Iesu Ena Hoa Karadia—Idaunegai Sivarai o Gori?

“Vadaeni daba rere kahirakahira, dibura neganai, Iesu be idia dekenai ia lao, davara ena kopina dekenai ia raka.”​—Mataio 14:25.

TANOBADA taudia milioni momo idia abidadama Iesu Keriso be hoa karadia ia karaia, Dirava idia abidadama henia bada hegeregerena. Evanelia buka idia torea taudia​—Mataio, Mareko, Luka, bona Ioane​—ese Iesu ena hoa karadia 35 bamona idia herevalaidia. To, idia torea sivarai ese idia hahedinaraia ia ese hoa karadia sisina momo ia karaia.​—Mataio 9:35; Luka 9:11.

Unai hoa karadia be taunimanima hamoalea totona ia karaia lasi. Idia hamomokania Iesu be Dirava ena Natuna, nega daudau lalonai idia naria Mesia unai. (Ioane 14:11) Mose be igui hesiai Israela besena dekenai ia lao neganai hoa karadia ia karaia. (Esodo 4:​1-9) Unai hegeregerena, idia perovetalaia Mesia, Mose ia hanaia tauna, ese Dirava ena heduru amo toa haida do ia karaia danu. (Deuteronomi 18:15) Unai dainai Baibel ese Iesu ia gwauraia, ‘Dirava ese [Iuda taudia] dekenai ia siaia hedinaraia, bona siahu kara bona hoa kara bona toa kara umui emui huanai ia karaia.’​—Kara 2:22.

Guna negadia ai, Baibel ese Iesu ia gwauraia hoa karadia karaia tauna be taunimanima ese idia abia dae. To vanegai lagani lalodiai, taunimanima ese Evanelia bukadia edia hereva idia hakoikoia toho. Lloyd Graham ena buka ladana Deceptions and Myths of the Bible lalonai, Baibel ese Iesu be ranu latanai ia raka ena sivarai ia gwauraia. Ia gwau: “Lalo-duhu taudia ese unai sivarai do idia abia dae momokani, bona taunimanima milioni momo ese unai sivarai idia abia dae. Unai kara dainai iseda tanobada be ia dika. Tanobada namona be edena bamona ia vara diba inai lalo-duhu tanobadana amo?”

Ia Vara Diba Lasi, A?

To, unai hereva be idia maoro lasi. The World Book Encyclopedia ese hoa kara ena anina inai bamona ia gwauraia, “ia be vaia tanobada dekenai idia vara gaudia edia kara hegeregerena lasi dainai ita gwauraia hedinarai diba lasi.” Unai anina be lagani 100 gunanai, TV mai ena kala danu, bona oi abia loaloa diba telefon, eiava huaia loaloa diba kompiuta maragina be hoa gaudia! Unai dainai bema hari ita diba saiens aonega amo kara ta ita lalo-pararalaia diba lasi dainai, ita gwau ia vara diba lasi be maoro, a?

Ita laloa gauna ma ta be inai: “Taravatu Matamata” be Greek gado korikorina ai idia torea bona “hoa karadia” idia gwauraia neganai, Greek hereva dyʹna·mis​—anina be “siahu” idia torea. Idia gwauraia anina ma haida be “hoa kara karaia siahuna” eiava “diba.” (Luka 6:19; 1 Korinto 12:10; Mataio 25:15) Baibel ia gwau Iesu ena hoa karadia ese “Dirava ena siahu” idia hahedinaraia. (Luka 9:43) Siahu ibounai Diravana​—“iena siahu be bada herea” Diravana ese unai bamona kara ia karaia diba, ani?​—Isaia 40:26.

Idia Hamomokania Gaudia

Evanelia Buka hani ita stadilaia namonamo neganai, hamomokania gaudia haida ita davaria, ita abidadama henidia momokani totona. Badina ta be, edia sivarai be gori amo idia idau. Iesu ia mase murinai, lagani momo lalodiai idia kikilaia sivarai koikoidia haida mani oi laloa. Guna idia torea gori ta ladana “Toma ena Evanelia” bukana ia gwau: “Iesu ena mauri lagani be ima neganai . . . , hanua lalonai ia raka noho lalonai, mero maragina ta ia heau mai bona ena pagana dekenai ia bampaia. Iesu ia badu dikadika bona unai mero dekenai ia gwau: ‘Do oi raka lao noho diba lasi’, bena unai mero ia moru bona ia mase.” Unai sivarai ita duahia neganai ita diba ia be gori sibona. Bona unai sibona lasi, idia gwauraia kara dika haraga merona be Baibel ese ia gwauraia merona, Iesu amo ia idau.​—Luka 2:​51, 52 itaia.

Mani Evanelia buka edia sivarai momokanidia ita laloa. Edia sivarai lalonai koikoi hereva ta be lasi. Iesu ese sibona ena ura hagugurua haraga totona hoa karadia ia karaia lasi, to mai edia badina dainai ia karaia. (Mareko 10:​46-52) Iesu ese ena siahu ia gaukaralaia lasi sibona ena namo tahua totona. (Mataio 4:​2-4) Bona ia gaukaralaia lasi ia heagi totona. Pavapava Heroda ia ura Iesu ese ia totona hoa dalanai “toa” ta do ia karaia dainai ia nanadaia neganai, Iesu “be ia haere henia lasi.”​—Luka 23:​8, 9.

Iesu ena hoa karadia be aonega taudia ese taunimanima idia koia karadia, meamea bona abidadama amo gorere idia hanamoa karadia amo idia idau. Nega ibounai iena hoa karadia ese Dirava idia hanamoa. (Ioane 9:3; 11:​1-4) Iena hoa karadia lalonai ia taitai bona lolo lasi, meamea herevadia ia gwauraia lasi bona ia heagi lasi. Ia ese, koikoi karadia eiava taunimanima ia hamahutadia bena ia hereva gaudia idia karaia karana ia karaia lasi. Iesu ese matakepulu tauna ladana Batimeo ia davaria neganai, Batimeo ia boiboi ia gwau, “Hadibaia tauna e, lau ura lauegu matana oi kehoa.” Iesu be inai bamona ia hereva: “ ‘Oi lao, oiemu abidadama dainai mauri oi davaria vadaeni.’ Nega tamona iena matana idia kehoa.”​—Mareko 10:​46-52.

Evanelia edia sivarai ese idia hahedinaraia Iesu ena siahu gaukara ia karadia neganai, laiti idauidau eiava koikoi karadia haida ia hegaegaelaia guna lasi. Nega momo taunimanima momo ese idia itaia gabuna dekenai ia karaia. (Mareko 5:​24-29; Luka 7:​11-15) Iesu be hari inai nega abidadama amo gorere idia hanamoa toho taudia bamona lasi; Iesu ese gorere taudia ibounai ia hanamodia. Mataio 8:16 ia gwau: “gorere taudia idauidau ibounai danu ia hanamoa.”

Aonega tauna Arthur Pierson ena buka, “Many Infallible Proofs:” The Evidences of Christianity lalonai, Iesu ena hoa karadia ia herevalaia, ia gwau: “Idia be momo, gorere taudia ia hanamodia haraga, ta ia reaia lasi, bona mase taudia danu ia hatoredia isi lou; unai ibounai ese guna bona hari inai nega lalonai idia vara hoa karadia idia hanaia.”

Hamomokania Hereva Haida

Pierson ena hereva ese Evanelia buka edia sivarai ia hamomokania, ia gwau: “Unai hoa karadia idia vara momokani badina ia hamomokania gauna ta be ena inai taudia be unai hoa karadia edia sivarai idia hakoikoia diba lasi.” Iuda bese gunalaia taudia idia ura Iesu ena kara idia hakoikoia, to taunimanima momo ese ena hoa karadia idia diba dainai, idia hakoikoia diba lasi. Unai dainai idia gwau unai hoa karadia be demoni edia siahu amo ia karaia. (Mataio 12:​22-24) Iesu ia mase bena lagani momo idia orea murinai, Iuda taudia edia Talmud buka lalonai idia gwau Iesu be mai ena siahu unai hoa karadia ia karaia. Buka ladana  Jewish Expressions on Jesus, lalonai idia gwau “ia be meamea karadia ia karaia tauna.” Bema Iesu ena hoa karadia idia gwauraia gori sibona, dahaka dainai unai bamona idia hereva?

Hamomokania gauna ma ta be lagani 300 ia lao 399 C.E. lalonai, dubu ena histori ia torea tauna Eusebius ese ia torea. Ena buka The History of the Church From Christ to Constantine lalonai, ia ese Quadratus ena revareva, pavapava Hadrian dekenai ia torea, Keristen tomadiho ia durua totona, ia herevalaia. Quadratus ena revareva ia gwau: “Iseda Hahemauri Tauna ena kara be nega ibounai taunimanima ese idia itaia, badina idia vara momokani​—taunimanima ese idia itaia lasi gorere amo ia hanamodia bona mase amo ia hatoredia isi neganai, to idia noho hanaihanai ita itaia totona, iseda Hahemauri Tauna ia noho negana ema bona Ia daekau lao; haida be idia mauri noho ela bona lauegu mauri negana.” Aonega tauna William Barclay ia gwau: “Quadratus be ia gwau Iesu ese idia dekenai hoa karadia ia karaia taudia be iena nega lalonai idia mauri noho bona taunimanima ese idia itadia diba hamomokania totona. Vadaeni, bema unai be momokani lasi, Roma gavamani ese haraga herea unai hoa karadia ia gwauraia koikoi.”

Iesu ena hoa karadia edia sivarai ita abidadama henidia diba bona unai be maoro, badina idia hamomokania gaudia danu idia hegeregere. Bona Iesu ena hoa karadia be mai edia anina hari iseda nega totona. Heberu 13:8 ia gwau: “Iesu Keriso be varani bona hari ia idau lasi. Bona do ia idau lasi, ela bona hanaihanai.” Oibe, hari Iesu be guba dekenai ia mauri noho. Bona guna, taunimanima bamona, tanobada dekenai ia noho neganai ia karaia lasi hoa karadia badadia, do ia karaia. Unai sibona lasi to Evanelia bukadia ese Iesu ena hoa karadia idia sivarailaia neganai, idia ese (1) Keristani taudia dekenai kara namodia idia hahedinaraia, bona (2) Iesu ena kara ia hahedinaraia, bona (3) hoa karadia badadia do idia vara negana ia mai kahirakahira idia herevalaia!

Baibel ena sivarai toi, unai gau toi idia hahedinaraia sivaraidia, be gabeai herevana ese do ia herevalaidia.