Apokalupo—Ioane Ia Abia Herevana

2 “Efeso kongrigeisen+ ena aneru dekenai inai hereva do oi torea:+ Iena imana idibana ai hisiu 7 ia dogoatao bona golo lamepa atoa gaudia 7 huanai ia raka tauna ese ia gwauraia herevadia be inai:+ 2 ‘Oi karaia gaudia, emu hekwarahi bona emu haheauka lau diba. Lau diba oi ese kara dika taudia oi ura henia lasi momokani. Bona haida idia gwau idia be aposetolo taudia,+ to idia be aposetolo taudia lasi, oi ese edia kara oi tahua bona oi davaria idia be koikoi taudia. 3 Danu, oi ese haheauka oi hahedinaraia, bona egu ladana dainai hekwakwanai momo oi haheaukalaia+ bona oi hesiku lasi.+ 4 To oi dekenai, lau be mai egu hereva inai gauna dekenai, oi ese guna oi abia lalokau oi rakatania vadaeni.

5 “‘Unai dainai oi rakatania vadaeni gauna oi laloa lou bona oi helalo-kerehai+ bona guna oi karaia karadia oi karaia lou. Bema oi helalo-kerehai lasi,+ lau be oi dekenai do lau mai bona emu lamepa atoa gauna be ena gabu amo do lau kokia.+ 6 To oi ese gau tamona oi do karaia maoro noho, oi ese Nikolaita taudia edia tomadiho oreana edia kara oi inai henia,+ unai be lau ese lau inai henia danu. 7 Mai ena taiana tauna ese lauma helaga ena hereva kongrigeisen oreadia dekenai ia kamonai be namo:+ Ia kwalimu tauna dekenai+ maoro do lau henia, mauri auna ena huahua ia ania totona.+ Unai au be Dirava ena paradaiso ai ia noho.’

8 “Semurana kongrigeisen ena aneru dekenai inai hereva do oi torea: ‘Ginigunana bona Ginigabena,’+ ia mase bona ia mauri lou tauna ese ia gwauraia herevadia be inai:+ 9 ‘Oiemu hisihisi bona ogogami maurina lau diba, to oi be kohu momo tauna.+ Bona lau diba sibodia idia gwauraia Iuda taudia ese oi idia hereva dika henia, to idia be Iuda taudia lasi, idia be Satani ena orea taudia.+ 10 Do oi davaria gwauraia hisihisi dainai oi gari lasi.+ Diabolo ese umui haida be dibura ruma dekenai do ia atoa noho, umui do ia tohoa momokani totona, bona dina 10 lalonai hisihisi do umui abia. To emu abidadama dekenai oi gini goada ela bona mase, vadaeni lau ese oi dekenai mauri ena korona do lau henia.+ 11 Mai ena taiana tauna ese lauma helaga ena hereva kongrigeisen oreadia dekenai ia kamonai be namo:+ Ia kwalimu tauna+ be mase iharuana do ia abia lasi momokani.’+

12 “Peregamo kongrigeisen ena aneru dekenai inai hereva do oi torea: Mai ena matana rua tuari kaia latana ia abia tauna ese ia gwauraia herevadia be inai:+ 13 ‘Oi noho gabuna lau diba, Satani ena terona be unuseniai ia noho. To oi ese egu ladana oi dogoatao noho,+ bona emu abidadama lau dekenai oi rakatania lasi.+ Oibe, egu kamonai witnes tauna, Anetipa,+ idia hamasea neganai danu,+ emu abidadama oi rakatania lasi. Ia be emu hanua dekenai idia hamasea, unai be Satani ia noho gabuna.

14 “‘To oi dekenai, lau be mai egu hereva haida inai gauna dekenai, emu huanai haida ese Balama ena hadibaia hereva idia badinaia noho.+ Balama ese Balaki+ ia hadibaia Israela taudia edia lalona do ia veria idia kara dika totona, hegeregere kaivakuku dekenai idia bouboulaia gaudia idia ania bona matabodaga karadia* idia karaia.+ 15 Unai hegeregerena, emui huanai haida ese Nikolaita taudia edia tomadiho oreana edia hadibaia herevadia idia badinaia noho.+ 16 Unai dainai oi helalo-kerehai. Bema lasi, lau be oi dekenai do lau mai haraga, bona egu uduna dekenai ia noho tuari kaia latana amo, idia do lau tuari henia.+

17 “‘Mai ena taiana tauna ese lauma helaga ena hereva kongrigeisen oreadia dekenai ia kamonai be namo.+ Ia kwalimu tauna+ dekenai hunia mana haida do lau henia,+ bona ia dekenai nadi kurokuro do lau henia, unai nadi latanai be ladana matamata ia noho, tau ta ia diba lasi, to unai nadi ia abia tauna sibona ia diba.’

18 “Tuatira+ kongrigeisen ena aneru dekenai inai hereva do oi torea: Dirava ena Natuna, iena matana be lahi ena hururuhururu bamona+ bona iena aena be ia diaridiari kopa bamona, ia gwauraia herevadia be inai:+ 19 ‘Oi karaia gaudia, emu lalokau, emu abidadama, emu hesiai gaukara, bona emu haheauka lau diba. Danu lau diba, hari oi karaia noho karadia ese guna oi karaia karadia idia hereaia.

20 “‘To oi dekenai, lau be mai egu hereva inai gauna dekenai, oi be inai hahine Iesebele ena kara oi koua lasi.+ Ia be sibona ia gwauraia peroveta hahine bona ia ese egu hesiai taudia ia hadibaia bona ia hakaua kerere, matabodaga karadia* idia karaia+ bona kaivakuku dekenai idia bouboulaia gaudia idia ania totona. 21 Bona ia dekenai nega lau henia ia helalo-kerehai totona, to ia ura lasi ena matabodaga karadia* amo ia helalo-kerehai. 22 Kahirakahira unai hahine dekenai gorere bada do lau havaraia, bona ia ida idia heudahanai taudia do lau hahisia bada, bema idia ia hakaua kerere bona idia karaia karadia amo idia helalo-kerehai lasi. 23 Bona ena natudia be gorere dikana amo do lau hamasea, unai amo kongrigeisen ibounai do idia diba, lau be taunimanima idia laloa gaudia* bona kudouna lau tahua. Bona umui ta ta emui kara hegeregerena davana do lau henia.+

24 “‘To umui Tuatira dekenai umui noho taudia oredia, Iesebele ena hadibaia hereva umui badinaia lasi taudia ibounai, oibe, idia gwauraia “Satani ena dobu gaudia”+ umui diba lasi taudia lau hamaoroa: Umui dekenai maduna ma haida do lau henia lasi. 25 To umui dekenai ia noho vadaeni gauna do umui dogoatao noho ela bona lau mai.+ 26 Bona ia kwalimu bona egu kara ia badinaia ela bona dokona tauna dekenai, siahu do lau henia bese idauidau ia lohiaia totona,+ 27 egu Tamana amo siahu lau abia hegeregerena, bona ia ese auri itotohi amo taunimanima do ia lohiaia,+ vadaeni uro hegeregerena idia do ia makohia maragimaragi. 28 Bona lau ese ia dekenai daba ena hisiu do lau henia.+ 29 Mai ena taiana tauna ese lauma helaga ena hereva kongrigeisen oreadia dekenai ia kamonai be namo.’