Ena be Eda Lalona Idia Hisihisi, to Ita be mai Eda Helaro

“Ia namo lasi umui be lalohisihisi bada, Keristani lasi taudia bamona. Idia ese Dirava idia abidadama henia lasi, bona idia ese mase amo toreisi lou mauri totona idia naria lasi.”​—1 TESALONIKA 4:13.

1. Taunimanima be dahaka idia davaria loulou?

EMU lalokau tauna ta ia mase vadaeni, a? Herevana iseda mauri laganidia be hida, ita momo be eda varavara ta o eda turana ta ena mase ita lalohisihisilaia vadaeni. Reana unai be ita ta ena tubuna, o ena tamana o sinana, o ena adavana, o ena natuna. Momo be buruka, o gorere, o aksiden dainai idia mase. Raskol karadia, dagedage, bona tuari ese lalohisihisi idia habadaia. Lagani ta ta iboudiai taunimanima 50 milioni bamona idia mase. Lagani 1993 lalonai dina ta ta idia mase taudia edia averes be 140,250. Mase taudia edia varavara bona edia turadia ese idia lalohisihisilaia bada.

2. Dahaka dainai natu edia mase be idau?

² Rogorogo hahinena ta, motuka ena aksiden dekenai ia mase hahinena, ena tamana sinana California U.S.A. dekenai be ita hebogahisi henia, ani? Unai neganai edia natuna hahinena tamona bona edia tubuna roboana idia boio. Tau ta ena adavana bona ena natuna roboana idia boio unai. Herevana natu ta ia do matamata eiava ia bada vadaeni, to ia ese ena tamana sinana be mase dekenai ia gunalaia be maoro lasi. Ita ibounai ese mauri ita ura henia. Unai dainai, mase be momokani iseda inai gauna.​—1 Korinto 15:26.

Mase Ia Vareai

³ Iseda tubuna roboadia, Adamu bona Heva, idia gwau-edeede negana amo, lagani 6,000 bamona lalodiai, kara dika bona mase ese taunimanima idia lohiaia. (Roma 5:14; 6:​12, 23) Edia natuna Abela be ena kakana Kaino ese ia alaia mase neganai idia abia mamina be Baibel ese ia herevalaia lasi. To, momokani, unai idia lalohisihisilaia bada. Taunimanima ta ena mase idia itaia, nega ginigunana; sibodia edia natuna ena unai. Edia gwau-edeede bona ura-kwalimu gaukaralaia kerere noho karana edia anina idia itaia unai. Ena be Dirava ese Kaino ia sisiba henia, to ena tadina ia alaia mase. Ita diba Heva ese Abela ena mase ia lalohisihisilaia bada, badina be Seta ia havaraia neganai, ia gwau: “Dirava ese natuna ta lau dekenai ia henia vadaeni, Abela, Kaino ese ia alaia tauna ena gabu do ia abia totona.”​—Genese 4:​3-8, 25.

4. Dahaka dainai mase diba lasi soulina herevana koikoina ese edia lalona ia hanamoa diba lasi, Kaino ia mase murinai?

⁴ Iseda tubuna roboadia ese danu Dirava ena hahemaoro herevana idia latanai ena anina korikorina idia itaia​—ia hamaorodia vadaeni, bema idia kamonai lasi do idia “mase momokani.” Ena be Satani ese ia koidia, to mase diba lasi soulina herevana be ia do hedinarai lasi dainai, unai ese edia lalona ia hagoadaia koikoi lasi. Dirava ese Adamu ia hamaoroa vadaeni, ia gwau: “Tano dekenai do oi giroa lou, badina be tano dekena amo oi mai. Oi be tano dekena amo karaia gauna, bona tano dekenai do oi giroa lou.” Mauri gabena, mase diba lasi soulina ta bamona, guba, o hel, o Limbo o pegatori dekenai do ia abia maurina, be ia hamaorolaia lasi. (Genese 2:17; 3:​4, 5, 19) Adamu bona Heva be mauri soulidia; idia kara dika dainai do idia mase bona do idia ore. King Solomona be Dirava ena lauma ese ia hasiahua dainai ia torea herevana be inai: “Mauri taudia idia diba do idia mase, to mase taudia be gau ta idia diba lasi. Idia be mai edia ahuna lasi, bona taunimanima ese mase taudia idia laloaboio momokani. Inai mase taudia edia lalokau, edia badu, bona edia mama be idia ore momokani, bona tanobada dekenai idia karaia noho karadia ibounai edia huanai, be kara ta do idia karaia lou lasi.”​—Hadibaia Tauna 9:​5, 6.

5. Helaro korikorina mase taudia totona be dahaka?

⁵ Unai hereva be momokani! Daika ese ena sene taudia, lagani 200 o 300 gunanai idia noho taudia, ia laloatao? Idia momo edia gara gabudia be nega daudau lalonai ta ese ia laloa lasi o ia naria lasi. Anina be iseda lalokau taudia, idia mase vadaeni taudia, do idia mauri lou dalana be lasi, a? Lasi vaitani. Lasaro ia mase murinai, ena taihuna Mareta ese ia herevalaia Iesu dekenai, ia gwau: “Lau diba dina gabeai, toreisi lou dinana neganai, do ia toreisi lou.” (Ioane 11:24) Ena be Heberu taudia idia laloa nega vairai Dirava ese mase taudia do ia hatorea isi lou, to edia lalokau taudia edia mase idia lalohisihisilaia.​—Iobu 14:13.

Taunimanima mai Edia Kamonai ese Mase Idia Lalohisihisilaia

⁶ Lagani 4,000 bamona idia lao vadaeni, Aberahamo ena adavana Sara ia mase neganai, “Aberahamo be ruma dekenai ia raka vareai, Sara totona ia taitai.” Unai tau, Dirava ena hesiai tauna mai ena kamonai bona mai ena boga-auka, be ena adavana lalokauna, ia ia badinaia hahinena, ena mase ia lalohisihisilaia bada dainai, ia taitailaia mai ena hemarai lasi.​—Genese 14:​11-16; 23:​1, 2.

6, 7. Mase dainai Aberahamo bona Iakobo be edena bamona idia kara?

⁷ Iakobo ena sivarai be unai bamona. Idia koia, idia gwau ena natuna Iosepa be uda boromana ta ese ia alaia mase. Unai neganai edena bamona ia kara? Genese 37:​34, 35 ia gwau: “Iakobo ese iena dabua ia darea, dabua korema ia kwatua, iena lalohisihisi toana unai. Iena natuna totona dina bona hanuaboi ia taitai ia lao dina momo. Vadaeni iena natuna tatau bona hahine ibounai idia lao ia dekenai, iena lalona idia hanamoa totona. To ia ura lasi iena lalona do idia hanamoa, vadaeni ia tai mai boiboi danu, ia gwau, ‘Lasi. Lauegu natuna dekenai mase gabuna dekenai dohore lau lao, mai tai danu.’ Ia taitai noho unai bamona, iena natuna totona.” Oibe, taunimanima edia kara korikori be, edia lalokau tauna ta ia mase neganai edia lalohisihisi ena toana idia hahedinaraia.

8. Nega momo Heberu taudia be edena bamona idia hahedinaraia mase idia lalohisihisilaia?

⁸ Reana hari inai negai haida idia laloa Iakobo ese ena lalohisihisi ena toana ia habadaia koikoi. To ia be idaunegai tauna ta, bona ena bese edia kastom be unai. Ena lalohisihisi hahedinaraia totona puse dabuana ia karaia​—unai kara be Baibel lalonai idia sivarailaia negana ginigunana be unai. To, Heberu Revarevadia ese idia gwauraia bamona, idia ese danu idia taitai badabada, lalohisihisi anedia idia abia, bona kahu dekenai idia helai. Heberu taudia ese edia lalohisihisi hahedinaraia karadia momokanidia idia hemarailaia lasi.a​—Esekiela 27:​30-32; Amosa 8:10.

Lalohisihisi, Iesu Ena Negai

⁹ Iesu ena hahediba taudia ginigunadia be edena bamona? Lasaro ia mase neganai, iena taihuna ruaosi Mareta bona Maria ese ena mase idia taitailaia. Tau goevadaena Iesu ia ginidae neganai, edena bamona ia kara? Ioane ia gwau: “Maria be Iesu ia noho gabuna dekenai ia ginidae, ia itaia, vadaeni ia ese Iesu ena aena badinai iena kwarana ia atoa diho, ia gwau, ‘Lohiabada e, iniseni bema oi noho, be egu taihuna ia mase lasi.’ Maria bona inai Iuda taudia ia danu idia raka hebou, be idia taitai, vadaeni Iesu ese idia ia itaia, be iena lalona ia hisihisi bada, mamina ia abia momokani. Vadaeni ia henanadai, ia gwau, ‘Edeseni umui atoa?’ Idia haere, idia gwau, ‘Lohiabada e, oi mai, oi itaia.’ Iesu ia tai.”​—Ioane 11:​32-35.

9, 10. (a) Lasaro ena mase dainai Iesu be edena bamona ia kara? (b) Unai kara dainai ita diba ia be edena bamona tauna?

¹⁰ “Iesu ia tai.” Unai hereva ese idia hahedinaraia momokani Iesu be mamina ia abia mai ena hebogahisi ida. Ena be toreisi lou helarona ia diba momokani, to “Iesu ia tai.” (Ioane 11:​35, King James Version) Idia itaia taudia idia gwau: “Umui itaia, ia ese [Lasaro] ia lalokau henia bada.” Momokani, bema tau goevadaena Iesu be ena turana ena mase dainai ia tai, hari inai negai tau ta o hahine ta be unai bamona ia kara be hemarai karana lasi.​—Ioane 11:36.

Mase Taudia Dainai Ita Abia Helarona be Dahaka?

¹¹ Unai sivarai Baibel lalonai ese dahaka ita idia hadibaia? Gauna be inai: Mase lalohisihisilaia be taunimanima edia kara korikori, bona iseda lalohisihisi hahedinaraia karadia ita hemarailaia lasi be namo. Ena be toreisi lou ita naria, to iseda lalokau tauna ta ena mase lalohisihisilaia mamina ita abia momokani. Ena hebamo, nega daudau ita moalelaia gauna, be dala dikana dekenai ia doko haraga. Momokani, helaro lasi taudia o helaro kerere taudia hegeregeredia ita lalohisihisi bada lasi. (1 Tesalonika 4:13) Inai danu, mase diba lasi soulina o mauri abia loulou karana goridia ese ita idia koia lasi. Ita diba Iehova ese ‘guba matamata bona tanobada matamata, kara maoromaoro do ia noho’ gabudia, be ia gwauhamatalaia vadaeni. (2 Petero 3:13) Dirava ese “matana ranu ibounai [iseda] matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—Apokalupo 21:4.

12. Paulo be edena bamona ia hahedinaraia toreisi lou herevana ia abia dae?

¹² Dahaka helaro mase taudia totona be ia noho?b Keristani toretore tauna Paulo be Dirava ese ena lauma amo ia hasiahua, iseda lalona do ia hagoadaia bona helaro namona ita do ia henia; unai neganai ia torea herevana be inai: “Ia dekenai idia tuari taudia ibounai ia ese ia haorea murinai, Dirava ese mase danu do ia haorea.” (1 Korinto 15:26) The New English Bible ia gwau: “Do ia haorea vaitani inai ginigabena be mase.” Badina be dahaka Paulo be unai ia diba momokani? Badina be Dirava ese mase amo ia hatorea isi tauna, Iesu Keriso, ese Paulo ena lalona ia giroa bena ia hadibaia dainai. (Kara 9:​3-19) Unai dainai Paulo ia gwau diba: “Badina be tau tamona [Adamu] dekena amo mase ia vara, bona inai bamona danu, tau tamona [Iesu] dekena amo mase dekena amo toreisi lou ia vara. Badina be taunimanima ibounai Adamu dainai idia mase vadaeni, unai bamona danu Keriso idia abidadama henia dainai ibounai do idia mauri.”​—1 Korinto 15:​21, 22.

13. Lasaro ena toreisi lou idia itaia taudia be edena bamona idia kara?

¹³ Iesu ena hahediba herevana dainai iseda lalona idia goada bona ita be mai eda helaro namona. Hegeregere, Lasaro dainai dahaka ia karaia? Lasaro ena guri gabuna, iena tauanina be dina 4 ia noho gabuna, dekenai ia lao. Ia guriguri, bena “ia boiboi bada herea, ia gwau, ‘Lasaro e, oi mai murimuri dekenai.’ Vadaeni mase tauna be ia raka murimuri dekenai, iena aena bona imana idia kumia dabua bona iena vairana idia kumia dabua be iena tauanina dekenai idia do noho. Iesu ia gwau, ‘Kumia dabua umui kokia, umui rakatania.’ ” Mani oi laloa, unai neganai Mareta bona Maria idia hoa bona idia moale bada, ani? Bona edia dekena taudia idia hoa bada, unai hoa karana idia itaia neganai! Idia itaia taudia momo ese Iesu idia abidadama henia, to tomadiho dainai idia inai henia taudia ese “alaia mase totona dala idia tahua.”​—Ioane 11:​41-53.

¹⁴ Iesu ese unai hatorea isi karana be taunimanima momo vairadiai ia karaia, bena idia laloaboio diba lasi. Unai be guna ia perovetalaia toreisi louna ena toana; unai neganai ia gwau: “Inai kara dekenai do umui hoa lasi. Badina be nega ta do ia mai, mase guria gabu dekenai idia noho taudia ibounai ese [Dirava ena Natuna ena] gadona do idia kamonai. Vadaeni guria gabu dekena amo do idia toreisi, kara namo taudia ese do idia toreisi mauri hanaihanai totona, to kara dika taudia do idia toreisi kota henia totona.”​—Ioane 5:​28, 29.

15. Dahaka dainai Paulo bona Anania idia diba Iesu ia toreisi lou vadaeni?

¹⁵ Ai hereva vadaeni bamona, aposetolo Paulo be toreisi lou herevana ia abia dae. Dahaka dainai? Guna ia be Saulo. Unai neganai, Keristani taudia ia dagedage henia dainai idia gari henia. Keristani tauna Stefano idia hodoa mase neganai, unai ia ura henia, ani? (Kara 8:1; 9:​1, 2, 26) To, Damaseko ena dala dekenai, ia toreisi lou vadaeni tauna, Keriso, ese Saulo ena lalona ia hapararaia bona ena matana ia hakepuludia. Saulo ese gado ta ia kamonai, ia gwau: “ ‘Saulo e, Saulo e, badina dahaka lau dekenai oi dagedage noho?’ Ia haere, ia gwau, ‘Lohiabada e, oi be daika?’ Bona ia gwau, ‘Lau be Iesu, oi ese lau dekenai oi dagedage noho.’ ” Bena ia toreisi lou tauna, Keriso, ese Damaseko dekenai ia noho tauna ta ladana Anania ia hadibaia Saulo be ruma ta dekenai ia guriguri noho, ma ia hagania unai ruma dekenai do ia lao bona ena matana do ia hanamodia lou. Unai dainai Saulo bona Anania ese toreisi lou herevana idia abia dae diba.​—Kara 9:​4, 5, 10-12.

16, 17. (a) Dahaka dainai ita diba Paulo ese Greek taudia edia lalohadai, taunimanima ena mase diba lasi soulina lalohadaina, ia abia dae lasi? (b) Baibel ese dahaka helaro korikorina ita ia henia? (Heberu 6:​17-20)

¹⁶ Gabeai, Saulo, aposetolo Paulo unai, be Keristani tauna dainai, idia dagedage henia. Gavana Feliki vairanai idia samania neganai ia haere dalana be mani oi laloa. Kara 24:15 dekenai ia gwau: “Lau be mai egu abidadama Dirava dekenai . . . Mase taudia dohore idia toreisi lou, kara maoromaoro taudia, bona kara maoromaoro lasi taudia danu.” Unai neganai Greek taudia idia laloa taunimanima ta ia mase murinai ena mase diba lasi soulina be mauri gabena lalonai ia vareai o tano henunai ia diho, to Paulo ese unai lalohadai ia abia dae lasi. Toreisi lou herevana ia abia dae bona ia hahedibalaia. Toreisi lou dainai, haida be lauma ai do idia lao bona doko diba lasi maurina be guba dekenai do idia abia Keriso ida, bona momo be tanobada goevadaena dekenai mauri do idia abia lou.​—Luka 23:43; 1 Korinto 15:​20-22, 53, 54; Apokalupo 7:​4, 9, 17; 14:​1, 3.

¹⁷ Baibel ese ita unai bamona ia gwauhamata henia goevagoeva dainai, iseda helaro momokanina be, toreisi lou amo momo ese edia lalokau taudia be tanobada dekenai do idia itaia lou, nega idau hereana lalonai.​—2 Petero 3:13; Apokalupo 21:​1-4.

Lalohisihisi Taudia Durua Momokani Dalana

¹⁸ Hari ita ese mase taudia ita laloatao bona ita lalohisihisilaia. Inai be edena bamona do ita haheaukalaia diba? Ma haida ese lalohisihisi taudia edena bamona do idia durudia diba? Inai danu, lalo-momokani taudia, mai edia helaro lasi bona mase idia lalohisihisilaia taudia, bema iseda haroro gaukarana lalonai ita davaria, edena bamona do ita durudia? Bona Baibel ese dahaka hereva ma haida amo iseda lalona ia hagoadaia, iseda lalokau taudia edia mase do ita haheaukalaia totona? Hereva gabena lalonai unai do ai herevalaia.

[Footnotes]

Oi Haere Diba A?

◻ Dahaka dainai ita gwau mase be iseda inai gauna?

◻ Baibel negadiai Dirava ena hesiai taudia ese edia lalohisihisi be edena bamona idia hahedinaraia?

◻ Iseda helaro mase taudia dekenai be dahaka?

◻ Badina be dahaka Paulo ese toreisi lou herevana ia abia dae?

3. Abela ena mase dainai reana Adamu bona Heva edia hemami be edena bamona?

11. (a) Mase taitailaia karadia sivaraidia Baibel lalonai ese dahaka ita idia hadibaia? (b) Dahaka dainai ita lalohisihisi bada lasi, helaro lasi taudia hegeregeredia?

14. Lasaro ena toreisi lou be dahaka ena toana?

18. (a) Dahaka heduru gauna namona be “Dirava Gari Henia” Hebouheboudia dekenai idia halasia? (Maua itaia.) (b) Dahaka henanadai do ita haerelaidia be namo?

[Box on page 8 and 9]

Lalohisihisi Taudia Durua Momokani Dalana

Lagani 1994 bona 1995 lalonai, “Dirava Gari Henia” Hebouheboudia ai, Watch Tower Society ese buklet matamatana ladana Oiemu Lalokau Tauna ta Ia Mase Neganai idia halasia. Idia torea, bese idauidau bona gado idauidau taudia iboudiai edia lalona hagoadaia totona. Mase ena anina be Baibel ena hereva haragadia amo ia gwauraia hedinarai. Unai ia hereaia gauna be inai: Ia ese Dirava ena gwauhamata ta, Iesu Keriso ena amo ia halasia gauna, ia hahedinaraia goevagoeva; unai gwauhamata be, mase taudia do idia toreisi lou bena paradaiso tanobadana goevana dekenai do idia mauri noho. Hari buklet ese mase idia lalohisihisilaia taudia edia lalona ia hagoadaia momokani. Unai dainai, iseda Keristani haroro gaukarana lalonai do ita gaukaralaia diba. Taunimanima edia lalona do ia veria, bena unai dainai Baibel stadi ma momo do ita karaia diba. Stadi henanadaidia be buklet ena kahana ta ta edia dokona kahanai idia atoa; unai henanadai amo, mase ia lalohisihisilaia tauna ida unai buklet ena hereva do umui herevalaia lou haraga diba.

[Picture on page 8]

Lasaro ia mase neganai, Iesu ia tai

[Picture on page 9]

Iesu ese Lasaro be mase amo ia hatorea isi

[Picture Credit Line on page 7]

First Mourning, by W. Bouguereau, from original glass plate in Photo-Drama of Creation, 1914