Tuari Ena Dika

GUNA tanobada Ibounai Tuarina Iharuana lalonai ia tuari tauna ta ia gwau: “Tuari dekenai ta ia kwalimu lasi. Iboudiai be lusi taudia.” Momo be iena hereva dekenai do idia lalo-tamona. Tuari ese ia havaraia dika be bada herea; idia kwalimu taudia bona idia lusi taudia ese davana dikana idia abia. Ena be tuari ia ore, to unai murinai taunimanima milioni momo be unai tuari ese ia havaraia dika dainai idia do hisihisi noho.

Dahaka dika? Tuari ese tano ta ena taunimanima momo herea ia hamasea diba, ia ore murinai tama sina lasi natudia bona vabu edia namba be bada. Tuari amo idia roho mauri taudia momo be edia tauanina dekenai dika bada idia abia, bona edia lalona dekenai danu. Taunimanima milioni momo idia ogogami eiava edia gabu idia heautania. Tuari amo idia roho mauri taudia edia lalona dekenai ia noho inai henia mamina bona lalohisihisi ita laloa diba, a?

Dika Ia Bada Noho

Tuari ia doko murinai, ipidi regena idia ore, bona tuari taudia be edia gabu dekenai idia giroa lou, to tuari ese ia havaraia dika be taunimanima edia lalona dekenai ia bada noho. Gabeai idia vara uru taudia ese edia lalona dekenai, ta ta badu henia karana idia do dogoatao noho. Unai dala amo tuari ta ena dika ese ma tuari ta ia havaraia diba.

Hegeregere, Germany taudia idia laloa Versailles Maino Pepana, lagani 1919 ai Tanobada Ibounai Tuarina Ginigunana hadokoa totona idia sainia pepana, ia gwauraia taravatu Germany totona be davana henia karana auka herea bamona. The Encyclopædia Britannica ena hereva hegeregerena, unai taravatu “ese Germany taudia huanai badu ia havaraia bona davana henia karana ena ura ia habadaia.” Lagani haida murinai, unai “maino gwaubou herevana badu henia karana ese Hitler dekenai dala ia kehoa” bona Tanobada Ibounai Tuarina Iharuana ena badina ta ai ia lao.

Tanobada Ibounai Tuarina Iharuana be Western Europe dekenai ia matamaia bona Balkan tanodia dekenai ia hanaia lao danu. Lagani 1940 murinai, unai gabu dekenai idia noho bese idauidau ese ta ta dekenai idia havaraia dika ese dala ia kehoa lagani 1990 murinai Balkan tanodia dekenai tuari ia vara totona. Germany ena niuspepa ta ladana Die Zeit ia gwau: “Inai heheni bona davana henia karana be idia bada idia lao ela bona hari iseda nega lalonai idia bada herea.”

Taunimanima be maino dekenai do idia noho diba totona, tuari ena dika idia hanamoa be gau badana. Edena dala ai unai idia karaia diba? Dahaka idia karaia diba inai heheni karana bona lalohisihisi idia haorea totona? Daika ese tuari ena dika ia hanamoa diba?

[Picture Credit Line on page 2]

COVER: Fatmir Boshnjaku

[Picture Credit Lines on page 3]

U.S. Coast Guard photo; UN PHOTO 158297/J. Isaac