October

Nega momo elda taudia, sekit naria taudia, brens ofesi, eiava Hakaua Oreana amo hakaua herevadia ita abia unai ese ita ia durua Iehova ita hesiai henia totona. To bema ita abia hakaua herevana ita lalopararalaia lasi, dahaka do ita karaia? Reana do ita daradara bema unai hakaua herevana ese namo do ia havaraia eiava lasi. Danu unai hakaua hereva idia henia tadikaka edia kerere do ita laloa matamaia. Abidadama amo ita raka neganai, ita abia dae Iehova ese ena orea ia hakaua noho bona iseda mauri ai idia vara gaudia ia diba. Unai dainai, lalohadai maorona bona hakaua herevadia ita badinaia haraga. (Heb. 13:17) Ita laloparara, hakaua herevadia ita badinaia neganai, unai ese kongrigeisen lalonai lalotamona ia havaraia. (Efe. 4:​2, 3) Ita abia dae ena be ita idia hakaua tadikaka be goevadae lasi, to Iehova be iseda badinaia karana do ia hanamoa. (1 Sam. 15:22) Danu bema ita laloa hakaua dalana ta idia haidaua be namo, namona be ita abia dae Iehova be ena nega korikori ai unai do ia hamaoromaoroa. w25.03 rau 23-24 par. 13-14

Ita be mai anina bada negana lalonai ita noho! Dina ta ta ai, ita itaia Baibel ena peroveta herevadia idia guguru. Hegeregere ita itaia, “not kahana ena king” bona “saut kahana ena king” be ta ta idia doria lao mai, badina idia ta ia ura tanobada ia lohiaia. (Dan. 11:​40, ftn.) Ita itaia Dirava ena taunimanima ese Basileia ena sivarai namona be tanobada ibounai dekenai idia harorolaia bona taunimanima milioni momo be unai sivarai namona idia abia dae. (Isa. 60:22; Mat. 24:14) Bona ita be “nega korikori ai” orea ese ia halasia gaudia momo ita abia. (Mat. 24:​45-47) Iehova be ita ia durua noho, kahirakahira do idia vara mai anina bada gaudia ita lalopararalaia totona. (Aon. 4:18) Ita abia dae diba hisihisi badana ia matamaia neganai, ita do ia durua gaudia do ita dibaia, unai amo mai abidadama ida do ita haheauka bona unai nega aukana lalonai Iehova ita hesiai henia noho. To namona be ita laloparara vaira negai do idia vara gaudia haida be ita diba lasi. w24.05 rau 8 par. 1-2

Salamo torea tauna ese ma haida edia ladana hadikaia karana ia herevalaia. Ladana hadikaia karana ena anina be dahaka? Unai be koikoi herevadia amo ta ena ladana ita hadikaia. Salamo 15:3 ese ita ia hadibaia Iehova ese ia boiria tauna be ena dekena tauna dekenai kara dikana ta ia karaia lasi bona ena turadia ia gwauraia dika lasi. (Sal. 15:1) Edena dala ai iseda turadia do ita gwauraia dika? Ita laloa lasi dalanai, ma ta ita herevalaia neganai, ia ita gwauraia dika. Hegeregere: (1) taihu ta be ena painia gaukara ia hadokoa, (2) headava tau bona hahine ta be Betele ai edia hesiai gaukara idia hadokoa, eiava (3) tadikaka ta be elda o hesiai gaukara ena maduna ia rakatania. Namo lasi tadikaka taihu ita hamaoroa unai taudia be reana kerere ta idia karaia dainai, edia hesiai gaukara idia hadokoa. Ita diba lasi reana badina haida dainai unai senisi idia vara. Danu, Iehova ena palai ruma ai ia noho tauna be “ena dekena tauna dekenai kara dikana ta ia karaia lasi, bona ena turadia ia gwauraia dika lasi.” w24.06 rau 11 par. 11-13

Iehova gari henia karana ita hagoadaia totona, namona be ita karaia abia hidi dekenai ia ita hamoalea. Baibel sivaraidia oi duahia neganai, sibona oi nandaia, ‘Bema lau dekenai unai ia vara, dahaka abia hidi do lau karaia?’ Hegeregere, sibona oi piksaia, Israela ena gunalaia taudia 10 be Iehova ese ia gwauhamatalaia tanona idia itaia murinai, idia mai bona hagaria herevadia idia gwauraia neganai, oi kamonai noho. Edia hereva do oi abia dae bona taunimanima do oi gari henia, eiava Iehova do oi lalokau henia bona ia do oi hamoalea, a? Israela taudia ibounai be idia abia dae lasi, Iosua bona Kaleba be hereva momokani idia gwauraia. Unai dainai, Gwauhamata Tanona dekenai idia vareai lasi.—Num. 14:​10, 22, 23. w24.07 rau 10 par. 7

Gomere ia heudahanai murinai, tatau ma haida totona peroveta tauna Hosea ia rakatania. Ena kara do ia haidaua diba, a? Iehova be ta ena kudouna ia diba dainai, Hosea ia hamaoroa: “Oi lao, bona tau ma ta ese ia ura henia bona ia heudahanai hahine oi ura henia lou. Lau, Iehova, ese Israela taudia lau ura henia hegeregerena, herevana idia be dirava ma haida idia ura henia.” (Hos. 3:1; Aon. 16:2) Hosea ena adavana be kara dika badana ia do karaia noho. To, Iehova ese Hosea ia hamaoroa ena adavana ena dika do ia gwauatao bona ia do ia abia dae lou. Unai hegeregerena, Iehova be ena taunimanima dekenai ia hesiku haraga lasi. Ena be kara dika badadia idia karaia noho, to idia ia do lalokau henia bona idia ia durua idia helalo-kerehai bona edia kara idia haidaua totona. Unai haheitalai ese ia hahedinaraia Iehova be taunimanima ia diba namonamo, bona ia ura ta do ia durua ia helalo-kerehai totona, ena be kara dika badadia ia karaia noho. w24.08 rau 10 par. 7

Keristani taudia ginigunadia ai idia lao Iuda taudia be senisi badadia idia karaia be namo, bona unai be mai ena hekwarahi. Guna, Iuda taudia be Iehova ese ia abia hidi besena. Lagani momo lalonai Ierusalema be mai anina bada gabuna, badina Iehova ese ia abia hidi King be unuseniai ia lohia. Bona tomadiho goevana be unuseni ia noho. Abidadama Iuda taudia ibounai ese Mose ena Taravatu idia badinaia, edia dubu gunalaia taudia ese idia hadibaia hegeregerena. Bona idia ania gaudia, kopina utua karana, bona idau bese taudia kara henia dalana totona taravatu idia atoa. To Iesu ia mase murinai, Iehova ese Iuda taudia edia boubou karadia ia abia dae lasi. Unai dainai Iuda taudia dekenai ia auka, idia badinaia Taravatu idia rakatania totona. (Heb. 10:​1, 4, 10) Danu lo Keristani taudia, hegeregere aposetolo Petero, be ia hekwarahi unai dala matamatana ia badinaia totona. (Kara 10:​9-14; Gal. 2:​11-14) Keristani taudia be unai dala matamatana idia badinaia dainai, Iuda ena dubu gunalaia taudia ese idia dagedage henidia. w24.09 rau 9 par. 4

Iehova ese ena taunimanima dekenai gaukara ia henia neganai, ia ura unai idia karaia namonamo. (1 Kor. 14:33) Hegeregere, Dirava ena ura be tanobada ibounai dekenai sivarai namona do idia harorolaia. (Mat. 24:14) Iehova ese Iesu ia abia hidi unai gaukara ia gunalaia totona. Bona Iesu ia ura unai gaukara be dala maorona ai do idia karaia. Aposetolo taudia edia negai, gabu idauidau ai kongrigeisen idia haginia neganai, elda taudia idia abia hidi hakaua herevadia idia henia bona taunimanima idia hakaua totona. (Kara 14:23) Ierusalema ai ia noho elda oreana, unai be aposetolo taudia bona tau badadia, ese abia hidi haida idia karaia bona kongrigeisen ibounai ese unai idia badinaia be namo. (Kara 15:2; 16:4) Tadikaka taihu be unai hakaua herevadia idia badinaia dainai, “kongrigeisen taudia edia abidadama ia goada ia lao bona dina ta ta ai edia namba ia bada daekau.”—Kara 16:5. w24.04 rau 8 par. 1

Nisan 16 ena daba kahana ai, abidadama hahinedia haida be Iesu ena guria gabuna dekenai idia lao. (Luka 24:​1, 10) Idia ta be, Maria Magadala. Ia be guria gabuna dekenai ia ginidae neganai, Iesu ena tauanina be ia noho lasi. Unai dainai ia lao bona Petero bona Ioane ia hamaoroa bena idia ida guria gabuna dekenai idia heau lao. Tatau rua be unai idia hamomokania murinai, edia ruma dekenai idia giroa lou. To Maria be ia giroa lou lasi, bona unuseniai ia taitai noho. To Iesu be unuseniai ia noho bona Maria ia itaia noho. Ia itaia unai abidadama hahinena ia taitai noho bona ia hebogahisi henia. Unai dainai, Maria dekenai ia hedinarai bona ia hamaoroa do ia lao bona Iesu ena tadikakadia dekenai mai anina bada sivaraina ta do ia gwauraia. Unai be, Iesu ia toreisi lou vadaeni. Unai ese Maria ia hagoadaia bada.—Ioa. 20:​17, 18. w24.10 rau 13 par. 7

Mose ese ia karaia gaukaradia haida be peroveta gaukara, diadi, tuari biaguna bona toretore tauna. Ia ese Israela besena be Aigupito amo ia hakaua raka-lasi. Bona ia ese Iehova ena hoa karadia momo ia itaia. Iehova ese Mose ia gaukaralaia Baibel ena buka ginigunadia 5, Salamo 90, bona reana Salamo 91 ia torea totona. Danu, ia ese Iobu bukana ia torea. Mose ena mauri lagani be 120, bona kahirakahira do ia mase neganai, ia ese Israela taudia ibounai ia haboua, bona Iehova ese guna idia totona ia karaia gaudia ia hadibaia lou. Idia be Iehova ese ia karaia toa, hoa karadia bona Aigupito taudia ia panisia dalana idia itaia. (Eso. 7:4) Idia be Iehova ese ia hapararaia Davara Kakakakana amo idia raka hanai, bona Iehova ese Farao bona ena tuari taudia ibounai ia hamasea karana idia itaia. (Eso. 14:​29-31) Taunimanima lasi gabuna ai, Iehova ese idia ia gimaia bona ia naria dalana idia itaia. (Deu. 8:​3, 4) Idia be kahirakahira Gwauhamata Tanona dekenai do idia vareai, unai dainai Mose ia do mase lasi neganai, ia ura idia do ia hagoadaia. w24.11 rau 8-9 par. 3-4

Iesu be Lohiabada Ena Anibou negana ai ia gwauraia herevana be orea maragi taudia sibona ia herevalaia. Lagani 32 C.E. ai, Iesu ese Galilea ai ia hereva henia taudia momo be aniani sibona idia ura. To Iesu ia ura idia dekenai aniani ia hereaia mai anina bada gauna ta ia hadibaia. Unai ese idia dekenai mauri hanaihanai ia henia diba. Bona Iesu ia gwau idia mase vadaeni taudia be dina dokona ai do idia toreisi lou bona mauri hanaihanai do idia abia. Ia be Lohiabada Ena Anibou ai ia gwauraia gauna, orea maragina ese do idia abia hahenamo ia herevalaia lasi. To Galilea ai ia gwauraia gauna be taunimanima ibounai ese idia abia diba. w24.12 rau 11 par. 10-11

Iehova ese dagedage tauna ia badu henia. (Sal. 11:5) Tau ese ena adavana ia dagedage henia neganai, Iehova do ia moale lasi. (Mal. 2:16) Bema tau ese ena adavana ia kara namo henia lasi, unai ese ena hetura karana Dirava ida ia hadikaia diba. Danu, Iehova ese ena guriguri do ia kamonai henia lasi. (1 Pet. 3:7) Tatau haida be edia adavadia dekenai mai badu ida idia hereva bona lalona hahisia herevadia idia gwauraia. Iehova be “badu, badu dikadika, boiboi badabada, bona hadikaia herevadia ia inai henia.” (Efe. 4:​31, 32) Tau ta ese ena adavana ia hereva auka henia neganai, unai ese ena headava ia hadikaia sibona lasi, to ena hetura karana Dirava ida ia hadikaia danu. (Iam. 1:26) Danu ponografi ia itaia tauna ese ena hetura karana Iehova ida ia hadikaia bona ena adavana ia matauraia lasi. Iehova ia ura headava tau be ena kara bona lalohadai amo, ena hahine sibona dekenai lalokau do ia hahedinaraia. Iesu ia gwau bema tau ta be mai ura ida hahine ma ta ia raraia noho, ia be ena “kudouna ai” ia heudahanai vadaeni.—Mat. 5:​28, 29. w25.01 rau 9 par. 6-8

Baibel ia gwau, Iehova ese ena hesiai taudia ia gwauraia maoromaoro, ena anina be iseda kara dika ia kokia momokani. Ena be Iehova ese unai ia karaia, to ena kara maoromaoro taravatudia ia badinaia. Iehova be iseda kara namodia dainai ita ia gwauraia maoromaoro lasi. Danu, ia be kara dika ia abia dae lasi. To, Iehova be mai ura ida iseda kara dika ia gwauatao, badina Ia bona Iesu ese idia henia mauri davana ita abidadama henia. (Roma 3:24) Iehova ese ita ia gwauraia maoromaoro neganai, dahaka namo ita davaria? Iesu ese ia gwauraia maoromaoro taudia haida be ia ida guba dekenai do idia lohia bona Dirava ena natudia ai do idia lao. (Tito 3:7; 1 Ioa. 3:1) Edia kara dika ia gwauatao. Unai be hegeregere kara dika ta idia karaia lasi, unai dainai idia hegeregere, Basileia lalonai idia noho totona. (Roma 8:​1, 2, 30) Bona Iehova ese ia gwauraia maoromaoro taudia ma haida be, tanobada ai do idia noho hanaihanai. Iehova ese edia dika ia gwauatao bona ena turana ai idia lao.—Iam. 2:​21-23. w25.02 rau 5 par. 17; rau 7 par. 18

Mani aposetolo Petero ese Iehova ena laloa dalana ia badinaia lasi negana ta ita laloa. Iesu ese ena aposetolo taudia ia hamaoroa, ia be Ierusalema dekenai do ia lao bona dubu gunalaia taudia ese do idia hahisia bada bona do idia hamasea. (Mat. 16:21) Petero ia diba Iesu be gwauhamata Mesiana, ia ese Dirava ena taunimanima do ia hamauria, unai dainai ia abia dae lasi Iesu do idia hamasea karana be Iehova ese do ia koua lasi. (Mat. 16:16) Unai dainai Petero ese Iesu ia hakaua siri bona ia gwau: “Lohiabada e, oi sibona oi hebogahisi henia. Oi dekenai unai do ia vara lasi.” (Mat. 16:22) Iesu be Petero ena lalohadai dekenai ia lalotamona lasi, badina Petero be Iehova ena laloa dalana ia badinaia lasi. Iesu ia diba Iehova ena ura ia badinaia totona hisihisi do ia davaria bona do ia mase. Reana Petero be badina namodia haida dainai ia hereva, to Iesu ese ena sisiba ia dadaraia. Unai amo Petero ia dibaia gauna be, Dirava ena laloa dalana ia abia dae be namo. Ita danu be unai amo mai anina bada gauna ta ita dibaia. w25.03 rau 9 par. 5-6

Oi lalometau badina oi trast henia tauna ta ese emu lalona ia hahisia eiava oi ia koia, a? Ena be ta ese oi ia kara namo henia lasi, to emu guba Tamana be oi ia lalokau henia bada. Ta ese iseda lalona ia hahisia neganai, hari dina ena siri ai Davida ena hagoadaia herevadia ese ita idia durua diba. Buka ta ia gwau “daradoko taudia” be “idia laloa edia mauri be anina lasi taudia” ia herevalaia. Lalohisihisi dainai unai bamona idia mamia taudia dekenai, Iehova be dahaka ia karaia? Tama o sina ese ia tai noho natuna ia rosia bona ia durua bamona, Iehova be ita “kahirakahira ia noho” bona ita lalohisihisi neganai ia be mai hebogahisi ida ita do ia durua haraga. Ia ura ita ia hagoadaia bona iseda lalona ia hanamoa. Bona ita dekenai gau momo ia henia, unai ese ita idia hagoadaia ita davaria hahetoho ita haheaukalaia totona.—Isa. 65:17. w24. 12 rau 23 par. 13-14

Hari, namona be Elda taudia idia diba, Iehova be edia gaukara namona ia itaia bona laloa bada. Elda taudia be mamoe vadivadi, hadibaia gaukara, bona haroro gaukara idia durua, to unai sibona lasi, idia haida be konstraksen gaukara bona disasta idia vara neganai heduru idia henia danu. Haida be Gorere Taudia Vadivadi Henia Grup eiava Hospital Liesen Komiti idia durua. Elda taudia idia diba kongrigeisen ena biaguna be Iehova. Kongrigeisen ai idia gaukara goada bona idia abia dae momokani Dirava ese idia dekenai davana namona do ia henia. (Kol. 3:​23, 24) Haida sibona be elda gaukara idia karaia. To ita ibounai ese Iehova dekenai gau ta ita henia diba. Mai kudouna ibounai ida ia ita hesiai henia neganai ia moale bada. Tanobada ibounai gaukarana durua totona, ita atoa kontribiusen ia itaia, ena be moni sisina ita atoa. Bona ita idia habadua taudia edia dika ita gwauatao neganai ia moale. Namona be oi abia dae oi karaia gaudia ia laloa bada. Ia be oi ia lalokau henia, bona oi dekenai davana namona do ia henia.—Luka 21:​1-4. w24.06 rau 23 par. 12-13

Inai sivarai ese ia hahedinaraia, Iehova idia tomadiho henia taudia be hedibagani idia davaria bona kara dika idia karaia diba. Reana ta be kara dika badana ta ia karaia murinai, do ia mamia gau ibounai idia vara haraga. Eiava reana do ia gwau, “Lau laloa lasi unai do ia vara.” To bema ia vara gauna ia laloa namonamo, do ia laloparara ia be abia hidi kereredia ia karaia dainai, kara dika badana ia karaia. Reana ia be Iehova idia tura henia lasi taudia ia bamoa, moale kererena ia abia hidi, bona gabu eiava websait kereredia dekenai ia lao. Danu reana guriguri karana, Baibel duahiduahi, hebou lao henia karana, eiava haroro gaukara ia hadokoa. Aonega Herevadia bukana ese ia herevalaia mero matamata bamona, ia be kara dika ia karaia haraga lasi, to abia hidi kereredia ia karaia murinai, kara dika badana ia karaia. Dahaka ita dibaia? Kara dika ita dadaraia sibona lasi, to ita idia hakaua dala kereredia ita dadaraia be namo. Solomona ese mero matamata bona matabodaga hahinena dekenai ia vara gauna ia herevalaia murinai, inai sisiba ia henia.—Mat. 5:​29, 30. w24.07 rau 16 par. 10-11

Unai dava bada gauna be dahaka? Ia be Basileia sivaraina, taunimanima hamauria gaukarana. (2 Kor. 4:1) Bona unai hodu be dahaka? Unai be Dirava ena hesiai taudia ia laulaulaia, idia be ma haida dekenai sivarai namona idia harorolaia. Paulo ena nega ai, hoihoi taudia be hodu idia gaukaralaia mai anina bada gaudia, hegeregere aniani, wain bona moni idia udaia bena idia abia lao. Unai hegeregerena, Iehova ese ita dekenai mai anina bada sivarai namona ia henia. Iehova ena heduru amo mai goada ida unai sivarai namona ita harorolaia noho diba. Nega haida haroro gaukara ai, taunimanima dekenai do ita gari. Edena dala ai unai manoka gauna ita hanaia diba? Aposetolo taudia idia oda henia do idia guriguri lasi neganai, idia gwauraia guriguri mani ita laloa. Iehova idia noia idia do ia durua, mai gari lasi ida idia haroro totona. Karaharaga, Iehova ese edia guriguri ia haerelaia. (Kara 4:​18, 29, 31) Bema nega haida taunimanima oi gari henia, Iehova oi noia taunimanima dekenai emu lalokau ia habadaia, unai amo idia dekenai sivarai namona oi harorolaia diba. w24.04 rau 16 par. 8-9

Iehova ita lalokau henia dainai iena ladana ita hahelagaia. Unai ena anina be ita ura ma haida ita hadibaia Satani ese Iehova totona ia gwauraia herevadia be koikoi. (Gen. 3:​1-5; Iobu 2:4; Ioa. 8:44) Haroro gaukara ai, kamonai taudia dekenai iseda Dirava totona hereva momokani ita gwauraia. Ita ura taunimanima ibounai idia diba Iehova ena kara badana be lalokau, iena lohia dalana be maoromaoro bona momokani, bona ena Basileia ese kahirakahira hisihisi ibounai do ia haorea, bona taunimanima dekenai maino bona moale korikori do ia havaraia. (Sal. 37:​10, 11, 29; 1 Ioa. 4:8) Taunimanima dekenai unai gaudia ita gwauraia neganai, Iehova ena ladana ita hahelagaia. Danu ita moale badina unai bamona ita karaia neganai, ita hahedinaraia ita be Iehova ena Witnes taudia. w24.05 rau 18 par. 12

Tadikaka e, emu turadia eiava ma haida dekenai kara namodia oi karaia neganai, oi be “heabidae karana” oi hahedinaraia. (1 Pet. 4:9) Baibel ena referens ta ia gwau: “Heabidae tauna be ia diba lasi taudia dekenai kara namo ia hahedinaraia bona mai moale ida ena ruma dekenai ia boiridia.” Sibona oi nanadaia, ‘Vadivadi taudia idia mai neganai lau be dahaka lau karaia?’ (Heb. 13:​2, 16) Heabidae tauna be vadivadi taudia ibounai, hegeregere ogogami taudia, tok henia totona idia vadivadi tadikaka bona idia gaukara goada sekit naria taudia dekenai kara namo ia hahedinaraia.—Gen. 18:​2-8; Aon. 3:27; Kara 16:15; Roma 12:13. w24.11 rau 21 par. 6

Aonega bona kavakava kekenidia ena parabole lalonai, Iesu be rami-hebou kekenidia 10 ia herevalaia, idia be headava matamata tauna hedavari henia totona idia lao. (Mat. 25:​1-4) Idia ibounai idia ura headava matamata tauna idia bamoa bona headava aria dekenai idia lao. Iesu ese 5 ia gwauraia “aonega kekenidia,” bona ma 5 ia gwauraia “kavakava kekenidia.” Aonega rami-hebou kekenidia be idia hegaegae headava matamata tauna idia naria totona, ena be hanuaboi momokani do ia ginidae. Unai dainai lamepa mai edia oela idia abia mai, unai amo dibura lalonai diari ia henia diba. Danu, oela ma haida idia abia kau, unai amo bema headava matamata tauna ia mai haraga lasi, edia lamepa do ia ara noho. (Mat. 25:​6-10) Headava matamata tauna ia ginidae neganai, aonega rami-hebou kekenidia be ia ida headava ariana dekenai idia vareai. Unai hegeregerena, horoa Keristani taudia be idia gima bona abidadama noho ela bona Keriso ia ginidae neganai, edia ahuna do idia abia, unai be guba Basileia lalonai, headava matamata tauna, Iesu do idia bamoa.—Apok. 7:​1-3. w24.09 rau 21 par. 6

Tanobada ibounai lalonai haroro gaukara ese taunimanima momo ia durua dalana ita itaia neganai, unai ese ita ia hagoadaia ita haroro noho totona. Lagani ta ta ai, kamonai taudia milioni momo be Memorial dekenai idia mai bona ita ida Baibel idia stadilaia. Taunimanima tausen momo be bapatiso idia abia bona ita ida haroro gaukara idia karaia. Ita haroro noho lalonai ita diba lasi taunimanima hida be sivarai namona do idia abia dae, to ita diba gauna be Iehova be hutuma bada taudia ia do haboua noho, idia be hisihisi badana amo do idia roho mauri. (Apok. 7:​9, 14) Iehova be uma ena Biaguna bona ia diba taunimanima momo be sivarai namona do idia abia dae, unai dainai ita haroro noho be namo. (Luka 10:2) Iesu ena hahediba taudia korikoridia be hanaihanai mai ura ida sivarai namona idia harorolaia. Taunimanima ese aposetolo taudia edia gari lasi karana idia itaia neganai “idia laloparara, idia be guna Iesu idia bamoa taudia.” (Kara 4:13) Ita danu be mai gari lasi bona ura bada ida sivarai namona ita harorolaia neganai, taunimanima do idia itaia ita be Iesu ita tohotohoa. w25.03 rau 18 par. 15; rau 19 par. 17-18

Baibel amo ita dibaia, ma haida ese idia laloa maragi taudia be Iehova ese ia laloa bada. Hegeregere, Iehova ese peroveta tauna Samuela be Iese ena ruma dekenai ia siaia, unai amo ena natuna mero ta do ia horoa Israela ena king ai ia lao totona. Iese be ena natuna memero 8 amo 7 ia boiria mai Samuela idia hedavari henia totona, to ena mero dokona Davida be ia noho lasi. To, Iehova ese Davida ia abia hidi. (1 Sam. 16:​6, 7, 10-12) Iehova ese Davida ena kudouna ia itaia bona unai mero matamata be Iehova ia lalokau henia bada. Mani oi laloa, Iehova ese ia hahedinaraia vadaeni oi ia laloa bada. Ia ese oi davaria hekwakwanai totona, sisiba namodia ia henia. (Sal. 32:8) Unai ese ia hamomokania ia be oi do ia durua gauna ia diba. (Sal. 139:1) Iehova ena sisiba oi badinaia bona oi itaia unai ese oi ia durua neganai, do oi abia dae momokani Iehova be oi ia laloa bada. (1 Siv. 28:9; Kara 17:​26, 27) Iehova be ia totona oi karaia gaudia ibounai ia itaia. Danu ia ese emu kara namodia ia itaia bona ia ura emu turana ai ia lao.—Ier. 17:10. w24.10 rau 25-26 par. 7-9

Momokani, oi be Iehova oi lalokau henia bona oi ura ma haida oi hesiai henia. Dahaka ese oi do ia durua unai gaukara oi karaia totona? Emu tadikaka bona taihu oi hesiai henia neganai, do oi davaria moalena oi laloa. Iesu ia gwau: “Henia kara ena moale be bada, to abia kara ena moale be maragi.” (Kara 20:35) Iesu be ia gwauraia gauna ia karaia. Ia be ma haida ia hesiai henia dainai ia moale bada. Mani Mareko 6:​31-34 ai ia noho haheitalai ta ita laloa. Nega ta, Iesu bona ena aposetolo taudia be idia hesiku, bona taunimanima lasi gabuna ta dekenai idia lao idia laga-ani totona. To hutuma be unai gabu dekenai idia ginidae guna, idia ura Iesu ese idia do ia hadibaia. Iesu ese idia ia hamaoroa diba, umui giroa lou. Badina ia bona ena aposetolo taudia be “nega lasi idia aniani totona.” Eiava Iesu be idia dekenai gau tamona eiava rua sibona ia gwauraia diba bona do ia siaidia lou. To ia be idia ia lalokau henia dainai, idia “ia hadibaia matamaia” ela bona “adorahi momokani.”—Mar. 6:35. w24.11 rau 16 par. 9-10

Tama sina e, emu natuna oi durua dala idauidau ai Baibel ena hereva momokani ia herevalaia totona. (Roma 10:10) Ma haida dekenai Baibel ena hereva hadibaia karana be miusiki gauna ta dibaia karana ida ia hegeregere. Matamanai, auka lasi anena ta amo miusiki gadaralaia karana do ia dibaia matamaia. Nega ia hanaia lalonai, miusiki gadaralaia karana do ia dibaia. Unai hegeregerena, Keristani matamata tauna ta be ia haroro matamaia neganai, auka lasi dalanai do ia hereva. Hegeregere, sikuli turana ia nanadaia diba: “Inai oi diba, a? Engineer taudia be nega momo havaraia gaudia edia toana hegeregerena gau ta idia karaia. Mani unai ena vidio ta lau hahedinaraia.” Was It Designed? ena kahana amo vidio ta ia hahedinaraia murinai, ia gwau diba: “Bema saiens tauna ta be unai design dainai, hanamoa ia abia, daika be unai havaraia gaudia dainai hanamoa ia abia be namo?” Unai bamona henanadai ese matamata tauna ta ia hagoadaia, bona do ia ura gau ma haida ia dibaia. w24.12 rau 19 par. 17-18

Iehova ese kara dika bona mase amo ita ia ruhaia totona, ia ese dala ia karaia Iesu ese mauri davana ia henia totona. To edena dala ai goevadae tauna tamona ena mase ese taunimanima milioni momo be kara dika bona mase amo ia ruhaia diba? Aposetolo Paulo ia gwau: “Tau tamona [Adamu] ena gwau-edeede karana dainai, taunimanima momo be kara dika taudia ai idia lao. Unai hegeregerena, tau tamona [Iesu] ena kamonai karana dainai, taunimanima momo be kara maoromaoro taudia ai do idia lao.” (Roma 5:19; 1 Tim. 2:6) Ita gwau diba, goevadae tauna tamona ena kamonai lasi karana dainai, ita ibounai be kara dika bona mase ita davaria. Unai dainai, goevadae tauna tamona ena mase ese ita be kara dika bona mase amo ia hamauria. Dahaka dainai Iehova ese maoro ia henia lasi ia idia badinaia Adamu ena natudia be mauri hanaihanai idia abia totona? Reana do ita laloa, unai be dala namona unai hekwakwanai hamaoromaoroa totona. To unai ese Iehova ena hahemaoro goevana do ia hahedinaraia lasi. Iehova ena kara ibounai be maoromaoro dainai, ia ese Adamu ena kara dika totona gau ta ia karaia be namo. w25.01 rau 21 par. 3-4

Aposetolo Paulo ia diba ia do idia hamasea negana ia kahirakahira vadaeni, to ena mauri ai ia karaia gaudia ia laloa lou neganai, ia moale. Unai dainai ia gwau: “Heau helulu lau haorea vadaeni, bona Keristani abidadama lau badinaia vadaeni.” (2 Tim. 4:​6-8) Paulo be ena Keristani hesiai gaukara lalonai abia hidi namodia ia karaia bona ia mamia Iehova be ia dekenai ia moale. Ita danu ita ura abia hidi namodia ita karaia bona Dirava ena lalonamo ita abia. Edena dala ai unai ita karaia diba? Paulo be ia sibona bona abidadama Keristani taudia ia herevalaia neganai, ia gwau: “Ita be abidadama amo ita raka, to ita itaia gaudia amo lasi.” Baibel ai inai hereva “raka” idia gaukaralaia neganai, nega haida ena anina be ta ese ia abia hidi mauri dalana ia herevalaia. Bema tau ta be abidadama amo ia raka, ia be Iehova Dirava ena ura hegeregerena abia hidi ia karaia. Iena kara ese ia hahedinaraia ia abia dae Baibel ena sisiba ia badinaia neganai, Dirava ese davana namona do ia henia, hari bona vaira negai danu.—Sal. 119:66; Heb. 11:6. w25.03 rau 20 par. 1-2

Dirava ena lauma helaga ena heduru dainai, guna idia dagedage bona koikoi taudia be hari edia mauri idia haidaua. (Isa. 65:25) Idia gaukara goada edia kara gunadia idia haidaua. (Efe. 4:​22-24) Momokani, Dirava ena taunimanima be goevadae lasi dainai kerere idia karaia diba. To, Iehova ese “taunimanima idauidau” ia hatamonaia bona idia ese Ia bona ta ta idia lalokau henia, unai dainai maino korikori bona lalotamona karana idia moalelaia. (Tito 2:11) Unai be hoa gauna, bona siahu ibounai Diravana sibona ese ia karaia diba! Hanaihanai ena hereva idia guguru. (Isa. 55:​10, 11) Hari ita be Iehova ena orea lalonai ia ita tomadiho henia. Bona Iehova ese taunimanima idauidau ia haboua, ruma bese ta bamona ia idia tomadiho henia, unai be idau momokani. Ita be unai ruma bese ena kahana ta dainai, ena be inai dagedage tanobadana lalonai ita noho, to maino bona noho namo ita moalelaia. (Sal. 72:7) Unai dainai, ita ura momo ita durua iseda Keristani ruma besena lalonai idia vareai. Unai ita karaia diba bema hahediba taudia halaoa gaukarana ita karaia.—Mat. 28:​19, 20. w24.04 rau 23 par. 13, 15

Iesu be mai lalona ibounai ida Iehova ia lalokau henia. Ia diba Dirava ena ura be dahaka bona ena lalona ia hadaia unai ura hegeregerena gau ibounai ia karaia, ena be ia diba hisihisi do ia davaria. Iesu be ena Tamana ena ura ia laloa bada dainai, gau ta ese ia koua lasi ena tahua gauna ia hagugurua totona. Petero bona aposetolo taudia ese nega bada lalonai Iesu idia bamoa bona ia amo diba idia abia karana be hahenamo badana. Petero be ena revareva ginigunana ia torea neganai, Keristani taudia ia hagoadaia Keriso ena laloa dalana idia badinaia totona. (1 Pet. 4:1) Inai hereva, “laloa dalana hegeregerena” be Grik gado ai Petero ese ia torea neganai, ia be tuari totona idia hegaegae herevana ta ia gaukaralaia. Unai dainai, Keristani taudia be Iesu ena laloa dalana idia dibaia bona badinaia neganai, do idia hegeregere edia ura dikadia idia tuari henia, bona Satani ese ia lohiaia tanobadana idia dadaraia diba.—2 Kor. 10:​3-5; Efe. 6:12. w25.03 rau 8-9 par. 1-3

Emui hetura karana lalonai dahaka gau ma haida oi dibaia be namo? Oi tura henia tauna dekenai emu ura ia do goada lasi lalonai, reana mai anina bada gaudia haida umui herevalaia be namo, hegeregere ma ta ena tahua gaudia. Edena dala ai ma ta do oi dibaia namonamo? Dala namona ta be mai momokani ida oi hereva, henanadai oi henia bona oi kamonai namonamo. (Iam. 1:19) Reana abia hidi umui karaia gau haida do umui karaia hebou, unai amo do ia auka lasi umui herevahereva totona, hegeregere umui aniani hebou, pablik gabudiai umui raka, bona umui haroro hebou. Danu, emui turadia bona famili umui bamoa neganai, ta ta do umui diba namonamo. Bona palani umui karaia gau haida umui karaia hebou, unai amo ma ta ese dala idauidau ai taunimanima ia kara henia dalana do oi dibaia. w24.05 rau 27-28 par. 6-7

Kahirakahira, nega aukadia do ita davaria bona unai nega lalonai namona be Iehova dekenai ita tabekau. Baibel sivaraidia bona Iehova ena Witnes taudia edia ekspiriens amo, Dirava ese ena hesiai taudia ia durua dalana do ita dibaia. Bona unai sivarai oi laloa dobu. Unai bamona oi karaia neganai, Iehova be emu Nadi Badana ai oi halaoa diba. Danu, do oi hegeregere, iseda tadikaka bona taihu oi hagoadaia totona. Hegeregere, Iesu ese Simona dekenai inai ladana Kepa (eiava “Petero”) ia henia, ena anina be “Nadi Ta.” (Ioa. 1:42) Unai ese ia hahedinaraia Petero be kongrigeisen lalonai ma haida do ia hagoadaia. Baibel ese elda taudia ia herevalaia neganai, ia gwau idia be “nadi badana ena ikerukeru bamona.” Unai ese ia hahedinaraia idia be kongrigeisen ai idia noho taudia idia gimaia. (Isa. 32:2) To ita ibounai be ta ta do ita hagoadaia, bema ita ese Iehova ena kara namodia ita tohotohoa. w24.06 rau 28 par. 10-11

Iehova ese ia gwauraia abidadama Israela king taudia be dala maorona ai, ia idia tomadiho henia. Iehova ese king taudia momo ia gwauraia abidadama lasi taudia, badina idia ese ena taravatu idia badinaia lasi, bona dirava koikoidia idia tomadiho henia matamaia. (1 Ki. 21:​25, 26; 2 Siv. 12:1) Dahaka dainai Iehova ese tomadiho karana ia laloa bada? Badina ta be, king taudia be mai edia maduna taunimanima idia durua, tomadiho momokanina idia badinaia totona. Danu, taunimanima ese dirava koikoidia idia tomadiho henia neganai, kara dika badadia idia karaia bona ma haida idia kara namo henia lasi. (Hos. 4:​1, 2) Ma danu, king taudia bona idia lohiaia taudia be Iehova dekenai idia gwauhamata vadaeni. Unai dainai, Baibel ia gwau, tomadiho koikoi idia badinaia neganai, unai be hegeregere heudahanai karana idia karaia. (Ier. 3:​8, 9) Ta be heudahanai karana ia karaia neganai, ia be ena adavana ena lalona ia hahisia bada. Unai hegeregerena, Iehova ena hesiai tauna ta be tomadiho koikoi edia kara ia badinaia neganai, unai ese Iehova ena lalona ia hahisia bada.—Deu. 4:23. w24.07 rau 22-23 par. 12-15