai idia noho king, Kinerete ena saut kahana ena tano palakana* ai idia noho king, Sepala bona Doro ena ororo maragidia+ edia west kahanai idia noho king, 3 bona Kanana tano ena ist bona west kahanai idia noho taudia,+ bona ororo gabudia ai idia noho Amoro taudia,+ Hiti taudia, Perisi taudia, Iebusu taudia, bona Misipa tanona ena Heremona Ororo henunai+ idia noho Hivi taudia+ dekenai. 4 Vadaeni idia bona edia tuari taudia ibounai idia mai, idia be hutuma bada herea, kone ena miri bamona, edia hosi bona tuari kariota be momo herea. 5 Unai king ibounai idia lalotamona idia hebou totona. Vadaeni idia lao bona Meroma ena ranu gabudia ai idia kamepa, Israela taudia tuari henia totona.

6 Unai neganai Iehova be Iosua dekenai ia gwau: “Namo lasi idia dainai oi gari,+ badina kerukeru inai bamona nega ai, lau ese idia ibounai be oi dekenai do lau henia, bona idia do oi alaia mase. Edia hosi ena aena varovaro do oi utudia+ bona edia kariota be lahi dekenai do oi gabudia.” 7 Vadaeni Iosua bona ena tuari taudia ibounai be edia inai taudia idia diba lasi negana ai Meroma ena ranu gabuna ai idia tuari henia. 8 Iehova ese idia be Israela ena imana dekenai ia atoa,+ bena Israela taudia ese idia halusidia bona idia luludia lao ela bona Sidono Badana+ bona Misirepoto-maimi+ dekenai, bona ela bona ist kahanai ia noho Misipe Koura dekenai, bona idia hamasedia noho ela bona idia ta ia roho mauri lasi.+ 9 Vadaeni Iosua be Iehova ese ia hamaoroa hegeregerena ia karaia, ia ese edia hosi edia aena varovaro ia utudia bona edia kariota be lahi dekenai ia gabudia.+

10 Danu, Iosua ia giroa bona Hasoro siti ia abia bona ena king be tuari kaia amo ia alaia mase,+ badina guna Hasoro be unai basileia ibounai edia siti badana. 11 Idia ese Hasoro dekenai idia noho taudia ibounai be tuari kaia amo idia alaia mase, idia ibounai idia hadikaia ore.+ Mauri gauna ta idia rakatania lasi.+ Bena siti be lahi amo ia gabua. 12 Iosua ese unai king edia siti ibounai ia abia bona unai king ibounai be tuari kaia amo ia halusia.+ Oibe, idia ibounai ia hadikaia ore,+ Iehova ena hesiai tauna Mose ese guna ia oda henia hegeregerena. 13 To, Israela taudia ese ororo maragidia ai idia noho siti idia gabua lasi, to Hasoro sibona be Iosua ese ia gabua. 14 Israela taudia ese unai siti edia kohu bona animal ibounai idia abia.+ To taunimanima ibounai be tuari kaia amo idia alaia mase.+ Idia ta ia mauri lasi.+ 15 Iehova ese ena hesiai tauna Mose ia oda henia hegeregerena, Mose ese Iosua ia oda henia,+ bona Iosua be unai bamona ia karaia. Iosua be Iehova ese Mose ia oda henia gaudia ibounai ia karaia.+

16 Iosua ese inai tano ibounai ia abia, ororo gabudia, Negebe ibounai,+ Gosena ena tano ibounai, Sepala,+ Arabaha,+ bona Israela taudia edia ororo gabudia mai edia tano palakadia, 17 Halaka Ororo, unai be Seiri kahirakahira ai, bona ela bona Bala-gada,+ unai be Lebanona Koura ai ia noho, Heremona Ororo ena henunai.+ Bona ia ese edia king ibounai ia abia bena idia ia alaia mase. 18 Iosua be nega sisina daudau lalonai unai king taudia ibounai ia tuari henia. 19 Siti ta be Israela taudia ida maino ia karaia lasi, to Gibeona ai idia noho Hivi taudia sibona.+ Idia ese tuari amo siti ma haida idia halusia.+ 20 Iehova ese unai taudia edia kudouna ia ha-aukaia,+ Israela taudia idia tuari henia totona, unai amo ia be mai hebogahisi lasi ida idia ia hadikaia ore.+ Idia ibounai be dika idia davaria, Iehova ese Mose ia oda henia hegeregerena.+

21 Unai negai Iosua ese Anakima taudia ibounai ia hadikaia ore.+ Idia noholaia ororo gabudia be inai: Heberona, Debiri, Anaba, bona Iuda ena ororo gabudia ibounai bona Israela ena ororo gabudia ibounai danu. Iosua ese idia bona edia siti ia hadikadia ore.+ 22 Anakima taudia ta be Israela taudia edia tano dekenai ia noho lasi,+ to idia be Gasa,+ Gata,+ bona Asadoda sibona dekenai idia noho.+ 23 Vadaeni Iosua ese unai tano ibounai ia biagua, Iehova ese guna Mose ia oda henia hegeregerena,+ bena Iosua ese unai tano be Israela taudia dekenai ahuna bamona ia henia, edia iduhu huanai idia haria totona.+ Bona tano be tuari amo ia laga-ani.+