Travay

4 Twouve, pandan yo toule de t ap pale ak pèp la, prèt an chèf yo, chèf gad ki t ap veye tanp lan, ansanm ak Sadiseyen yo vin kote yo 2 tou kontrarye poutèt yo t ap anseye pèp la e poutèt yo te sèvi ak egzanp Jezi pou yo pale aklè sou rezirèksyon pami mò yo. 3 Epi, yo met men sou yo, yo mete yo nan prizon annatandan demen rive, paske li te gentan aswè. 4 Men, anpil nan moun ki te tande pawòl mesye yo te di yo te kwè, e kantite gason ki te kwè yo te rive anviwon 5 000.

5 Nan demen, chèf yo, ansyen yo ak espè nan Lalwa yo reyini nan Jerizalèm 6 (Àn, prèt an chèf la, Kayif, Jan, Aleksann ansanm ak tout fanmi prèt an chèf la te la tou), 7 e yo mete mesye yo kanpe nan mitan yo, epi yo mande yo: “Ki otorite NOU genyen pou NOU fè sa NOU te fè a? Nan non kiyès NOU fè l?” 8 Lè sa a, Pyè, ki te ranpli ak lespri sen, di yo:

“NOU menm, chèf pèp la ak ansyen yo, 9 paske nou te fè yon bon bagay pou yon moun ki enfim, jodi a N ap poze nou kesyon pou NOU konnen kiyès ki geri l, 10 ebyen, n ap fè NOU tout ansanm ak tout pèp Izrayèl la konnen, se nan non Jezi Kris, moun Nazarèt NOU te kloure sou poto a, li menm Bondye te leve sot nan lanmò a, se grasa li mesye sa a kanpe enganm devan NOU la a. 11 Se li menm ki ‘wòch NOU menm moun k ap bati yo pa t pran pou anyen an, men ki vin tounen wòch prensipal ki nan kwen an’. 12 Mete sou sa, okenn lòt moun pa ka ban nou delivrans, paske Bondye pa t bay non okenn lòt moun anba syèl la pami lèzòm ki ka pèmèt nou sove.”

13 Lè yo wè fason Pyè ak Jan pale avèk kouraj, lè yo remake yo se moun ki pa t fè gwo etid*, e yo se moun òdinè, yo sezi. Epi yo vin rann yo kont mesye sa yo te konn avèk Jezi. 14 Lè yo gade mesye ki te geri a ki kanpe bò kote yo, sa fè yo pa t jwenn anyen pou yo reponn. 15 Donk, yo bay mesye yo lòd pou yo soti nan sal Sanedren an, epi yo kòmanse diskite bagay la antre yo, 16 yo di: “Ki sa pou n fè ak mesye sa yo? Paske, an reyalite, yo sot reyalize yon siy estrawòdinè la a, yon siy ki klè pou tout moun ki abite Jerizalèm. Nou pa ka nye sa. 17 Men, pou sa pa gaye plis nan mitan pèp la, ann menase yo. N ap di yo pou yo pa pale nan non sa a ankò ak pèsonn.”

18 Menm kote a, yo rele mesye yo, epi yo ba yo lòd pou yo pa ni pale ni anseye okenn kote nan non Jezi. 19 Men, Pyè ak Jan reponn, yo di: “Si sa bon nan je Bondye pou nou koute NOU olye nou koute Bondye, se NOU k konnen. 20 Men, kanta pou nou menm, nou pa ka sispann pale bagay nou te wè yo ak bagay nou te tande yo.” 21 Lè sa a, yo menase yo ankò, epi yo lage yo, nonsèlman paske yo pa t jwenn okenn rezon pou yo pini yo, men tou poutèt pèp la. Paske, tout pèp la t ap bay Bondye glwa pou sa k te pase a, 22 paske mesye yo te fè mirak pou yo geri l la te gen plis pase karant an.

23 Lè yo fin lage yo, y al jwenn lòt disip yo, e yo rakonte yo sa prèt an chèf yo ak ansyen yo te di yo. 24 Lè disip yo tande sa, yo met tèt yo ansanm pou yo priye Bondye, yo di:

“Souvren Seyè, se ou menm ki fè syèl la, tè a, lanmè a ansanm ak tout sa ki ladan yo, 25 e se ou menm, pa mwayen lespri sen, ki te sèvi ak bouch David, zansèt nou an, sèvitè w la, pou w di: ‘Poukisa nasyon yo ap bat kò yo konsa a, e poukisa pèp yo ap medite sou bagay ki san valè? 26 Wa latè yo pran pozisyon yo e dirijan yo rasanble, yo fè yon sèl kont Jewova e kont sila a li chwazi a.’ 27 Annefè, Ewòd, Pons Pilat ansanm ak yon seri mesye nan nasyon yo ak pèp ki ann Izrayèl yo te rasanble vre nan vil sa a kont Jezi, sèvitè w la ki sen, li menm ou chwazi a, 28 pou yo fè sa w te deside davans lan reyalize grasa pouvwa w e ann amoni ak volonte w. 29 Kounye a, Jewova, koute menas yo fè yo, epi bay esklav ou yo posiblite pou yo kontinye pale pawòl ou a ak anpil kran, 30 toutpandan w ap lonje men w pou w fè gerizon, e toutpandan gen siy ak bagay etonan k ap fèt nan non Jezi, sèvitè w la ki sen.”

31 Lè yo fin sipliye Bondye, kote yo te reyini an te pran tranble. Yo tout nèt te ranpli ak lespri sen, e yo t ap pale pawòl Bondye a avèk kran.

32 Mete sou sa, foul moun ki te kwè yo te ini*, e pèsonn pa t konsidere sa l genyen kòm zafè pa l. Okontrè, yo te pataje tout bagay. 33 Epitou, apot yo te kontinye bay temwayaj sou rezirèksyon Seyè Jezi avèk anpil pisans, e Bondye te vide favè san parèy li a an kantite sou yo tout. 34 Anfèt, pa t gen youn nan yo ki te nan bezwen. Paske, tout moun ki te posede tè oswa kay te vann yo, yo vin ak kòb la, 35 e yo depoze l devan apot yo. Apre sa, apot yo separe kòb la bay chak moun, selon sa moun nan te bezwen. 36 Se konsa, Jozèf, yon Levit ki fèt sou zile Chip, li menm apot yo te rele Banabas, ki vle di Pitit konsolasyon, 37 te gen yon moso tè, li vann li, li vin ak kòb la e li depoze l devan apot yo.