Headava Lalonai Hepapahuahu Hamaoromaoroa Dalana

IA LALOA namonamo headava tau eiava hahine be hepapahuahu karana ia moalelaia lasi, to madi unai kara be nega momo ia vara. Vaia, ta ena hereva ese ma ta ia habadua. Bona unai dainai mai badu bada ida idia hepapahuahu, idia lolo bona ta ta idia hereva dika henia. Bona dina haida lalonai idia badu noho bona edia ruma bese taudia haida dekenai idia herevahereva lasi. Gabeai edia badu ia ore bona ta ta dekenai sori herevana idia gwauraia. To unai maino be ia noho daudau lasi.

Nega momo TV dekenai, headava lalonai idia vara hekwakwanai be idia hevasehalaia, to unai be hevaseha gauna lasi. Oibe, Baibel ena aonega herevana ta ia gwau: “Ia hereva haraga tauna ena hereva, be tuari kaia ia gwadaia noho bamona.” (Aonega Herevadia 12:18) Oibe, hereva dikadia dainai nega daudau lalonai oi lalohisihisi diba. Bona heai karana amo heatu ia vara diba.​​—⁠Esodo 21:⁠18.

Ita be kara dika taudia dainai, headava lalonai hekwakwanai idia vara diba. (Genese 3:​16; 1 Korinto 7:​28) To, namo lasi ita laloa unai be hanaihanai ia vara gauna. Tahua karana idia karaia taudia idia davaria, headava lalonai idia hepapahuahu momo taudia be edia headava do idia hadokoa haraga. Unai dainai, oi bona emu adavana huanai hekwakwanai idia vara neganai, namona be mai manau ida umui hamaoromaoroa.

Hekwakwanai Hanaia Dalana

Bema oiemu headava lalonai umui hepapahuahu momo, namona be oi tahua unai hekwakwanai ena badina be dahaka. Bema oi bona emu adavana be gau ta dekenai umui lalotamona lasi, nega momo umui hepapahuahu, a? Emui herevahereva karana be hepapahuahu ai ia lao, bona ta ta dekenai hereva dikadia umui gwauraia, a? Unai ia vara neganai, dahaka do oi karaia?

Gau ginigunana be, oi sibona emu kara oi tahua, oi be dahaka oi karaia bona unai hekwakwanai ia vara. Oi badu haraga, a? Oi be heai momo tauna, a? Emu adavana ena lalohadai be dahaka unai henanadai dekenai? Unai henanadai ihatoina be mai anina bada, badina hepapahuahu dekenai oiemu lalohadai bona emu adavana ena lalohadai be idau.

Hegeregere, edena bamona, bema oi herevahereva neganai, oi ese emu lalohadai eiava hemami oi gwauraia hedinarai haraga, to oiemu adavana be ia herevahereva momo lasi. Reana do oi gwau: “Egu ruma bese lalonai ibounai be unai bamona idia herevahereva. Unai be hepapahuahu karana lasi!” Bona reana oi dekenai unai be hepapahuahu lasi. To emu adavana dekenai unai hereva ese ena lalona ia hahisia bona heai ia havaraia diba. Bema oi laloparara umui ruaosi emui herevahereva daladia be idauidau, unai ese umui ia durua diba lalohadai kereredia umui dadaraia totona.

Namona be oi laloatao danu, hepapahuahu be lolo sibona lasi. Paulo be Keristani taudia ia hamaoroa: “Hereva dika, laloa dika, bona samania koikoi hereva ibounai do umui hadokoa.” (Efeso 4:​31) Unai be gadona habadaia karana sibona lasi, to ita badu dainai ita hereva maragimaragi ese ia hahedinaraia danu. Unai dainai herevana tau bona ena adavana be idia hereva maragimaragi, to edia hereva amo ta idia hahisia neganai, ita gwau diba idia hepapahuahu.

Mani oi bona emu adavana ese hekwakwanai umui hamaoromaoroa dalana umui laloa lou. Oi hepapahuahu momo, a? Ita itaia vadaeni, unai henanadai ena haere be emu adavana ese do ia haerelaia. Namo lasi oi laloa emu adavana be ia lalohisihisi kava, to emu adavana oi kamonai henia, iena lalohadai oi matauraia, bona mai manau ida oi hereva. Paulo ia gwau: “Tau tamona sibona ena namo do ia tahua lasi, to namona be tau haida edia namo do ia tahua.”​​—⁠1 Korinto 10:⁠24.

Kamonai Karana Naria Namonamo

Hepapahuahu hamaoromaoroa dalana ma ta be Iesu ese ia herevalaia, ia gwau: “Umui emui kamonai do umui naria namonamo.” (Luka 8:​18) Momokani, Iesu be headava lalonai herevahereva karana ia herevalaia lasi. To, unai hakaua herevana be mai anina bada headava lalonai. Emu adavana ia hereva neganai oi kamonai namonamo, a? Eiava iena hereva oi utua haraga bona hamaoromaoroa dalana ta oi gwauraia ena be unai hekwakwanai oi lalopararalaia lasi, a? Baibel ia gwau: “Hereva do oi kamonai guna, gabeai do oi haere. Bema oi haere haraga, oi be kavakava, bona hemarai do oi davaria.” (Aonega Herevadia 18:13) Bema hepapahuahu ia vara, namona be oi bona emu adavana be unai hekwakwanai umui herevalaia hebou bona ta ta umui kamonai henia be namo.

Namona be emu adavana ena lalohadai oi laloa bada bona “ta ta dekenai durua do umui henia.” (1 Petero 3:⁠8) Unai hereva Greek dekenai ena anina be ma ta ia davaria hisihisina oi mamia danu. Bema emu adavana be gau ta dainai ia lalometau, unai umui herevalaia hebou be namo. Namona be oi hekwarahi emu adavana ena lalohadai oi lalopararalaia totona.

Dirava ia badinaia tauna Isako be unai bamona ia karaia. Baibel ese ita ia hadibaia iena adavana Rebeka, be edia natuna Iakobo dainai ia lalohisihisi bada. Rebeka ese Isako ia hamaoroa: “Lau hesiku vadaeni inai Hiti hahine taudia totona. Bema Iakobo ese inai Hiti taudia edia natuna, inai tano dekenai idia noho ta do ia adavaia, lauegu noho be dohore edena bamona?”​​—⁠Genese 27:⁠46.

Rebeka be ia lalohisihisi dainai unai hereva ia gwauraia. To, momokani ia ura ia mase, a? Bema ena natuna mero be Hiti kekeni ta ia adavaia, do ia moalelaia lasi, a? Reana lasi. To, Isako ese Rebeka ena hemami ia laloa maragi lasi. Isako ia diba Rebeka ena hereva be mai badina, unai dainai kara ta ia karaia. (Genese 28:⁠1) Namona be unai bamona oi karaia bema emu adavana be hekwakwanai ta dainai ia lalometau. Namo lasi oi laloa emu adavana be ia lalohisihisi kava, to emu adavana oi kamonai henia, iena lalohadai oi matauraia, bona mai manau ida oi hereva.

Kamonai Bona Laloparara

Baibel ena aonega herevana ta ia gwau: “Tau ta ena aonega ese haheauka ia henia noho, vadaeni ia badu haraga lasi.” (Aonega Herevadia 19:11) Vaia, hepapahuahu lalonai emu adavana ese ia gwauraia badu herevana oi haloua haraga diba. Nega momo unai ese hepapahuahu ia habadaia sibona. Unai dainai emu adavana ia hereva neganai, ena hereva sibona oi kamonai lasi to ena hemami danu oi laloa. Unai be aonega karana, badina unai ese oi do ia durua sibona emu lalohadai oi laloa lasi bona hekwakwanai ena badina oi tahua totona.

Hegeregere, bema emu hahine ia gwau, “Oi be lau danu oi herevahereva diba lasi!” Reana do oi badu bona ena hereva do oi haloua. Oi gwau: “To ita noho hebou neganai ita herevahereva lasi, a?” To bema oi kamonai namonamo emu adavana be ia ura umui helai bona ena lalona dekenai ia noho lalohadai umui herevalaia hebou. Reana hahine ese ia gwauraia herevana ena anina be, oi be ia oi laloa bada lasi bona oi lalokau henia lasi.

Bema oi be hahine ta bona emu adavana be oi hoia gauna ta dekenai ena lalohadai ia gwauraia. Mai badu ida ia gwau: “Oi be moni bada herea oi negea unai oi hoia totona.” Reana do oi gwau moni be hegeregere dainai unai gauna lau hoia eiava oi gwau ena davana be bada lasi. To bema oi kamonai namonamo, do oi laloparara emu adavana be moni ia herevalaia lasi. To, ia badu badina unai gauna oi hoia neganai, ia oi hadibaia lasi.

Momokani, headava taudia ta ta ese edia nega idia gaukaralaia hebou eiava moni amo kohu ta idia ura hoia daladia be idauidau. To, gau badana be inai, bema hepapahuahu ena badina oi lalopararalaia, unai ese emu badu do ia koua bona oi do ia durua mai anina bada gaudia umui herevalaia totona. Namona be oi badu haraga lasi, to Baibel torea tauna Iamesi ena hereva oi badinaia, ia gwau: “Umui ta ta ibounai ese hereva dekenai do umui kamonai haraga, to hereva do umui gwauraia haraga lasi. Bona do umui badu haraga lasi.”​​—⁠Iamesi 1:​19.

Namona be oi laloatao, emu adavana oi hereva henia dalana be gau badana. Baibel ia gwau, “Aonega tauna ena hereva ese, taunimanima idia hamauria diba.” (Aonega Herevadia 12:18) Bema oi bona emu adavana be gau ta dekenai umui hepapahuahu neganai, emu hereva ese emu adavana ia hadikaia eiava ia hanamoa, a? Emu adavana be ia ura hekwakwanai ia hamaoromaoroa eiava ia ura ia hepapahuahu sibona, a? Ita itaia vadaeni, bema mai badu ida ita hereva neganai, unai ese hepapahuahu do ia habadaia sibona.​​—⁠Aonega Herevadia 29:⁠22.

Bema hepapahuahu ia bada ia lao, namona be oi hekwarahi hepapahuahu ena badina oi diba bena oi hamaoromaoroa. Namo lasi oi gwau unai be emu adavana ena kerere, to oi tahua dahaka dainai unai ia vara. Bona hamaoromaoroa dalana oi tahua, to daika be maoro bona daika be kerere umui heailaia lasi. Oi naria namonamo, namo lasi au be lahi dekenai oi atoa bona lahi ia habadaia hegeregerena, emu hereva ese hepapahuahu do ia habadaia. Baibel ia gwau: “Hereva auka ese badu ia havaraia noho.” (Aonega Herevadia 15:⁠1) Oibe, dahaka oi hereva bona edena bamona unai hereva oi gwauraia ese emu adavana ena lalona do ia veria oi danu ia lalotamona eiava oi do ia badu henia totona.

Hepapahuahu Hamaoromaoroa

Iseda ura badana hepapahuahu dekenai be ita kwalimu totona lasi, to ita hamaoromaoroa totona. Edena bamona oi hamaoromaoroa diba? Gau badana be Baibel ena hakaua herevana oi badinaia, bona headava lalonai tatau ese unai idia badinaia guna. Namona be oi sibona emu lalohadai amo hepapahuahu oi hamaoromaoroa lasi, to Iehova ena lalohadai hegeregerena unai oi karaia. Namona be Dirava umui guriguri henia bona iena maino ese umui laloa gaudia, bona emui kudouna idia mamia gaudia ibounai do ia gimaia. (Efeso 6:​18; Filipi 4:​6, 7) Emu namo oi tahua sibona lasi, to namona be oi hekwarahi emu adavana ena namo oi tahua danu.​​—⁠Filipi 2:⁠4.

Nega momo oi lalohisihisi bada dainai unai hekwakwanai ia bada ia lao. To, bema Dirava ena Hereva hegeregerena hekwakwanai umui hamaoromaoroa, ta ta ida maino umui karaia bona Iehova ena hahenamo umui abia diba. (2 Korinto 13:11) Unai dainai, namona be “Dirava dekena amo ia mai aonega” ese oi do ia hakaua, unai amo Dirava ena kara do oi karaia bona ‘maino oi karaia noho neganai,’ hahenamo momo do oi davaria.​​—⁠Iamesi 3:​17, 18.

Namona be tau bona hahine be mai maino ida hekwakwanai idia hamaoromaoroa daladia idia dibaia, ena be unai idia karaia totona sibona edia lalohadai idia dadaraia diba. (1 Korinto 6:⁠7) Unai dainai, Paulo ena sisiba ita badinaia, ia gwau, “Inai gaudia umui negea momokani: Badu, dagedage, laloa dika. Hereva dika bona hereva mirodia do umui gwauraia lasi. . . . Badina be emui mauri gunana mai ena dika be dabua gunana bamona umui kokia vadaeni, bona mauri matamata umui kwatua vadaeni.”​​—⁠Kolose 3:​8-​10.

Oibe, nega haida oi gwauraia hereva dainai emu hemami ia dika. (Iamesi 3:⁠8) Unai ia vara neganai, emu adavana dekenai sori herevana oi gwauraia be namo. Bema oi hekwarahi, do oi itaia oi bona emu adavana ese hekwakwanai umui hamaoromaoroa haraga diba.

[Box/Picture on page 16]

Hepapahuahu Koua Daladia Toi

• Emu adavana oi kamonai henia. Aonega Herevadia 10:⁠19

• Emu adavana ena lalohadai oi matauraia. Filipi 2:4

• Mai lalokau ida oi hereva. 1 Korinto 13:​4-7

[Box/Picture on page 17]

Hari Oi Karaia Diba Gaudia

Henunai idia noho henanadai amo emu adavana oi nanadaia, bona ena haere oi kamonai namonamo. Bena emu adavana danu unai bamona do ia karaia.

• Lau hepapahuahu eiava heai momo, a?

• Oiemu lalohadai oi gwauraia neganai, lau kamonai namonamo, eiava oi hereva noho lalonai emu hereva lau utua, a?

• Lauegu hereva be oi idia hahisia eiava oi idia habadua, a?

• Gau ta dekenai ita lalotamona lasi neganai, ita ruaosi ese dahaka ita karaia diba iseda herevahereva dalana ita hanamoa totona?

[Picture on page 15]

Emu adavana ena hereva oi kamonai namonamo, a?

[Picture on page 16]

“Egu adavana ese lau ia laloa bona lalokau henia lasi”

[Picture on page 16]

“Oi be lau danu oi herevahereva diba lasi!”

[Picture on page 16]

“To ita noho hebou neganai ita herevahereva lasi, a?”