Tomadiho Koikoi Ariara Hahinena Bamona Ia Kara

TAUNIMANIMA haida idia gwau ariara karana be idau negai idia karaia moni gaukarana. Ariara hahinena be sihari kava hahinena, ia ese ena tauanina be tatau dekenai ia hoia do idia sihari henia totona. To idau negai, taunimanima haida idia laloa unai kara be gaukara namona!

2, 3. Babulono gunana ena hahelaga hahinedia edia kara bona Iehova ese Israel taudia ia henidia taravatuna ariara tataudia bona hahinedia edia kara dekenai be edena bamona idia idau?

² Profesa S. H. Hooke ese Babulono gunana ena hahelaga taudia ia herevalaia, ia gwau: “Hahelaga gaukara idia karaia taudia be tatau sibodia lasi, to hahine danu be dubu badadia lalonai idia gaukara. Bema hahine ta be hahelaga hahinedia oreana ta lalonai ia noho, taunimanima idia laloa dagi badana ia abia, bona king haida ese edia natu kekenidia be hahelaga hahine gaukarana dekenai idia gwauhamatalaia. . . . Edia gaukara helagana badana be aria negadiai ariara gaukarana idia karaia. . . . Ista [natuna havaraia siahuna bona tuari dirava hahinena] ena dubu lalonai unai bamona hahine momo idia gaukara.”

³ Unai kara be Iehova ese Israel besena ia henidia tomadihona amo ia idau vaitani. Dirava ena Taravatu be: “Israel hahinedia ta be dubu ena ariara hahine ta ai ia lao diba lasi, bona Israel tataudia ta danu be dubu ena ariara tauna ta [tatau ida idia sihari kava tauna ta] ai ia lao diba lasi. Ariara hahine eiava sisia ena davana be Iehova emu Dirava ena ruma ai umui mailaia vareai lasi, emu gwauhamata ena davana bamona, badina unai kara be Iehova emu Dirava ese ia inai henia momokani.” (Deuteronomi 23:​17, 18) Unai dainai, ariara hahine ena davana be Dirava ena dubu totona harihari monina bamona idia abia dae diba lasi. Tomadiho lalonai idia karaia lasi ariara karana danu ia dika rohoroho. Dirava ese Israel taudia ia haganidia, ia gwau: “Emu natu kekenina oi hamiroa lasi, ariara hahine ai oi halaoa lasi, tano be ariara karana do ia karaia garina bona tano be lebulebu karadia amo do ia honu garina.” Ariara karana bona tatau ese tatau idia sihari henia karana, “kara mirona” unai, idia taravatudia dainai, taravatu ese Israel besena ia naria tauanina dalana ai bona lauma dalana ai.​—⁠Levitiko 19:29; 20:⁠13.

Lauma Dalana ai Ariara Karana be Dika Herea

 4. Ariara karana dika rohorohona be dahaka?

⁴ To, Dirava dekenai lauma dalanai ariara karana, idia gwau Dirava momokanina idia tomadiho henia, to nega tamona edia tomadiho bona lalokau be dirava idaudia idia henia karana unai, ese tauanina dalanai ariara karadia edia dika ia hanaia. Ierusalem gunana ese ena ariara karana be ma ia habadaia. Lauma dalana ai idia sihari henidia bese badadia dekenai harihari gaudia ia henidia, tomadiho momokanina idia hamiroa besedia unai.​—⁠Esekiel 16:⁠34.

5, 6. Iseda nega lalonai daidia ese lauma dalana ai idia sihari kava noho, bona unai dainai dahaka henanadai idia vara?

⁵ Iseda nega lalonai danu, inai tanobada ena tomadiho be lauma dalana ai idia sihari kava momo. Kerisendom be unai tomadiho oreana ena kahana badana. Bible ese ena ladana ia hatoa “Babulono badana, ariara hahine ibounai bona tanobada ena kara mirodia ibounai edia sinana.”​—⁠Apokalupo 17:⁠5.

⁶ To nega dokonai Babulono Badana ese dahaka do ia davaria? Bona oi bona emu lalokau taudia dekenai ia davaria gauna ena anina be dahaka? Dirava ese ariara hahinedia Israel gunana ai ia hahemaoro henidia, vadaeni hari inai negai idia karaia lauma ariara karana dainai dahaka do ia karaia? Hereva gabedia ese unai henanadai bona henanadai ma haida do ia haerelaia.

 1. Taunimanima momo ese ariara karana edena bamona idia laloa?