Iehova Ena Hereva be Ia Mauri Noho

Samuela Iharuana Bukana Ena Hereva Badadia

IEHOVA ena lohia siahuna ita abia dae ena anina be Dirava ita kamonai henia goevagoeva, a? Kara maoromaoro badinaia tauna be hanaihanai Dirava ena vairanai gau ibounai ia karaia be maoro sibona, a? Edena bamona tauna be Dirava momokani ese “ia ura henia”? (1 Samuela 13:14) Baibel bukana Samuela Iharuana ese unai henanadaidia ia haerelaia namonamo.

Samuela Iharuana be Gadi bona Natana ese idia torea, unai peroveta taudia ruaosi be idaunega Israela ena King Davida ena tura namodia.a Unai buka be lagani 1040 B.C.E. bamona ai idia haorea, unai negai Davida ena lagani 40 lohia negana ia ore, bona unai buka ese Davida bona ena hetura karana Iehova ida ia herevalaia momo. Unai sivarai namona ese ia hahedinaraia edena dala ai heiriheiri karana ese ia hapararaia besena be king ta henunai lalotamona basileiana ai ia lao. Unai buka lalonai idia noho sivaraidia momo ese taunimanima edia hemami ia hahedinaraia namo herea.

DAVIDA BE “IA GOADA LAO NOHO”

(2 Samuela 1:1–10:19)

Davida be Saulo bona Ionatana ena mase sivaraina ia kamonai negana ai ia karaia kara ese ena hemami idia bona Iehova dekenai ia hahedinaraia. Heberona dekenai, Davida be Iuda iduhu ena king ai idia halaoa. Saulo ena natuna Isiboseta be Israela taudia oredia edia king ai idia halaoa. Davida be ‘ia goada ia lao,’ bona lagani 7 mai kahana murinai, ia be Israela ibounai ena king ai idia halaoa.​—2 Samuela 5:10.

Davida ese Iebusu taudia amo Ierusalema ia abia bona ena basileia ena hanua badana ai ia halaoa. Davida ese Taravatu Maua be nega ginigunana Ierusalema dekenai ia abia lao neganai, dika ia vara. To, nega iharuana ia karaia neganai ia kwalimu, bona ia moale dainai ia mavaru. Iehova be Davida ida basileia ta totona gwauhamata ta ia karaia. Dirava be Davida ida ia noho negadia lalonai, Davida ese ena inai taudia ia halusidia noho.

Baibel Henanadaidia Edia Haere:

2:18​—Dahaka dainai Ioaba bona ena tadikaka rua idia gwauraia edia sinana, Seruia ena natuna tau toi? Heberu Revarevadia lalonai, bese taudia edia lista ai hanaihanai tamana ena ladana idia gaukaralaia. Seruia ena tau be reana ia mase vadaeni, eiava idia laloa ena ladana be hegeregere lasi Buka Helaga lalonai idia torea totona. Seruia ena ladana idia atoa badina ia be Davida ena taihuna. (1 Sivarai 2:15, 16) Unai tadikaka toi edia tamana idia gwauraia negana tamona be Betelehema dekenai ena guri gabuna idia gwauraia negana ai.​—2 Samuela 2:​32.

3:29​—Tau ese “hahine edia gaukara do [ia] karaia” ena anina be dahaka? Dabua turia gaukara be hahine taudia edia gaukara. Unai dainai, unai hereva ese tuari gaukaradia totona idia hegeregere lasi bona unai dainai hahine ese idia karaia gaukara idia karaia be namo taudia ia herevalaia.

5:1, 2​—Isiboseta idia hamasea murinai, lagani hida idia hanaia bena Davida be Israela ibounai edia king ai idia halaoa? Ita gwau diba Saulo ia mase murinai, Isiboseta be ena king dagina ia abia bona lagani rua lalonai ia lohia, unai nega tamona ai Davida be Heberona dekenai ena king dagina ia matamaia. Davida be lagani 7 mai kahana Heberona amo Iuda ia lohiaia. Israela ibounai edia king ai idia halaoa murinai, Ierusalema be ena hanua badana ai ia halaoa. Unai dainai, Isiboseta ia mase bena lagani 5 idia hanaia murinai, Davida be Israela ibounai ena king ai idia halaoa.​—2 Samuela 2:3, 4, 8-11; 5:4, 5.

8:2​—Israela taudia be Moaba taudia ida idia tuari murinai, Moaba taudia hida idia hamasedia? Edia namba be duahia karana amo idia abia lasi, to hahetoho varo amo idia makaia. Reana Davida ese idia ia hamaoroa tano dekenai laini ai idia hekure totona. Bena, varo amo ia makaia. Reana, Moaba taudia toi toi amo rua rua be idia hamasea, bona toi toi amo ta ta idia hamasea lasi.

Ita Dibaia Gaudia:

2:1; 5:19, 23. Davida be Heberona dekenai ia do lao lasi bona ena inai taudia ia do tuari henia lasi neganai, ia ese Iehova ia tahua guna. Ita danu iseda lauma dalana ia hadikaia diba abia hidi ita do karaia lasi neganai, Iehova ena hakaua hereva ita tahua guna be namo.

3:26-30. Dika ena davana henia karana ese dika ia havaraia.​—Roma 12:17-19.

3:31-34; 4:9-12. Davida be haheitalai namona, ia be dika davana ia henia lou lasi bona ia idia inai henia taudia dekenai ia badu lasi.

5:12. Namona be ita laloaboio lasi Iehova ese ena dala be ita dekenai ia hadibaia bona dala ia kehoa ia ida ita hetura namonamo totona.

6:1-7. Ena be Davida dekenai Maua be treila latanai do ia abia lao karana be maoro, to unai be Dirava ena hahegani ida ia hegeregere lasi bona unai dainai dika ia vara. (Esodo 25:13, 14; Numera 4:15, 19; 7:7-9) Usa ese Maua ia dogoatao karana ese ia hahedinaraia danu, badina namodia ese Dirava ena ura do ia haidaua lasi.

6:​8, 9. Hedibagani ia vara neganai, Davida ia badu, bena ia gari​—reana unai dika dainai ia gwau unai be Iehova ena kerere. Ita naria namonamo, hahegani ita badinaia lasi dainai hekwakwanai idia vara neganai, namo lasi ita gwau unai be Iehova ena kerere.

7:18, 22, 23, 26. Davida ena manau, Iehova badinaia goadagoada karana, bona iena ura Dirava ena ladana ia abia isi totona ita tohotohoa be namo.

8:2. Lagani 400 gunanai idia gwauraia peroveta herevana ia guguru. (Numera 24:17) Iehova ena hereva be hanaihanai ia momokani.

9:1, 6, 7. Davida be ena gwauhamata ia badinaia. Ita danu iseda gwauhamata ita hagugurua be namo.

IEHOVA ESE IA HOROA TAUNA DEKENAI HISIHISI IA MAILAIA

(2 Samuela 11:1–20:26)

Iehova ese Davida ia hamaoroa: “Oi sibona oiemu famili lalona dekena amo, dika oi dekenai do lau havaraia. Oiemu adavana haida be do lau abia lao, oiemu varavara tauna dekenai idia do lau henia, bona ia ese dina ena diari lalonai idia do ia sihari henidia.” (2 Samuela 12:11) Dahaka dainai unai hereva ia henia? Badina Davida be Bataseba ida ia kara dika. Ena be Iehova ese helalo-kerehai tauna Davida ena dika ia gwauatao, to Davida ena kara dika dainai dika haida ia davaria.

Ginigunana be Bataseba ese ia havaraia natuna ia mase. Bena Davida ena rami-hebou natuna kekenina, Tama, be ena kakana Amono ese ia reipia. Unai dainai Tama ena kakana Abesaloma ia badu bona Amono ia hamasea. Abesaloma be ena tamana ia hadikaia dalana ia tahua bona Heberona ai sibona king ai ia halaoa. Davida be Ierusalema ia rakatania bona ia heau. Abesaloma be ena tamana ena hahine 10, ruma idia naria totona ia rakatania hahinedia, ida ia mahuta hebou. Abesaloma idia hamasea murinai, Davida be ena king dagina ia abia lou. Beniamina tauna Sieba ia mase neganai, ia ese ia havaraia dagedage karadia be unai negai idia ore.

Baibel Henanadaidia Edia Haere:

14:7​—“Egu lahi gida maragina” ese dahaka ia laulaulaia? Lahi gida maragina be ia mauri noho natuna ia laulaulaia.

19:29​—Mepiboseta ena hereva dekenai dahaka dainai Davida be unai bamona ia haere? Davida ese Mepiboseta ena hereva ia kamonai murinai, reana ia laloparara ia be Siba ena hereva ia abia dae kava dainai ia kerere. (2 Samuela 16:1-4; 19:24-28) Toana be, unai ese Davida ia habadua, bona ia ura lasi hereva ma haida ia kamonai.

Ita Dibaia Gaudia:

11:2-15. Davida ena sivarai ese ena kerere ia gwauraia hedinarai dainai, unai ese ia hamomokania Baibel be Dirava ena lauma helaga amo ia vara.

11:16-27. Kara dika badana ita karaia neganai, namo lasi ita hunia Davida ia karaia bamona. To, iseda kara dika be Iehova dekenai ita gwauraia hedinarai bona kongrigeisen ai elda taudia edia heduru ita tahua be namo.—Aonega Herevadia 28:13; Iamesi 5:13-16.

12:1-14. Natana ese haheitalai namona ia hahedinaraia kongrigeisen lalonai idia noho elda taudia totona. Idia be kara dika idia karaia taudia idia durua be namo, unai amo edia dala idia hamaoromaoroa diba. Elda taudia ese mai aonega ida unai maduna idia huaia be namo.

12:15-23. Davida be ia dekenai idia vara gaudia dekenai lalohadai maorona ia abia, unai ese ia durua hekwakwanai neganai ia laloa namonamo totona.

15:12; 16:15, 21, 23.  Toana be Abesaloma be terona ia abia gwauraia neganai, sisiba henia tauna namona Ahitopela be ia hekokoroku bona ladana bada ia ura henia dainai Abesaloma ia hadikaia. Bema oiemu aonega be bada, to manau bona kamonai karadia oi hahedinaraia lasi, tarapu dekenai do oi moru.

19:24, 30. Mepiboseta be Davida ena hebogahisi-mai-lalokauna ia abia dae. Ia be mai ena ura ida king ese Siba dekenai ia karaia abia hidi ia matauraia. Iehova bona ena orea laloa bada karana ese iseda lalona ia veria hemataurai ita hahedinaraia totona.

20:21, 22. Tau tamona ena aonega ese taunimanima dekenai do ia vara dika bada ia koua diba.​—Hadibaia Tauna 9:14, 15.

IEHOVA “ESE ITA IA PANISIA BE NAMO”

(2 Samuela 21:1–24:25)

Lagani toi lalonai hitolo bada ia vara badina Saulo ese Gibeona taudia ia hamasedia. (Iosua 9:15) Unai dainai Gibeona taudia be rara bubua karana ena davana totona, idia noinoi Saulo ena natudia memero 7 do idia hamasedia. Davida ese Gibeona taudia edia imana dekenai ia henidia, vadaeni doe ia ore bona medu bada ia diho. Pilistia tatau latadia foa be “Davida bona iena tuari taudia ese . . . idia alaia mase.”​—2 Samuela 21:22.

Davida ese oda ia henia taunimanima idia duahia totona dainai, kara dika badana ia karaia. Ia helalo-kerehai bona ia abia dae Iehova ‘ese ia panisia be namo.’ (2 Samuela 24:14) Unai dainai, taunimanima 70,000 be gorere dikana amo idia mase. Davida ese Iehova ena hahegani ia badinaia, bona unai dika badana ia ore.

Baibel Henanadaidia Edia Haere:

21:8​—Edena bamona idia gwau Saulo ena natuna kekeni Mikala ena natudia memero be faiv, to 2 Samuela 6:23 ia gwau ia be natudia lasi bona ia mase? Taunimanima momo ese idia abia dae herevana be unai natudia memero be Mikala ena taihuna Meraba, Adariele ese ia adavaia hahinena, ena natudia. Toana be, Meraba be ia mase guna bona Mikala ese unai natudia memero ia naria.

21:9, 10​—Gibeona taudia ese idia hamasea Risipa ena natudia rua bona Saulo ena tubuna memero faiv be Risipa ese hua hida lalonai ia naridia? Unai taudia 7 “be uma ena anina idia haboua hamatamaia negana”​—March eiava April​—ai idia tauadae. Edia mase tauanina be ororo dekenai idia rakatania kava. Risipa ese unai mase tauanina 7 be dina bona hanuaboi lalonai ia naridia ela bona Iehova ese medu ia siaia, unai amo Iehova ia hahedinaraia ena badu ia ore vadaeni. October lalonai, uma aniani haboua negana ia do ore lasi bona medu bada herea unai bamona ia diho be hoa gauna. Unai dainai, reana Risipa be hua 5 eiava 6 lalonai ia naria. Gabeai, Davida ese unai tatau edia turia ia guria.

24:1​—Dahaka dainai taunimanima duahia karana be kara dika badana Davida dekenai? Taunimanima duahia karana be Taravatu ese ia gwauraia dika lasi. (Numera 1:1-3; 26:1-4) Davida ese taunimanima ia duahia ena badina be Baibel ese ia gwauraia lasi. To, 1 Sivarai 21:1 ia hahedinaraia Satani ese ena lalona ia veria dainai unai ia karaia. Herevana dahaka ia karaia, ena tuari biaguna, Ioaba, ia diba Davida ia karaia duahia karana be kerere bona ia ura Davida ia koua unai ia karaia lasi totona.

Ita Dibaia Gaudia:

22:​2-51. Davida ena ane ese ia hahedinaraia namo herea Iehova be Dirava momokani, ia ita abidadama henia be maoro!

23:15-17. Davida be Dirava ena taravatu mauri bona rara dekenai ia matauraia bada, bona ia karaia karana amo ia hahedinaraia ia ura lasi unai taravatu do ia utua. Unai bamona kara ita hahedinaraia be namo Dirava ena taravatu ibounai dekenai.

24:10. Davida ena lalomamina ese ena lalona ia veria ia helalo-kerehai totona. Iseda lalomamina be unai bamona, a?

24:14. Davida ia diba Iehova ena hebogahisi ese taunimanima edia hebogahisi ia hereaia. Ita danu be unai bamona ita laloa, a?

24:17. Davida ia lalohisihisi badina ena kara dika dainai bese ibounai be hisihisi idia davaria. Bema ia helalo-kerehai kara dika tauna ena kerere ese kongrigeisen ia hadikaia, unai ia lalohisihisilaia be namo.

‘Dirava ese Ita Ia Ura Henia’ Diba

Israela ena king iharuana be ‘Iehova ese ia ura henia tauna.’ (1 Samuela 13:14) Davida be Iehova ena kara maoromaoro taravatudia ia hepapahuahulaia lasi, bona Dirava ena lohia siahuna ia dadaraia lasi. Davida ia kerere negadiai, ena kerere ia gwauraia hedinarai, matahakani ia abia dae, bona ena dala ia hamaoromaorodia. Davida be kara maoromaoro ia badinaia tauna. Ita kerere neganai, ia bamona ita kara be aonega karana, a?

Davida ena mauri sivaraina ese ia hahedinaraia namonamo, Iehova ena lohia siahuna ita abia dae ena anina be Ena taravatu namo bona dika dekenai ita abia dae bona ita hekwarahi ita badinadia totona. Unai ita karaia diba. Samuela Iharuana ena buka amo ita dibaia gaudia dainai ita moale bada! Momokani, unai buka ai idia noho sivarai be ia mauri noho bona mai ena siahu.​—Heberu 4:12.

[Footnote]

[Picture on page 6]

Davida be king ai ia ia halaoa tauna ia laloa karana ese ia durua ia manau totona

[Pictures on page 8]

“Oi sibona oiemu famili lalona dekena amo, dika oi dekenai do lau havaraia”

Bataseba

Tamara

Aminona