Apokalupo—Ioane Ia Abia Herevana
1 Iesu Keriso ese hunia herevana ia hahedinaraia, unai be Dirava ese ia dekenai ia henia gauna,+ kahirakahira do idia vara gaudia be ena hesiai taudia dekenai ia hahedinaraia totona.+ Bona ia ese ena aneru ia siaia bona ia amo unai hunia herevana be toa amo ena hesiai tauna Ioane dekenai ia hahedinaraia,+ 2 Ioane be Dirava ese ia henia herevana bona Iesu Keriso ese ia henia herevadia, oibe, ia itaia gaudia ibounai ia gwauraia hedinarai. 3 Inai peroveta hereva ia duahia badabada tauna be do ia moale, bona inai hereva idia kamonai bona idia badinaia taudia be do idia moale,+ badina Dirava ena abia hidi negana be kahirakahira.
4 Lau Ioane, lau ese Asia provinsi ai idia noho kongrigeisen 7 dekenai inai revareva lau torea.+
Namona be hebogahisi hereadaena bona maino umui abia. Unai be “harihari ia noho, gunaguna ia noho, bona do ia mai Diravana” amo,+ bona iena terona vairanai idia gini lauma 7 amo,+ 5 bona Iesu Keriso amo. Ia be “Hereva Hamomokania Tauna mai Ena Kamonai,”+ “mase amo ia toreisi lou tauna ginigunana”+ bona “tanobada ena king taudia edia Lohia.”+
Iesu ese ita ia lalokau henia,+ bona ena rara amo ita be iseda kara dika amo ia ruhaia,+ 6 bona iena Dirava bona ena Tamana ena king bona hahelaga taudia+ ai ita ia halaoa.+ Oibe, Iesu dekenai hairai bona siahu do ia noho ela bona hanaihanai. Amen.
7 Ia be ori lalonai do ia mai,+ bona taunimanima ibounai ese ia do idia itaia, ia idia gwadaia taudia danu ese ia do idia itaia. Bona ia dainai tanobada ena iduhu ibounai be mai taitai ida edia kemena do idia botaia.+ Unai do ia vara momokani, Amen.
8 Iehova* Dirava ia gwau, “Lau be Alepa bona Omega,*+ harihari ia noho, gunaguna ia noho bona do ia mai Diravana, lau be Siahu Ibounai Diravana.”+
9 Lau Ioane be emui tadikaka bona umui ida hisihisi lau abia,+ umui ida basileia lalonai do ita noho,+ bona Iesu murinai ita raka dainai umui ida lau haheauka.+ Lau ese Dirava lau herevalaia bona Iesu lau gwauraia hedinarai dainai, motumotu ta ladana Patamo dekenai lau noho. 10 Lauma helaga amo lau be Lohiabada ena dina lalonai lau noho, bona egu murina amo gado badana ta lau kamonai, kibi regena bamona, 11 ia gwau: “Oi itaia gaudia be lokua toretore dekenai oi torea bona inai kongrigeisen 7 dekenai oi siaia: Efeso,+ Semurana,+ Peregamo,+ Tuatira,+ Sadi,+ Filadelefia,+ bona Laodikea.”+
12 Lau ia hereva henia tauna itaia totona lau giroa neganai, golo lamepa atoa gaudia 7 lau itaia.+ 13 Bona unai lamepa atoa gaudia edia huanai tau ta ia gini, ena toana be taunimanima ena natuna bamona,+ dabua latana ia karaia, unai dabua ia diho ela bona ena aena, bona golo beleta be ena kemena ia hagegea. 14 Danu iena kwarana ena huina be kurokuro, wulu kurokuro bona sinou bamona bona iena matana be lahi ena hururuhururu bamona,+ 15 bona iena aena be lahi badana lalonai ia diaridiari kopa bamona+ bona iena gadona be ia aru haraga ranu ena regena bamona. 16 Bona iena imana idibana ai hisiu 7 idia noho+ bona iena uduna amo mai ena matana rua tuari kaia latana+ ia raka-lasi, bona iena vairana be dina bamona, mai siahu ida ia diaridiari.+ 17 Ia lau itaia neganai, iena aena badinai lau moru, lau mase bamona.
Bona ia ese ena imana idibana be lau dekenai ia atoa bona ia gwau: “Oi gari lasi. Lau be Ginigunana+ bona Ginigabena,+ 18 bona lau be ia mauri noho tauna.+ Guna lau mase,+ to hari lau mauri bona do lau mauri noho ela bona hanaihanai.+ Bona mase bona Mase Gurina* edia ki be lau dekenai idia noho.+ 19 Unai dainai oi itaia vadaeni gaudia oi torea bona hari idia vara gaudia bona inai murinai do idia vara gaudia danu. 20 Egu imana idibana dekenai oi itaia hisiu 7 bona golo lamepa atoa gaudia 7 edia hunia hereva helagana be inai: Hisiu 7 edia anina be kongrigeisen 7 edia aneru, bona lamepa atoa gaudia 7 edia anina be kongrigeisen 7.+