Kara Maoromaoro Taudia Do Idia Toreisi Lou
“Lau be mai egu abidadama Dirava dekenai, . . . mase taudia dohore idia toreisi lou, kara maoromaoro taudia, bona kara maoromaoro lasi taudia danu.”—KARA 24:15.
1. Adamu bona Heva idia kara dika negana amo, taunimanima iboudiai dekenai ia vara gauna be dahaka?
“OIEMU imana ese ia davaria gaukara ibounai, be do oi karaia mai oiemu goada ibounai danu. Badina be mase taudia edia gabu, oi lao gabuna, dekenai be kara ta lasi, laloa ta lasi, diba bona aonega ta lasi.” (Hadibaia Tauna 9:10) Unai hereva amo, King Solomona ese iseda tubuna roboadia, Adamu bona Heva, idia kara dika negana amo uru iboudiai dekenai ia vara gauna be ia gwauraia. Mase ese taunimanima iboudiai—taga taudia bona ogogami taudia, pavapava bona ladana lasi taudia, kamonai taudia bona kamonai lasi taudia—ia hadonoa. Momokani, “mase ese taunimanima ibounai ia biagua.”—Roma 5:17.
2. Dahaka dainai hari inai nega dokona lalonai kamonai taudia haida be reana idia lalo-hisihisi?
2 Ena be hari inai negai gorere hanamoa muramuradia matamatadia be momo bona gorere taudia hanamoa daladia matamatadia be momo, to mase ia do kwalimu noho. Ena be unai ita hoalaia lasi, to haida edia lalona idia hisihisi, iseda inaina, mase, be idia vairanai ia hedinarai neganai, badina be lagani 1920 murinai, Watch Tower Society ese inai hereva ia halasia: “Hari idia noho taudia milioni momo be do idia mase lasi.” Hari taunimanima milioni momo be daidia? Idia be Iesu ese mamoe bona nanigosi ia gwauraia neganai ia gwauraia ‘mamoedia.’ (Mataio 25:31-46) Ia peroveta idia be dokona negana lalonai do idia hedinarai, bona edia helaro be tanobada paradaisona lalonai mauri hanaihanai do idia abia. Gabeai, Dirava ena orea taudia ese unai “mamoe” edia gabu Iehova ena palani ai idia lalo-pararalaia. Idia diba, Iesu ese unai kamonai taudia be gwau-edeede ‘nanigosidia’ edia amo edia idau do ia hahedinaraia, bena nanigosi do ia hadikadia ore murinai, mamoe totona ia hegaegaelaia Basileiana ese do ia naria tanobadana lalonai mauri do idia abia.
Mamoe Bamona Taudia Gogoa Karana
3 Lagani 1935 amo, “hesiai tauna mai ena kamonai” ia gaukara goada, mamoe bamona taudia ia tahua bona Iehova ena orea lalonai ia hakaua vareai. (Mataio 24:45; Ioane 10:16) Hari taunimanima, diba idia tahua Keristani taudia, idia diba vadaeni Iesu be Iehova ena guba Basileiana lalonai ia lohia noho bona nega daudau lasi inai tanobada oromana dikana do ia ore bena tanobada matamatana do ia vara, ia lalonai kara maoromaoro do ia noho. (2 Petero 3:13; Apokalupo 12:10) Unai tanobada matamatana lalonai, Isaia ena hereva, “mase do ia haorea momokani ela bona hanaihanai” herevana, ena anina do ia vara.—Isaia 25:8.
4. Ena be idia ura bada Iehova ena lohia siahuna hamomokania karana be Aramagedono ai do idia itaia, to dahaka ia vara mamoe idaudia momo dekenai?
4 Satani ena tanobada gunana ena dokona be kahirakahira, unai dainai mamoe bamona Keristani taudia idia ura bada do idia mauri noho ela bona hisihisi be Babulonia Badana bona Satani ena tanobada orena latanai do ia vara neganai Iehova ese ena lohia siahuna do ia hamomokania. (Apokalupo 19:1-3, 19-21) To madi, idia momo be unai do idia itaia lasi. Taunimanima momo, edia ura be do idia mase lasi to taunimanima “milioni momo” ida do idia roho mauri taudia, be madi idia mase vadaeni. Haida be hereva momokani idia badinaia dainai, dibura rumadia ai idia hamasedia eiava tomadiho koikoi goadalaia taudia ese idia hamasedia. Ma haida be aksiden dainai idia mase eiava gorere o buruka dainai idia mase. (Salamo 90:9, 10; Hadibaia Tauna 9:11) Dokona ia do ginidae lasi neganai ma momo do idia mase. Dirava ese tanobada matamatana, kara maoromaoro do ia noho gabuna, ia gwauhamatalaia vadaeni; unai gwauhamata ena anina do ia vara neganai, unai taudia ese unai be edena bamona do idia itaia?
Toreisi Lou Helarona
5 Aposetolo Paulo ese unai ia gwauraia, Roma gavana Feliki vairanai ia hereva neganai. Kara 24:15 ai idia torea bamona, Paulo ia hereva mai ena goada ida, ia gwau: “Lau be mai egu abidadama Dirava dekenai, . . . mase taudia dohore idia toreisi lou, kara maoromaoro taudia, bona kara maoromaoro lasi taudia danu.” Toreisi lou helarona dainai iseda lalona idia goada, unai dainai dika badadia ita haheaukalaia diba. Unai helaro dainai, iseda turadia idia gorere bona idia mase gwauraia neganai idia dara doko lasi. Idia diba ena be do idia mase to edia kamonai ena davana do idia abia. Toreisi lou helarona dainai, iseda tadikaka bona taihu mai edia boga auka be edia inai taudia ese idia hamasea gwauraia neganai, idia diba edia inai taudia do idia kwalimu dalana be lasi. (Mataio 10:28) Kongregesen tauna ta ia mase neganai, ita lalohisihisi badina be ita ia masetania, to bema ia be mamoe idaudia ta, ita moale danu, badina be Dirava ia badinaia ela bona mase bona hari ia laga-ani, bona Dirava ena tanobada matamatana lalonai mauri do ia abia dainai.—1 Tesalonika 4:13.
5, 6. Tanobada helarona idia abia to Aramagedono be do lasi neganai idia mase taudia edia vaira negana be edena bamona?
6 Oibe, toreisi lou helarona dainai iseda abidadama ia goada. To, dahaka dainai toreisi lou herevana ita abia dae mai eda goada ida, bona daidia do idia toreisi lou?
7. Toreisi lou be dahaka, bona edena siri ese idia hamomokania?
7 Inai hereva “toreisi lou” be Greek gado herevana a·naʹsta·sis amo idia hahanaia; ena anina korikorina be “gini tore”—mase amo tore isi lou karana unai. Inai hereva “toreisi lou” be Heberu Revarevadia lalonai ia noho lasi, to toreisi lou helarona idia gwauraia goevagoeva. Hegeregere, Iobu ese hisihisi ia ania neganai, ia gwau: “Lau ura mase gabuna dekenai lau do oi hunia. . . . Vadaeni nega ta do oi gwauraia, unai neganai oi ese lau do oi laloa.” (Iobu 14:13) Unai hegeregerena, Hosea 13:14 ia gwau: “Mase gabuna ena siahu dekena amo Israela taudia do lau veria mauri, a? Mase dekena amo idia do lau hamauria, a? Mase e, oiemu hisihisi be edeseni? Mase gabuna e, taunimanima hadikaia ena siahu do oi mailaia!” Korinto Ginigunana 15:55 ai, aposetolo Paulo ese unai hereva ia gwauraia lou bona ia hahedinaraia toreisi lou amo mase do idia halusia. (Momokani, unai siri lalonai Paulo ese do idia toreisi lou bena guba ai do idia mauri taudia ia herevalaia.)
Kamonai Taudia “Ia Gwauraia Maoromaoro”
8 Paulo ese Feliki ia hereva henia neganai, ia gwau mase taudia do idia toreisi lou, kara maoromaoro taudia bona kara maoromaoro lasi taudia danu. Kara maoromaoro taudia, mase amo do idia toreisi lou, be daidia? Taunimanima ta lasi ena kara korikori be maoromaoro vaitani. Ita ibounai be kara dika ai ita vara, bona iseda mauri lalonai ita kara dika loulou—anina be gau rua dainai ita mase be maoro. (Roma 5:12; 6:23) To, Baibel lalonai inai hereva, “gwauraia maoromaoro,” ita davaria. (Roma 3:24) Taunimanima haida ia gwauraidia unai, ena be idia be goevadae lasi, to Iehova ese edia kara dika ia gwauatao.
8, 9. (a) Edena dala amo goevadae lasi taudia be mai edia ahuna, kara maoromaoro taudia edia toreisi lou lalonai? (b) Dahaka dainai iseda helaro be mase ese do ia hadokoa lasi maurina do ita abia?
9 Baibel lalonai, horoa Keristani taudia, guba maurina ena helaro idia abia taudia, be unai bamona idia gwauraidia momo. Roma 5:1 ai aposetolo Paulo ia gwau: ‘Iseda abidadama dainai, Dirava ese maoromaoro taudia ita ia gwauraia vadaeni. Unai dainai Dirava danu maino ita abia, Iesu Keriso iseda Lohiabada dainai.’ Oibe, horoa Keristani taudia iboudiai be edia abidadama dainai Dirava ese maoromaoro taudia ia gwauraia. Dahaka idia abidadama henia? Roma bukana lalonai Paulo ia gwau, Iesu Keriso idia abidadama henia. (Roma 10:4, 9, 10) Iesu, tau goevadaena, ia mase bena unai murinai Dirava ese mase amo ia hatorea isi, bena ia daekau lao guba, iena tauanina ai ia abia maurina ena anina be ita dainai Dirava ia henia. (Heberu 7:26, 27; 9:11, 12) Iehova ese ena boubou ia abia dae neganai, anina be Iesu ese taunimanima be kara dika bona mase edia hesiai lao henia karana amo ia hoia. Unai idia abidadama henia taudia ese ia ena amo namo bada idia davaria. (1 Korinto 15:45) Ia dainai abidadama taudia be mai edia helaro mauri do idia abia, edia inaina, mase, ese do ia hadokoa lasi maurina unai.—Ioane 3:16.
10, 11. (a) Horoa Keristani taudia mai edia kamonai ese dahaka toreisi lou idia abia? (b) Keristani negana vairanai Iehova idia tomadiho henia taudia edia helaro be edena toreisi lou dekenai?
10 Iesu ena boubou, taunimanima edia mauri davalaia gauna, dainai, horoa taudia mai edia kamonai be Dirava ese maoromaoro taudia ia gwauraia dainai, edia helaro aukana be inai: Iesu hegeregerena, mase amo do idia toreisi lou bona doko diba lasi maurina be lauma ai do idia abia. (Apokalupo 2:10) Apokalupo 20:6 ese edia toreisi lou inai bamona ia gwauraia: “Inai toreisi lou ginigunana dekenai idia toreisi taudia be moale bona helaga momokani. Idia be Dirava ena taudia korikori. Mase iharuana be mai ena siahu lasi unai taudia dekenai. Idia be Dirava bona Keriso edia hahelagaia taudia. Bona lagani 1000 lalonai Keriso danu do idia lohia.” Guba ena toreisi lou be unai. To mani inai umui laloa: Baibel ese edia toreisi lou ia gwauraia “toreisi lou ginigunana.” Unai ese ia hahedinaraia ma haida be gabeai do idia toreisi lou.
11 Heberu karoa 11 ai, Paulo ese Keristani negana vairanai idia noho taudia, Iehova Dirava ena hesiai idia lao henia bona idia abidadama henia mai edia goada ida taudia unai, ia herevalaia. Idia danu ese toreisi lou herevana idia abia dae. Unai karoa ena Heb 11 siri 35 ai, Paulo ese idaunegai Israelana ai hoa dalanai idia toreisi lou taudia ia herevalaia, ia gwau: “Hahine danu ese edia mase taudia idia davaria lou, idia toreisi lou dainai. Haida be dibura ruma lalonai, vadaeni dibura ruma naria taudia ese idia dadabadia ela bona idia mase. Oibe, haida be mai edia mauri dalana bema dala maorona idia negea, to Dirava idia badinaia noho dainai, mase idia davaria. To mase idia laloa lasi, badina be idia diba, Dirava ena toreisi lou ena mauri namo herea do idia davaria.” Unai idaunegai witness taudia mai edia abidadama ese toreisi lou namo hereana idia laroa diba. Unai toreisi lou ese Elia bona Elisaia edia amo idia vara gaudia do ia hereaia. (1 King Taudia 17:17-22; 2 King Taudia 4:32-37; 13:20, 21) Edia helaro be mase amo do idia toreisi lou bona tanobada ai do idia noho. Unai neganai, Dirava ena hesiai taudia be edia abidadama dainai do idia hahisidia lasi, bona hahine be edia lalokau taudia ese do idia masetanidia lasi. Oibe, edia helaro be mase amo do idia toreisi lou bona tanobada matamatana, ita ese danu ita naria noho gauna, lalonai do idia mauri. (Isaia 65:17-25) Iehova ese unai tanobada matamatana ia gwauraia hedinarai sisina idia dekenai, to ita dekenai ia gwauraia hedinarai badabada. To, idia diba do ia vara, bona idia ura ia lalonai do idia noho.
Toreisi Lou Tanobada Ai
12 Keristani negana vairanai idia noho tataudia bona hahinedia mai edia abidadama be unai tanobada matamatana ai do idia noga lou, anina be kara maoromaoro taudia edia toreisi lou do idia abia, a? Toana be unai bamona, badina be Baibel ese ia gwauraidia kara maoromaoro taudia. Hahediba tauna Iamesi ese idaunegai idia noho taudia rua, tau ta bona hahine ta, Dirava ese ia gwauraidia maoromaoro taudia, ia herevalaia. Tau be Aberahamo, Heberu besena edia tubuna roboana. Iena sivarai be inai: “ ‘Aberahamo ese Dirava ia abidadama henia, bona iena abidadama dainai Dirava ia gwau ia be maoromaoro vadaeni.’ Unai dainai idia gwau Aberahamo be Dirava ena turana.” Hahine be Rahaba, Israel lasi hahinena; Iehova ia abidadama henia. “Dirava ena vairanai ia maoromaoro” bona Heberu besena hahinena ai ia lao. (Iamesi 2:23-25) Vadaeni, idaunegai tataudia bona hahinedia, Iehova bona ena gwauhamata idia abidadama henia vaitani bona ia idia badinaia ela bona mase taudia, be edia abidadama dainai Iehova ese maoromaoro taudia ia gwauraia, bona momokani, ‘kara maoromaoro taudia edia toreisi lou’ lalonai do idia toreisi lou.
13, 14. (a) Dahaka dainai ita diba tanobada helarona idia abia Keristani taudia be Iehova ese maoromaoro taudia ia gwauraia diba? (b) Unai ena anina be dahaka idia dekenai?
13 To, mamoe bamona taudia hari inai negai, edia mauri be Dirava dekenai idia gwauhamatalaia bona edia helaro be tanobada ai do idia noho taudia, bema inai nega dokona lalonai idia mase, kara maoromaoro taudia edia toreisi lou lalonai do idia toreisi lou, a? Toana be unai bamona. Mata hanai lalonai aposetolo Ioane ese unai bamona abidadama taudia hutuma ia itaia. Ia gwau: “Egu matana lau negea, taunimanima momo herea lau itaia, duahia diba lasi. Idia be bese idauidau, iduhu idauidau, kopina idauidau, bona gado idauidau. Idia ibounai be helai gabuna badana ena vairanai bona Mamoe ena Natuna vairanai idia gini. Edia dabua be kurokuro, bona edia imana dekenai pama au rauraudia idia dogoatao. Idia boiboi badabada, idia gwau, ‘Taunimanima hamauria siahuna be iseda Dirava ena, helai gabu badana dekenai ia helai Diravana. Inai siahu be Mamoe ena Natuna ena danu.’ ”—Apokalupo 7:9, 10.
14 Mani oi laloa, unai manau taudia idia diba vaitani mauri do idia abia, idia gwau Iehova bona Iesu, “Mamoe ena Natuna,” ese idia hamauridia. Idia be Iehova bona Mamoe ena Natuna edia vairanai idia gini, edia dabua be kurokuro. Dahaka dainai edia dabua be kurokuro? Guba tauna ta ese Ioane ia hamaoroa, ia gwau: “Edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro bona goeva momokani.” (Apokalupo 7:14) Baibel lalonai, kurokuro be kara goeva bona kara maoromaoro edia toana. (Salamo 51:7; Daniela 12:10; Apokalupo 19:8) Unai dainai, hutuma bada herea edia dabua be kurokuro, anina be Dirava ia laloa idia maoromaoro. Unai be edena bamona ia vara diba? Idia kara vadaeni, hegeregere edia dabua be Mamoe ena Natuna ena rarana ai idia huria bamona. Dirava ese maoromaoro taudia ia gwauraia bona ena turana ai ia halaoa, hisihisi badanana lalona amo do idia roho mauri totona, badina be Iesu Keriso ena rarana, ia bubua gauna, idia abidadama henia dainai. Unai dainai, idia gwauhamata vadaeni Keristani taudia mai edia kamonai, hutuma bada herea taudia unai, be idia diba momokani, hisihisi badana be ia do ginidae lasi neganai bema do idia mase, idia be kara maoromaoro taudia edia toreisi lou lalonai do idia toreisi lou, tanobada ai.
15. Kara maoromaoro taudia bona kara maoromaoro lasi taudia do idia toreisi lou, to dahaka dainai kara maoromaoro taudia do idia hekwarahi bada lasi?
15 Unai toreisi lou be Apokalupo karoa 20, siri 13 ese ia gwauraia; ia gwau: “Davara lalonai idia mase vadaeni taudia be davara ese idia ia henia daekau lou. Bona Mase, bona mase taudia edia gabu ese idia lalonai idia koua noho taudia idia henia daekau lou. Vadaeni idia danu be Kota Biaguna ese edia kara hegeregerena idia ia kota henia.” Anina be, Dirava ena Hahemaoro Dinana badana ena lagani 1,000 lalodiai, Dirava ese ia lalodia tao taudia iboudiai be do idia toreisi lou—kara maoromaoro taudia bona kara maoromaoro lasi taudia danu. (Kara 17:31) To, unai neganai kara maoromaoro taudia do idia kwalimu be haraga! Badina be guna idia ese Dirava idia abidadama henia. Guna idia ese Iehova idia tura henia bona idia diba momokani ia ese ena palani do ia hagugurudia. Kara maoromaoro witness taudia Keristani negana vairanai idia noho, be mase amo do idia toreisi lou neganai, do idia ura bada idia diba, Iehova ese ena gwauhamata Garana dekenai be edena bamona ia hamomokanidia. (1 Petero 1:10-12) Mamoe idaudia taudia, hari inai negai Iehova ese ia gwauraidia maoromaoro, be gara gabudia amo do idia raka lasi neganai, do idia ura bada tanobada Paradaisona, ena sivarai be hari inai negai idia harorolaia gauna, do idia itaia. Unai neganai moale bada do ia vara!
16. Iseda nega lalonai idia mase taudia edia toreisi lou Hahemaoro Dinana lalonai be edena bamona ita gwauraia diba?
16 Unai lagani 1,000 Hahemaoro Dinana lalonai, guna Satani ena tanobada ena lagani ginigabedia ai idia gini auka ela bona mase taudia be edena negai do idia toreisi lou? Baibel ese unai ia gwauraia lasi. To, Dirava ese ia gwauraidia maoromaoro bena hari inai negai idia mase taudia bema nega daudau lasi do idia toreisi lou, bena Aramagedono lalona amo idia roho mauri taudia hutuma bada ida do idia gini hebou, uru gunadia taudia be mase amo do idia toreisi lou neganai do idia abidia dae totona, unai do ita hoalaia lasi, ani?
Lalona Ia Hagoadaia Helarona
17 Toreisi lou helarona ese hari inai negai Keristani taudia iboudiai edia lalona ia hagoadaia. Bema Dirava ita badinaia noho, gau ta lasi eiava iseda inai tauna ta lasi ese iseda davana namona ita dekenai do ia koua diba! Lagani 1992 Yearbook of Jehovah’s Witnesses ena rau 177 ai, boga auka Keristani taudia Ethiopia ai, idia ura lasi edia abidadama do idia negea dainai idia mase taudia, edia laulau idia noho. Unai laulau henudiai inai hereva ia noho: “Ita laloa toreisi lou neganai do ita itadia taudia edia vairana.” Idia bona unai bamona taudia ma momo, Dirava idia badinaia noho ela bona mase taudia, do ita dibaia be hahenamo bada hereana!
17, 18. (a) Toreisi lou helarona ese iseda lalona edena bamona ia hagoadaia? (b) Unai dainai ita ese Iehova edena bamona ita gwauraia?
18 Ita siboda eda lalokau taudia bona eda turadia, hisihisi badana ia do ginidae lasi neganai buruka o gorere dainai idia mase taudia, be edena bamona? Toreisi lou helarona dainai, bema Dirava idia badinaia noho, edia vaira negana do ia namo herea. Bona bema ita danu ese Iesu ena boubou, mauri davalaia gauna, ita abidadama henia mai eda boga auka ida, eda vaira negana do ia namo herea. Badina be, Paulo hegeregerena, iseda helaro be “mase taudia dohore idia toreisi lou, kara maoromaoro taudia, bona kara maoromaoro lasi taudia danu.” Inai helaro dainai, Iehova ita tanikiu henia mai eda lalona ibounai ida. Momokani, unai dainai salamo torea tauna ena hereva ita gwauraia lou, ita gwau: “[Iehova] ena hairaina be bese idauidau ibounai dekenai, do umui gwauraia hedinarai. Iena kara badadia be idia ibounai dekenai do umui hadibaia. Lohiabada be mai ena ladana badana, inai ladana badana do ita abia isi noho be namo.”—Salamo 96:3, 4.
Oi Gwauraia Hedinarai Diba A?
◻ Edena siri ese idia hamomokania mase taudia momo be tanobada ai do idia toreisi lou?
◻ Dahaka dainai Dirava ese Keristani taudia be hari ia gwauraidia maoromaoro?
◻ Toreisi lou helarona ese iseda lalona edena bamona ia hagoadaia?
3. Lagani 1935 amo Dirava ena orea taudia ese dahaka gaukara idia goadalaia?
12. Keristani negana vairanai idia noho taudia mai edia kamonai be Iehova ese maoromaoro taudia ia gwauraia eiava? Mani oi gwauraia hedinarai.
[Picture on page 9]
Paulo hegeregerena, horoa Keristani taudia edia helaro be guba ena toreisi lou do idia abia