Iosua

18 Vadaeni Israela taudia ibounai be Silo dekenai idia haboua,+ bona unuseniai hebou dubu idia haginia,+ badina idia ese unai tano idia abia vadaeni.+ 2 To Israela taudia edia iduhu ma 7 idia do noho, idia dekenai edia ahuna idia do henia lasi. 3 Vadaeni Iosua be Israela taudia dekenai ia gwau: “Umui be do umui naria noho ela bona edena negai? Edena negai do umui lao bona Iehova, emui sene taudia edia Dirava, ese umui dekenai ia henia tanona do umui abia?+ 4 Lau dekenai tatau toi do umui henia, lau siaidia lao totona, idia be iduhu ta ta amo. Namona be idia lao bona tano ibounai idia raka hanaia bona iduhu ta ta ese do idia abia tano idia makaia. Bena lau dekenai do idia giroa mai. 5 Namona be idia sibona huanai unai tano be kahana 7 dekenai do idia haria.+ Iuda be ena tano dekenai do ia noho, unai be saut kahana ai,+ bona Iosepa ena bese taudia be edia tano dekenai do idia noho, unai be not kahana ai.+ 6 To umui be do umui lao bona mapu ai tano do umui makaia bona kahana 7 dekenai umui haria, bona lau dekenai mapu umui abia mai. Bena iniseniai Iehova iseda Dirava vairanai umui totona gadara ta*+ amo tano do lau abia hidi. 7 To umui huanai Levi taudia be ahuna ta do idia abia lasi,+ badina Iehova totona idia karaia hahelaga gaukara be edia ahuna.+ Bona Gado, Rubena, bona Manase ena iduhu kahana taudia be edia ahuna+ idia abia vadaeni, unai be Ioridane ena ist kahanai, unai tano be Iehova ena hesiai tauna Mose ese idia dekenai ia henia.”

8 Unai tatau idia hegaegae idia lao totona, bona Iosua ese tano ena mapu do idia karaia taudia ia oda henia, ia gwau: “Umui lao bona unai tano dekenai umui raka loaloa bona ena mapu umui karaia bona lau dekenai umui giroa mai, bona Iehova ena vairanai gadara ta amo umui totona tano do lau abia hidi, unai be Silo ai.”+ 9 Vadaeni unai tatau idia lao bona tano ibounai dekenai idia raka loaloa bona tano be kahana 7 dekenai idia haria. Bona idia haria kahadia edia siti ibounai be lista ta dekenai idia torea danu. Unai murinai Iosua dekenai idia giroa lou, unai be Silo ena kamepa ai. 10 Bena Silo ai Iosua ese Iehova ena vairanai idia totona nadi gadara ta amo tano ia abia hidi.+ Unuseniai Iosua ese Israela taudia dekenai tano ia haria, edia tano ena kahana hegeregerena.+

11 Bona gadara ta* amo Beniamina ena iduhu taudia ese tano idia abia, edia famili ta ta hegeregerena, bona idia abia tano be Iuda ena iduhu taudia+ bona Iosepa ena bese taudia edia huanai ia noho.+ 12 Bona not kahana dekenai, edia tano hetoana be Ioridane amo ia matamaia, bona ia daekau lao Ieriko koura ena not kahana ai,+ bena ororo ena west kahana ia daekau lao, bona ia hanaia lao Betavene ena taunimanima lasi gabuna dekenai.+ 13 Bona tano hetoana be unuseni amo ia lao Lusu, unai be Lusu ena saut kahanai ia noho koura dekenai, Betele unai.+ Bena ia diho lao Ataroto-adara dekenai,+ unai taoni be ororo ai, bona unai ororo be Henu Bete-horono ena saut kahanai.+ 14 Bena tano ena hetoana be Bete-horono ia vaira henia ororo amo ia lao bona saut kahana amo ia hanaia. Bona ia lao bona Kiriata-bala dekenai ia doko, unai be Kiriata-iearimi,+ Iuda bese taudia edia siti. Ia be west kahana.

15 Saut kahana be Kiriata-iearimi ena dokona amo ela bona west kahana dekenai, bona ma ia lao Nepetoa ena ranu gabudia dekenai.+ 16 Bena ia diho lao ororo ena henuna kahanai, unai ororo be Repaima Koura ena not kahanai ia noho,+ bona Hinoma Ena Natuna Mero Koura ia vaira henia,+ bena unuseni amo ia diho lao Hinoma Koura dekenai, ma ia lao Iebusu ena saut kahana ia diho lao,+ bena ia diho lao Ene-rogele dekenai.+ 17 Bona not kahana amo ia lao ela bona Ene-semese, ma ia lao Geliloto dekenai, unai be Adumimi ororo dalana ena vaira kahanai ia noho,+ bena ia diho lao Bohani+ ena nadi dekenai,+ ia be Rubena ena natuna. 18 Bona ma ia lao not kahanai ia noho koura dekenai, unai be Arabaha vairanai, bena ia diho lao Arabaha dekenai. 19 Bena ma ia lao Bete-hogila ena not kahanai ia noho koura dekenai,+ bona Damena Davara* ena not kahanai ia doko,+ unai be Ioridane ena saut kahanai. Unai be saut kahana ena tano hetoana. 20 Bona ist kahana ena tano hetoana be Ioridane dekenai. Unai be Beniamina ena bese taudia edia ahuna, edia famili ta ta bona edia tano hetoana hegeregerena.

21 Bona Beniamina iduhu edia famili ta ta ese idia abia siti be inai: Ieriko, Bete-hogila, Eme-kesi, 22 Bete-arabaha,+ Semaraimi, Betele,+ 23 Avima, Para, Opera, 24 Kepara-moni, Opini, bona Geba,+ siti ibounai 12, mai edia hanua maragidia danu.

25 Gibeona,+ Rama, Beroto, 26 Misipe, Kepira, Mosaha, 27 Rekema,Iripele, Tarala, 28 Seleha,+Ha-elepa, Iebusu, unai be Ierusalema,+ Gibea,+ bona Kiriata, siti ibounai 14 mai edia hanua maragidia danu.

Unai be Beniamina bese taudia ese idia abia tano, edia famili ta ta hegeregerena.