Lauma Helaga be Lauegu Durua Tauna ai Lau Halaoa Vadaeni, A?
TOMADIHO idia stadilaia taudia, bona taunimanima ma haida danu, edia lalohadai Dirava ena lauma helaga dekenai be idauidau. To, unai bamona daradara be anina lasi. Baibel ese lauma helaga be dahaka ia gwauraia hedinarai goevagoeva. Ia be tau ta lasi, haida idia laloa bamona, to ia be Dirava ese ena ura hagugurua totona ia gaukaralaia siahu goadana.—Salamo 104:30; Kara 2:33; 4:31; 2 Petero 1:21.
Lauma helaga be Dirava ena ura hagugurua totona ia gaukaralaia dainai, ita ura iseda mauri lalonai ia ita badinaia. Namona be ita ura ia be iseda durua tauna ai ia lao.
Durua Tauna—Dahaka Dainai Ita Abia be Namo?
Tanobada do ia rakatania negana ia laloa dainai, Iesu ese ena hahediba taudia ia hagoadaia, ia gwau: “Lau ese Tamana do lau noia, ia ese Durua Tauna ta do ia henia umui dekenai, umui dekenai do ia noho hanaihanai.” Bona ma ia gwau: “To inai hereva momokani lau gwauraia umui dekenai: Umui dekenai durua totona do lau rakatania umui, badina be umui bema lau rakatania lasi, Durua Tauna be umui dekenai do ia mai lasi, to do lau lao, vadaeni ia do lau siaia umui dekenai.”—Ioane 14:16, 17; 16:7.
Iesu ese mai anina bada hahegani ta be ena hahediba taudia dekenai ia henia, idia ia hadibaia: “Unai dainai do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:19, 20) Unai be gaukara haragana lasi, badina dagedage lalonai do idia haorea.—Mataio 10:22, 23.
Tanobada amo dagedage do idia davaria to hepapahuahu haida be kongregesen lalonai do idia vara danu. Lagani 56 C.E. bamona ai, Paulo ese Roma Keristani taudia ia tore henia, ia gwau: “Lauegu varavara taudia e, ekalesia orea idia hapararaia taudia bona taunimanima haida edia abidadama idia hadikaia taudia do umui naria namonamo. Ai ese umui dekenai ai henia vadaeni hadibaia hereva idia ura hamakohia gwauraia. Idia dekena amo do umui raka siri.” (Roma 16:17, 18) Aposetolo taudia idia mase neganai unai kara do ia bada. Paulo ese idia ia hamaoroa: “Badina be lau diba, umui lau rakatania murinai, uda sisia dikadia umui emui huanai dohore idia mai, bona mamoe orea do idia hadikaia. Emui huanai tatau haida do idia toreisi, hereva koikoi do idia gwauraia, bona diba tahua taudia do idia hakaua kerere.”—Kara 20:29, 30.
Dirava ena heduru idia abia be namo unai hekwakwanai idia hanaia totona. Ia ese Iesu amo unai heduru ia henia. Iena toreisi lou murinai, Pentekoste 33 C.E. ai, ia murinai idia raka taudia 120 be “Lauma Helaga dekenai idia honu.”—Kara 1:15; 2:4.
Unai negai, lauma helaga ia bubua bona hahediba taudia idia lalo-parara unai be Iesu ese ia gwauhamatalaia heduruna. Hari Iesu ese ia gwauraia gauna ena anina idia lalo-pararalaia namonamo: “Durua Tauna, Lauma Helaga be unai, Tamana ese lauegu gabuna abia totona do ia siaia. Ia ese gau ibounai do ia hadibaia umui dekenai. Hereva ibounai lau henia vadaeni umui dekenai, be ia ese umui emui lalona dekenai do ia hedinaraia lou.” (Ioane 14:26) Danu ia gwauraia ‘Durua Tauna, Hereva Momokani Laumana.’—Ioane 15:26.
Edena Dala ai Lauma be Heduru Tauna?
Lauma be dala momo ai heduru tauna ai do ia lao. Dala ginigunana be, Iesu ia gwauhamata unai lauma ese ena hahediba taudia edia lalona dekenai ia ese ia hadibaia gaudia do ia hahedinaraia lou. Iena hereva ena anina be do ia durudia hereva haida do idia laloatao sibona lasi. Lauma ese do ia durudia bena Iesu ese idia dekenai ia hadibaia gaudia edia anina dobuna do idia lalo-pararalaia. (Ioane 16:12-14) Hereva kwadogi ai be, lauma ese iena hahediba taudia do ia hakaua hereva momokani do idia lalo-pararalaia namonamo totona. Gabeai aposetolo Paulo ia gwau: “Inai gaudia be hunia dekenai idia noho, to Dirava ese iena Lauma dekena amo ita dekenai ia hedinaraia. Oibe, Lauma Helaga ese gau ibounai ia tahua noho, Dirava ena laloa dobu gaudia danu.” (1 Korinto 2:10) Iesu murinai idia raka horoa taudia ese ma haida dekenai diba maoromaoro idia henia totona, edia lalo-parara be badina maorona ai idia haginia be namo.
Dala iharuana be, Iesu ese ena hahediba taudia dekenai guriguri dalana ia hadibaia bona nega momo unai do idia karaia be namo. Bema nega haida idia diba lasi dahaka do idia gurigurilaia, lauma ese idia totona do ia karaia eiava do ia durudia. “Lauma Helaga danu ia mai, ita goada lasi taudia ia durua noho. Ita be guriguri dala maorona ita diba lasi. Unai dainai Lauma Helaga ese ita totona ia noinoi Dirava dekenai, mai taitai bada danu. Iena noinoi herevadia be taunimanima idia gwauraia diba lasi gaudia.”—Roma 8:26.
Dala ihatoina be, lauma ese Iesu ena hahediba taudia do ia durua taunimanima vairana hereva momokani do idia gwauraia totona. Idia ia hamaoroa: “Idia ese kaunsolo edia vairana dekenai do idia hakaua umui, bona idia edia dubu lalonai do idia botaia umui. Lohia bona king edia vairana dekenai do idia hakaua umui, lau dainai. Inai dala dekenai umui ese lau do umui gwauraia hedinarai idia dekenai, bona bese idauidau ibounai dekenai. Umui idia kota henia neganai umui emui lalona do idia hekwarahi lasi, do umui gwauraia herevadia totona. Badina be unai neganai do umui gwauraia herevadia be Dirava ese do ia henia umui dekenai. Badina be gwauraia tauna be umui lasi, to umui emui Tamana ena Lauma be umui emui lalona dekenai do ia hereva.”—Mataio 10:17-20.
Danu, lauma helaga ese Keristani kongregesen do ia hahedinaraia bona ena memba taudia do ia hakaua abia hidi namodia idia karaia totona. Namona be unai hereva ena kahana rua ita tahua namonamo bona hari inai negai edia anina ita dekenai do ita itaia.
Toana ai Ia Lao
Lagani handred momo lalonai Iuda taudia be Mose ena Taravatu henunai bona idia be Dirava ese ia abia hidi besena. Iesu, Mesia unai, idia dadaraia dainai, ia peroveta idia danu be gabeai do ia dadaraia: “Buka Helaga ena revareva umui duahia lasi, a? ‘Ruma haginia taudia ese idia ura henia lasi nadi be, ruma ena kona nadi ia halaoa vadaeni. Inai be Lohiabada ena kara. Ita itaia, ita hoa.’ Unai dainai umui lau hamaoroa, Dirava ena Basileia be Dirava ese umui dekena amo do ia abia siri, bona Basileia ena huahua do ia havaraia besena dekenai do ia henia.” (Mataio 21:42, 43) Keristani kongregesen be Pentekoste 33 C.E. ai idia haginia neganai, Keriso murinai idia raka taudia be ‘Basileia ena huahua ia havaraia besena’ ai idia lao. Unai nega amo, unai kongregesen be Dirava ena hereva halasia dalana ai ia lao. Dirava ia ura taunimanima idia itaia ia ese ena lalo-namo ia hanaia ma ta dekenai, unai dainai do idia daradara lasi toana ia henia.
Pentekoste dinana ai lauma helaga dainai hahediba taudia be guna idia dibaia lasi gadodia ai idia hereva, unai dainai idia itaia taudia idia hoa bona idia henanadai: “Edena bamona ita ibounai be ta ta iseda gado korikori dekenai, idia hereva neganai ita kamonai noho?” (Kara 2:7, 8) Idia diba lasi gadodia ai idia hereva diba, bona aposetolo taudia ese “hoa kara bona toa kara momo” idia karaia dainai, taunimanima 3,000 bamona idia lalo-parara Dirava ena lauma ia gaukara momokani.—Kara 2:41, 43.
Danu, “Lauma Helaga” ena huahua—lalokau, moale, maino, haheauka, hebogahisi, kara maoromaoro, abidadama, manau, tauanina ena ura koua karana—ese idia hahedinaraia goevagoeva Keriso ena hahediba taudia be Dirava ena hesiai taudia. (Galatia 5:22, 23) Momokani, lalokau be Keristani kongregesen ia hahedinaraia goevagoeva karana. Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.”—Ioane 13:34, 35.
Idaunegai Keristani kongregesen taudia ese Dirava ena lauma helaga ena gunalaia karana idia abia dae bona ia henia heduruna idia gaukaralaia. Hari inai negai Keristani taudia idia lalo-parara Dirava ese Keristani taudia ginigunadia edia negai ia karaia karadia, mase taudia ia hatorea isi lou bona hoa karadia idauidau, be hari ia karaia lasi, to Dirava ena lauma helaga ena huahua ese ia hahedinaraia idia be Iesu Keriso ena hahediba taudia korikoridia.—1 Korinto 13:8.
Gau ta Ita Abia Hidi Neganai Ia Durua
Baibel be lauma helaga ese ia havaraia gauna ta. Unai dainai, bema ita ese Baibel ena hakaua ita badinaia, ia be hegeregere lauma helaga ese ita ia hadibaia. (2 Timoteo 3:16, 17) Ia ese ita do ia durua diba aonega dalana ita abia hidi totona. To iena heduru ita abia dae, a?
To moni gaukara ta abia hidi neganai, edena bamona? Lauma helaga ese ita do ia durua Iehova ena lalohadai hegeregerena, do ita abia dae moni gaukara do ita laloa danu. Iseda moni gaukara be Baibel ena hakaua hereva danu do ia hegeregere be namo, bona namona be unai gaukara ese ita do ia durua tiokratik tahua gaudia do ita hagugurua totona. Gaukara ena davana eiava dagi bona taunimanima ese unai gaukara edena bamona idia laloa be gau badana lasi. Gau badana be iseda mauri durua gaudia ia henia bona ita dekenai nega bona dala ia henia iseda Keristani maduna ita huaia namonamo totona.
Mauri moalelaia karana be vaia taunimanima edia kara bona unai be maoro. (Hadibaia Tauna 2:24; 11:9) Unai dainai ia laloa maoromaoro Keristani tauna ese moale karadia do ia karaia, ia laga-ani bona ia do ia hamoalea totona. To namona be moale karadia ia abia hidi neganai, lauma huahua ia hahedinaraia moale karadia ia abia hidi, to “tauanina ena kara” ia hahedinaraia moale karadia ia abia hidi lasi. Paulo ia gwau: “Tauanina ena kara be ita ibounai ita diba. Karadia be inai: Heudahanai, kara mirodia, matabodaga, kaivakuku tomadiho henia kara, meamea, heai, mama, badu, sibona ena ura tahua kara, hepapahuahu, orea hapararaia kara, laloa dikadia, kekero, lebulebu, bona unai bamona kara ibounai.” Danu, ‘hekokoroku, ta ta habadua, bona kohu totona ta ita mama henia’ karadia ita karaia lasi be namo.—Galatia 5:16-26.
Turadia ita abia hidi neganai danu be unai bamona. Aonega karana be edia goada lauma dalanai hegeregerena ita abia hidi, to edia toana bona kohu dainai lasi. Ia hedinarai goevagoeva Davida be Dirava ena turana, badina Dirava ese ia gwauraia “egu lalokau tauna.” (Kara 13:22) Toana ia laloa lasi, to Dirava ese Davida ia abia hidi Israela taudia edia king ai ia lao, inai hakaua herevana hegeregerena: “Lohiabada ese gau ia itaia lasi, taunimanima ese idia itaia bamona. Taunimanima ese tau ena toana idia itaia, to Lohiabada ese tau ena kudouna ia itaia.”—1 Samuela 16:7.
Taunimanima tausen momo edia hetura karana ia dika badina idia be tauanina ena toana eiava kohu dainai idia vara. Taga dainai ia vara hetura karana be karaharaga do ia doko. (Aonega Herevadia 14:20) Dirava ena lauma amo ia vara Herevana ese ita ia sisiba henia turadia ita abia hidi neganai, namona be iseda Iehova hesiai henia karana do idia durua taudia ita abia hidi. Ita ia hamaoroa namona be henia karana ita manadalaia to abia karana ita manadalaia lasi badina henia karana amo moale bada ita abia. (Kara 20:35) Iseda turadia dekenai ita henia dava bada gaudia korikoridia be iseda nega bona goada.
Adavana ia tahua Keristani tauna dekenai, Baibel ese lauma amo ia vara sisibana ia henia. Ena hereva ena anina be: ‘Vairana bona tauanina oi itaia sibona lasi. Aena oi itaia.’ Aena? Oibe, inai dala amo: Unai aena ia gaukaralaia Iehova ena sivarai namona harorolaia gaukarana ia karaia totona, bona unai dainai idia be namo herea iena matana dekenai, a? Idia ese hereva momokani bona maino ena sivarai namona idia abia loaloa, a? Ita duahia: “Ororo dekenai idia raka mai noho taudia, edia aena be mai hairaidia danu. Badina be sivarai namona idia mailaia noho, maino ena sivarai idia gwauraia noho. Kwalimu bona hamauria herevana danu idia gwauraia noho. Siona dekenai idia gwau, ‘Oiemu Dirava be ia King noho.’ ”—Isaia 52:7; Efeso 6:15.
“Metau dikadia momo” idia vara neganai ai ita noho dainai, Dirava ena ura karaia totona heduru ita abia be namo. (2 Timoteo 3:1) Durua tauna, Dirava ena lauma helaga, ese Keristani taudia ginigunadia edia gaukara ia durua bona edia durua tauna ai ia lao danu. Ita ese Dirava ena Hereva, lauma helaga ese ia havaraia gauna ta, ita stadilaia goadagoada be dala badana ta ita ese lauma helaga be iseda durua tauna ai ita halaoa totona. Unai bamona ita karaia, a?
[Full-page picture on page 23]