‘Durua Ibounai Henia Diravana’ ese Ita Ia Durua
“Dirava, iseda Lohiabada Iesu Keriso ena Tamana ita hanamoa. Ia be iseda Tamana, bona bogahisihisi bona durua ibounai ia henia Diravana. Aiemai hisihisi ibounai lalonai ia ese ai ia durua noho.”—2 KORINTO 1:3, 4.
1, 2. Mase idia lalohisihisilaia taudia be edena bamona idia hagoadadia be namo?
MASE idia lalohisihisilaia taudia edia lalona be haida ese idia hagoadaia momokani be namo. Inai hereva, ‘nega ese bero do ia hanamodia,’ ese unai bamona ia lalohisihisi matamaia tauna ena lalona ia hagoadaia lasi, ani? Ena be Keristani taudia idia diba Dirava ese toreisi lou ia gwauhamatalaia, to ia mase haraga tauna idia lalohisihisilaia bada. Bona, bema emu natuna ta ia mase, ena be haida idia do mauri noho, to emu lalona ia hegeregere lasi.
2 Mase ita lalohisihisilaia neganai, haida ese Dirava ena gwauhamata amo ita idia hagoadaia momokani bona idia hebogahisi henia be namo. Rwanda taudia be unai heduru idia abia be namo, bona unai be mai anina bada, Iehova ena Witness taudia edia famili momo herea dekenai, madi edia lalokau taudia be unai ala-ala dika rohorohona lalonai idia mase. Lalohisihisi taudia iboudiai be daika ena amo goada idia abia diba?
Iehova—Goada Henia Diravana
3 Taunimanima edia lalona hagoadaia dalana be Iehova ese ia hahedinaraia. Ia sibona ese ia havaraia Natuna tamona, Keriso Iesu, ia siaia tanobada dekenai, iseda lalona do ia hagoadaia hanaihanai bona helaro namona ita do ia henia totona. Iesu ia gwau: “Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioane 3:16) Ena orea taudia ia hamaoroa, ia gwau: “Lalokau namo herea momokani be inai, tau ta ese ena mauri do ia atoa diho, iena turana totona.” (Ioane 15:13) Ma nega ta ia gwau: “Taunimanima ena Natuna bamona, ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai, bona iena mauri do ia atoa diho, taunimanima momo edia dika davana karaia totona.” (Mataio 20:28) Bona Paulo ia gwau: “Dirava ese iena lalokau badana ia hedinaraia ita dekenai, badina ita be do kara dika noho taudia neganai, Keriso be ita dainai ia mase.” (Roma 5:8) Inai siri bona ma siri momo amo, ita ese Dirava bona Keriso Iesu edia lalokau ita lalo-pararalaia.
4. Dahaka dainai aposetolo Paulo ese Iehova ia tanikiu henia bada be maoro?
4 Aposetolo Paulo be Iehova ena hebogahisi ia diba momokani. Lauma dalanai ia mase bona Keriso ena orea taudia ia dagedage henidia noho lalonai, ia ese ia hamauria bona Keristani tauna ai ia halaoa, bena haida ese idia dagedage henia. (Efeso 2:1-5) Ia gwau: “Aposetolo ibounai ese lau idia hereaia, lau be namo lasi aposetolo tauna lau idia gwauraia. Badina be Dirava ena ekalesia oreana lau dagedage henia. To Dirava ena hariharibada dainai, lau be harihari aposetolo dagi lau karaia noho. Bona lau dekenai ia henia hariharibada be ia henia kava lasi, badina be gaukara bada herea lau karaia vadaeni, aposetolo taudia ibounai lau hereaia vadaeni. To inai be lauegu goada dekenai lasi, Dirava ena hariharibada be lau danu ia noho, ia ese ia karaia.”—1 Korinto 15:9, 10.
5. Paulo ese Dirava ena heduru edena bamona ia gwauraia?
5 Unai dainai Paulo ia gwau: “Dirava, iseda Lohiabada Iesu Keriso ena Tamana ita hanamoa. Ia be iseda Tamana, bona bogahisihisi bona durua ibounai ia henia Diravana. Aiemai hisihisi ibounai lalonai ia ese ai ia durua noho. Unai dainai hisihisi idia abia noho taudia be ai ese ai durua diba. Dirava ese ai dekenai ia henia durua, be ai ese ma ai henia noho idia dekenai. Badina be Keriso danu hisihisi ita abia ena bada hegeregerena, Dirava ena durua ita abia danu ia bada, Keriso dainai. Bema hisihisi ai davaria neganai, inai be umui do ai durua, bona mauri do umui abia totona. Bona bema Dirava ese ai ia durua neganai, inai be ai ese umui do ai durua totona. Bema metau bona hisihisi lalonai umui gini goada, ai ese ai gini goada hegeregerena, Dirava ese umui do ia durua. Unai dainai ai daradara lasi, to ai diba momokani aiemai hisihisi hegeregerena umui abia bamona, Dirava dekena amo ai abia durua, be umui danu do umui abia.”—2 Korinto 1:3-7.
6. Greek gado herevana ta, unai siri lalodiai “durua” be ia ida idia hahegeregerea herevana, ena anina be dahaka?
6 Hagoadaia herevadia unai! Idia lalonai inai hereva “durua” be Greek gado herevana ta ida idia hahegeregerea; ena anina be, “ta be hetoho auka hereana ia davaria neganai, ma ta be ia badinai ia gini, ena lalona ia hagoadaia totona.” (A Linguistic Key to the Greek New Testament) Baibel tahua namonamo tauna ta ia gwau: ‘Nega ibounai unai hereva ena anina be hebogahisi sibona lasi. . . . Keristani heduruna ese boga auka ia havaraia; ia dainai tau ta ese hekwarahi iboudiai ia haheaukalaia diba.’ Unai heduru lalonai be lalona hagoadaia herevadia—toreisi lou gwauhamatana bona helarona herevadia unai.
Iesu Bona Paulo ese Idia Hagoadadia mai Edia Hebogahisi Ida
7 Paulo ese haida edia lalona ia hagoadaia namo herea! Tesalonika taudia ia tore henia, ia gwau: “Umui emui huanai ai be manau, iena natuna ia ubua hahine bamona. Umui ai lalokau henia bada dainai, ai ese Sivarai Namona umui dekenai ai henia. Bona inai sibona lasi, to ai be ai noho hegaegae, aiemai mauri umui dainai do ai atoa diho, badina be umui ai lalokau henia bada noho. Umui diba, ai ese umui ta ta ai durua, tamana ese iena natuna ia durudia hegeregerena.” Haida idia lalohisihisi neganai, ita ibounai be edia tamadia sinadia lalokaudia hegeregeredia ita kara henidia diba, mai eda lalokau bona mai eda hebogahisi ida.—1 Tesalonika 2:7, 8, 11.
8. Badina be dahaka Iesu ena hereva ese lalohisihisi taudia ia hagoadaia?
8 Paulo ese unai bamona ia lalodia momo mai ena hebogahisi ida neganai, unai kara ia haheitalaia tauna badana, Iesu, ia tohotohoa. Iesu ena hebogahisi herevana Mataio 11:28-30 dekenai be mani oi laloa: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai. Egu huaia auna be emui pagana dekenai do umui atoa, lau dekenai diba do umui tahua, badina lau be dagedage lasi bona manau tauna. Vadaeni emui laumana be do idia laga-ani. Badina be lauegu huaia auna be ia metau lasi, bona huaia neganai danu hekwarahi lasi.” Oibe, Iesu ena hahediba herevadia ese edia lalona ia hagoadaia lou, badina be helaro namona bona toreisi lou gwauhamatana ia gwauraia. Buklet ladana Oiemu Lalokau Tauna ta Ia Mase Neganai be taunimanima ita henidia neganai, unai helaro bona gwauhamata ita henidia unai. Ena be mase be nega daudau ita lalohisihisilaia, to unai helaro ese ita ibounai ia durua diba.
Lalohisihisi Taudia Hagoadaia Daladia
9 Edia lalokau tauna ta ia mase murinai, taunimanima be nega kwadogi sibona mo idia lalohisihisi lasi. Haida be edia mauri dinadia iboudiai idia lalohisihisi, bona edia natudia idia mase taudia dekenai anina be bada. Spain dekenai lagani 11 merona ta ladana Paquito be lagani 1963 lalonai meninjaitis gorerena dainai ia mase. Ema bona hari, iena tamana sinana, Keristani taudia mai edia kamonai, ese idia kikilaia negadiai, madi idia tai. Reana dina ta, o foto ta, o ma gau ta dainai ia idia laloa lou mai edia lalohisihisi ida. Unai dainai, namona be ta ita maumauraia lasi, ia be nega daudau ia lalohisihisi dainai. Doketa ta ia gwau: “Reana lalo-metau bona lalohisihisi do idia noho ela bona lagani haida idia ore.” Mani inai oi laloa: Iseda kipara haida hegeregeredia, reana lalohisihisi ena toana haida be iseda mauri dinadia iboudiai do idia noho.
10. Lalohisihisi taudia be edena bamona ita durua be namo?
10 Keristani kongregesen lalonai, mase idia lalohisihisilaia taudia be edena bamona ita durua diba? Reana tadikaka ta o taihu ta be ita ta ese ia hereva henia mai ena momokani ida, ia gwau, “Bema egu heduru oi abia be namo, mani lau oi hamaoroa.” To mase ia lalohisihisilaia tauna ta be nega hida ita ta ia boiria, ia gwau, “Do oi durugu dalana ta lau laloa vadaeni”? Momokani, ita ia do noia lasi neganai ita durua matamaia be namo; unai amo ena lalona ita hagoadaia. Vadaeni, edena dala amo ita durua be namo? Durua daladia haida be inai.
11. Bema edia hereva ita kamonaia, unai ese edena bamona ia durudia?
11 Oi kamonaia: Lalohisihisi tauna durua bada dalana be, ena hereva oi kamonaia, ena lalohisihisi ena mamina oi abia totona. Reana oi nanadaia, oi gwau, “Oi ura do oi herevalaia, a?” Oi doria lasi. Keristani tauna ta ese ena tamana ena mase negana ia herevalaia, ia gwau: “Haida ese ena mase idia henanadailaia bena idia kamonai momokani; unai ese lau ia durua momokani.” Iamesi ena sisiba bamona, oi kamonai haraga. (Iamesi 1:19) Oi kamonai mai emu haheauka bona mai emu hebogahisi ida. Baibel be Roma 12:15 ai ia gwau: “Idia taitai taudia danu do umui tai” be namo. Mani oi laloa, Iesu be Mareta bona Maria ida idia tai.—Ioane 11:35.
12. Lalohisihisi taudia edia lalona be edena bamona ita hagoadaia diba?
12 Ena lalona oi hagoadaia: Namona be oi laloatao, mase ia lalohisihisilaia tauna be reana ena lalona ese ia botaia, badina be ia laloa heduru karadia haida ia reaia. Oi hamaoroa ia karaia diba karadia iboudiai be ia karaia vadaeni (o hagoadaia herevadia momokanidia ma haida oi hamaoroa). Oi hamaoroa ena mamina be taunimanima momo ese idia abia mamina hegeregerena. Mase idia lalohisihisilaia murinai edia lalona idia goada lou taudia haida, edia sivarai oi diba taudia, be oi hamaorolaia. Oi durua mai emu hebogahisi ida. Unai be mai anina bada! Solomona ia gwau: “Hereva maorona gwauraia namonamo karana, be golo herahera siliva bosea latanai bamona.”—Aonega Herevadia 16:24; 25:11; 1 Tesalonika 5:11, 14.
13. Bema ita noho hegaegae, unai ese edena bamona ia durua?
13 Dala oi kehoa: Emu heduru do ia abia haraga dalana oi kehoa iena. Unai be dina ginigunadia, iena turana momo bona ena varavara momo be ia dekenai idia noho dinadia, lalodiai sibona lasi, to reana ma hua haida lalodiai danu, idia rakatania murinai. Ta be nega daudau herea ia lalohisihisi, ma ta be idau. Edia hisihisi negadiai Keristani dalanai ita lalodia momo bona ita hebogahisi henidia be mai anina bada. Baibel ia gwau: “Turana ta ia noho, iena turana kara, ese tadikaka ta ena lalokau ia hereaia noho.” Inai hereva, “Oi dabu neganai oi ia tura henia tauna be emu turana korikorina,” be momokani, bona ita badinaia be namo.—Aonega Herevadia 18:24; ma danu Kara 28:15 itaia.
14. Dahaka ita herevalaia diba, mase ia lalohisihisilaia tauna ena lalona hagoadaia totona?
14 Mase tauna ena kara namodia oi kikilaia: Bema nega maorona ai oi kikilaia, unai ese mase ia lalohisihisilaia tauna ia durua bada. Ena lalokau tauna ena ladana hatoa garina oi gari lasi. Oi kara lasi, hegeregere ia be guna ia noho lasi bamona. Harvard Medical School ena buka ta ese iseda lalona ia hagoadaia, ia gwau: “Dokonai, mase tauna ia lalohisihisilaia tauna ese ia laloa neganai, bema ia dara doko momokani lasi, anina be ena lalona ia namo lou . . . Ena lalohisihisi ia maragi ia lao, bena mase tauna ia laloa lou mai ena lalo-namo ida.” Ena lalokau tauna ena hebamo namona ia laloa lou neganai, ena lalona ia goada! Witness tauna ta, iena tamana be lagani haida gunanai ia mase, be ia gwau: “Lau laloatao gauna namona be inai: Tamagu be hereva momokani ia stadilaia matamaia murinai lau be ia ida Baibel ai duahia hebou. Bona sinavai ena isena dekenai lau hekure, egu hekwarahi haida lau hamaorolaia. Lagani toi o hani lalodiai nega tamona tamona lau itaia, unai dainai unai dina lau lalodia bada.”
15. Ta ese heduru ia do noia lasi neganai, edena bamona oi durua diba?
15 Nega maorona ai oi durua sibona: Mase idia lalohisihisilaia taudia edia lalo-goada be idauidau dainai, ta ena goada hegeregerena ai oi durua be namo. Keristani hahinena ta ese guna mase ia lalohisihisilaia negana ia gwauraia, ia gwau: “Momo idia gwau: ‘Bema egu heduru oi abia be namo, mani lau oi hamaoroa.’ To Keristani taihuna ta ia henanadai lasi. Daiutu lalonai ia vareai, mahuta patana dabuadia mirodia ia kokia, bena ia huria. Ma ta ese baketi, ranu bona sopu ia abia, egu adavana ia mumuta gedana ia huria. Idia be turagu korikoridia; idia do lau laloaboio lasi.” Bema oi itaia mase ia lalohisihisilaia tauna do oi durua be namo, oi durua sibona—reana ena aniani oi karaia, o ena ruma oi hagoevaia, o ia dainai oi lao sitoa. To, ia ura sibona ia noho negadiai, ena ruma do ita lao lasi be namo. Paulo ena hereva do ita badinaia toho be namo: “Umui be Dirava ena taudia, ia ese umui ia lalokau henia, bona umui ia abia hidi, iena. Unai dainai inai bamona karadia, dabua bamona do umui atoa: Bogahisihisi, durua, manau, manada bona haheauka.” Hebogahisi, haheauka, bona lalokau be idia doko lasi.—Kolose 3:12; 1 Korinto 13:4-8.
16. Dahaka dainai revareva ta o kadi ta ese ta ena lalona ia hagoadaia diba?
16 Revareva ta o kadi ta oi siaia: Momo idia laloa lasi gauna be inai: Hebogahisi revarevana ta o hebogahisi kadina ta mai hairaina be ia dekenai idia siaia be namo, badina be do ia duahia loulou diba. Emu revareva ia kwadogi be herevana; emu hebogahisi ia hahedinaraia be gau badana. Namona be abidadama ia hahedinaraia, to sisiba herevadia oi torea lasi be namo. Inai hereva kwadogina “Oi dainai ai noho hegaegae” ese ena lalona ia hagoadaia diba.
17. Guriguri ese edena bamona ia hagoadadia diba?
17 Idia ida umui guriguri: Guriguri, mase idia lalohisihisilaia Keristani taudia dainai o idia ida umui gwauraia guriguridia, be mai anina bada. Baibel be Iamesi 5:16 ai ia gwau: “Kara maoromaoro tauna ena guriguri be mai ena siahu.” Idia dainai ita gwauraia gurigurina idia kamonai neganai, unai ese ia durudia, edia lalo-metau idia negea totona. Iseda lalona idia metau negadiai, Satani ese ena “koikoi karadia” amo ita ia hamanokaia toho. Unai neganai guriguri ese ita ia hagoadaia bona ia durua be namo. Paulo ia gwau: “Nega ibounai Lauma Helaga ena siahu dekena amo guriguri bona noinoi do umui gwauraia. Do umui hesiku lasi, to nega ibounai guriguri totona do umui noho hegaegae. Dirava ena taudia totona do umui guriguri nega ibounai.”—Efeso 6:11, 18; ma danu Iamesi 5:13-15 itaia.
Kara Kereredia Bona Hereva Kereredia
18 Ta ia lalohisihisi neganai, kara haida oi karaia o hereva haida oi gwauraia be kerere. Aonega Herevadia 12:18 ia gwau: “Ia hereva haraga tauna ena hereva, be tuari kaia ia gwadaia noho bamona, to aonega tauna ena hereva ese, taunimanima idia hamauria diba.” Nega haida ita hereva kerere, to unai ita diba lasi. Reana ita gwau, “Emu lalona ena mamina be lau diba.” To unai be momokani a? Guna oi lalohisihisilaia gauna be hari ia lalohisihisilaia gauna hegeregerena momokani, a? Bona reana emu lalona ena mamina be iena hegeregerena lasi. Reana namona be oi gwau, “Oi lau hebogahisi henia momokani, badina be guna egu . . . ia mase neganai lau lalohisihisilaia.”
18, 19. Iseda herevahereva lalonai, hebogahisi be edena bamona ita hahedinaraia diba?
19 Hebogahisi hahedinaraia dalana ma ta be, mase tauna do ia toreisi lou eiava lasi herevana do ita herevalaia lasi. Tadikaka bona taihu haida edia lalona idia hisihisi bada, badina be haida ese edia adavadia, kamonai lasi taudia, idia herevalaia, idia gwau reana do idia toreisi lou lasi. Do idia toreisi lou taudia gwauraia hidi be iseda gaukara lasi. Ita moale diba, badina be taunimanima edia lalona ia itaia Diravana, Iehova, ena hebogahisi ese ita momo eda hebogahisi ia hereaia.—Salamo 86:15; Luka 6:35-37.
Lalona Hagoadaia Siridia
20 Mase ia lalohisihisilaia tauna durua bada daladia ta be, Iehova ena gwauhamata mase taudia dainai be nega maorona ai ita hamaorolaia. Herevana ia be Witness tauna ta eiava iseda haroro gaukarana lalonai ita davaria tauna ta, to unai Baibel herevadia amo do ita durua diba. Unai siri haida be dahaka? Ita diba Iehova be hagoadaia momokani Diravana, badina be ia gwau: “Lau ese umui lau hagoadaia noho inai.” Ma ia gwau: “Sinana ese iena mero ia hamoalea bona hagoadaia bamona, lau ese umui do lau hamoalea bona hagoadaia.”—Isaia 51:12; 66:13.
20, 21. Mase ia lalohisihisilaia tauna ena lalona hagoadaia siridia haida be dahaka dahaka?
21 Salamo torea tauna ia gwau: “Hisihisi ese lau ia abia neganai goada lau davaria lou, badina oiemu gwauhamata ese, mauri matamata lau dekenai ia henia. Lohiabada e, oiemu oda hereva gunadia lau laloatao, bona idia ese lau idia hagoadaia. Mani emu kara oiemu noho hanaihanai lalokauna dekena amo, lau do oi hagoadaia, badina be lau, oiemu hesiai tauna dekenai, oi ese unai bamona oi gwauhamata vadaeni.” Mani oi laloa, inai hereva “hagoadaia” ia torea loulou unai siri lalodiai. Oibe, iseda hisihisi neganai bema Iehova ena Hereva ita tahua, goada momokani ita davaria diba, siboda eda bona ma haida edia. Unai dainai, bona iseda tadikaka edia lalokau bona edia hebogahisi dainai, ita haheaukalaia diba, bena unai murinai Keristani hesiai gaukarana be mai eda moale ida ita goadalaia lou diba.—Salamo 119:50, 52, 76.
22. Iseda helaro be dahaka?
22 Bema lalohisihisi taudia ita durua momo, unai amo siboda eda lalohisihisi ita hamaragia diba. Ita durudia neganai, lauma dalanai henia karana ena moale momokanina ita abia danu. (Kara 20:35) Namona be toreisi lou dinana ena moale be idia ida do ita herevalaia hebou. Unai dina dekenai, bese gunadia iboudiai taudia, uru ta ta amo, ese edia lalokau taudia, mase amo idia toreisi lou taudia, be tanobada matamatana lalonai do idia abia dae. Helaro namo hereana unai! Unai neganai do ita moale hisidae, badina do ita laloa lou Iehova be momokani “hisihisi idia abia noho taudia ia durua Diravana.”!—2 Korinto 7:6.
Inai Oi Laloatao A?
◻ Iehova ese “durua ibounai” be edena bamona ia henia?
◻ Iesu bona Paulo ese lalohisihisi taudia be edena bamona idia hagoadaia?
◻ Mase idia lalohisihisilaia taudia be edena bamona ita hagoadaia diba?
◻ Lalohisihisi taudia dekenai dahaka ita karaia lasi be namo?
◻ Edena siri oi ura henidia bada, badina be mase negadiai emu lalona idia hagoadaia dainai?
3. Iehova ese taunimanima edia lalona hagoadaia dalana edena bamona ia hahedinaraia?
7. Paulo ese ena Keristani tadikaka edena bamona ia hagoadadia?
9. Dahaka dainai mase idia lalohisihisilaia taudia ita hesikulaia lasi be namo?
[Picture on page 15]
Lalohisihisi taudia oi durudia toho mai emu hemataurai ida