November

Elda taudia be kongrigeisen amo idia kokia tauna idia durua neganai, Iehova ena hebogahisi karana idia tohotohoa. Hegeregere, ena be Israela taudia be kara dika momo idia karaia, to Iehova be ia naria lasi do idia helalo-kerehai bona idia do ia durua. Ia ese dala ia karaia guna idia ia durua totona. Iehova ese peroveta tauna Hosea ia hamaoroa ena adavana ia abia dae lou totona, ena be ia do kara dika noho. Unai dala amo Iehova be ena hebogahisi karana ia haheitalaia. (Hos. 3:1; Mal. 3:7) Unai hegeregerena, elda taudia idia ura kerere tauna ia giroa lou dainai, dala idia karaia ia idia durua totona. Iesu ese ia gwauraia boio natuna ena parabole lalonai, tamana “ia heau lao, [ena natuna] ia rosia bona ia kisi henia.” (Luka 15:20) Tamana be ia naria lasi ena natuna ese do ia noia ena dika ia gwauatao totona. To, ia heau lao guna badina ena natuna ia lalokau henia. w24.08 rau 28 par. 7-8

Hari dina ena siri ese ia hahedinaraia, Iehova be ena aonega ia hunia lasi. Ia be mai hariharibada ida henia karana ia hahedinaraia. Danu, Iamesi ia gwau Iehova be aonega ia henia neganai, ita ia ‘gwau henia lasi’ eiava ‘iseda kerere ia tahua lasi.’ Bona iena hakaua dalana totona ita noinoi neganai, ia ura lasi iseda hemami ia dika. To ia ura unai totona ita noinoi. (Aon. 2:​1-6) Ita be edena bamona? Iehova ita tohotohoa bona ita dibaia gaudia be ma haida dekenai ita hadibaia, a? (Sal. 32:8) Iehova ena taunimanima be dala idauidau ai ma haida idia hadibaia. Hegeregere, nega momo ita ese haroro gaukara ai ma haida ita treinia. Elda taudia be mai haheauka ida hesiai taudia bona bapatiso tadikaka idia durua, kongrigeisen lalonai, edia asainmen idia karaia totona. Konstraksen bona hanamoa gaukarana idia diba momo tadikaka taihu, be ma haida idia treinia tomadiho rumadia idia haginia totona. w24.09 rau 28-29 par. 11-12

Tadikaka e, elda tauna ai oi lao totona, “namona be oi be kerere ta lasi,” anina be kongrigeisen ai ladana namona oi abia bona ta be oi do ia gwauraia dika lasi. (1 Tim. 3:2) Ma danu namona be murimuri taudia vairanai oi be ladana namona tauna. Nega haida, reana idia ese oi abia dae gaudia idia gwauraia dika, to namo lasi badina haida dainai emu kara namodia idia gwauraia kerere. (Dan. 6:​4, 5) Sibona oi nanadaia, ‘Kongrigeisen lalonai bona murimuri ai lau be mai egu ladana namona, a?’ Bema oi be ‘kara namo oi ura henia,’ oi ese ma haida edia kara namodia do oi itaia bona idia do oi hanamoa. (Tito 1:8) Danu oi moale ma haida oi durua totona, bona idia noia lasi gaudia oi karaia danu. Dahaka dainai elda taudia dekenai unai kara be mai anina bada? Badina idia ese edia nega bada idia gaukaralaia, kongrigeisen ai tadikaka taihu idia durua bona asainmen idauidau idia karaia totona. (1 Pet. 5:​1-3) Ena be gaukara momo idia karaia, to ma haida idia hesiai henia dainai idia moale.—Kara 20:35. w24.11 rau 20-21 par. 3-5

Hesiai taudia be kongrigeisen ai mai anina bada gaukara idia karaia. Aposetolo Paulo be unai tadikaka edia gaukara ia laloa bada. Hegeregere, Filipi kongrigeisen ia tore henia neganai, ia ese hesiai taudia bona elda taudia ia hanamoa. (Fili. 1:1) Herevana oi matamata eiava oi buruka, bapatiso tadikaka momo be hesiai tauna ena maduna idia huaia dainai idia moale bada. Hegeregere, Devan ena mauri lagani be 18 neganai, hesiai tauna ai ia lao. Ma tadikaka ta ladana Luis ena mauri lagani be 50 neganai, hesiai tauna ai ia lao. Ia be hesiai taudia momo ese idia abia hemami ia herevalaia neganai, ia gwau: “Kongrigeisen taudia ese lau dekenai idia hahedinaraia lalokau lau laloa neganai, lau mamia hesiai tauna ena maduna be hahenamo badana!” Bema oi be bapatiso tadikaka ta bona hesiai tauna ai oi do lao lasi, unai be emu tahua gauna ai oi halaoa diba, a? w24.11 rau 14 par. 1-3

Iuda ena King Hesekaia ena mauri lagani be 39 neganai, gorere badana ta ia abia. Peroveta tauna Isaia ese Iehova ena hadibaia hereva be Hesekaia dekenai ia gwauraia, ia be gorere dainai do ia mase. (2 Ki. 20:1) Hesekaia be unai hadibaia hereva ia kamonai neganai, ia tai dikadika. Bena Iehova ena heduru totona ia noinoi. Iehova be Hesekaia ena guriguri ia kamonai bona ena mata ranu ia itaia neganai, ia hebogahisi bona ia gwau: “Lau ese emu guriguri lau kamonai vadaeni. Emu matana ranu lau itaia vadaeni. Oi be emu gorere amo do lau hanamoa.” Iehova be Isaia amo, Hesekaia dekenai ia gwauhamata ena mauri do ia halataia bona Asuria taudia edia imana amo Ierusalema do ia hamauria. (2 Ki. 20:​4-6) Dahaka do oi karaia bema oi abia gorere be ia namo diba lasi? Iehova dekenai emu hemami oi gwauraia, ena be oi guriguri lalonai oi tai danu. Baibel ese ita ia hadibaia “hebogahisi Tamana bona lalogoada ibounai ia henia Diravana” be ita davaria hahetoho ibounai lalonai ita do ia hagoadaia.—2 Kor. 1:​3, 4. w24.12 rau 24 par. 15-17

Mani oi laloa mai moale ida toreisi lou taudia do oi welkam henia! Danu Iehova ena havaraia gaudia idauidau oi stadilaia neganai, ia oi dibaia noho karana do oi moalelaia. (Sal. 104:24; Isa. 11:9) Bona gau namo hereana be, kara dika ta do oi karaia lou lasi, unai dainai Iehova oi hesiai henia diba bona emu dika ia gwauatao totona ia do oi noia lou lasi. Vaira nega ena hahenamo idauidau do oi laloa bada lasi bona hari “nega sisina do ia noho gauna” do oi karaia, a? (Heb. 11:25) Lasi! Badina vaira nega ai do ita abia mauri namona be inai tanobada ai ita abia gaudia ia hereaia. Laloatao, tanobada Paradaisona be hanaihanai do ita naria noho gauna lasi. To ia be do ia vara momokani bona do ita noholaia. Iehova be unai gaudia ibounai do ia karaia, badina ita ia lalokau henia bona ena Natuna ia bouboulaia! w25.01 rau 29 par. 12

Heberu bukana ese Iehova idia abidadama henia taudia momo ia herevalaia, idia ta be Mose. (Heb. 3:​2-5; 11:​23-25) Mose ena abidadama dainai Iehova ese tano kaukauna ai, hoa dalanai taunimanima dekenai aniani bona ranu ia henia. (Eso. 15:​22-25; Sal. 78:​23-25) Iehova ese Israela taudia be Aigupito taudia amo ia ruhaia, bona lagani ta bamona murinai, Mose ia daradara matamaia, bema Iehova be ia hegeregere ena taunimanima dekenai vamu ia henia totona. Taunimanima milioni momo be tano kaukauna ai idia kamepa. To Iehova ese Mose ia haere henia: “Iehova ena imana be ia kwadogi, a?” (Num. 11:​21-23) Unai dainai ita gwau diba, Iehova be Mose ia hamaoroa: ‘Lau gwauraia gaudia ibounai lau karaia diba.’ w25.03 rau 26 par. 1-2

Do ita gwau, Abata ena sivarai be vaira negai do idia vara gaudia ia laulaulaia, a? Haere be, lasi. Dahaka dainai? Badina Baibel ese unai ia herevalaia lasi. Momokani, Iesu ese Noa ena nega be iena noho negana ida ia hahegeregerea. To ia gwau lasi Noa ena negai idia vara gaudia be vaira negai do idia vara gaudia ia laulaulaia, hegeregere Iehova ese lagatoi ena iduara ia koua karana. (Mat. 24:​37-39) Noa ese Iehova ena hadibaia herevana ia kamonai neganai, dahaka ia karaia? Ia ese lagatoi ia haginia, unai amo ia hahedinaraia ia be mai ena abidadama. (Heb. 11:7; 1 Pet. 3:20) Unai hegeregerena, Dirava ena Basileia ena sivarai namona idia kamonai taudia ese kara ta idia karaia be namo. (Kara 3:​17-20) Petero ese Noa ia gwauraia, “kara maoromaoro ia harorolaia tauna.” Hari, ita be mai ura bada ida tanobada hegegemadai idia karaia haroro gaukarana ita durua. Dokona ia do ginidae lasi lalonai ita ura taunimanima ibounai ita haroro henia, to do ita hegeregere lasi. w24.05 rau 9-10 par. 3-5

Namona be dala ita tahua Iehova ena turadia ita kara namo henia bona matauraia. (Roma 12:10) Edena dala ai? Salamo 15:4 ese ia hahedinaraia, dala ta be Iehova ena palai ruma ai ia noho tauna be “ia karaia gwauhamata ia badinaia, ena be hagugurua totona be ia auka.” Iseda gwauhamata ita badinaia lasi neganai, ma haida do ita hahisia. (Mat. 5:37) Hegeregere, Iehova ia ura headava tau bona hahine ese idia headava neganai, ta ta dekenai idia karaia gwauhamata idia badinaia. Danu, tama sina be edia natudia dekenai idia karaia gwauhamata idia hagugurua neganai, Iehova ia moale. Dirava bona iseda dekena taudia ita lalokau henia neganai, do ita gaukara goada iseda gwauhamata ita badinaia totona. Dirava ena turadia ita matauraia dalana ma ta be, idia dekenai heabidae karana bona hariharibada karana ita hahedinaraia. (Roma 12:13) Nega ita atoa tadikaka taihu ita bamoa neganai, unai ese ita do ia durua idia bona Iehova ida iseda hetura karana ita hagoadaia. Danu, heabidae karana ita hahedinaraia neganai, ita be Iehova ita tohotohoa. w24.06 rau 12 par. 15-16

Iehova ese manau taudia dekenai hereva momokani ia hahedinaraia. (Mat. 11:25) Hereva momokani ita dibaia totona, mai manau ida heduru ita abia dae. (Kara 8:​30, 31) To, namona be ita naria namonamo, unai amo do ita hekokoroku lasi. Bema ta ia hekokoroku, do ia laloa Baibel ena sisiba bona orea amo ita abia hakaua herevadia amo, iena lalohadai danu be maoro. Manau karana ita hahedinaraia noho totona, namona be ita laloatao Iehova be ita taunimanima ia hereaia. (Sal. 8:​3, 4) Danu, Iehova ita guriguri henia, ita manau bona diba ita abia totona. Iehova ese ita do ia durua, iena lalohadai ita laloa bada totona, unai be Baibel bona ena orea amo ita dibaia. Emu Baibel duahiduahi lalonai, Iehova ese manau karana ia ura henia, to heagi, ladana abia isi, bona hekokoroku karadia ia inai henia dalana oi laloa. Bema orea lalonai maduna badana ta oi abia dainai, momo be oi idia matauraia, namona be oi gaukara goada manau karana oi hahedinaraia totona. w24.07 rau 10 par. 8-9

Hari inai negai danu, Iehova be iena taunimanima ia hakaua noho. Lagani 1919 amo, Iesu ese horoa taudia amo orea maragina ia gaukaralaia haroro gaukara ia gunalaia bona nega korikori ai Dirava ena hakaua herevadia ia halasia. (Luka 12:42) Ita itaia Iehova be unai orea ena gaukara ia hanamoa noho. (Isa. 65:​13, 14) Bema ita hegaegae namonamo lasi, Iesu ese ita dekenai ia henia gaukarana do ita hagugurua lasi. (Mat. 28:​19, 20) Hegeregere, bema tadikaka be kongrigeisen lalonai haroro gaukara ena teritori idia palanilaia lasi, reana ita ibounai be iseda ura gabudia ai do ita haroro. Reana teritori haida be ita karaia loulou to haida be ita do karaia lasi. Hegaegae namonamo karana dainai idia vara namo haida oi laloa, a? Iesu be tanobada ai ia noho neganai iena murinai idia raka taudia ia hakaua hegeregerena, hari danu Dirava ena taunimanima ia hakaua noho. w24.04 rau 8-9 par. 2-4

Kaino be Adamu bona Heva edia natuna ginigunana. Ia be ena tama sina amo kara dika karaia urana ia abia. Danu Baibel ia gwau: “Ena kara be dika.” (1 Ioa. 3:12) Reana unai dainai Kaino be boubou gauna ia henia neganai, Iehova ese “ia lalonamo henia lasi, bona ena boubou gauna ia abia dae lasi.” To Kaino be ena kara ia haidaua lasi, “ia badu dikadika bona ia lalometau.” Iehova be dahaka ia karaia? Kaino ia hereva henia. (Gen. 4:​3-7) Iehova be Kaino ia hereva henia namonamo, bona ia hamaoroa bema kara namo ia karaia, do ia hanamoa. Danu Kaino ia hadibaia bema ia badu noho kara dika do ia karaia. To, Kaino ia kamonai lasi. Ia ura lasi Iehova ese do ia durua ia helalo-kerehai totona. Ena be Kaino be Dirava ia kamonai henia lasi, to unai ese Iehova ia koua lasi ma haida ia durua idia helalo-kerehai totona. w24.08 rau 10 par. 8

Ia ese Israela besena ia hadibaia vaira negana ai gau namodia do idia vara. Iehova ese idia ia hanamoa dainai, idia totona ia gwauhamatalaia tanona ai idia mauri daudau diba. Unai be tano namona bona aniani momo gabuna! Mose be unai tano ia herevalaia, bona ia gwau: “Tano be mai ena siti badadia bona namodia, umui haginia lasi gaudia unai, bona edia ruma be gau namodia idauidau amo idia honu, umui haboua lasi gaudia unai, ranu guridia, umui geia lasi gaudia unai, bona vain uma bona olive audia, umui hadoa lasi gaudia unai.” (Deu. 6:​10, 11) Mose ese Israela taudia dekenai hadibaia hereva ia henia danu. Unai tano namona ai idia mauri noho totona, Iehova ena taravatu idia badinaia be namo. Mose ese idia ia hagoadaia ‘mauri do idia abia hidi,’ anina be Iehova do idia kamonai henia bona idia “badinaia” noho. (Deu. 30:20) To, Israela taudia ese Iehova idia dadaraia. Unai dainai, Asuria taudia ese idia tuari henia bona edia tano dekenai idia abidia lao. Bona gabeai, Babulonia taudia ese idia tuari henia danu bona edia tano dekenai idia abidia lao.—2 Ki. 17:​6-8, 13, 14; 2 Siv. 36:​15-17, 20. w24.11 rau 9 par. 5-6

Hari inai negai, taunimanima momo idia gwau Iesu idia abidadama henia bona ia idia gwauraia edia hamauria tauna. (Ioa. 6:29) To, taunimanima haida be matamanai Iesu idia abidadama henia bena gabeai ia idia rakatania. Dahaka dainai? Iesu ese ia ubua taudia momo be idia moale ia idia badinaia totona. Badina idia ura Iesu ese edia gorere do ia hanamoa, aniani do ia henia, eiava idia ura kamonai gaudia do ia hadibaia. To, Iesu ese ia hahedinaraia iena hahediba taudia momokanidia be gau haida idia karaia be namo. Ia be taunimanima edia ura gaudia henia totona tanobada dekenai ia mai lasi. Idia be Iesu ‘dekenai do idia lao’ anina be ia hadibaia gaudia ibounai idia abia dae bona badinaia be namo.—Ioa. 5:40. w24.12 rau 12 par. 12-13

Dahaka ese headava tauna ia durua diba dagedage bona hemataurai lasi karadia ia dadaraia totona? Ia gaukara goada Iesu ena haheitalai ia tohotohoa totona. Iesu ena hahediba taudia ia kara henia dalana be tau ese ia tohotohoa diba ena hahine ia kara henia totona. Iesu ese ena aposetolo taudia ia kara henia bona hereva henia dalana amo tau ese do ia dibaia gaudia haida mani ita herevalaia. Iesu be hanaihanai mai hemataurai ida ena aposetolo taudia ia kara henia. Bona nega ta idia ia kara auka eiava biagua auka lasi. Iesu be ena siahu ia gaukaralaia lasi ia idia gari henia eiava edia hemami ia hadikaia totona. To mai manau ida idia ia hesiai henia. (Ioa. 13:​12-17) Ena hahediba taudia dekenai ia gwau: “Lau dekenai diba umui abia, badina lau be manau bona lalomanada tauna, bona goada matamata do umui davaria.” (Mat. 11:​28-30) Laloatao, Iesu be manau tauna. Tau ta ia manau neganai, unai ese ia hahedinaraia lasi ia be goada lasi. Ia be sibona ia biagua diba. Ia badu neganai ena hemami ia biagua. w25.01 rau 10 par. 10-11

Inai nega oromana ena dokona ia kahirakahira noho dainai, moni ena hekwakwanai do ia bada ia lao. Politikol edia heiriheiri karadia, tuari, disasta, eiava idia hanaia gorere matamatadia ese moni ena hekwakwanai ia havaraia, eiava moni gaukara, kohu, bona ruma ita haboioa. Abia hidi ita karaia neganai, edena bamona do ita hahedinaraia Iehova ena imana dekenai ita tabekau? Gau badana be Iehova dekenai emu hekwakwanai ibounai oi gwauraia. Unai ese oi do ia durua bada. Ia oi noia aonega do ia henia abia hidi namodia oi karaia totona, bona gau haida dekenai oi “lalohekwarahi lasi” totona lalomaino do ia henia. (Luka 12:​29-31) Dirava oi noia oi do ia durua unai amo do oi laloa oi dekenai idia noho gaudia be hegeregere. (1 Tim. 6:​7, 8) Iseda pablikeisen ai tahua gaukara oi karaia, unai amo moni ena hekwakwanai negadia ai do oi karaia gaudia do oi diba. Momo be jw.org ai idia noho gaudia ese ia durua moni ena hekwakwanai idia hanaia totona. w25.03 rau 28-29 par. 10-11

Idau bese taudia be Dirava ena taunimanima ai do idia lao negana ia ginidae. Dirava ese aposetolo Petero ia abia hidi Korenelio dekenai ia haroro totona, ia be idau bese tauna ginigunana Keristani tauna ai ia lao totona. Iuda taudia be Idau Bese Taudia idia bamoa lasi, unai dainai Petero ese ena laloa dalana ia hamaoromaoroa be namo, unai amo idau taudia ia haroro henia diba. Petero be Dirava ena lalohadai idau bese taudia dekenai ia dibaia neganai, ena laloa dalana ia haidaua. Unai dainai Korenelio ese Petero ia noia ia do ia vadivadi henia neganai, Petero ia “daradara lasi.” (Kara 10:​28, 29) Ia ese Korenelio bona ena ruma bese ia haroro henia bona bapatiso idia abia. (Kara 10:​21-23, 34, 35, 44-48) Lagani haida murinai, Petero ese Keristani taudia ia hagoadaia “mai lalotamona ida” do idia noho totona. (1 Pet. 3:8) Iseda tadikaka taihu ida lalotamona ai ita noho diba, bema Iehova ena laloa dalana ita badinaia, unai be Baibel amo ita dibaia gaudia. w25.03 rau 9-10 par. 7-8

Tanobada taudia edia kara bona lalohadai be ia dika momokani, badina Iehova ena laloa dalana idia badinaia lasi. (Aon. 17:15) Unai dainai lalohadai kereredia ita diba bona dadaraia be mai anina bada. Namo lasi iseda inai taudia ese ita idia koia, Iehova hesiai henia karana ita rakatania totona. Aposetolo Paulo ese Heberu Keristani taudia ia hamaoroa, do idia hekwarahi noho lo taudia ai idia lao totona, bona ita danu unai bamona ita karaia be namo. Anina be Baibel ita stadilaia, unai amo Iehova do ita dibaia bona ena lalohadai do ita lalopararalaia. Ena be iseda mauri ita gwauhamatalaia bona ita bapatiso vadaeni, to unai ita karaia noho be namo. Ena be nega daudau hereva momokani lalonai ita noho, to hanaihanai Dirava ena hereva ita duahia bona stadilaia be namo. (Sal. 1:2) Hanaihanai Baibel ita stadilaia neganai, unai ese iseda abidadama do ia hagoadaia. Paulo ese Heberu Keristani taudia ia hamaoroa unai kara idia hahedinaraia totona.—Heb. 11:​1, 6. w24.09 rau 10 par. 7-8

Bema Iehova ida iseda hetura karana ia goada, do ia auka lasi ia ita abidadama henia noho totona. Iosepa dekenai unai ia vara. Ia be mai gari lasi ida matabodaga karana ia dadaraia. Ia dekenai Dirava be taunimanima korikorina ta bamona ia laloa bona ia ura lasi ena lalona ia hahisia. (Gen. 39:9) Iehova ida iseda hetura karana ia goada totona, namona be nega ita atoa ia ita guriguri henia bona iena Hereva ita stadilaia. Iosepa bamona Iehova ida iseda hetura karana ia goada neganai, do ita ura lasi gau ta ita karaia iena lalona ita hahisia totona. Bema haida idia laloaboio Iehova be mauri Diravana, do ia auka lasi ia idia rakatania totona. Taunimanima idia noho lasi gabuna ai, Israela taudia dekenai ia vara gauna mani ita laloa. Idia diba Iehova ia noho, to idia daradara bema edia dabu gaudia do ia henia. (Eso. 17:​2, 7) Unai dainai, Dirava idia gwau-edeede henia. Momokani, ita ura lasi edia haheitalai dikana ita tohotohoa.—Heberu 3:12. w24.06 rau 24 par. 14-15

Ita be nega ena dokona ai ita noho dainai, ita be hekwakwanai momo do ita davaria bona do ita hisihisi bona taitai. Iehova be iseda mata ranu ia itaia bona ia hebogahisi. Ia ese iseda mata ranu ia laloa bada. Unai dainai hekwakwanai ita davaria neganai, ita ura Iehova dekenai iseda lalometau ibounai ita gurigurilaia. Namona be iseda tadikaka bona taihu kahirakahira ita noho. Danu hanaihanai Baibel ita duahia karana amo goada do ita abia. Ita diba, bema mai abidadama ida ita haheauka noho, Iehova be ita dekenai ahuna namona do ia henia. Bona ia gwauhamata hegeregerena, nega vaira ai mase, ta ese ita ia hahisia eiava lalometau dainai idia vara mata ranu ibounai do ia dahua ore. (Apok. 21:4) Unai nega ai moale ena mata ranu sibona do ia diho. w24.12 rau 20 par. 3; rau 25 par. 19

Iehova ese ita ia abia hidi ena Witnes taudia ai ita lao, bona ia gwauhamata ita dekenai goada do ia henia. (Isa. 43:​10, 11) Mani ita ia hagoadaia daladia foa ita laloa. Ginigunana be, sivarai namona ita harorolaia neganai, Iesu be ita ida ia noho. (Mat. 28:​18-20) Iharuana be, Iehova ese aneru ia abia hidi ita idia durua totona. (Apok. 14:6) Ihatoina be, Iehova ese ena lauma helaga amo ita ia durua ita dibaia gaudia ita laloatao totona. (Ioa. 14:​25, 26) Ihahanina be, Iehova ese tadikaka bona taihu ia henia ita idia bamoa totona. Iehova bona tadikaka taihu edia heduru amo goada do ita abia sivarai namona do ita harorolaia noho. To taunimanima be edia ruma ai oi davaria lasi neganai, oi lalohisihisi, sibona oi nanadaia: ‘Egu teritori ai idia noho taudia be edeseniai do lau davaria?’ (Kara 16:13) ‘Idia be gaukara gabunai eiava sitoa dekenai idia noho, a?’ Bema unai bamona, oi laloa dala haroro amo taunimanima momo do oi davaria, a? w24.04 rau 17 par. 10-11

Bema oi be headava tadikaka bona oi ura elda tauna ai oi lao, namona be ma haida dekenai emu ruma bese be haheitalai namona. Unai dainai, ‘dala maorona ai emu ruma bese oi naria.’ Unai ena anina be, mai lalokau ida emu ruma bese oi naria bona idia totona abia hidi namodia oi karaia. Emu ruma bese tomadiho oi karaia, Keristani heboudia dekenai umui lao, bona idia oi durua haroro gaukara idia karaia totona. Bema oi be tamana ta, namona be ‘emu natudia be idia laloa namonamo bona oi henunai idia noho.’ (1 Tim. 3:4) Namona be mai lalokau ida emu natudia oi hadibaia. Momokani, natudia ma haida bamona mai moale ida idia kiri, bona idia gadara. To idia oi hadibaia namonamo dainai, hereva do idia kamonai, idia hemataurai, bona kara namodia idia hahedinaraia. Danu namona be oi hekwarahi emu natudia oi durua Iehova ida edia hetura karana idia hagoadaia, Baibel ena hakaua herevadia idia badinaia, bona tahua gauna idia atoa idia bapatiso totona. w24.11 rau 22 par. 10-11

Iehova dekenai iseda hesiai gaukara ita habadaia neganai, iena heduru do ita mamia bona unai ese iseda abidadama ia dekenai do ia hagoadaia. (1 Kor. 3:9) Laloatao, Iehova be ia totona oi karaia gaudia be ma haida ida ia hahegeregerea lasi; to ia ese emu kudouna ai ia noho gauna ia itaia. Iehova ia moale, bema ia itaia oi be mai kudouna ibounai ida ia henia harihari gauna, mauri davana oi laloa bada. (1 Sam. 16:7; Mar. 12:​41-44) Mauri davana sibona ese dala ia kehoa Iehova ese iseda dika ia gwauatao, ia ita tura henia, bona mauri hanaihanai ita abia diba. Iehova be ita ia lalokau henia dainai, unai hahenamo ibounai ia henia. Unai dainai hanaihanai ia dekenai iseda tanikiu karana ita hahedinaraia. (1 Ioa. 4:19) Danu namona be Iesu dekenai iseda tanikiu karana ita hahedinaraia, badina ita ia lalokau henia bada dainai ita totona ia mase! w25.01 rau 31 par. 16-18

Mani Salamo 73 ia torea tauna ena hemami oi laloa. Ia itaia, haida be Iehova idia hesiai henia lasi, to edia helt ia namo, taga maurina idia noholaia, bona hekwakwanai momo idia davaria lasi. (Sal. 73:​3-5, 12) Ia itaia, edia mauri be ia namo dainai, ia mamia Iehova ena hesiai gaukara lalonai ena hekwarahi be anina lasi. Unai lalohadai kererena ia abia dainai, “dina ibounai ena lalona ia hisihisi noho.” (Sal. 73:​13, 14) Unai dainai dahaka ia karaia? Salamo torea tauna be Iehova ena dubu helaga dekenai ia lao. (Sal. 73:​16-18) Unuseniai, Iehova ena taunimanima huanai lalomaino ia abia. Ia laloparara ena be haida be mauri namona idia noholaia, to idia dekenai vaira nega ena helaro be lasi. Unai dainai, ia abia lalohadai kererena ia dadaraia bona ia abia dae, Iehova hesiai henia karana be abia hidi hereadaena. Bona ena lalona ia hadaia Iehova ia hesiai henia noho totona.—Sal. 73:​23-28. w24.10 rau 27 par. 11-12

Iehova ese ita ia abia hidi iena “hereva hamomokania taudia” ai ita lao totona. (Isa. 43:​10-12) Lagani haida gunanai, Hakaua Oreana ena revareva ta ia gwau: “Ita moalelaia hahenamo badana be taunimanima ese ita idia gwauraia Iehova ena Witnes taudia.” Dahaka dainai unai be momokani? Mani oi laloa haida idia gwau, oi be kerere ta oi karaia. Unai dainai ta do oi abia hidi unai taudia ia hamaoroa, oi totona idia gwauraia herevadia be koikoi, oi be taunimanima namona bona unai bamona do oi karaia lasi. Daika do oi abia hidi? Momokani, oi trast bona ladana namona tauna ta do oi abia hidi, unai amo haida ese ena hereva do idia abia dae. Unai hegeregerena Iehova be ita ia trast bona diba namonamo dainai ita ia abia hidi iena Witnes taudia ai ita lao totona, bona ia diba taunimanima dekenai do ita hahedinaraia ia be Dirava momokanina. Iena Witnes taudia ai ita lao be hahenamo badana bona dala idauidau ai iena ladana ita gwauraia hedinarai bona ma haida ita hamaoroa ia totona idia gwauraia herevadia be koikoi. Unai ita karaia neganai, ita hahedinaraia ita be Iehova ena Witnes taudia!—Roma 10:​13-15. w24.05 rau 18 par. 13

Iesu be haida ia hesiai dainai ia moale bada. Nega ta Iesu ese taunimanima dekenai Dirava ia herevalaia sibona lasi, to edia dabu gaudia ia henia. Ia ese hoa dalanai aniani ia haboua bena ena hahediba taudia ia hamaoroa, taunimanima dekenai idia haria totona. (Mar. 6:41) Unai amo, ena hahediba taudia dekenai ma haida hesiai henia dalana ia hadibaia. Danu, idia dekenai ia hahedinaraia unai bamona gaukara be mai anina bada. Mani oi laloa aposetolo taudia be idia moale bada Iesu ida idia gaukara hebou. Bona hoa dalanai taunimanima dekenai aniani idia haria ela bona “ibounai idia aniani bona idia bogakunu”! (Mar. 6:42) Unai be Iesu ese ma haida edia namo ia atoa guna ena haheitalai namona ta. Ena tanobada maurina ibounai lalonai ia be taunimanima ia hesiai henia. (Mat. 4:23) Iesu be ma haida ia hadibaia bona edia dabu gaudia ia henia dainai ia moale. w24.11 rau 16 par. 10-11

“Dina gabedia ai” mauri ia auka ia lao noho dainai, dala momo do ia kehoa ta ta ita durua totona. Danu, idia ita hagoadaia bona idia dekenai lalokau ita hahedinaraia diba. Unai ita karaia dalana ta be Kingdom Hall dekenai idia mai neganai, idia ita welkam henia. Unai dainai iseda tadikaka taihu be hebou totona idia mai neganai, ita ura idia ita hagoadaia bona ita hahedinaraia idia ita lalokau henia. Elda taudia ese hekwakwanai idia davaria tadikaka bona taihu idia durua diba. Disasta eiava medikol heduru totona, elda taudia be karaharaga dala idia tahua heduru idia henia totona. Danu, Baibel amo hakaua herevadia idia henia bona idia hagoadaia. Tadikaka bona taihu be elda ta idia hereva henia diba, bema idia mamia idia do ia hereva henia namonamo, mai ura ida idia do ia kamonai henia bona edia hemami ia lalopararalaia. Unai bamona karadia ese ma haida ia durua bona idia mamia ma ta be idia ia laloa bada, unai dainai elda ta be Baibel amo hakaua herevadia ia henia neganai, do ia auka lasi idia badinaia totona.—1 Tes. 2:​7, 8, 11. w24.06 rau 29 par. 12-13

Namo lasi ita laloa Dirava be siahu ibounai Diravana dainai ia be hemami lasi! Ia ese ita ia havaraia neganai, hemami ia atoa bona ita be ena toana hegeregerena ia karaia, unai dainai ita diba Iehova be mai ena hemami. Baibel ia gwau, Dirava ena “lalona idia hahisia.” (Sal. 78:​40, 41) Iehova ia itaia ena Natuna be kerere tauna ta bamona taunimanima ese idia hahisia neganai, ia lalohisihisi bada! Mauri davana ese ita ia hadibaia Iehova ese ita ia lalokau henia karana be, iseda varavara bona turadia edia lalokau ia hereaia. (Roma 8:​32, 38, 39) Ita diba momokani, Iehova ese ita ia lalokau henia bada bona unai ese ita sibona ita lalokau henia karana ia hereaia. Oi ura oi mauri hanaihanai, a? Iehova ia ura do oi mauri hanaihanai. Oi ura emu kara dika ia gwauatao, a? Iehova ia ura unai ia karaia. Ita amo ia noia gauna be ia henia harihari gauna do ita abia dae, anina be ia do ita abidadama henia bona ita badinaia. Iehova ese ia henia mauri davana ese ia hahedinaraia ita ia lalokau henia bada.—Had. 3:11. w25.01 rau 22-23 par. 8-9

Nega haida ita itaia, kamonai bona mamia gaudia hegeregerena abia hidi ita karaia. To ita itaia bona kamonai gaudia be nega haida ita idia koia diba, bona Iehova ese ia ura henia lasi gauna ta ita karaia diba. (Had. 11:9; Mat. 24:​37-39) To abidadama amo ita raka neganai, “Lohiabada ese ia abia dae” gaudia hegeregerena abia hidi do ita karaia. Dirava ena sisiba ita badinaia neganai, ia ese lalomaino do ia henia bona do ita moale. (Sal. 16:​8, 9; Isa. 48:​17, 18) Bona abidadama amo ita raka noho neganai, vaira nega ai mauri hanaihanai do ita abia. (2 Kor. 4:18) Edena bamona do ita diba bema ita be abidadama amo ita raka eiava ita itaia gaudia amo ita raka? Inai henanadai ita laloa diba: Dahaka gaudia amo abia hidi lau karaia? Abia hidi ita karaia neganai, ita itaia gaudia sibona ese ita idia hakaua, a? Eiava Iehova ita abidadama henia bona ena sisiba ese ita ia hakaua, a? w25.03 rau 20-21 par. 3-4

Ita ta ta be mai iseda maduna ma haida ita durua, Iehova idia tomadiho henia totona. Unai ita karaia totona, namona be Iehova ita tohotohoa. Ia be taunimanima ia doria lasi ena orea lalonai idia vareai totona. To, mai lalokau ida ta ia “veria mai” ia dekenai. (Ioa. 6:44; Ier. 31:3) Kudou-maoro taudia be Iehova ena lalokau bona kara namodia idia dibaia neganai, ia kahirakahira idia lao. Edena dala ai, iseda kara namodia amo taunimanima ita veria mai diba Iehova idia tomadiho henia totona? Dala ta be, iseda tadikaka taihu dekenai lalokau bona kara namodia ita hahedinaraia. Kamonai taudia be iseda kongrigeisen heboudia dekenai idia mai neganai, ita ura idia danu be guna Korinto dekenai hebou idia lao kamonai taudia bamona idia mamia. Idia gwau: “Momokani, Dirava be umui huanai ia noho.” (1 Kor. 14:​24, 25; Sek. 8:23) Unai dainai, hari dina siri ena sisiba herevana ita badinaia noho be namo. w24.04 rau 23-24 par. 16-17