August

Ita guriguri, taunimanima ese ita gwauraia herevana do idia kamonai bona abia hidi idia karaia ita ida Iehova idia tomadiho henia totona. To iseda hereva idia kamonai lasi taudia, be edena bamona? Babulonia Badana do idia hadikaia karana idia itaia taudia haida be Iehova do idia abidadama henia bona idia do ia hamauria. Unai dainai, hari taunimanima dekenai unai hadibaia herevana ita gwauraia noho be mai anina bada. Hari idia dekenai ita gwauraia hadibaia herevana be reana gabeai do idia laloatao. (Esekiela 33:33 hahegeregerea.) Reana idia kamonai hadibaia herevana do idia laloa lou bona unai ese idia do ia durua, nega ia noho lalonai ita ida Iehova idia tomadiho henia totona. “Tano mareremarere bada ia vara” murinai, Filipi ai dibura naria tauna be ena lalona ia haidaua hegeregerena, reana hari hadibaia hereva idia kamonai, to kara ta idia karaia lasi taudia be Babulonia Badana idia hadikaia murinai, edia lalona do idia haidaua.—Kara 16:​25-34. w24.05 rau 17 par. 9-10

Aposetolo Paulo ese Heberu Keristani taudia totona ia torea revareva amo mai anina bada gauna ta ita dibaia. Haida be Iehova ida edia hetura karana idia hagoadaia lasi, ‘idia ura milika sibona idia inua taudia bamona ai idia lao, to aniani korikorina [Baibel ena hereva dobudia] idia ura lasi.’ (Heb. 5:12) Iehova ese Kongrigeisen amo hadibaia hereva matamata ia halasia, to idia ura lasi abia dae bona badinaia. (Aon. 4:18) Hegeregere, Iuda Keristani taudia be Mose ena Taravatu idia do badinaia noho, ena be lagani 30 gunanai Iesu ena boubou gauna ese unai taravatu ia kokia. (Tito 1:10) Unai dainai Paulo be ia ura idia ia durua ia hadibaia hereva momokani dobudia idia abia dae totona. Paulo ena revareva ese Keristani taudia ia durua, unai amo do idia abia dae, Iehova ese Iesu amo ia hegaegaelaia tomadiho dala matamatana be maoro. Danu, unai ese idia ia durua mai gari lasi ida idia haroro noho totona.—Heb. 10:​19-23. w24.04 rau 6 par. 15

Adamu bona Heva be Satani ida Iehova Dirava idia gwau-edeede henia negana amo, taunimanima bilioni momo idia mase. Idia mase vadaeni taudia dekenai dahaka do ia vara? Orea maragina, Keriso murinai idia raka taudia 144,000, be do idia mauri lou, bona guba dekenai mase diba lasi maurina do idia abia. (Apok. 14:1) Bona Iehova idia lalokau henia abidadama tatau bona hahine hutuma, be ‘kara maoromaoro taudia ida do idia toreisi lou,’ bona mauri hanaihanai do idia abia, bema Keriso ena Lagani 1,000 Lohia Negana lalonai bona hahetoho ginigabena lalonai, kara maoromaoro idia badinaia. (Dan. 12:13; Heb. 12:1) Danu Lagani 1000 Lohia Negana lalonai, “kara maoromaoro lasi taudia” hegeregere Iehova idia hesiai henia lasi taudia, eiava “kara dika idia karaia taudia” dekenai dala ia noho edia kara do idia haidaua bona Iehova Dirava idia hesiai henia totona. (Ioa. 5:29; Luka 23:​42, 43) To, taunimanima haida edia kara be dika momokani, unai dainai Iehova be abia hidi ia karaia do idia toreisi lou lasi.—Luka 12:​4, 5. w24.05 rau 2 par. 3; rau 5 par. 15; rau 6 par. 17

Bema ta ia ura Iehova ena palai ruma ai ia noho, namona be ena “kudouna amo hereva momokani ia gwauraia.” (Sal. 15:2) Unai ena anina be ita koikoi lasi, to unai sibona lasi, Iehova ia ura gau ibounai lalonai mai momokani ida ita kara bona hereva. (Heb. 13:18) Unai be mai anina bada, “badina Iehova ese koikoi tauna ia inai henia, to kara maoromaoro tauna be Dirava ena turana namona.” (Aon. 3:32) ‘Kudouna amo hereva momokani idia gwauraia’ taudia be taunimanima vairanai Dirava idia badinaia bona sibona idia noho neganai unai bamona idia karaia danu. Idia ese koikoi karadia idia dadaraia. Koikoi tauna be reana do ia laloa, Dirava ena taravatu haida be nega momo idia maoro lasi. (Iam. 1:​5-8) Ia ese Iehova ena taravatu haida ia dadaraia, badina ia laloa unai be gau maragidia sibona. Bena ia itaia bema ia utua taravatu amo dika ta ia vara lasi, kara dika badadia do ia karaia matamaia. Ena be ia laloa Dirava ia hesiai henia noho, to Iehova ese ena tomadiho karana do ia abia dae lasi. (Had. 8:11) To, ita be ita ura gau ibounai lalonai kara momokani ita badinaia. w24.06 rau 10 par. 7-8

Iehova ena taunimanima be Baibel ai ia noho hereva momokani idia ura henia. Unai gaudia amo iseda abidadama ita hagoadaia. (Roma 10:17) Ita abia dae Iehova ese Keristani kongrigeisen ia haginia, ia be “hereva momokani ena du bona hereva momokani ia durua.” (1 Tim. 3:15) Satani ia ura Baibel eiava Dirava ena orea amo ita abia hakaua herevadia badinaia karana ita hadokoa. (Efe. 4:14) Kahirakahira Diabolo ese koikoi hereva badadia do ia gaukaralaia, bese ibounai ia hakaua kerere totona, unai amo Iehova do idia inai henia. (Apok. 16:​13, 14) Danu ita diba Satani do ia gaukara goada, Iehova ena taunimanima ia hakaua kerere totona. (Apok. 12:9) Unai dainai, gau badana be sibona ita hadibaia, hereva momokani bona sivarai koikoi edia idau ita diba totona, unai amo hereva momokani do ita badinaia. (Roma 6:17; 1 Pet. 1:22) Bona hisihisi badana amo ita roho mauri totona, unai be mai anina bada! w24.07 rau 8 par. 1-3

Iehova be Israela taudia dekenai ena taravatu ia henia neganai, idia gwauhamata unai do idia badinaia. Bema ena taravatu idia badinaia, ia ese idia do ia gimaia bona hanamoa. To bema idia gwau-edeede eiava dirava idaudia idia tomadiho henia, idia do ia gimaia lasi bona dika do idia davaria. To, idia be Dirava ena lalonamo idia abia lou diba. Bona ‘Iehova edia Dirava dekenai idia giroa lou bona ena hereva idia kamonai’ diba. (Deu. 30:​1-3, 17-20) Anina be idia helalo-kerehai diba. Bema unai bamona idia karaia, Iehova be idia kahirakahira do ia lao bona idia do ia hanamoa lou. Iehova ena taunimanima be ia dekenai idia gwau-edeede loulou. Unai dainai dika idia davaria. To Iehova be idia ia dadaraia haraga lasi. Ia ese ena peroveta taudia ia siaia loulou, ena taunimanima idia hagoadaia idia helalo-kerehai bona ia dekenai idia giroa totona.—2 Ki. 17:​13, 14. w24.08 rau 9 par. 4-5

Iesu ia mase murinai, Ierusalema bona Iudea ai idia noho Heberu Keristani taudia be hekwakwanai momo idia davaria. Keristani kongrigeisen ia matamaia bona daudau lasi murinai, Keristani taudia be dagedage bada idia davaria. Lagani 20 bamona murinai, hitolo bona ogogami maurina dainai idia hisihisi. (Kara 11:​27-30) To lagani 61 C.E. bamona ai, Keristani taudia be dagedage bada idia davaria lasi. Unai nega lalonai, Dirava ena lauma helaga amo aposetolo Paulo ese idia dekenai revareva ta ia torea. Unai revareva be nega korikori ai idia abia, badina idia ia durua vaira nega ai do idia vara gaudia totona idia hegaegae. Heberu Keristani taudia be nega korikori ai unai revareva idia abia, badina idia moalelaia noho maino be do ia ore. Paulo ese hakaua hereva namodia ia henia unai amo idia do ia durua kahirakahira do idia davaria hisihisi idia haheaukalaia totona. w24.09 rau 8 par. 1-2

Hisihisi ita davaria neganai, Iehova ese iseda tadikaka taihu amo ita dekenai ena lalokau ia hahedinaraia. Iseda tadikaka taihu be ita idia hagoadaia diba bema, nega idia atoa ita idia bamoa bona iseda hemami ita gwauraia neganai ita idia kamonai henia. Danu, idia ese hagoadaia Baibel siri ta idia duahia eiava ita ida idia guriguri. (Roma 15:4) Nega haida, tadikaka eiava taihu ta ese ita do ia durua Iehova ena lalohadai ita abia totona, unai amo lalohadai maorona ita abia diba. Danu, iseda tadikaka taihu ese dala ma haida ai ita idia durua diba, hegeregere ita dekenai aniani idia henia. Nega haida ma haida ita noia diba ita idia durua totona. (Aon. 17:17) Reana iseda hemami eiava iseda ura gaudia idia diba lasi. (Aon. 14:10) Unai dainai lo turadia dekenai emu hemami oi gwauraia diba. Bona oi do ia durua gaudia be idia dekenai oi herevalaia. Bona oi manada elda ta eiava rua dekenai emu hemami oi gwauraia hedinarai. Taihu haida be lo taihu ta idia hereva henia neganai goada idia abia. w24.10 rau 10 par. 15-16

Taunimanima momo be aniani namodia idia ania bona hanaihanai idia eksasais, badina idia ura edia helt ia namo bona idia mauri daudau. To, idia diba do idia buruka bona idia mase. Reana idia laloa ta ia mauri hanaihanai diba lasi. To, Ioane 3:16 bona 5:24 ai Iesu ia gwau taunimanima be mauri hanaihanai idia abia diba. Dina ta ai, Iesu be hoa dalana ai beredi bona gwarume amo taunimanima tausen momo ia ubua. To, murinai dinana ai ia gwauraia herevana dainai taunimanima idia hoa. Iesu be Kaperanauma dekenai ia lao, unai be Galilea ena kone badinai, bona hutuma be ia murinai idia lao. Unuseniai idia ia hamaoroa taunimanima be do idia toreisi lou bona mauri hanaihanai do idia abia. (Ioa. 6:​39, 40) Iesu ena hereva ese ia hahedinaraia idia mase taudia momo be do idia toreisi lou. Bona oi bona emu lalokau taudia be mauri hanaihanai umui moalelaia diba. w24.12 rau 8 par. 1-2

Vanegai, World Health Organization ena ripoti ta ese ia hahedinaraia, tatau momo be edia adavadia idia dadabaia, idia hereva dika henia, bona idia kara namo henia lasi. Unai bamona idia karaia tatau haida be taunimanima vairanai edia adavana idia matauraia, to ruma dekenai idia kara namo henia lasi. Dahaka dainai tatau haida be edia adavadia idia kara namo henia lasi? Reana idia tubu daekau ruma besena lalonai tamana ese sinana ia dagedage henia, unai dainai idia laloa unai kara be kerere lasi. Haida be edia tano ena mauri dalana dainai, edia adavadia idia kara auka henia, unai amo hahine do idia diba tatau ese idia biagudia be namo. Tatau haida be edia hemami idia biagua diba lasi, hegeregere idia badu haraga. Tatau haida be ponografi laulau idia itaia momo dainai, hahine bona mahuta hebou karana dekenai lalohadai kererena idia abia. Ma danu, ripoti haida ese idia hahedinaraia COVID-19 gorerena lalonai, tatau momo be edia adavadia idia dagedage henia matamaia. To momokani, tatau ese edia adavadia idia dagedage henia be maoro lasi. w25.01 rau 8 par. 2-3

Iesu ese Mose ena taravatu lalonai mai anina bada gauna ia herevalaia. Ia gwau: “Namona be Iehova emu Dirava oi lalokau henia mai emu kudouna ibounai bona mai emu mauri ibounai bona mai emu goada ibounai bona mai emu lalona ibounai ida.” (Luka 10:27) Unai dainai mai ura ida, hemami bona goada ibounai ida Iehova ita lalokau henia. Danu, iseda lalohadai amo ita hahedinaraia be namo. Oibe, Iehova ese ia laloa gaudia ibounai ita lalopararalaia diba lasi. To Dirava ena laloa dalana ita lalopararalaia totona, “Keriso ena lalohadai” ita stadilaia be namo, badina Iesu be ena Tamana ena laloa dalana ia hahedinaraia goevagoeva.—1 Kor. 2:16. w25.03 rau 8 par. 1

Tau ginigunana Adamu ia do kara dika lasi neganai, ia goevadae hegeregerena, Iesu be goevadae tauna. (1 Kor. 15:45) Unai dainai Iesu be ita totona ia mase neganai, ia hegeregere Adamu ese ia haboioa gauna ia hoia lou totona. (Roma 5:19) Unai dala amo, Iesu be “Adamu ginigabena” ai ia lao. Goevadae tauna ma ta be Adamu ese ia haboioa gauna ia hoia lou be anina lasi. Iesu be “nega tamona sibona” ia mase. (Heb. 7:27; 10:12) Dahaka ese dala ia kehoa Iehova ida hetura karana namona ita moalelaia totona? Iehova ese iseda dika ia gwauatao totona, dala ta ia hegaegaelaia. Iesu ese ena mauri goevadaena ia bouboulaia, iseda kara dika ena davana ia henia totona.—Heb. 9:14. w25.02 rau 5 par. 12-13

Bema Iehova be tau korikorina ta bamona ita laloa, unai ese ita do ia durua ita davaria hekwakwanai dekenai lalohadai maorona ita abia totona. Hekwakwanai ita davaria neganai namona be mai anina bada gaudia ita laloa. Diabolo ia gwau hekwakwanai ita davaria neganai, Iehova do ita rakatania. Unai dainai, hekwakwanai negadiai ita karaia abia hidi ese Iehova do ia hamoalea eiava hahisia. (Iobu 1:​10, 11; Aon. 27:11) Ena be hekwakwanai ita davaria to Iehova ita badinaia neganai, ita hahedinaraia ia ita lalokau henia bona ita hamomokania Diabolo be koikoi tauna. Reana oi noho gabuna ai gavamani ese Iehova ena taunimanima idia dagedage henia, moni ena hekwakwanai oi davaria, oi haroro henia taudia be sivarai namona idia ura henia lasi, eiava dala ma haida ai hisihisi oi davaria noho. Bema oi dekenai unai idia vara, laloatao unai be nega namona Iehova ena kudouna oi hamoalea totona. Danu laloatao, Iehova ese oi do ia rakatania lasi emui goada ia hereaia hekwakwanai oi davaria totona. Ia ese oi dekenai goada do ia henia oi haheauka totona. w24.06 rau 22 par. 9

Nega momo oi idia tohoa haraga gaudia oi diba, a? Namo lasi iseda manoka gaudia ita laloa maragi eiava ita laloa ita hegeregere, kara dika ta ita dadaraia totona. (1 Ioa. 1:8) Laloatao, Paulo ia gwau, bema “lo Keristani taudia” be idia naria namonamo lasi hedibagani lalonai do idia moru. (Gal. 6:1) Namona be mai momokani ida ita hahedinaraia ita be mai iseda manoka gaudia. (2 Kor. 13:5) Nega momo ita idia tohoa haraga gaudia ita diba neganai, dahaka ita karaia be namo? Ita gaukara goada, unai hahetoho hanaia dalana ita hanamoa! Haheitalai ta be, Baibel negadiai siti ta ena magu ia goada lasi kahana be ena geiti. Unai dainai, gadi taudia momo be geiti idia gimaia. Unai hegeregerena, namona be iseda manoka gaudia ita diba bona unai gaudia totona ita gima noho.—1 Kor. 9:27. w24.07 rau 15 par. 5-7

Hari dina ena siri bamona gaukara namona ta be sivarai namona harorolaia gaukarana. Dirava ena Hereva ita duahia bona laloa dobu neganai, Iehova dekenai iseda abidadama ia hagoadaia bona ita laloparara Basileia sivaraina ita harorolaia be mai anina bada. Dirava ena Hereva ese ita ia durua totona, ita duahia, stadilaia bona laloa dobu namonamo, ita haragaharaga lasi. Bona nega ita atoa be namo. Bema Baibel oi duahia lalonai siri ta oi lalopararalaia lasi, namo lasi unai oi laloa maragi. To Watch Tower Publications Index eiava Iehova Ena Witnes Taudia Edia Stadi Indeks oi gaukaralaia, unai siri ena anina oi tahua totona. Bema emu stadi totona nega oi atoa, Dirava ena Hereva dekenai emu abidadama do oi hagoadaia. (1 Tes. 5:21) Unai amo mai moale ida oi dibaia gaudia be ma haida dekenai do oi hadibaia. w24.04 rau 15 par. 4-5

Dirava “be namo bona [ia] noho hegaegae dika gwauatao totona.” (Sal. 86:5) Mika ia gwau: “Edena Dirava be oi bamona, . . . kerere ia gwauatao bona edia dika ia laloaboio?” (Mika 7:18) Bona Isaia ia gwau: “Namona be kara dika tauna be ena dala kererena ia rakatania bona ena lalohadai ia haidaua. Namona be Iehova dekenai ia giroa lou, badina ia dekenai do ia hebogahisi. Iseda Dirava ese kara dika do ia gwauatao momokani.” (Isa. 55:7) Korinto kongrigeisen ese Iehova idia tohotohoa totona, hadibaia hereva idia abia, ia helalo-kerehai tauna do idia welkam henia lou bona lalokau henia totona. Unai sisiba idia badinaia dainai idia ese “gau ibounai lalonai kamonai karana” idia hahedinaraia. Momokani, unai tau be hua haida sibona lalonai idia kokia, to unai matahakani ese ia durua bona ia helalo-kerehai. Unai dainai, kongrigeisen lalonai idia abia vareai lou haraga be namo. w24.08 rau 17-18 par. 12-13

Ita noho negana ai senisi badadia do idia vara! Kahirakahira, Iesu ese idia mauri noho taudia ta ta do ia hahemaoro henia. Iesu ia hahedinaraia unai hahemaoro negana ia do ginidae lasi neganai, “toa” haida do idia vara, unai ese ena noho negana bona “tanobada ena dokona” do ia hahedinaraia. (Mat. 24:3) Unai peroveta herevadia be Mataio karoa 24 bona 25 bona Mareko karoa 13 bona Luka karoa 21 ai idia noho. Iesu ese parabole toi ia gaukaralaia ita ia durua do ita hegaegae totona, unai be ita dekenai hadibaia herevadia. Unai parabole toi be mamoe bona nanigosi, aonega bona kavakava kekenidia bona talent. Unai parabole amo do ita itaia, ta be ena kara hegeregerena hahemaoro do ia abia. w24.09 rau 20 par. 1-2

Iseda haheitalai hereadaena be Iesu Keriso. Ia be ena Tamana bona taunimanima ia lalokau henia dainai, ia ura hesiai gaukara ibounai ia karaia. Unai lalokau dainai ia gaukara goada bona ia ura haida do ia hesiai henia. (Mat. 20:28; Ioa. 13:​5, 14, 15) Tadikaka e, bema lalokau dainai oi ura maduna ma haida oi abia, hegeregere hesiai tauna ai oi lao totona, Iehova ese oi do ia hanamoa bona do ia durua emu tahua gauna oi hagugurua totona. (1 Pet. 5:5) Tanobada ai, sibona edia ladana idia abia isi taudia be nega momo taunimanima ese idia laloa bada. To Iehova ena taunimanima be unai bamona idia karaia lasi. Tadikaka ta be Iesu hegeregerena, lalokau dainai hesiai gaukara ia karaia neganai, ia ura lasi ma haida ia hanaia eiava ladana bada ia abia. Bema tadikaka ta ia ura taunimanima ese idia laloa bada, ia be mai manau ida hesiai gaukara do ia karaia lasi, Iehova ena mamoe ia naria totona. Reana unai gaukara haida be momo ese idia laloa maragi dainai, do ia laloa ia karaia lasi be namo.—Ioa. 10:12. w24.11 rau 15 par. 6-7

Tanobada hegegemadai, namona be tadikaka momo ese “harihari gaudia bamona” maduna idauidau idia huaia. (Efe. 4:8) Bema oi be bapatiso tadikaka ta, “heduru oi henia” diba, a? (Aon. 3:27) Oi gaukara goada noho hesiai tauna ai oi lao totona, a? Bema oi be hesiai tauna ai oi lao vadaeni, oi gaukara goada noho elda tauna ai oi lao totona, a? Oi hegeregere emu noho dalana do oi haidaua bona Basileia Evanelia Sikuli do oi lao, a? Unai sikuli ese oi do ia hegaegaelaia, Iesu ese oi ia gaukaralaia totona. Bema oi mamia oi hegeregere lasi, unai gaudia oi karaia totona, Iehova oi guriguri henia. Iena lauma helaga ena heduru totona oi noinoi, unai amo oi abia asainmen oi karaia namonamo diba. (Luka 11:13) Iesu ese harihari gaudia bamona ia henia tadikaka be idia gaukara goada noho, unai ese ia hamomokania, inai dina gabedia ai Iesu be ita ia hakaua noho. (Mat. 28:20) Ita moale bada, badina iseda King be lalokau bona hariharibada tauna. Ia ese ita dekenai tadikaka ia henia ita idia durua totona. w24.10 rau 23 par. 16-17

Dirava ena taunimanima dekenai hisihisi bona lalometau idia havaraia gaudia be edena bamona? Kahirakahira, unai gaudia be do idia ore bona “[Dirava] vairana amo do idia boio.” (Isa. 65:16) Iehova ese iseda hekwakwanai ibounai do ia kokia, bona nega ia hanaia lalonai ita davaria hisihisi ibounai do idia ore. Hari iseda Keristani hebou dekenai ita helai neganai ita gari lasi, bona inai tanobada dikana ese ia havaraia gaudia ita laloa momo lasi. Danu, Dirava ena lauma helaga ese ia havaraia kara namodia hegeregere lalokau, moale, maino, kara namo bona manau ita hahedinaraia neganai, iseda tadikaka taihu do idia gari lasi. (Gal. 5:​22, 23) Dirava ena orea lalonai ita noho be hahenamo badana! Tomadiho goevana ai idia noho taudia ese Dirava ena gwauhamata “guba matamata bona tanobada matamata” ia guguru dalana do idia itaia. w24.04 rau 22 par. 9-10

Ena be tadikaka bona taihu ese edia hetura karana idia moalelaia diba, to namona be idia diba unai ese dala do ia kehoa idia headava totona. Tadikaka bona taihu ta be edia headava dinana ai, Iehova ena vairanai idia gwauhamata edia mauri dinadia ibounai lalonai ta ta do idia lalokau henia bona matauraia. Gwauhamata idia do karaia lasi neganai, namona be unai idia laloa namonamo. Headava gwauhamata totona, unai be mai anina bada. Tadikaka bona taihu ta idia hetura neganai, unai ese dala ia kehoa ta ta idia dibaia bona abia hidi namona idia karaia totona. Nega haida abia hidi idia karaia do idia headava totona, to nega haida abia hidi idia karaia edia hetura karana do idia hadokoa totona. Bema tadikaka bona taihu ta be edia hetura karana idia hadokoa, unai ese ia hahedinaraia lasi kerere ta idia karaia. To idia laloparara do idia headava eiava lasi. Namona be singul taudia idia laloatao, idia hetura ena badina be do idia diba bema idia ura idia headava eiava lasi. Singul taudia be lalohadai maorona idia abia neganai, do idia adavaia lasi tauna do idia tura henia lasi. w24.05 rau 26-27 par. 3-4

Nega haida Keristani matamata taudia idia gari, edia abidadama idia gwauraia hedinarai totona. Hegeregere, sikuli ai evolusen idia herevalaia neganai, reana natuna do ia gari ia abia dae gaudia ia herevalaia totona. Dahaka dainai? Reana tisa do ia gwau evolusen be ia vara momokani. Bema oi be tama eiava sina ta, edena dala ai emu natuna oi durua diba ia abia dae gaudia be mai gari lasi ida ia herevalaia totona? Emu natuna oi hadibaia ia hemarai lasi be namo, badina ia diba Havaraia Tauna ia noho. Danu, saiens taudia momo idia abia dae mauri gaudia be idia vara kava lasi. Unai taudia idia laloparara aonega bada tauna ta ese mauri gaudia ibounai ia havaraia. Unai dainai evolusen herevana idia abia dae lasi. Emu natuna ena abidadama ia goada bona do ia gari lasi dalana ta be, tadikaka bona taihu haida ese Havaraia Tauna idia abia dae ena badina do ia laloa. w24.12 rau 18 par. 14-15

Iesu ia diba momokani taunimanima haida be sivarai namona do idia kamonai. Unai ese ia durua mai ura ida haroro gaukara ia karaia totona. Hegeregere lagani 30 C.E. lalonai, Iesu ia itaia taunimanima momo idia ura sivarai namona idia kamonai, bona idia ia herevalaia neganai ia gwau uma aniani ia hegeregere vadaeni gogoa totona. (Ioa. 4:35) Lagani ta bamona murinai ena hahediba taudia ia hamaoroa: “Uma aniani gogoa gaukarana be bada.” (Mat. 9:​37, 38) Gabeai unai hereva ia gwauraia lou: “Uma aniani gogoa gaukarana be bada . . . Gogoa gaukarana ena Biaguna umui noia, ia ese gaukara taudia do ia siaia iena aniani idia gogoa totona.” (Luka 10:2) Iesu ia diba taunimanima be sivarai namona do idia abia dae, bona unai idia karaia neganai ia moale. Iesu ese ena hahediba taudia ia hamaoroa, idia harorolaia sivarai namona ese anina namona do ia havaraia, unai ese idia do ia hagoadaia idia haroro noho totona. w25.03 rau 18-19 par. 15-16

Iehova be iseda heau mauri gabuna. Lai gubana lalonai ta be kohua ta ese ia gimaia hegeregerena, nega aukadia lalonai Iehova ese ita ia gimaia. Bona ita ia durua iseda hetura karana ia ida ita gimaia bona ita ia hadibaia hari ita davaria hisihisi be do idia noho hanaihanai lasi. Danu ia gwauhamata: Iseda maino bona noho namo idia hadikaia gaudia do ia haorea. (Ese. 34:​25, 26) Iehova be iseda Heau Mauri Gabuna ai ita halaoa totona, dala ta be ia ita guriguri henia. Ita guriguri neganai, Iehova ese “Dirava ena maino” do ia henia, unai ese iseda kudouna bona lalona do ia gimaia. (Fili. 4:​6, 7) Iehova be ia noho hegaehegae ita ia durua totona. Iehova ita abidadama henia diba, badina ia be “noho hanaihanai Nadina.” (Isa. 26:​3, 4) Ia be ia mauri noho bona hanaihanai ena gwauhamata ia badinaia, iseda guriguri ia kamonai, bona ita do ia durua. Iehova dekenai ita tabekau diba, badina ia idia hesiai henia taudia ia rakatania diba lasi. (2 Sam. 22:26) Ita karaia gaudia do ia laloaboio lasi bona ita dekenai davana namona do ia henia.—Heb. 6:10; 11:6. w24.06 rau 27 par. 4-6

Moale karadia dikadia ese iseda lalona ia veria diba. Danu, hebamo dikadia ita bamoa bona kohu momo abia lalohadaina ese ita ia hakaua kerere diba. Bema ita itaia gau ta ese Iehova ita lalokau henia karana ia hamanokaia noho, karaharaga, unai gauna ita kokia be namo. (Mat. 5:​29, 30) Namo lasi gau ta ese Iehova dekenai iseda lalokau ia hamaragia. Do ita laloa Iehova ena hesiai gaukara lalonai ita bisi dainai, hebamo dikadia ese ita do idia hakaua kerere lasi. Mani inai haheitalai oi laloa, oi be emu ruma oi hagoevaia murinai windo oi kehoa, lai namona ia vareai totona, to kahu ia vareai danu. Iehova ida iseda hetura karana be unai bamona. Ia kahirakahira ita lao totona, gau namodia sibona ita karaia be hegeregere lasi. Ita ura lasi ruma lalonai kahu ia vareai hegeregerena, Iehova ida iseda hetura karana ia hamanokaia gaudia ita dadaraia danu.—Efe. 2:2. w24.07 rau 21 par. 6-7

Iesu be au dekenai idia kokoa kau neganai ia mamia hisihisi mani ita laloa, idia hahisia bada bona unai ia haheaukalaia. Ena be ia idia hahisia bada, to Iehova ia lalokau henia bona abidadama henia noho. Bona au dekenai ia idia kokoa kau tuari taudia ia badu henia lasi, to ia gwau: “Egu tamana e, edia dika oi gwauatao, badina idia diba lasi dahaka idia karaia noho.” (Luka 23:34) Ita idia kara namo henia lasi taudia totona ita guriguri neganai, unai ese ita ia durua ita badu noho lasi. Tanobada ena dokona ia do ginidae lasi neganai, ita diba lasi dahaka kara gageva do ita davaria. Herevana dahaka hekwakwanai idia vara, namona be Iehova ena heduru totona ita guriguri noho. Danu, namona be Iesu ese kara gageva ia haheaukalaia dalana ita tohotohoa bona Baibel ena hakaua herevadia ita badinaia. Bema unai bamona ita karaia, ita diba momokani Iehova ese ita do ia hanamoa.—1 Pet. 3:​8, 9. w24.11 rau 6 par. 16; rau 7 par. 17, 19

Iehova be kara dika ibounai ia inai henia. (Sal. 5:​4-6) Ia ura ena kara maoromaoro taravatudia ita badinaia, bona unai be Baibel ai idia noho. Momokani, Iehova ia diba ita be goevadae lasi dainai, nega haida do ita kerere. (Sal. 130:​3, 4) To, Dirava be ia idia badinaia lasi taudia ia abia dae lasi, badina ‘idia laloa ena hebogahisi hereadaena dainai, idia ese gwau-edeede hemarai karadia idia karaia’ diba. (Iuda 4) Oibe, Baibel ia hahedinaraia Dirava ena Aramagedono tuarina ai ‘Dirava idia badinaia lasi taudia be do idia ore momokani.’ (2 Pet. 3:7; Apok. 16:16) To, Iehova ia ura lasi tau ta ia mase. Baibel ese ia hahedinaraia Iehova “ia ura taunimanima ibounai be do idia helalo-kerehai.” (2 Pet. 3:9) Elda taudia be Iehova idia tohotohoa dainai, mai haheauka ida kara dika taudia idia durua edia kara idia haidaua totona, unai amo Iehova ena lalonamo idia abia lou diba. w24.08 rau 26 par. 1-2

Iehova bamona, mai lalokau ida ma haida edia dabu gaudia ita henia diba. Hegeregere, oi diba tadikaka eiava taihu ta be aniani eiava dabua ia ura, a? Iehova ese oi ia gaukaralaia diba, ia oi durua totona. Momo idia diba, Iehova ena taunimanima be disasta ia vara neganai, hariharibada karana idia hahedinaraia. Hegeregere, COVID-19 negana ai, tadikaka bona taihu ese aniani, dabua, bona gau ma haida be idia dabu taudia dekenai idia henia. Danu, momo be kontribiusen amo tanobada hegegemadai gaukarana idia durua. Unai moni ese disasta ia vara gabudia ai tadikaka taihu ia durua. Unai hariharibada karana idia hahedinaraia tadikaka taihu be Heberu 13:16 ena hereva idia badinaia, ia gwau: “Umui laloaboio lasi, kara namodia do umui karaia noho bona ma haida ida emui kohu do umui haria, badina Dirava ese unai bamona boubou karadia ia moalelaia.” w24.09 rau 27 par. 6-7

Mani inai haheitalai oi laloa. Emu famili durua totona moni gaukara oi tahua noho. Bona gaukara rua oi davaria. Gau ibounai oi tahua namonamo, do oi karaia gaukara, ena sediual, gaukara gabuna ena daudau bona gau ma haida. Oi davaria, unai moni gaukara rua be Baibel ena taravatu ia utua lasi. Reana gaukara ta oi ura henia badina unai gaukara dalana oi ura henia eiava ena pei be bada. To abia hidi namona oi karaia totona gau ma haida oi laloa be namo. Unai moni gaukara rua ena sediual dainai, emu kongrigeisen heboudia do oi reaia, a? Eiava oi be nega lasi emu ruma bese hamoalea gaudia oi karaia bona idia oi durua Iehova kahirakahira idia lao totona, a? Unai bamona henanadai ese oi do ia durua “mai anina bada gaudia”— oi atoa guna, hegeregere emu tomadiho karana bona emu ruma bese ena namo. Oi be Iehova ese do ia hanamoa abia hidi oi karaia diba. w25.01 rau 17 par. 11-13

Ena be ma haida ese oi idia kara auka henia, to namona be oi diba Iehova ese oi ia lalokau henia bona ia laloa bada. Bema oi “daradoko,” laloatao Iehova be emu kudouna ai gau namodia ia itaia bona oi ia veria mai ia kahirakahira. (Ioa. 6:44) Ia be hanaihanai ia noho hegaegae oi ia durua totona, badina oi ia laloa bada. Iesu ena haheitalai ita laloa karana amo, Iehova ena hemami do ita diba. Iesu be tanobada ai ia noho neganai, ma haida ese idia laloa maragi taudia ia kara namo henia. (Mat. 9:​9-12) Hahine ta be ia ura ena gorere dikana amo ia namo lou dainai Iesu ena dabua ia dogoatao, unai dainai Iesu ese ia hagoadaia bona ena abidadama dainai hanamoa hereva ia gwauraia. (Mar. 5:​25-34) Iesu ese ena Tamana ena kara ia hahedinaraia goevagoeva. (Ioa. 14:9) Unai dainai namona be oi abia dae Iehova be oi ia laloa bada bona emu kara namodia ia itaia, hegeregere emu abidadama bona ia oi lalokau henia karana. w24.10 rau 7 par. 4-5

Davida ena mauri lalonai, hekwakwanai badadia haida ia haheaukalaia bona unai dainai ia lalohisihisi bada bona ia taitai. Taunimanima momo ese ia idia inai henia. Danu ena turadia bona ruma bese taudia haida be ia idia badinaia lasi bona idia ura ia idia hamasea. (1 Sam. 19:​10, 11; 2 Sam. 15:​10-14, 30) Nega ta, Davida ia gwau: “Lau lalohisihisi noho dainai lau manoka vadaeni, hanuaboi ibounai lalonai lau taitai dainai, egu bedi be mata ranu amo ia paripari, bona lau taitai dainai egu helai gauna ia paripari momokani.” (Sal. 6:6) Ena be Davida ese unai hekwakwanai ia davaria, to ia diba Iehova ese ia lalokau henia. Ia gwau: “Iehova ese egu taitai do ia kamonai.” (Sal. 6:8) Iseda dina ena siri ese ia hahedinaraia, Iehova be ita ia lalokau henia bada bona iseda hemami ia laloa bada. Davida ia mamia Iehova ese ena mata ranu be kavabu ta lalonai ia haboua eiava buka ta ai ia torea. Davida ia diba Iehova ese ena hisihisi ia itaia bona laloatao. Davida ia abia dae ena lalokau guba Tamana ese ena hekwakwanai bona ena hemami ia lalopararalaia. w24. 12 rau 22 par. 11-12