Hakaua Taudia Namodia—Edeseniai Ita Davaridia Diba?

BAIBEL ia gwau: “Ruma ibounai be mai edia karaia tauna, to gau ibounai ia karaia tauna be Dirava sibona.” (Heberu 3:4; Apokalupo 4:11) Dirava momokanina, Iehova, be iseda Havaraia Tauna dainai, “ia diba, ita be tanobada ena kahu dekenai amo ita ia karaia.” (Salamo 103:14) Ia be iseda goada ena hetoana bona dahaka ita abia be namo ia diba goevagoeva. Bona ia be lalokau Diravana dainai, ia ura unai gaudia ia henia. (Salamo 145:16; 1 Ioane 4:⁠8) Ia diba danu hakaua taudia namodia ita abia be namo.

Iehova be peroveta tauna Isaia amo ia gwau: ‘Lau ese Davida lau abia hidi, bona hakaua tauna, bona bese idauidau edia lohia lau halaoa. Bona Davida dekena amo, egu siahu badana bese idauidau dekenai lau hedinaraia.’ (Isaia 55:⁠4) Hari hakaua tauna namona ita davaria totona, namona be unai Hakaua Tauna​​—⁠Siahu Ibounai Diravana ese ia abia hidi tauna​​—⁠ita diba bona ena hakaua dalana ita abia dae. Vadaeni, idia perovetalaia Hakaua Tauna bona Lohia Tauna be daika? Dahaka ia karaia dainai hakaua tauna ai ia lao be maoro? Edeseniai ita do ia hakaua lao? Dahaka ita karaia be namo iena hakaua dalana amo namo do ita abia totona?

Idia Gwauhamatalaia Hakaua Tauna Ia Ginidae

Lagani 2,500 gunanai, aneru Gabriela be peroveta tauna Daniela dekenai ia hedinarai bona ia gwau: “Namona be do oi diba bona emu lalona danu do ia parara, Ierusalema hanamoa lou bona haginia lou herevana do ia hedinarai negana ela bona Mesia, Hakaua Tauna, do ia mai be pura 7 bona pura 62. Do ia giroa lou bona do idia haginia lou, mai ena ariara bona mai ena gegea ahu koupana, to hekwakwanai momo negana ai unai do ia vara.”​—⁠Daniela 9:​25, NW.

Ia hedinarai goevagoeva, aneru be Daniela dekenai Iehova ese ia abia hidi Hakaua Tauna ena mai negana ia hadibaia. Lagani 455 B.C.E. ai, Ierusalema haginia lou herevana idia halasia negana amo ita duahia matamaia ela bona pura 69, o lagani 483, idia ore neganai, bena “Mesia, Hakaua Tauna,” do ia hedinarai.a (Nehemia 2:​1-8) Dahaka ia vara unai nega ena dokona ai? Evanelia torea tauna Luka ia gwau: “Tiberio Kaisara be lagani 15 ia lohia neganai, Pontio Pilato be Iudea edia gavana, bona Heroda be Galilea dekenai [29 C.E. ai] ia lohia. . . . Unai neganai Dirava ese Ioane Sekaraia dekenai ia hereva, taunimanima idia noho lasi tanona dekenai. Unai dainai Ioane ese Ioridane Sinavai kahana ena tano ibounai dekenai ia loaloa. Ia haroro, ia gwau, ‘Umui emui lalona umui giroa, bapatiso umui abia, bona Dirava ese emui kara dika do ia gwauatao.’ ” Unai neganai, taunimanima ese Mesia, Hakaua Tauna, ena mai negana “idia laloa momo.” (Luka 3:​1-3, 15) Ena be hutuma idia mai Ioane dekenai, to ia be unai Hakaua Tauna lasi.

October 29 C.E. ena siahu negana ia ore neganai, Nasareta tauna Iesu be Ioane dekenai ia lao bapatiso ia abia totona. Bona Ioane ese ia itaia gaudia ia gwauraia hedinarai, ia gwau: “Lauma Helaga lau itaia vadaeni, guba dekena amo ia diho, pune manu bamona, ia latanai ia kamokau. Lau be lau diba lasi ia, to Dirava ese ranu dekenai bapatiso karaia totona lau ia siaia. Unai neganai Dirava ese lau ia hadibaia, ia gwau, ‘Tauna be oi ese do oi itaia, Lauma Helaga be do ia diho, bona iena latanai do ia kamokau. Inai tauna ese Lauma Helaga dekena amo taunimanima do ia bapatiso henidia.’ Ma Ioane ia gwau, ‘Lau ese lau itaia vadaeni, bona umui dekenai lau gwauraia hedinaraia inai, ia be Dirava ena Natuna.’ ” (Ioane 1:​32-34) Iesu ese bapatiso ia abia neganai, ia be horoa Hakaua Tauna​​—⁠Mesia, o Keriso​​—⁠ai ia lao.

Oibe, gwauhamata ‘hakaua tauna, bona bese idauidau edia lohia’ momokanina be Iesu Keriso. Bona ena hakaua karana ita tahua namonamo neganai, ita itaia diba iena hakaua dalana ese hari idia gwauraia hakaua tauna namona ia hereaia.

Mesia​​—⁠Hakaua Tauna Hereadaena

Hakaua tauna namona be hakaua hereva goevagoevadia ia henia bona ia henunai idia noho taudia dekenai goada bona diba ia henia, bona unai amo idia ese edia hekwakwanai idia hanamoa diba. Buka ta, 21st Century Leadership: Dialogues With 100 Top Leaders, ia gwau: ‘Hari inai negai hakaua tauna do ia kwalimu totona, unai kara do ia karaia.’ Iesu ese kamonai taudia ia hegaegaelaia namonamo dina ta ta ena hekwakwanai do idia hanamoa diba totona! Iesu ena hereva ta, taunimanima momo idia diba herevana​​—⁠Haroro Herevana Badana​​—⁠mani oi laloa. Unai mai anina bada sisiba herevadia be Mataio karoa 5 ia lao 7 lalonai idia noho.

Hegeregere, Iesu ena sisiba, hekwakwanai hamaoromaoroa dalana dekenai, mani oi laloa. Ia gwau: “Unai dainai, oiemu harihari gauna pata helaga dekenai oi atoa gwauraia neganai be do oi laloa guna, oiemu tadikakana dekenai mai emu kerere. Bema unai bamona, oiemu harihari gauna pata helaga ena vairana dekenai do oi rakatania, oi lao, oiemu tadikakana danu maino do umui ruaosi karaia guna, gabeai oi giroa lou, oiemu harihari gauna Dirava dekenai do oi henia.” (Mataio 5:​23, 24) Gau ginigunana be ma haida ida maino ita tahua​​—⁠unai be tomadiho karana, hegeregere Mose ena Taravatu bamona Ierusalema ena dubu patana ai harihari gauna idia atoa karana, do ia hanaia danu. Bema oi karaia guna lasi, Dirava ese unai tomadiho karana do ia abia dae lasi. Lagani handred momo gunanai hegeregerena, hari inai negai Iesu ena sisiba be mai anina bada.

Iesu ese kamonai taudia ia durua matabodaga karadia ena tarapu idia dadaraia totona. Ia hamaorodia, ia gwau: “Umui kamonai vadaeni, sene taudia dekenai idia hamaoroa, idia gwau, ‘Umui heudahanai lasi.’ To lau ese umui lau hamaoroa, bema tau ta ese hahine ta do ia itaia noho matana dekenai, ela bona iena lalona dekenai do ia ura dikadika, iena kudouna dekenai unai tau be ia heudahanai vadaeni.” (Mataio 5:​27, 28) Unai be sisiba namo hereana! Iseda lalona ai matabodaga karadia ita lalohadailaia bona do ita karaia dalana dekenai ita raka matamaia be namo, a? Iesu ia gwau lalona dekena amo idia mai gaudia be heudahanai bona matabodaga. (Mataio 15:​18, 19) Aonega dalana be iseda kudouna ita gimaia.​—⁠Aonega Herevadia 4:⁠23.

Danu, Haroro Herevana Badana lalonai sisiba namodia haida be, ta ese ena inai tauna ia lalokau henia, hariharibada ia hahedinaraia, kohu bona lauma gaudia ia laloa namonamo, bona unai bamona gaudia ia karaia be namo. (Mataio 5:​43-47; 6:​1-4, 19-21, 24-34) Danu, Iesu ese kamonai taudia dekenai guriguri gwauraia dalana ia hadibaia, Dirava ena heduru do idia tahua diba totona. (Mataio 6:​9-13) Mesia, Hakaua Tauna, ese ia murinai idia raka taudia dekenai goada ia henia, bona idia ia hegaegaelaia taunimanima idia davaria hekwakwanai do idia hanaia totona.

Haroro Herevana Badana lalonai nega 6 Iesu ena hamatamaia herevana be “umui kamonai vadaeni” eiava “ma idia gwau,” to lalohadai ma ta ia gwauraia, ia gwau “to lau hereva umui dekenai.” (Mataio 5:​21, 22, 27, 28, 31-34, 38, 39, 43, 44) Unai ese ia hahedinaraia kamonai taudia idia manadalaia karana be Farisea taudia edia uduna amo idia gwauraia sene taravatudia hegeregerena idia kara. To hari Iesu ese dala idauna ta ia hahedinaraia​​—⁠unai ese Mose ena Taravatu ena badina korikori ia hahedinaraia. Iesu ese do ia idau gauna ia gwauraia, bona ia gwauraia dalana be auka lasi dainai ia murinai idia raka taudia ese idia abia dae haraga diba. Oibe, Iesu ese taunimanima ia hagoadaia lauma dalanai bona kara maoromaoro dalanai edia mauri idia haidaua. Hakaua tauna momokanina ena maka be unai.

Bisinesi stadi bukana ta ia gwau unai bamona haidaua karana be auka. Ia gwau: “Taunimanima edia kara haidaua tauna [hakaua tauna] ese welfea tauna ena hebogahisi, psychology tauna ena lalo-parara, gabu daudau heau helulu tauna ena haheauka, dagedage sisia ena koria noho karana, sibona ia noho tauna be sibona ena goada dekenai ia tabekau karana, bona seint ena haheauka ia abia be namo. Bona ena be unai kara iboudiai ia abia, to do ia kwalimu o lasi be ita gwauraia diba lasi.”

Buka ta ena hereva ladana “Hakaua Taudia: Edia Kara be mai Anina Bada, A?” ia gwau: “Namona be hakaua taudia edia kara ia namo badina idia ura idia murinai idia raka taudia edia kara be namo.” Momokani, hakaua tauna namona be ia harorolaia gaudia ia badinaia danu. Iesu Keriso dekenai unai be momokani! Oibe, ia ida idia noho taudia ia hadibaia idia manau be namo, to ia hadibaia totona edia aena ia huria. (Ioane 13:​5-15) Iesu ese ena hahediba taudia ia siaia kava lasi Dirava ena Basileia ena sivarai namona idia harorolaia totona, to ia ese unai gaukara ia karaia goadagoada danu. (Mataio 4:​18-25; Luka 8:​1-3; 9:​1-6; 10:​1-24; Ioane 10:​40-42) Bona hakaua tauna badinaia karana dekenai, Iesu ese haheitalai namona ia hahedinaraia. Ia gwau: “Natuna be sibona kara ta ia karaia diba lasi, to ia ese iena Tamana ena kara ia itaia noho, vadaeni unai kara sibona ia karaia.”​—⁠Ioane 5:⁠19.

Iesu ena hereva bona kara, ai herevalaia vadaeni gaudia, ese idia hahedinaraia goevagoeva ia be Hakaua Tauna hereadaena. Momokani, ia ese taunimanima idia laloa bada hakaua taudia iboudiai ia hereaia. Iesu ia goevadae. Ia mase bona ia toreisi lou murinai, mase diba lasi maurina ia abia, bona do ia mauri hanaihanai. (1 Petero 3:18; Apokalupo 1:​13-18) Tanobada hakaua tauna ta be unai bamona gaudia ia abia, a?

Dahaka Ita Karaia be Namo?

“Mesia, Hakaua Tauna,” be Dirava ena Basileia ena King dainai, ia ese kamonai taudia dekenai hahenamo momo do ia henia. Unai dainai Baibel ia gwauhamata: “Tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.” (Isaia 11:⁠9) “Manau taudia ese noho gabuna tano do idia abia, do idia helai namonamo, mai moale bona mai maino danu.” (Salamo 37:11) “Taunimanima ta ta ibounai, be maino dekenai do idia noho. Ta ta ese sibona edia vain uma bona fig audia, be do idia naria noho, bona tau ta ese idia do ia hagaria lasi.” (Mika 4:⁠4) “Dirava be idia danu do ia noho, bona ia be edia Dirava do ia lao. Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.”​—⁠Apokalupo 21:​3, 4.

Inai tanobada dekenai hakaua taudia namodia idia davaria be auka. To Iesu Keriso ese manau taudia be maino tanobada matamatana lalonai do ia hakaua lao, bona unuseniai kamonai taudia be Iehova Dirava do idia tomadiho henia mai lalo-tamona ida bona do idia goevadae. Unai dainai gau badana be nega ita atoa Dirava momokani bona ia abia hidi Hakaua Tauna ita diba totona bona unai diba hegeregerena kara ita karaia!​—⁠Ioane 17:⁠3.

Tau ta do ita hanamoa dalana namona ta be iena kara ita tohotohoa. Vadaeni, taunimanima edia histori ibounai lalonai Hakaua Tauna hereadaena​​—⁠Iesu Keriso​​—⁠ita tohotohoa be namo, ani? Edena bamona unai ita karaia diba? Ena hakaua dalana ita abia dae neganai, eda mauri lalonai dahaka do ia vara? Hereva gabedia rua ese unai henanadai bona ma haida do idia herevalaia?

[Footnote]

[Picture on page 4]

Daniela ese Dirava ia abia hidi Hakaua Tauna do ia mai negana ia perovetalaia

[Pictures on page 7]

Iesu ena hahediba herevadia ese taunimanima idia hegaegaelaia mauri ena hekwakwanai idia hanamoa totona

[Picture on page 7]

Iesu be maino tanobada matamatana ai kamonai taudia do ia hakaua lao