September

Lo taudia ai ita lao neganai, namona be ita hekwarahi unai bamona ita noho totona. Namo lasi ita laloa lo taudia ai ita lao dainai, iseda hetura karana Iehova ida ita hagoadaia be anina lasi. (1 Kor. 10:12) Namona be sibona ita “tahua noho” bema iseda hetura karana Iehova ida ia goada. Aposetolo Paulo ese Kolose taudia ia tore henia neganai, ia hahedinaraia lo taudia bamona ita noho be namo. Ena be Kolose taudia be lo taudia ai idia lao vadaeni, to Paulo ese idia ia hamaoroa, sibona do idia gimaia be namo. Unai amo tanobada ena lalohadai ese idia do ia koia lasi. (Kol. 2:​6-10) Bona Epafra be kongrigeisen taudia ibounai ia diba namonamo dainai, idia totona ia guriguri goadagoada. Unai amo do idia “gini goada,” eiava lo taudia bamona do idia noho. (Kol. 4:12) Dahaka ita dibaia? Paulo bona Epafra idia laloparara ta be lo tauna bamona ia noho totona, ia gaukara goada bona Iehova ena heduru ia tahua be namo. Idia ura Kolose taudia be lo Keristani taudia eiava taunimanima badana bamona do idia noho, ena be hekwakwanai idia davaria. w24.04 rau 6-7 par. 16-17

Iehova ita gari henia ena anina be, ia ita lalokau henia bada dainai, ia moalelaia lasi gaudia ita dadaraia. Ita ura bada maoro bona kerere bona hereva momokani bona koikoi edia idau ita diba, unai amo Iehova ena lalonamo do ita abia diba. (Aon. 2:​3-6; Heb. 5:14) Bema taunimanima ita gari henia dainai Dirava gari henia karana ia maragi, hereva momokani ita rakatania diba. Mani iduhu gunalaia taudia 12 edia haheitalai ita laloa. Idia be Iehova ese Israela taudia totona ia gwauhamatalaia tanona dekenai idia lao spai. To spai taudia 10 be Kanana taudia idia gari henia dainai, Iehova dekenai edia lalokau ia goada lasi. Idia be Israela taudia idia hamaoroa: “Ai be unai taudia ai tuari henia diba lasi, badina edia goada ese emai goada ia hereaia.” (Num. 13:​27-31) Taunimanima edia lalohadai dekenai, Kanana taudia edia goada be Israela taudia edia goada ia hereaia. Bona haida idia gwau Israela taudia be hegeregere lasi edia inai taudia idia tuari henia totona, unai ese ia hahedinaraia idia be Iehova idia laloa lasi. w24.07 rau 9 par. 5, 6

Ita abia dae momokani, Iehova be taunimanima ia hahemaoro henia neganai, hanaihanai abia hidi maorona ia karaia, a? Oibe! Aberahamo ia laloparara, Iehova ena kara be goevadae, ia be aonega bada bona hebogahisi Diravana, bona “Tanobada ibounai edia Hahemaoro Tauna.” Iehova ese ena Natuna ia treinia bona taunimanima ibounai hahemaoro henia gaukarana ia henia. (Ioa. 5:22) Iehova bona Iesu be taunimanima edia kudouna ai idia noho gaudia idia diba. (Mat. 9:4) Unai dainai, taunimanima idia hahemaoro henia neganai “kara maorona” do idia karaia! Namona be iseda lalona ita hadaia, Iehova ita abidadama henia bona ia karaia abia hidi ibounai ita abia dae. Ita laloparara ita be hegeregere lasi ma ta ita hahemaoro henia totona, to Iehova sibona be unai ia karaia diba! (Isa. 55:​8, 9) Unai dainai, ita abia dae Iehova bona ena Natuna ese hahemaoro gaukarana idia karaia be namo. Danu, ita diba iseda King, Iesu, be ena Tamana ena hahemaoro goeva bona ena hebogahisi karana do ia tohotohoa goevagoeva.—Isa. 11:​3, 4. w24.05 rau 7 par. 18-19

Iesu ese nega ginigunana, Natanaela ia hedavari henia karana amo, mai kudouna ibounai ida ita kara dalana do ita dibaia. Filipo be ena turana Natanaela ia hakaua mai bona Iesu ia hedavari henia neganai, gau ta ia vara. Ena be Iesu ese nega ta Natanaela ia hedavari henia lasi, to ia gwau: “Itaia, ia be Israela tauna momokanina, ia dekenai koikoi ta be lasi.” (Ioa. 1:47) Iesu ia itaia Natanaela ena kara be idau momokani. Ita bamona Natanaela be goevadae lasi. To ia koikoi lasi bona gau ibounai lalonai ia kara momokani. Iesu ese unai kara namona ia moalelaia dainai, Natanaela ia hanamoa. Salamo 15 ese ma haida ita kara henia daladia momo ia herevalaia. Unai ita karaia neganai, Iehova ita hamoalea diba. Salamo 15:3 ese ia hahedinaraia, Iehova ena palai ruma ai ia noho tauna be “ena hereva amo ma haida edia ladana ia hadikaia lasi, ia ese ena dekena tauna dekenai kara dikana ta ia karaia lasi, bona ena turadia ia gwauraia dika lasi.” Bema iseda hereva amo ma haida edia ladana ita hadikaia, unai ese idia do ia hahisia bada.—Iam. 1:26. w24.06 rau 10 par. 7, 9; rau 11 par. 10

Bema haroro gaukara totona oi hegaegae namonamo, do oi gari lasi ma haida oi hereva henia totona. Iesu be ena hahediba taudia ia hegaegaelaia guna, bena gabeai haroro gaukara totona ia siaidia. (Luka 10:​1-11) Iesu ese ia hadibaia gaudia idia badinaia dainai, gau namodia momo idia karaia bona idia moale. Edena dala ai haroro gaukara totona ita hegaegae diba? Namona be hereva momokani do ita gwauraia dalana ita lalohadailaia bona iseda herevahereva dalanai ita gwauraia. Bona teritori ai momo ese idia laloa bada gaudia, bona idia do ita hereva henia dalana ita laloa. Bena taunimanima ita hereva henia neganai, do ita gari lasi, kiri toana ita hahedinaraia bona tura namona ta bamona do ita hereva. w24.04 rau 16 par. 6-7

Sivarai namona ita harorolaia ena badina badana be Iehova ita lalokau henia bona ena ladana helagana ita laloa bada. Danu haroro gaukara ita karaia neganai, ita lalokau henia Diravana ita hanamoa. Mai kudouna ibounai ida ita abia dae Iehova be mai ena maoro ia idia tomadiho henia taudia ese hairai, hemataurai bona siahu idia henia totona. Ma haida dekenai ita hahedinaraia ia ese ‘gau ibounai ia havaraia’ bona ia dainai ita mauri. Unai ita karaia neganai ia dekenai hairai bona hemataurai ita henia. Iseda nega, goada bona kohu ita gaukaralaia bona iseda noho dalana hegeregerena haroro gaukara ita karaia neganai, Iehova dekenai siahu ita henia. (Mat. 6:33; Luka 13:24; Kol. 3:23) Bona ita ura bada ita lalokau henia Diravana ita herevalaia. Danu, ita ura ma haida dekenai ena ladana bona ena kara namodia ita herevalaia. w24.05 rau 17 par. 11

Iehova ese maino bona iseda ura gaudia ia henia bona vaira negai mauri hanaihanai do ia henia. Ita abia dae momokani Iehova ia ura ita dekenai davana namona ia henia. Bona ia be mai ena siahu unai ia karaia totona. Unai dainai, mai kudouna ibounai ida Iehova ita tomadiho henia, idaunegai ena hesiai taudia idia karaia bamona. Bona Timoteo danu be unai ia karaia. (Heb. 6:​10-12.) Timoteo ia abidadama Dirava ese ia dekenai davana namona do ia henia. (1 Tim. 4:10) Unai dainai, Iehova bona ma haida totona ia gaukara goada. Edena dala ai? Aposetolo Paulo ese ia hagoadaia, haroro gaukara bona kongrigeisen ai hadibaia tauna namona ai ia lao totona. Danu, ia hamaoroa matamata taudia bona buruka taudia dekenai haheitalai namona do ia hahedinaraia. Bona ia dekenai gaukara badadia haida idia henia, hegeregere tadikaka taihu dekenai sisiba do ia henia. (1 Tim. 4:​11-16; 2 Tim. 4:​1-5) Timoteo ia diba Iehova ese ia dekenai davana namona do ia henia.—Roma 2:​6, 7. w24.06 rau 22-23 par. 10-11

Nega momo Iehova be ena peroveta taudia amo ena taunimanima ia hadibaia bona edia kara ia hamaoromaoroa. Hegeregere, Dirava be Ieremia amo ia gwau: “Gwau-edeede Israela e, umui giroa mai. Lau ese mai badu ida umui do lau kara henia noho lasi, badina lau be hebogahisi Diravana, do lau badu hanaihanai lasi. . . . Emu kerere oi gwauraia hedinarai, badina oi be Iehova . . . oi gwau-edeede henia.” (Ier. 3:​12, 13) Iehova be Ioela amo ia gwau: “Mai emui kudouna ibounai ida lau dekenai umui giroa mai.” (Ioe. 2:​12, 13) Isaia amo ia gwau: “Sibona umui hagoevaia. Emui kara dikadia be egu vairana amo umui kokia. Emui kara dikadia umui hadokoa.” (Isa. 1:​16-19) Bona Iehova be Esekiela amo inai henanadai ia henia: “Kara dika tauna ta ia mase neganai lau moale, a? Eiava lau ura iena kara dika do ia rakatania bona ia mauri noho? . . . Lau be tau ta ena mase dekenai lau moale lasi. Unai dainai umui helalo-kerehai bona umui mauri.” (Ese. 18:​23, 32) Iehova ia itaia taunimanima idia helalo-kerehai neganai, ia moale, badina ia ura idia mauri hanaihanai! w24.08 rau 9 par. 5-6

Iehova ese iena hesiai taudia ta ta dekenai edia abidadama hagoadaia gaudia ia henia, idia ia hakaua bona gimaia. Iehova ese taunimanima be maka tamona ai ia kara henia dalana ta be, dala ia kehoa taunimanima ibounai be hari Baibel idia duahia diba. Toretore Helagadia idia torea ena gado ginigunadia toi be: Heberu, Aramia, bona Grik. Unai gado ai, Baibel idia duahia diba taudia sibona be Iehova idia tura henia, a? Lasi. (Mat. 11:25) Iehova ia laloa lasi ita be sikuli bada taudia eiava gado ma haida ita dibaia dainai, ita ia boiria iena turana ai ita lao totona. To, Iehova ese taunimanima ibounai dekenai iena aonega ia henia, ena be sikuli badana idia lao eiava lasi. Iena Hereva, Baibel, be gado tausen momo ai idia hahanaia; unai dainai, taunimanima be Baibel ena hahediba herevadia amo namo do idia abia bona iena turana ai idia lao diba.—2 Tim. 3:​16, 17. w24.06 rau 6-7 par. 13-15

Iesu ese ia perovetalaia, Ierusalema do idia hadikaia ore negana, be ia kahirakahira. Oibe, Paulo bona Iudea ai idia noho Keristani taudia be unai dika do ia vara negana idia diba lasi. To unai Keristani taudia be unai nega idia naria noho lalonai, edia abidadama bona haheauka karana idia hagoadaia diba. (Heb. 10:25; 12:​1, 2) Kahirakahira hisihisi badana do ita davaria, unai be Heberu Keristani taudia ese idia davaria hisihisi do ia hereaia. (Mat. 24:21; Apok. 16:​14, 16) Mani Iehova ese unai Keristani taudia dekenai ia henia hakaua herevadia haida ita herevalaia, unai ese ita do ia durua danu. Aposetolo Paulo ena revareva ai, Heberu Keristani taudia ia hagoadaia Dirava ena Hereva idia stadilaia bona laloa dobu totona. (Heb. 5:14–6:1) Ia ese Heberu toretoredia amo ena tadikaka dekenai, Keristani tomadiho dalana ese Iuda tomadiho dalana ia hereaia ena badina ia herevalaia. Paulo ese Keristani taudia ia hagoadaia, Toretore Helagadia amo Hereva momokani do idia diba bona lalopararalaia, unai amo hahediba hereva koikoidia idia dadaraia diba. w24.09 rau 8-9 par. 2-3; rau 10 par. 6

Iesu ena hahediba taudia be hagoadaia herevadia idia abia be namo. Dahaka dainai? Haida be edia ruma, famili, bona bisinesi idia rakatania, Iesu ena murinai idia raka totona. (Mat. 19:27) Haida be ena hahediba taudia ai idia lao dainai idia kara auka henidia. (Ioa. 9:22) Unai bamona abia hidi idia karaia, badina idia abia dae Iesu be gwauhamata Mesiana. (Mat. 16:16) To, Iesu ia mase neganai, idia lalohisihisi bona idia lalomanoka, badina idia laloa idia naria gauna ia vara lasi. Iesu ia mase neganai, ena hahediba taudia idia lalohisihisi bona unai ia lalopararalaia. Bona ia diba idia lalohisihisi karana ese ia hahedinaraia lasi, edia abidadama be ia manoka. Unai dainai, ia toreisi lou dinana ai ena turadia ia hagoadaia matamaia. Hegeregere, Maria Magadala be Iesu ena guria gabuna ai ia taitai noho lalonai, ia dekenai ia hedinarai. (Ioa. 20:​11, 16) Danu, Emausa dekenai idia lao hahediba taudia rua dekenai ia hedinarai. Bona aposetolo Petero dekenai ia hedinarai. w24.10 rau 13 par. 5-6

Tama sina e, emu natuna oi durua mai gari lasi ida Havaraia Tauna ia noho ia herevalaia totona. Umui ese jw.org ai, havaraia gaudia bona evolusen idia herevalaia atikol haida umui herevalaia. Bena natuna ese ia ura henia point umui herevalaia diba, unai ese ia do ia durua ena sikuli turadia dekenai, Havaraia Tauna ia herevalaia totona. Danu bema haida idia ura unai topik idia herevalaia, namona be emu natuna oi hagoadaia auka lasi dalanai ia hereva bona badina namodia ia gaukaralaia. Hegeregere, sikuli turana ta do ia gwau: “Lau be lau itaia gaudia sibona lau abia dae, bona Dirava lau itaia lasi.” Matamata Keristani tauna be inai bamona ia haere diba: “Mani oi laloa, oi be taunimanima idia noho lasi uda gabuna ta dekenai oi raka lalonai, nadi amo idia karaia ranu guri ta oi davaria. Dahaka do oi gwau? Do oi gwau taunimanima ese unai ranu guri idia karaia, unai hegeregerena ta ese iseda tanobada bona mauri gaudia ibounai ia havaraia!” w24.12 rau 18 par. 16

Ita ibounai be abia hidi namodia ita karaia totona, heduru ita abia be namo. Bona unai bamona heduru be elda taudia bona lo Keristani taudia amo ita abia diba. Bema idia be buruka taudia, namo lasi ita laloa edia sisiba be ita do ia durua lasi. Iehova ia ura buruka taudia amo diba ita abia. Idia be edia mauri ai gau momo idia dibaia bona edia laloparara bona aonega be bada. Baibel negadia ai, Iehova ese abidadama buruka taudia ia gaukaralaia ena taunimanima ia hagoadaia bona hakaua totona. Idia haida be, Mose, Davida, bona aposetolo Ioane. Idia be nega idauidau ai idia noho bona edia noho daladia be idauidau. Edia mauri ena dina ginigabedia ai matamata taudia dekenai sisiba namodia idia henia. Unai abidadama buruka taudia ese idia hahedinaraia Dirava badinaia karana be mai anina bada. Ena be ita matamata eiava buruka, to edia sisiba amo namo ita abia diba.—Roma 15:4; 2 Tim. 3:16. w24.11 rau 8 par. 1-2

Noa ena negai, Dirava ese taunimanima ia taravatua rara idia ania lasi totona. (Gen. 9:​3, 4) Gabeai Iehova ese Israela taudia ia oda henia rara do idia ania lasi. Rara ia ania tauna be do idia “hamasea be namo.” (Lev. 7:27) Iesu be Iuda taudia ia hadibaia Dirava ese Mose amo ia henia Taravatu ibounai idia badinaia totona. (Mat. 5:​17-19) Unai dainai ia ese Iuda taudia do ia noia lasi iena tauanina do idia ania bona ena rara do idia inua totona. Iesu be hutuma ia hereva henia neganai, haheitalai ia gaukaralaia. Guna ia ese Samaria hahinena ia hereva henia bamona ia gwau: “Lau henia ranuna . . . be . . . mauri hanaihanai ia henia.” (Ioa. 4:​7, 14) Iesu ia gwau lasi Samaria hahinena be ranu do ia inua bena mauri hanaihanai do ia abia. Unai hegeregerena, ia gwau lasi Kaperanauma dekenai ia hereva henia taudia be mauri hanaihanai do idia abia bema iena tauanina bona rara idia ania. w24.12 rau 9 par. 4-6

Keristani headava tatau ese hahine dekenai lalohadai kereredia idia abia lasi be namo. Dahaka dainai? Badina tau ese ia laloa gauna be do ia karaia. Aposetolo Paulo ese Roma ai idia noho Keristani taudia ia hadibaia ‘inai nega oromana ai idia noho taudia do idia tohotohoa lasi.’ (Roma 12:​1, 2) Paulo ese Roma kongrigeisen ia tore henia neganai, idia be lagani haida lalonai Keristani taudia ai idia lao vadaeni. To, Paulo ena hereva ese ia hahedinaraia kongrigeisen lalonai, haida be tanobada ena kastom karadia bona lalohadai idia do badinaia noho. Unai dainai idia ia sisiba henia, edia lalohadai bona kara idia haidaua totona. Unai sisiba be hari Keristani headava taudia ese idia badinaia diba. To madi, haida be inai tanobada ena lalohadai ese ia hakaua dainai edia hahine idia dagedage henia. w25.01 rau 9 par. 4

Hari, elda taudia be gaukara momo idia karaia. Idia be evanelia taudia. (2 Tim. 4:5) Idia ese haroro gaukara idia gunalaia, iseda haroro teritori idia hegaegaelaia, bona ita idia treinia haroro bona hadibaia gaukarana ita karaia namonamo totona. Idia be mai hebogahisi ida hahemaoro idia henia bona maka tamona ai taunimanima idia kara henia. Kongrigeisen ai ta be kerere badana ia karaia neganai, elda taudia ese unai tauna idia durua, Iehova ida ena hetura karana ia hanamoa lou totona. Danu, kongrigeisen ia goeva totona idia gaukara goada. (1 Kor. 5:​12, 13; Gal. 6:1) To elda be mamoe naria taudia, unai be edia maduna badana. (1 Pet. 5:​1-3) Idia ese Baibel amo tok namodia idia henia, idia gaukara goada kongrigeisen taudia ibounai idia dibaia totona bona mamoe vadivadi idia karaia. Danu elda taudia haida be gaukara ma haida dekenai heduru idia henia, hegeregere Kingdom Hall idia haginia bona hanamoa, hebouhebou idia hakaua, bona Hospital Liesen Komiti bona Gorere Taudia Vadivadi Henia Grup idia durua. Elda taudia be ita totona idia gaukara goada! w24.10 rau 20 par. 9

Baibel ia gwau, mauri davana ese ita ia hoia lou eiava ruhaia. Aposetolo Petero ia gwau: “Umui diba, Dirava ese idia dika diba gaudia, hegeregere siliva bona golo, amo emui sene taudia edia anina lasi mauri dalana amo umui ia ruhaia lasi [anina be “ta ese emui mauri davana ia karaia; umui ia hoia lou.”] To ia ese Keriso ena dava bada rarana amo umui ia ruhaia, unai be ia goeva bona maka ta lasi mamoe natuna ena rara bamona.” (1 Pet. 1:​18, 19; ftn.) Mauri davalaia boubouna ese, ita be kara dika bona mase edia igui amo ia ruhaia. (Roma 5:21) Iesu ena dava bada rarana amo ita ia hoia lou dainai, Iehova bona Iesu ita tanikiu henia bada. w25.02 rau 5 par. 15-16

Edena dala ai hedibagani bona kara dika ita dadaraia diba? Mani Aonega Herevadia karoa 7 ese ia herevalaia mero matamata ena haheitalai ita herevalaia. Unai mero be matabodaga hahinena ida ia mahuta hebou. Siri 22 ia gwau unai mero matamata be unai hahine murinai ia lao “haraga.” To siri ginigunadia ese idia hahedinaraia, ia be abia hidi kereredia ia karaia dainai, unai ese metairametaira ia hakaua kara dika ia karaia totona. Unai mero matamata be dahaka gaudia ia karaia dainai, kara dika ia karaia? Ginigunana be, adorahi ai, matabodaga hahinena “ena dala dekenai ia raka lao.” Bena, hahine ena ruma dekenai ia raka lao. (Aon. 7: 8, 9) Gabeai, mero ese hahine ia itaia neganai, ia raka siri lasi. To, unai hahine ese ia kisi henia bona ia henia maino karaia boubouna ia herevalaia neganai, mero ia kamonai noho, reana unai amo do ia laloa ia be hahine namona. (Aon. 7:​13, 14, 21) Bema mero matamata be abia hidi kereredia ia karaia lasi, hedibagani do ia dadaraia bona ia kara dika lasi. w24.07 rau 16 par. 8-9; rau 19 par. 19

Iehova be ena taunimanima huanai kara dika idia karaia bona idia helalo-kerehai lasi taudia ia abia dae lasi. Haida idia laloa Iehova be hebogahisi Diravana dainai, kongrigeisen lalonai idia noho helalo-kerehai lasi taudia do ia abia dae, to Iehova be unai dala ai ena hebogahisi ia hahedinaraia lasi. Iehova be hebogahisi Diravana, to ia ese kara haida ia abia dae lasi; iena kara maoromaoro taravatudia be idia idau lasi. (Iuda 4) Unai dainai bema Iehova ese ia helalo-kerehai lasi tauna ia kokia, unai be hebogahisi karana, badina kongrigeisen taudia ibounai do ia gimaia. (Aon. 13:20; 1 Kor. 15:33) To, ita dibaia gauna be Iehova ia ura lasi ta ia mase. Bema hegeregere, ia ura taunimanima ia hamauria. Edia laloa dalana bona kara idia haidaua bona edia hetura karana ia ida idia hanamoa taudia dekenai hebogahisi ia hahedinaraia. (Ese. 33:11; 2 Pet. 3:9) Unai dainai, Korinto ai unai kara dika tauna ia helalo-kerehai bona ena kara dika ia rakatania neganai, Iehova ese aposetolo Paulo ia gaukaralaia kongrigeisen taudia ia hamaoroa unai tauna ena dika do idia gwauatao bona idia abia dae lou be namo. w24.08 rau 17 par. 7; rau 18-19 par. 14-15

Iesu ia gwau, taunimanima be ena horoa tadikaka idia durua dalana hegeregerena hahemaoro do idia abia. (Mat. 25:​31-46) “Hisihisi badana” lalonai, Aramagedono do lasi neganai, unai taudia do ia hahemaoro henia. (Mat. 24:21) Mamoe naria tauna ese mamoe be nanigosi amo ia hapararaia hegeregerena, Iesu ese horoa taudia edia hakaua dalana idia badinaia taudia be idia badinaia lasi taudia amo do ia hapararaia. Baibel ia gwau, Iesu be Iehova totona taunimanima ia hahemaoro henia neganai, mai momokani ida unai do ia karaia. (Isa. 11:​3, 4) Ia be taunimanima ese idia karaia gaudia, edia lalohadai, idia gwauraia gaudia bona ena horoa tadikakadia idia kara henia dalana ia itaia. (Mat. 12:​36, 37) Iesu do ia diba daika ese iena horoa tadikaka bona edia gaukara ia durua. Bona mamoe bamona taudia ese Keriso idia durua dala badana ta be haroro gaukara idia karaia. w24.09 rau 20-21 par. 3-4

Bema gau ta dekenai ita daradara, namona be Baibel ena hereva ida ita hahegeregerea. Mani matamata tauna ta ita laloa, ia be ia daradara bema Dirava ese ia laloa bada. Do ia abia dae ena lalohadai be maoro, a? Lasi, ‘namona be gau ibounai ia tahua namonamo’ unai amo Iehova ena lalohadai do ia diba. Baibel ita duahia lalonai, ita “kamonai” Iehova be ita ia hereva henia noho. To iseda daradara gauna ta ena haere ita abia totona, kara ta ita karaia be namo. Bona Baibel ita duahia sibona be hegeregere lasi. Namona be iseda henanadai do ia haerelaia Baibel siridia ita tahua bona stadilaia. Unai ita karaia totona, iseda pablikeisen amo tahua gaukara ita karaia. (Aon. 2:​3-6) Guriguri amo Iehova ita noia, iseda henanadai edia haere ita davaria totona. Bena Baibel ena hakaua herevadia bona ita do ia durua daladia haida ita tahua bona badinaia. w24.10 rau 25 par. 4-5

Bema ta be ia hekokoroku eiava sibona ena namo ia tahua, Iehova ese ena hekwarahi do ia hanamoa lasi. (1 Kor. 10:​24, 33; 13:4) Nega haida, Iesu ena turana namodia haida be badina kereredia dainai, idia ura maduna idia abia. Mani aposetolo taudia rua Iamesi bona Ioane ita laloa. Idia ese Iesu idia noia ena Basileia ai dagi badana do ia henia. Iesu ese idia hamaoroa lasi, idia noia gauna be maoro. Bona ena aposetolo taudia 12 dekenai ia gwau: “Bema ta ia ura emui huanai do ia bada, namona be emui hesiai tauna ai do ia lao. Bona bema ta ia ura emui huanai do ia guna, ia be umui ibounai emui hesiai tauna ai ia lao be namo.” (Mar. 10:​35-37, 43, 44) Bema tadikaka be badina maorona dainai idia ura maduna idia huaia, unai ese kongrigeisen do ia durua bada.—1 Tes. 2:8. w24.11 rau 15-16 par. 7-8

Abia hidi ita karaia neganai, lalokau ese ita do ia hagoadaia “ma ta ena namo” ita tahua bona ita laloa maoromaoro totona. (1 Kor. 10:​23, 24, 32; 1 Tim. 2:​9, 10) Bona ita karaia abia hidi amo do ita hahedinaraia ma haida ita matauraia bona lalokau henia. Bema oi ura abia hidi badana ta oi karaia, unai oi badinaia totona do oi karaia gaudia oi laloa. Iesu ese ita ia hadibaia ‘davana ita laloa’ totona. (Luka 14:28) Unai dainai emu abia hidi oi hagugurua totona emu nega, kohu, bona goada do oi gaukaralaia dalana oi laloa. Nega haida emu ruma bese taudia oi noia diba, gau haida dekenai oi idia durua totona. Dahaka dainai unai bamona palani oi karaia be mai anina bada? Badina reana do oi laloparara, emu abia hidi dekenai gau haida do oi haidaua eiava abia hidi ma ta oi karaia diba. Danu emu ruma bese taudia oi noia bona edia lalohadai oi kamonai neganai, do idia ura oi idia durua emu abia hidi oi hagugurua totona. w25.01 rau 18-19 par. 14-15

Isaia ese ia hahedinaraia Iehova ita tomadiho henia dainai ita “moale.” Iehova ese unai ia havaraia. (Isa. 65:​18, 19) Unai dainai ita ia gaukaralaia noho, taunimanima dekenai hereva momokani ita hadibaia, bona ita durudia ita ida Iehova idia tomadiho henia totona! Hereva momokani ita dibaia bona ita abia hahenamo idauidau dainai ita moale, bona unai ese ita ia hagoadaia ma haida dekenai ita dibaia gaudia ita herevalaia totona. (Ier. 31:12.) Danu, ita moale badina Iehova ita tura henia dainai, vaira nega ena helaro namona ita abia. Baibel ia gwauhamata ‘ruma do ita haginia, bona do ita noholaia, bona vain umadia do ita karaia bona edia huahua do ita ania.’ ‘Do ita hekwarahi kava lasi’ badina ‘Iehova ese ita do ia hanamoa.’ Ia gwauhamata ita do ia naria bona mauri namona do ia henia. Ia be idia ta ta edia ura gaudia ia diba bona ‘mauri gaudia ibounai edia ura gaudia do ia henia.’—Isa. 65:​20-24; Sal. 145:16. w24.04 rau 22-23 par. 11-12

Iehova dekenai ita tabekau neganai, ia be iseda Nadi Badana ai ita halaoa. Ita abia dae nega aukadia lalonai ia ita badinaia neganai, namo do ita davaria. (Isa. 48:​17, 18) Iehova ena heduru karana ita itaia neganai, ia dekenai iseda abidadama do ia goada. Bona do ita abia dae momokani ena be hahetoho badadia ita davaria, to Iehova ese ita do ia durua ita haheauka totona. Nadi badana eiava ororo be edia gabu ai idia noho hegeregerena, Iehova be ia idau diba lasi. Iena kara bona ena ura be idia idau diba lasi. (Mal. 3:6) Adamu bona Heva be Iehova idia gwau-edeede henia neganai, taunimanima totona ena ura ia haidaua lasi. Danu, aposetolo Paulo ia gwau Iehova be “sibona ena hereva ia hakoikoia diba lasi.” (2 Tim. 2:13) Unai ena anina be ena be dahaka ia vara eiava haida be dahaka idia karaia, to Iehova ena kara, ura, bona taravatu be do ia haidaua lasi. Iehova ena kara be ia idau diba lasi dainai, ita diba nega aukadia lalonai ita do ia durua bona ena gwauhamata vaira nega totona do ia hagugurua.—Sal. 62:​6, 7. w24.06 rau 27-28 par. 7-8

Bema ta oi tura henia noho, dahaka ese oi do ia durua abia hidi oi karaia do oi headava eiava lasi? Ta ta umui diba namonamo. Reana oi be ta ena kara oi dibaia murinai ia oi tura henia matamaia. To hari, dala ia noho iena “kudouna ai ia noho gauna” oi diba totona. Umui hetura lalonai iena hetura karana Iehova ida, ena kara, bona laloa dalana do oi dibaia. Reana nega ia hanaia lalonai inai bamona henanadai do oi haerelaia diba: ‘Ia be adavana namona ai do ia lao, a?’ (Aon. 31:​26, 27, 30; Efe. 5:33; 1 Tim. 5:8) ‘Ta ta do ai lalokau henia bona laloa bada, a? Ta ta emai kerere do ai gwauatao, a?’ (Roma 3:23) Ta ta umui dibaia noho lalonai, namona be umui laloatao, mai anina bada gauna be ta ta emui mauri dalana do umui abia dae eiava lasi. w24.05 rau 27 par. 5

King Davida be kara dika badana ia karaia. To peroveta tauna Natana ese ia sisiba henia neganai, Davida be mai manau ida ia helalo-kerehai. (Sal. 51:​3, 4, 17, supaskripsen) King Hesekaia danu be Iehova vairanai kara dika ia karaia. (2 Siv. 32:25) To Davida hegeregerena, Hesekaia be ia helalo-kerehai. (2 Siv. 32:26) Unai dainai Iehova ese Hesekaia be abidadama king tauna ta bamona ia laloa, bona ena vairanai, “kara maorona ia karaia noho.” (2 Ki. 18:3) Dahaka ita dibaia? Namona be iseda kara dika amo ita helalo-kerehai, bona ita gaukara goada unai dika ita karaia lou lasi. Bema ita karaia kerere maragina ta dainai, kongrigeisen ena elda ese ita idia sisiba henia be edena bamona? Namo lasi ita laloa, Iehova eiava elda taudia be ita idia ura henia lasi. Israela ena king namodia danu be sisiba idia abia. (Heb. 12:6) Ita karaia kerere dainai sisiba ita abia neganai, namona be (1) ita manau, (2) senisi ita karaia, bona (3) mai kudouna ibounai ida Iehova ita hesiai henia noho. Bema iseda kara dika amo ita helalo-kerehai, Iehova ese ita do ia gwauatao.—2 Kor. 7:​9, 11. w24.07 rau 21 par. 8; rau 22 par. 9, 11

Kara dika tauna be kongrigeisen amo do idia kokia, bema elda taudia ese idia durua loulou, to ena kara dika amo ia helalo-kerehai lasi. (2 Ki. 17:​12-15) Iena kara ese idia hahedinaraia ia ura lasi Iehova ena taravatu ia badinaia. (Deu. 30:​19, 20) Kongrigeisen idia hadibaia ia be Iehova ena Witnes tauna ta lasi. Unai hadibaia hereva be kerere tauna hahemaraia totona lasi. To, unai idia karaia tadikaka bona taihu be Baibel ena sisiba idia badinaia totona, unai be ‘ia do idia bamoa lasi bona ia ida do idia aniani lasi danu.’ (1 Kor. 5:​9-11) Badina namona dainai Iehova ese unai sisiba ia henia. Aposetolo Paulo ia gwau: “Isti sisina ese paraoa ibounai ia hatubua.” (1 Kor. 5:6) Idia helalo-kerehai lasi taudia ese Iehova ena kara maoromaoro taravatudia idia badinaia taudia idia hakaua kerere diba.—Aon. 13:20; 1 Kor. 15:33. w24.08 rau 27 par. 3-4

To, iseda goada ita gaukaralaia ma haida ita durua karana amo, Iehova ita tohotohoa diba. Hegeregere, buruka eiava idia gorere tadikaka taihu totona, ruma gaukaradia ita karaia eiava sitoa dekenai ita lao. Eiava Kingdom Hall hagoevaia eiava hanamoa totona ita durua diba. Danu laloatao, oi gwauraia herevadia be mai edia siahu. Emu hanamoa herevana ese do ia durua tadikaka eiava taihu ta oi laloa, a? Heduru ia ura tadikaka eiava taihu ta oi diba, a? Bema oibe, unai tauna oi hamaoroa ia oi laloa bada. Ia oi vadivadi henia, oi rini henia, eiava kadi, email, o meseij oi siaia diba. Do oi gwauraia herevana oi laloa momo lasi. Emu kudouna amo oi gwauraia hereva kwadogina ese emu tadikaka ia durua, dina ta lalonai ena abidadama ia hagoadaia eiava ena hekwakwanai lalonai, lalohadai maorona do ia abia.—Aon. 12:25; Efe. 4:29. w24.09 rau 28 par. 8-10

Bema oi be hesiai tauna ta, elda tauna ai oi lao totona oi gaukara goada Baibel ena hakaua herevadia oi badinaia totona. Oi ura inai gaukara namona oi karaia, a? Elda tauna be dahaka gaukara ia karaia? Haroro gaukara ia gunalaia, mamoe naria gaukara bona hadibaia gaukara ia karaia namonamo bona iena hereva bona kara amo kongrigeisen ia hagoadaia. Unai dainai, Baibel ese idia gaukara goadagoada elda taudia ia gwauraia “harihari gaudia.” (Efe. 4:8) Elda tauna ai oi lao totona dahaka oi karaia diba? Elda maduna be moni gaukara bamona lasi. Inai tanobada ai, moni gaukara ta oi abia diba bema gaukara ta oi diba. To elda maduna oi abia totona, haroro bona hadibaia dalana oi diba sibona be hegeregere lasi. Namona be 1 Timoteo 3:​1-7 bona Tito 1:​5-9 ai idia noho hakaua herevadia oi badinaia danu. w24.11 rau 20 par. 1-3