‘Sivarai Namo Do Idia Harorolaia Guna’

“To Sivarai Namo bese ibounai dekenai be do idia haroro henia guna.”​—MAREKO 13:10.

 1. Dahaka gau tamona dainai Iehova ena Witness taudia be idau, Kerisendom ena tomadiho oreadia hegeregeredia lasi, bona badina be dahaka?

TAUNIMANIMA momo be sibodia idia gwauraia Keristen taudia, to Iehova ena Witness taudia mo sibodia ese sivarai namona harorolaia gaukarana idia laloa namonamo. Idia sibodia edia orea taudia iboudiai idia laloa edia maduna be, edia dekena taudia do idia lou henidia loulou, Dirava ena palani be idia dekenai do idia herevalaia totona. Badina be dahaka? Badina be Witness taudia iboudiai ta ta idia laloa, idia be Keristen taudia dainai Keriso ena aena gabudia ai do idia raka be namo. (1 Petro 2:21) Inai ena anina be dahaka?

 2. Taunimanima momo edia lalohadai Iesu Keriso dekenai be dahaka, to tanobada dekenai ia noho neganai, dahaka gaukara ia goadalaia momokani?

² Taunimanima momo idia laloa Iesu Keriso be kara namo tauna sibona. Gorere taudia ia hanamodia, hitolo taudia ia ubudia, bona dabu taudia dekenai lalokau bona hebogahisi ia hahedinaraia. To Iesu ese ma gaukara momo ia karaia danu. Dirava ena Basileia ena sivarai namona ia harorolaia goadagoada. Bapatiso be Ioridane sinavaina lalonai ia abia bena hua haida murinai, Iesu be taunimanima vairadiai ia haroro matamaia, ia gwau: “Emui lalona umui giroa, badina be Guba Basileia kahirakahira ia mai vadaeni.” (Mataio 4:17) Mareko ia gwau: “Iesu ia lao Galilea dekenai, Dirava ena Sivarai Namona ia harorolaia. Ia haroro, ia gwau, ‘Harihari be Dirava ena nega, bona Dirava ena Basileia be kahirakahira ia ginidae. Umui emui lalona umui giroa, Sivarai Namona umui abidadama henia.’ ”​—Mareko 1:​14, 15.

 3, 4. (a) Ena be Iesu ese gorere idauidau iboudiai ia hanamoa, to ena gaukara lalonai dahaka ia herevalaia momo? (b) Dahaka dainai Dirava ese Iesu ia siaia? (c) Iesu ia gwau iena haroro gaukara be dahaka bamona, bona ena hahediba taudia ia haganidia dahaka do idia karaia?

³ Iesu ese Petro, Andrea, Iakobo, bona Ioane ia boiridia, ia murinai do idia raka, bena “Galilea kahana ibounai dekenai ia loaloa edia dubu lalonai ia hadibaia, bona Basileia ena sivarai Namona ia harorolaia. Bona taunimanima edia gorere bona edia hisihisi idauidau dekena amo ia hamauridia.” Galilea dekenai hutuma ese ia idia dogoatao toho neganai, ia gwau: “Lau be Dirava ena Basileia ena Sivarai Namo hanua idauidau dekenai do lau harorolaia, lau ia siaia badina be unai.” Bena ia lao, Iudea ena dubu lalodiai ia haroro.​—Mataio 4:​18-23; Luka 4:​43, 44.

⁴ Galilea dekenai ia giroa lou neganai, Iesu be “hanua badadia bona hanua maragidia edia lalonai ia haroro loaloa, Dirava ena Basileia ena Sivarai Namona ia harorolaia.” (Luka 8:1) Ia gwau iena haroro gaukara be uiti ena anina abia negana hegeregerena, ma ia gwau: “Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.” (Mataio 9:​35-38) Ena be taunimanima momo be ia dekenai idia lao dainai ia laga-ani diba lasi, to “ia ese idia ia abia dae, Dirava ena Basileia herevana ia haroro henia idia dekenai, bona gorere hanamoa ura taudia ia hanamoa.”​—Luka 9:11.

 5. Iesu ese ena aposetolo bona hahediba taudia be haroro gaukara dekenai ia siaidia lao neganai, dahaka oda ia henidia?

⁵ Momokani, Iesu ese gorere taudia ia hanamodia bona nega ta ta hitolo taudia ia ubudia. To ia goadalaia gaukarana be inai, Dirava ena Basileia ia harorolaia taunimanima dekenai. Bona ia ura ia murinai idia raka taudia danu be unai bamona do idia karaia. Ena aposetolo ia hadibadia vadaeni murinai, ia ese idia na rua rua ia siaidia oho do idia haroro totona; ia hamaorodia, ia gwau: “Umui raka noho neganai do umui haroro, umui gwau, ‘Guba Basileia be kahirakahira ia mai vadaeni.’ ” (Mataio 10:7) Luka ia gwau: “Vadaeni ia siaidia, Dirava ena Basileia do idia harorolaia bona gorere taudia do idia hanamodia.” (Luka 9:2) Iesu ese danu ena hahediba taudia 70 ia oda henidia, ia gwau: “Edia gorere taudia do umui hanamoa, bona do umui hadibaia idia dekenai, do umui gwau, ‘Dirava ena Basileia be umui dekenai kahirakahira ia ginidae.’ ”​—Luka 10:9.

 6. Guba dekenai ia daekau gwauraia neganai, Iesu ese ena hahediba taudia edia gaukara edena bamona ia haganilaidia?

⁶ Guba dekenai ia daekau gwauraia neganai, Iesu ese ena hahediba taudia ia haganidia, haroro gaukara do idia karaia noho bona do idia habadaia danu. Ia oda henidia, ia gwau: “Unai dainai do umui lao, bese ibounai be diba tahua taudia do umui halaoa, . . . Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:​19, 20) Ma ia gwau: “Umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.” (Kara 1:8) Unai hegeregerena, Iesu bona ena aposetolo taudia danu be Dirava ena Basileia ena sivarai namona harorolaia gaukarana idia tahua guna.

Basileia Do Idia Harorolaia Iseda Nega Lalonai

 7. “Tanobada dokona” dekenai do idia karaia haroro gaukarana be Iesu ese edena bamona ia gwauraia?

⁷ “Tanobada dokona” negana lalonai do idia vara gaudia ia perovetalaia neganai, Iesu ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai dokona be do ia ginidae.” (Mataio 24:​3, 14) Eiava, Mareko 13:10 dekenai ia hereva bamona: “To Sivarai Namo bese ibounai dekenai be do idia haroro henia guna.”​—Apokalupo 14:​6, 7 danu itaia.

 8. (a) Aposetolo taudia edia nega lalonai, sivarai namona ena anina be dahaka? (b) Hari inai nega lalonai sivarai namona ena anina be dahaka?

⁸ Iesu be tanobada dekenai ia noho neganai, Basileia ena sivarai namona ena anina be maragi, “nega dokonai” ena anina be bada. Iesu ia haroro, ia gwau Basileia be ia kahirakahira, ia gwau ia be taunimanima edia ihuanai ia noho, Mesia bona King bamona. (2 Timoteo 3:1; Mataio 4:17; Luka 17:21) Keristen taudia ginigunadia idia harorolaia sivarai namona ena anina be, Iesu be mase amo ia toreisi lou bona guba dekenai ia daekau vadaeni, bona unai hereva amo lalo-manau taudia edia lalona idia hagoadaia, do ia mai Basileiana do idia abidadama henia totona. (Kara 2:​22-24, 32; 3:​19-21; 17:​2, 3; 26:23; 28:​23, 31) “Tanobada dokona” be ita dekenai ia ginidae vadaeni dainai, Basileia ena sivarai namona ita harorolaia, anina be ita gwau Basileia be guba dekenai idia haginia vadaeni.​—Apokalupo 11:​15-18; 12:10.

Daidia ese Sivarai Namona Do Idia Harorolaia?

 9. (a) Haida idia gwau Keristen taudia iboudiai lasi to haida sibodia be sivarai namona idia harorolaia be namo; unai hereva be edena bamona idia hamomokania toho? (b) Gunaguna Iehova ese daidia ia hagaukaradia iena hereva idia harorolaia totona, bona inai ena anina be dahaka ita dekenai?

⁹ Hari inai nega lalonai daidia idia haroro be namo? Kerisendom taudia idia laloa unai be Keristen taudia iboudiai edia maduna lasi, bona momokani, Iesu ese sivarai namona do idia harorolaia herevana ia gwauraia neganai, ia hahedinaraia lasi daidia ese unai gaukara do idia karaia. To Iehova ese iena Hereva idia abidadama henia bona edia mauri lalonai idia badinaia matamaia taudia sibodia be unai bamona gaukara lalonai ia hagaukaradia diba, ani? Noa ena nega lalonai Iehova ese ena lalona ia hadaia, taunimanima dikadia do ia hadibadia do ia hamasedia ore; unai neganai ia ese “Dirava danu ia noho, turana hegeregerena” tauna ta ia hagaukaraia. (Genese 6:​9, 13, 14; 2 Petro 2:5) Gabeai ‘peroveta taudia, iena hesiai taudia’ ia siaidia, ena peroveta herevadia be Israel dekenai do idia abia lao. (Ieremia 7:25; Amos 3:​7, 8) Gwauhamata besena Israel be iena witness taudia edia bese. (Esodo 19:​5, 6; Isaia 43:​10-12) Oibe, Iehova ese iena hesiai taudia, ia dekenai sibodia idia hahelagaia taudia, ia hagaukaradia iena hereva idia gwauraia hedinarai totona.

10. Mataio 28:​19, 20 ena hereva ese edena bamona ia hahedinaraia Iesu ese Keristen taudia iboudiai ia haganidia taunimanima be hahediba taudia ai do idia halaodia?

¹⁰ Haida idia gwau, Mataio 28:​19, 20 dekenai Iesu ese aposetolo sibodia mo ia haganidia, taunimanima be hahediba taudia ai do idia halaodia, bona unai dainai unai hahegani be anina lasi Keristen taudia oredia dekenai. To Iesu ena hereva mani oi laloa, ia gwau: “Unai dainai do umui lao, bese ibounai be diba tahua taudia do umui halaoa, . . . Bona idia dekenai do umui hadibaia, umui dekenai lao henia hereva ibounai be do idia badinaia.” Iesu ia ura iena hahediba taudia ese hahediba taudia matamatadia do idia hadibadia, Iesu ena oda herevadia iboudiai do idia badinaia. Bona iena oda ta be ‘do idia lao, taunimanima be hahediba taudia ai do idia halaodia.’ Momokani, ia ura hahediba taudia matamatadia iboudiai do idia hadibadia, inai taravatu danu do idia badinaia.

11. (a) Aposetolo edia nega lalonai, Keristen ekalesiana taudia edia maduna be dahaka? (b) Ta be dahaka do ia karaia be namo Dirava ese do ia hamauria totona?

¹¹ Keristen ekalesiana aposetolo taudia edia nega lalonai idia gwauraia ‘Dirava ena orea korikori taudia. Dirava ese idia ia abia hidi, iena hoa kara badadia do idia gwauraia hedinarai. Badina be ia ese dibura dekena amo idia ia boiria, vadaeni iena diari namo bada herea lalonai do idia noho.’ (1 Petro 2:9) Unai negai Keristen ekalesiana taudia ese Dirava ena Basileia idia harorolaia goadagoada. (Kara 8:​4, 12) “Helaga taudia” iboudiai Roma dekenai idia noho, horoa Keristen taudia unai, be Paulo ese ia hamaorodia, ia gwau: “Inai abidadama be iseda uduna dekenai ita gwauraia hedinarai, be mauri do ita davaria” bona “Dirava ena ladana idia noinoi henia taudia ibounai be mauri do idia davaria.” (Roma 1:​7, NW; 10:​9, 10, 13) Ta ese ena abidadama na taunimanima vairadiai inai bamona ia gwauraia, bapatiso ia abia neganai, bona Iehova ena Basileia ena sivarai namona be taunimanima vairadiai ia harorolaia neganai danu.

¹² Aposetolo Paulo ese Heberu Keristen taudia ia tore henidia, ia gwau: “Namona be iseda abidadama ita dogoatao goada noho. Ita gwauraia noho abidadama be unai.” (Heberu 10:23) Taunimanima vairadiai ita gwauraia hedinarai be kongregesen ena hebou lalodiai sibona lasi. (Salamo 40:​9, 10) Salamo 96:​2, 3, 10 dekenai peroveta haheganina ta ita itaia, unai hahegani be kongregesen murimurinai bese idauidau do ita haroro henidia; ia gwau: “Dina ta ta iboudiai ia amo hahemauri sivaraina umui harorolaia. Bese iboudiai lalodiai iena hairai umui harorolaia, taunimanima iboudiai dekenai iena hoa karadia umui harorolaia. Bese bogaragidiai umui gwau: ‘Iehova be pavapava ai ia lao vadaeni.’ ” Momokani, Mataio 28:​19, 20 bona Kara 1:8 dekenai Iesu ese Keristen taudia ia oda henidia, bese iboudiai do idia haroro henidia.

12, 13. (a) Heberu 10:23 hegeregerena iseda abidadama “ita gwauraia noho,” anina be dahaka? (b) Salamo 96 ese edena bamona ia hahedinaraia iseda abidadama be kongregesen murimurinai ita gwauraia be namo, bona Apokalupo 7:​9, 10 be inai edena bamona ia hamomokania?

¹³ Unai haroro gaukara taunimanima vairadiai idia karaia, be Paulo ese ma ia gwauraia lou, horoa Heberu Keristen taudia ia tore henidia neganai, ia gwau: “Namona be Dirava do ita hanamoa, Iesu ena ladana dainai. Bona inai hanamoa Dirava do ita henia nega ibounai, boubou gauna bamona. Oibe, ita ese iseda uduna bibina Iesu dekenai do ita henia, bona ia do ita gwauraia hedinarai, ia be Lohiabada.” (Heberu 13:15) Apokalupo lalonai Ioane ia gwau, “hutuma bada herea,” bese iboudiai amo idia gogodia taudia, idia boiboi badabada, idia gwau: “Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.” (Apokalupo 7:​9, 10) Unai hegeregerena, inai nega ena dokona lalonai, Iehova ena gwauhamata Witness taudia ese sivarai namona idia harorolaia, Keriso ena lauma tadikaka oredia bona mamoe bamona taudia “hutuma bada herea” unai. To inai gaukara be edena bamona idia karaia be namo?

“Taunimanima Vairadiai bona Ruma ta Ruma ta Dekenai”

14. Iesu be edeseniai ia haroro, bona unai ese dahaka ia hadibaia ita dekenai?

¹⁴ Iesu ese taunimanima ia haroro henidia. Dubu lalodiai ia haroro, badina be Sabati dinadia ai taunimanima be unuseniai idia hebou, bona ta ese Buka Helaga ia duahia bona ena hereva edia anina ia herevalaia neganai idia kamonaia. (Mataio 4:23; Luka 4:​15-21) Iesu ese danu taunimanima ia haroro henidia, dala badinai, kone dekenai, ororo ta ena kahana ta dekenai, ranu gurina ta dekenai, bona taunimanima edia ruma lalodiai danu. Taunimanima idia noho gabudia dekenai, Iesu ese ia haroro henidia.​—Mataio 5:​1, 2; Mareko 1:​29-34; 2:​1-4, 13; 3:19; 4:​1, 2; Luka 5:​1-3; 9:​57-60; Ioane 4:​4-26.

15. (a) Iesu ese dahaka oda be ena hahediba taudia ia henidia bena ia siaidia oho idia haroro totona? (b) Bible ena hereva edia anina gwauraia hedinarai taudia haida idia gwau inai siri ena anina be dahaka?

¹⁵ Iesu ese ena hahediba taudia ia siaidia do idia haroro totona neganai, ia siaidia taunimanima dekenai. Ena hahegani, Mataio 10:​1-15, 40-42 dekenai be unai idia hahedinaraia. Siri 11 lalonai ia gwau: “Hanua maragina ta dekenai o hanua badana ta dekenai do umui ginidae neganai, kara namona tauna ta do umui tahua. Vadaeni ia dekenai do umui noho ela bona unai gabu umui rakatania.” The Jerusalem Bible lalonai inai siri be inai bamona idia torea: “Kara maoromaoro tauna ta umui henanadailaia,” hegeregere hahediba taudia ese hanua ena tau badana ta do idia nanadaia, daika be mai ena ladana namona bona unai dainai do idia haroro henia be maoro. Bona Bible ena anina gwauraia taudia haida idia gwau siri 11 ena anina be unai bamona.

16. Iesu ena hereva Mataio 10:11 dekenai ita laloa namonamo neganai, ita davaria aposetolo taudia ese kara namo taudia edena bamona idia tahudia?

¹⁶ To mani inai oi laloa, Kerisendom ena tomadiho daladia hadibalaia taudia momo be ruma ta ruma ta dekenai idia lao lasi, bona Bible ena anina gwauraia hedinarai taudia momo ese Bible ena hereva edia anina idia gwauraia hedinarai, sibodia edia mauri dalana hegeregerena. Iesu ena hahegani ena anina ita tahua namonamo neganai, ita davaria ena hereva ena anina be, ena hahediba taudia ese taunimanima ta ta do idia tahudia, ruma ta ruma ta dekenai, eiava taunimanima vairadiai, bena Basileia sivaraina do idia gwauraia hedinarai idia dekenai. (Mataio 10:7) Idia davaria taudia do idia kamonai neganai, edia kara amo do idia hahedinaraia idia be kara namo taudia eiava lasi.​—Mataio 10:​12-15.

17. Dahaka ese ia hahedinaraia Iesu ena hahediba taudia ese taunimanima iboudiai edia ruma dekenai idia lao?

¹⁷ Iesu ena hereva Mataio 10:14 dekenai ese unai ia hahedinaraia; ia gwau: “To bema ruma taudia o hanua taudia idia abia dae lasi umui, emui hereva idia kamonai lasi, unai gabu umui rakatania, bona emui aena dekenai ia noho momoru umui negea oho unuseni.” Iesu ena hereva ena anina be, ena hahediba taudia ese taunimanima do idia vadivadi henidia, unai taudia ese do idia boiridia lasi neganai. Momokani, sivarai namona idia abia dae taudia ta ena ruma lalonai do idia noho danu. (Mataio 10:11) To gau badana be idia haroro. Luka 9:6 ia gwau: “Idia be idia raka lao, hanua momo edia lalonai Sivarai Namo idia harorolaia, bona gorere taudia idia hanamoa.” (Luka 10:​8, 9 danu itaia.) Kara namo taudia, hahediba taudia be peroveta taudia bamona na edia ruma ai idia abidia dae, bona reana “ranu keruma kapusi tamona” eiava mahuta gabudia idia henidia, taudia be edia davana namona do idia abia momokani. Idia ese Basileia sivaraina do idia kamonai.​—Mataio 10:​40-42.

18, 19. (a) Kara 5:42 ena hereva hegeregerena, idau negai Keristen taudia ese edia haroro gaukara edena bamona idia karaia? (b) Paulo ena hereva Kara 20:​20, 21 dekenai ese edena bamona ia hahedinaraia ia ese murimuri taudia haroro henidia gaukarana ia herevalaia, Keristen taudia vadivadi henidia gaukarana ia herevalaia lasi?

¹⁸ Iesu Keriso ese Keristen ekalesiana ia haginia murinai, aposetolo be “dina iboudiai, Dubu Helaga lalonai bona ruma ta ruma ta dekenai, taunimanima idia hadibadia, bona Iesu Keriso ena sivarai namona idia gwauraia, inai gaukara idia hadokoa lasi.” (Kara 5:​42, NW ) Greek hereva ta, kat’ oiʹkon, be Motu gado ai idia hahegeregerea neganai, “ruma ta ruma ta” idia torea. Anina be, hahediba taudia edia haroro gaukara be ruma ta ruma ta dekenai idia karaia. Unai bamona idia karaia neganai, sibodia edia orea taudia, idia ida idia gwauhamata heheni vadaeni taudia, idia vadivadi henidia lasi. Inai hereva ka·taʹ be unai bamona idia hahanaia Luka 8:​1, (NW ) dekenai: “Hanua badadia ta ta dekenai bona hanua maragidia ta ta dekenai.”

¹⁹ Unai Greek hereva be aposetolo Paulo ese ia gwauraia Kara 20:​20, (NW ) dekenai. Ia gwau: “Taunimanima vairadiai bona ruma ta ruma ta dekenai umui lau hadibaia.” Inai hereva “ruma ta ruma ta dekenai” be Bible haida lalodiai idia torea lasi, to inai hereva “emui ruma dekenai” idia torea. Unai dainai Kerisendom ena Bible ena anina gwauraia taudia haida idia gwau, unai siri lalonai Paulo ena hereva ena anina be, Keristen edia ruma lalodiai ia vadivadi henidia ia hagoadadia totona. To Paulo ena hereva oredia ese idia hahedinaraia, ia ese murimuri taudia haroro henidia gaukarana ia gwauraia unai, badina be ia gwau: “Iuda taudia bona Helene taudia danu dekenai lau sisiba henia goada edia lalona do idia giroa Dirava dekenai, bona Lohiabada Iesu do idia abidadama henia.”​—Kara 20:21.

20. (a) Iseda nega lalonai Iehova ena Witness taudia ese Basileia ena sivarai namona idia harorolaia; edia gaukara ena bada be edena bamona? (b) Reana haida ese haroro gaukara edena bamona idia henanadailaia?

²⁰ Hari inai nega lalonai taunimanima be inai dala amo ita lao henidia be namo, badina be Iesu ia gwau iseda nega lalonai “Basileia ena Sivarai Namona be tanobada ibounai dekenai do idia harorolaia,” bese iboudiai hadibadia totona. (Mataio 24:14) Lagani 65 lalodiai Iehova ena Witness taudia be taunimanima vairadiai bona ruma ta ruma ta dekenai, Dirava ena Basileia, ia haginia vadaeni gauna, ena sivarai namona idia harorolaia goadagoada​—hari idia be tano 210 dekenai idia karaia noho. Ena be idia hereva henidia taudia momo “edia taiana idia kudima,” bona idia haida idia badu, to haroro gaukara bada hereana idia karaia noho! (Mataio 13:15) Badina be dahaka Iehova ena Witness taudia idia haroro noho, taunimanima idia kamonai henidia lasi gabudia dekenai bona idia badu henidia gabudia dekenai danu? Inai henanadai be hereva gabena lalonai do ai haerelaia.

Edena Bamona Do Oi Haere?

◻ Bible ese ia hahedinaraia Iesu ese dahaka gaukara ia goadalaia?

◻ Iesu ese aposetolo na edia haroro gaukara ia hadibalaidia neganai, dahaka oda ia henidia?

◻ Iesu ia gwau dahaka gaukara be iseda nega lalonai do idia karaia, bona badina be dahaka?

◻ Iehova ese daidia ia hagaukaradia, sivarai namona be iseda nega lalonai do idia harorolaia totona?

◻ Edeseniai bona edena dala amo haroro gaukara idia karaia guguru?