Sri Lanka ai, Kamonai Ruma Bese Taudia Idia Momo

SRI LANKA, guna ena ladana be Ceylon ela bona lagani 1972 ai idia haidaua, be motumotu ta mai hairaina. Ia be mai ena niu audia, ororo, bona tano kava gabudia maragidia haida danu. Ororo gabuna ai, ororo ladana Adam’s Peak ena lata mita 2243 be tomadiho oreadia hani edia helaga gabuna.a Kahirakahira ai ia noho gabuna idia gwauraia World’s End, bona ia be hagahaga gabuna ta, ia amo mita 1500 ia diho maoromaoro. Unai be Sri Lanka ena gabu hairaina itaia namonamo gabuna hereadaena.

Sri Lanka ai idia noho taudia milioni 18 edia mai daladia be idauidau. Lagani 500 B.C.E. murinai, India ena not kahana amo idia mai taudia, idia gwauraia Indo-European taudia, ese unai motumotu idia noholaia. Hari unai taudia idia gwauraia Sinhalese, bona taunimanima 10 10 amo 7 7 be Sinhalese taudia. Bena, unai murinai ela bona lagani 1100 C.E murinai, India ena saut kahana taudia, Tamil taudia idia aru lao; hari idia noho unai motumotu ena not bona ist kahana dekenai. Portugal, Holland, bona Britain taudia ese unai tano idia naria dainai edia mauri dalana ena toana ia noho. Danu, davara idia hanaia hoihoi taudia, Arabia bona Malaysia amo idia mai taudia, idia noho. Europe, Persia, China, bona ma gabu haida amo idia mai taudia edia hanua maragidia oi davaria diba danu.

Kopi idauidau, gado idauidau, bona tomadiho idauidau idia noho Sri Lanka dekenai. Unai motumotu ena gado badadia toi be Sinhalese, Tamil, bona English. Sri Lanka taudia momo be unai gado rua idia herevalaia diba. Nega momo edia tubudia edia tomadiho dalana idia badinaia. Sinhalese taudia momo be Buddhist tomadiho idia badinaia, to Tamil taudia momo be Hindu tomadiho idia badinaia. Arab o Malaysia taudia be Islam tomadiho idia badinaia, Europe taudia be Kerisendom tomadihodia hegeregere, Katolik o Protestan dubu idauidau dekenai idia lao.

Gaukara mai Ena Hekwarahi Idia Karaia

Unai ibounai dainai Iehova ena Witness taudia Sri Lanka ai, edia gaukara ena hekwarahi ia bada herea. Unai taudia idia gaukara goada Iesu ia henia gaukarana do idia hagugurua: “Basileia ena Sivarai Namona be tanobada ibounai dekenai do idia harorolaia.” (Mataio 24:14) Gado idauidau taudia sibona idia davaria lasi, to pablisa taudia ese edia haroro gaukara horadia rua o toi sibona lalonai, Buddhist, Hindu, Kerisendom ena dubu dekenai idia lao taudia, bona Dirava be lasi lalohadaina idia abia taudia idia hereva henidia.

Haroro gaukara karaia namonamo totona, pablisa taudia ese Tamil, Sinhalese, bona English Gima Kohorona bona Noga! magasin bona buka idia huaia. Tauanina goada taudia be unai gado dekenai idia hahanaia Baibel toi danu idia huaia. Pablisa taudia idia moale badina buklet edia ladana Dirava ese Ita Ia Laloa Eiava? bona Our Problems​—⁠Who Will Help Us Solve Them? bona pepapepa ta ladana Inai Tanobada Do Ia Ore Eiava? be gado toi dekenai idia halasia. Ena anina be heduru gaudia ma haida idia abia edia haroro gaukara totona.

Lagani 1912 ai, Charles Taze Russell, International Bible Students Association ena presiden, be Ceylon dekenai nega sisina ia vadivadi negana amo ema bona hari, tadikaka idia gaukara goada noho. To idia tubu daekau negana ia matamaia lasi ela bona 1947 ai, Watchtower Bible School of Gilead amo idia mai taudia idia ginidae negana. Unai nega murinai, Sri Lanka pablisa taudia be edia haroro gaukara amo ahuna namona idia abia. Lagani 1994 ai, Basileia pablisa taudia 1,866 edia averes be, hua ta ta ai, Baibel stadi 2,551 idia karaia. Memorial hebouna dekenai idia lao taudia ibounai be 6,930, unai be pablisa taudia iboudiai edia namba nega 4 amo ia habadaia. Hahenamo badana ta unai!

Sri Lanka be tano ma haida ida oi hahegeregerea neganai toana be ia tubu daekau haraga lasi. Badina ta be varavara edia hebamo karana ia goada momokani. To, unai be durua gauna ai ia lao diba. Roma tuari biagua tauna Korenelio ese hereva momokani ia abia dae neganai, ena ruma bese iboudiai be ia idia badinaia. (Kara 10:​1, 2, 24, 44) Kara bukana ese Keristani ruma bese goadadia ia herevalaia danu, Lidia, Krisipo, bona Paulo bona Sila ia gimaia dibura ruma tauna ta edia.​—⁠Kara 16:​14, 15, 32-34; 18:⁠8.

Varavara edia hebamo karana goadana ese namo bada do ia havaraia, bema idia gaukara hebou mai abidadama ida. Nega daudau misinari gaukara ia karaia vadaeni tauna Ray Matthews ese Isaia 60:22 ia laloa bada, ia gwau: “Nega korikori ai Iehova ese ena gaukara ia haharagaia, taunimanima ta ta ia haboudia sibona lasi to hari ruma besedia ia haboudia danu.”

Ruma Bese Ia Gaukara Hebou amo Iehova Idia Hanamoa

Unai bamona abidadama ruma besedia idia noho Sri Lanka dekenai. Haheitalai ta be Sinnappa besena, edia nega idia haria namonamo taudia. Idia be Kotahena dekenai idia noho, unai be Colombo, Sri Lanka ena siti badana, ena kahana ta. Ena be edia tamana, Marian, be idaunegai ia mase, to ena adavana, Annamma, bona edia natudia 15 amo 12 ta ta, edia mauri lagani be 13 ia lao 33 padanai, be Iehova idia badinaia noho. Edia sivarai ai torea neganai, idia 8 be bapatiso idia abia vadaeni, bona idia toi be ful-taim regula painia gaukara idia karaia. Ma toi be nega ta ta ai heduru painia gaukara idia karaia. Matamata natudia hani be bapatiso lasi pablisa taudia. Danu, tubudia hani, idia matamata momokani, to Baibel idia stadilaia bona Colombo North Congregation of Jehovah’s Witnesses edia hebou dekenai idia lao.

Lagani 1978 ai, Annamma be nega ginigunana Basileia ena sivarai namona ia kamonai henia, Gima Kohorona ta ia abia neganai. Baibel stadi ia matamaia, bona Mauri ia lao henia Hereva Momokanina bukana ia haorea murinai, Iehova dekenai iena mauri ia gwauhamatalaia bona ia bapatiso. Iena haheitalai namona ese ena ruma bese taudia ia durua.

Ami tauna Korenelio bamona, Annamma ena ruma bese taudia ese edia nega idia haria namonamo. Annamma ia gwau: “Keristani heboudia bona hebouhebou badadia totona ai palani namonamo​—⁠sikuli totona danu be hekwarahi bada. Hebouhebou totona dabua matamata abia be hekwakwanai ta, to Iehova ese ai ia hanamoa dainai hebouhebou ta ta totona haida ai abia diba. Ruma bese taudia iboudiai idia aniani namonamo, edia dabua namodia idia hahedokilaia bona idia lao​—⁠mai kiri ida.”

Mai moale ida unai natudia ese edia ruma ena heau dalana idia laloatao. Keristani heboudia dekenai idia lao diba totona, natudia badadia ese maduna idauidau idia abia. Hegeregere, Mangala ese dabua ia huria bona Winnifreda ese ia aeania. Maragidia ese edia dabua idia atoa neganai Winnifreda ese ia durua, bona ia gwau: “Iboudiai be ruma idia rakatania neganai, edia toana be namo herea.”

Lauma aniani idia palanilaia namonamo danu. Natuna kekeni ta, Pushpam, hari ia be regula painia gaukara ia karaia, ese edia mauri ia kikilaia, ia gwau: “Dina ta ta ai aiemai ruma bese ese Baibel bona dina ena siri ai duahia hebou.” Annamma ma ia gwau: “Natudia iboudiai be mai edia Baibel, Gima Kohorona, bona buka ma haida. Hebou dekenai idia haere neganai, lau kamonai namonamo. Bema lau laloa heduru do ia abia, ruma dekenai idia lau hagoadaia o sisiba henia. Hanuaboi ai, ai hebou bona ruma bese guriguri ai karaia, unai dina totona.”

Iena natudia badadia ese Annamma idia durua Keristani dalana hadibaia gaukarana lalonai. Ena be nega be bada lasi, to idia ura sivarai namona idia harorolaia. Ruma bese taudia ese Baibel stadi 57 edia dekena taudia ida idia karaia noho. Ravana tau Rajan ia gwau: “Famili taudia ese Baibel stadi namodia idia karaia. Egu adavana, Pushpam, be hahenamo ta ia abia vadaeni, ena stiuden ta be Iehova dekenai iena mauri ia gwauhamatalaia vadaeni.”

Unai ruma bese badana be Roman Katolik Oreana idia rakatania neganai, Kotahena taudia idia hoa. Ena be pris be idia ia vadivadi henia lasi, to edia kara ena badina ia diba totona, dubu taudia ia siaia. Idia herevahereva, Toi Tamona idia herevalaia momo. Annamma be Iehova dekenai ia tabekau bona Baibel amo iena abidadama ia hahedinaraia namonamo. Herevahereva lalonai ia ura gaukaralaia sirina ta be Ioane 17:⁠3.

Sinnappa besena ese idia hahedinaraia goevagoeva palani namonamo karana bona hekwarahi noho karana ese, anina namona do ia havaraia. Mai edia ura bada ida idia gaukara dainai, uru matamata be Basileia ena pablisa taudia ai idia halaodia, bona unai be Iehova hanamoa gauna.

Dagedage ese Famili Ia Hatamonaia Tomadiho Momokanina Ai

Ratnam bese be Narhenpitya, Colombo ena kahana ta dekenai idia noho, Sinnappa besena edia noho gabuna kahirakahira ai. Guna idia danu be Roman Katolik taudia. Lagani 1982 ai, ruma-ta-ruma-ta hesiai gaukara idia karaia Witness taudia ese Balendran, edia kekeni badana, Fatima, ena adavana idia davaria. Famili ibounai ida Baibel stadi idia hamatamaia. Nega sisina murinai edia natudia toi ese edia Tubuna hahine Ignasiamal idia nanadaia Dirava ena ladana be daika. Natudia ese haere idia henia, idia gwau “Iehova” neganai, edia Tubuna ia ura diba ma haida ia abia, bona unai amo Baibel stadi ia abia dae. Gabeai, iena kekeni rua, Jeevakala bona Stella danu be idia stadi, bona 1988 ai idia toiosi be idia bapatiso.

Unai neganai, Balendran bona Fatima be Fatima ena tadina, Mallika, bona ena adavana, Yoganathan idia haroro henidia. Lagani 1987 ai idia ruaosi idia bapatiso, bona edia natudia dekenai Iehova lalokau henia karana idia hadibaia bona unai lalokau ia tubu daekau. Murinai, Pushpa, Fatima ena tadina ma ta, be hereva momokani lalonai ia vareai. Lagani 1990 ai ia gwauhamata bona ia bapatiso. Tokyo dekenai ia noho neganai, iena adavana, Eka, be English kongregesen lalonai hesiai gaukara ia karaia, bona Pushpa ese edia mero maragina, Alfred, ia durua Iehova ena dala ai do ia tubu daekau.

Vadaeni, Ratnam natudia 10 amo hani be hereva momokani idia abia dae. Moale gauna be, ma toi be Baibel stadi idia abia bona idia goada idia lao noho. Tubudia 11 amo, kekeni ta, Pradeepa, ia bapatiso vadaeni. Maragidia 7 be ruma bese Baibel stadi amo idia hadibadia noho. Danu, edia dekena taudia ida Baibel stadi 24 idia karaia.

Unai ia vara haraga lasi. Matamana ai, edia ruma bese taudia ese idia dagedage henidia. Edia tamana, Muthupillai, bona edia kakadia, memero rua, idia ura lasi edia bese taudia idia lao Kingdom Hall dekenai hebou totona, eiava idia lao haroro. Nega haida idia koua badina be idia gari hekwakwanai do idia davaria, to danu Muthupillai, ia gwau: “Lau ese ‘helaga taudia’ lau laloa bada bona lau ura lasi egu ruma bese ese Katolik Dubu idia rakatania.” To hari, edia abidadama ese idia ia durua bada dainai, Muthupillai ia diba idia ese Dirava momokanina idia tomadiho henia.

Haheitalai ta be inai, ena ruma idia rentaia tauna be Buddhist tauna, bona meamea ia gaukaralaia ruma amo idia ia lulua totona. Hanuaboi ta ia mai bona “meamea” siporo be ruma murimurinai ai ia atodia hegege. Dekena taudia be meamea idia garilaia dainai idia laloa Ratnam bese dekenai gau dikana ta do ia vara. Ignasiamal ia diba neganai, ia bona ena natudia be mai gari lasi ida siporo idia abia bona idia negea​—⁠bona gau dikana ta ia vara lasi. Unai gabu dekenai edia gari lasi karana dainai taunimanima ese edia abidadama idia itaia, bona hari edia dekena taudia ese idia matauraidia bada. Stella ese Baibel stadi rua, kahirakahira idia noho dekena taudia ida, ia hamatamaia. Unai kara ese edia ravana hahine Nazeera ia hagoadaia dainai, Baibel stadi ia abia dae danu.

Idia abia hahenamo momo ia lalohadailaia neganai, Ignasiamal ia gwau: “Lau moale lauma dalanai egu ruma bese ia tubu daekau. Iehova ese ai ia hanamoa badina dagedage karana ia maragi ia lao, bona aiemai ruma bese ena lalo-tamona ia goada.”

Unai ruma bese badadia be hahenamo bada herea momokani. Idia be natudia momo lasi ruma besedia, tamana sibona o sinana sibona ruma bese taudia, bona idia headava lasi Keristani taudia ida idia gaukara goada Basileia ena sivarai namona be “hairai tanona,” Sri Lanka ena anina unai, dekenai idia harorolaia. Tanobada hegegemadai idia noho Keristani taudia ida, Sri Lanka Witness taudia be Paradaiso idia naria noho, bona hari idia laloa diba, Sri Lanka ena kone bona ororo hairaidia idia itaia neganai.

[Footnotes]

[Pictures on page 24, 25]

Sri Lanka ai momo be Keristani haroro bona hahediba gaukarana idia abia dae