Jòb
41 “Èske w ka kenbe Levyatan*+ ak zen yo konn kenbe pwason?
Oubyen èske w ka mare lang li ak yon kòd?
3 Èske l ap sipliye w pou w gen pitye pou li?
Oubyen èske l ap pale dous avè w?
4 Èske l ap fè alyans avè w
Pou w ka fè l vin esklav ou nètale?
5 Èske w ap jwe avè l kòmsi l te yon zwazo?
Oubyen èske w ap mare l nan yon kòd pou pitit fi w jwe avè l?
6 Èske moun k ap fè lapèch yo ap jwenn moun ba yo yon bagay pou li?
Èske y ap koupe l fè plizyè moso pou machann yo?
7 Èske w ka pèse po l ak kout frenn+
Oubyen èske w ka pèse tèt li ak frenn yo konn frennen pwason yo?
8 Al met men w sou li.
Ou pap bliye konba a e w pap janm fè sa ankò!
9 Ou pa menm bezwen gen espwa w ap kenbe l.
W ap annik wè l, kè w ap rete*.
10 Pa gen pèsonn k ap pran chans vin nui l.
Si se konsa, ki moun ki kapab kanpe devan m+?
11 Ki moun ki te ban m yon bagay anvan pou m ta oblije remèt li sa+?
Tout sa ki anba syèl la se pou mwen yo ye+.
12 Mwen pa ka pa di anyen sou pat li yo,
Sou fòs li ak fason kò l byen fèt.
13 Kiyès ki te retire rad sou li?
Ki moun k ap vin toupre bouch li ki tou louvri?
14 Ki moun ki te ouvri bouch* li?
Tout dan l yo nèt bay laperèz.
15 Do l gen plizyè ranje kal*
Ki byen kole ansanm.
16 Yo tèlman kole youn ak lòt,
Lè pa ka pase nan mitan yo.
17 Yo kole youn ak lòt.
Yo soude youn ak lòt, e anyen pa ka separe yo.
18 Bri souf li fè limyè sot nan nen l,
E je l tankou reyon solèy douvanjou.
19 Zèklè t ap sot nan bouch li,
Gen yon pakèt ti dife k ap vole sot nan bouch li.
20 Lafimen sot nan twou nen l
Tankou yon fou ki gen dife ki fèt ak pay.
21 Souf li fè chabon limen,
E flanm dife sot nan bouch li.
22 Kou l gen anpil fòs,
E devan l se laperèz ki blayi.
23 Pli ki nan po l kole byen di youn ak lòt,
Yo tankou fè yo pa ka retire.
24 Kè l di kou wòch.
Wi, kè l di tankou yon gwo wòch moulen.
25 Lè l leve, menm kè moun ki vanyan yo kase,
Depi l fè yon mouvman, moun pa konn sa pou yo fè.
26 Pa gen epe ki frape l k ap fè l ret trankil,
Ni okenn lans, ni frenn, ni flèch+.
27 Li wè fè tankou pay,
E kuiv tankou bwa pouri pou li.
28 Flèch pa ka fè l kouri,
Wòch flonn tounen pay sou li.
29 Pou li, bout baton se pay.
E lè l tande bri lans, se ri l ri.
30 Anba vant li tankou yon pakèt moso veso ann ajil ki byen file,
Li layite kò l nan labou tankou planch yo konn bat manje angren+.
31 Li fè dlo ki fon yo bouyi kòmsi yo te nan chodyè.
Li fè lanmè monte tankou yon chodyè grès.
32 Li kite yon tras klere kote l pase.
Moun ta ka panse gen cheve blan nan fon dlo a.
33 Pa gen anyen ki tankou l sou tè a.
Se yon bèt ki fèt pou l pa pè anyen.
34 Li gad tout bèt fewòs nan je.
Se li ki wa tout gwo bèt sovaj yo.”