Jozye

8 Annapre, Jewova di Jozye: “Pinga w pè e pinga w panike+. Fè tout mesye ki konn al nan lagè yo monte avè w pou n al atake Ayi. Gade! Mwen lage wa Ayi a nan men w ansanm ak pèp li a, vil li a ak peyi l la+. 2 Fè Ayi ak wa l la menm sa w te fè Jeriko ak wa l la+. Men, fwa sa a, ou mèt pran sa w jwenn nan vil la ak bèt ki ladan l yo apre lagè a. Al tann yon anbiskad pou yo pa dèyè vil la.”

3 Vrèmanvre, Jozye ak tout mesye ki konn al nan lagè yo te monte al atake Ayi. Jozye te chwazi 30 000 sòlda vanyan e li te voye yo nan zòn nan lannuit. 4 Men lòd li te ba yo: “Gade! Nou dwe tann yon anbiskad pa dèyè vil la. Pa ret twò lwen vil la e nou tout dwe prepare nou. 5 Mwen menm ak tout moun ki avè m yo ap pwoche toupre vil la, e lè moun yo soti vin atake nou, menm jan yo te fè anvan an+, n ap kouri pou yo. 6 Lè yo soti vin dèyè nou, n ap rale yo sot nan vil la, konsa y ap di: ‘Yo kouri pou nou, menm jan yo te fè anvan an+.’ Epi nou menm, n ap kouri pou yo. 7 Lè sa a, nou dwe soti kote nou te poste kò nou an pou n pran vil la. Jewova, Bondye nou an, ap lage l nan men nou. 8 Kou nou fin pran vil la, nou dwe met dife ladan l+. Nou dwe fè sa Jewova te di a. Sa a se lòd mwen ban nou pou n suiv.”

9 Apre sa, Jozye fè yo ale, epi y al kote yo pral tann anbiskad la. Yo poste kò yo ant Betèl ak Ayi, nan lwès Ayi, pandan Jozye li menm ret pase nuit lan ak pèp la.

10 Apre Jozye fin leve granmmaten, li rasanble sòlda yo, e li menm ak ansyen ki nan pèp Izrayèl la kondui yo al Ayi. 11 Tout mesye ki konn al nan lagè+ ki te avèk li yo t ap mache pou y al devan vil la. Yo kanpe nan nò Ayi, e se vale a ki te separe yo ak Ayi. 12 Pandan tan sa a, Jozye pran anviwon 5 000 gason, li fè yo tann yon anbiskad+ ant Betèl+ ak Ayi, nan lwès vil la. 13 Se konsa, mesye yo te fè baz yo nan nò vil la+, e gad ki t ap veye pa dèyè yo te nan lwès vil la+, epi jou swa sa a Jozye t al nan mitan vale a*.

14 Kou wa Ayi a wè sa, demen maten byen bonè, li menm ak mesye yo nan vil la soti byen vit pou y al batay ak Izrayelit yo yon kote ki anfas dezè a. Men, li pa t konnen si yo te tann yon anbiskad pou li pa dèyè vil la. 15 Lè mesye nan Ayi yo atake pèp Izrayèl la, Jozye ak tout moun ki te avè l yo kouri al nan wout ki mennen nan dezè a+. 16 Lè sa a, mesye Ayi yo mande tout moun nan vil la pou yo kouri dèyè yo. Epi, pandan yo t ap kouri dèyè Jozye, Jozye ak tout moun ki te avè l yo te rale yo sot nan vil la. 17 Pa gen yon gason ki te ret nan Ayi ak Betèl ki pa t soti al dèyè Izrayelit yo. Yo te kite pòt vil la gran ouvè pou y al kouri dèyè Izrayelit yo.

18 Lè sa a, Jewova di Jozye: “Lonje lans ki nan men w lan nan direksyon Ayi+, paske m ap lage l nan men w+.” Epi, Jozye lonje lans ki te nan men l lan nan direksyon vil la. 19 Kou l lonje men l, gwoup moun ki te poste kò yo a soti byen vit kote yo te ye a, yo kouri antre nan vil la e yo pran vil la. Menm kote a, yo met dife ladan l+.

20 Lè mesye Ayi yo vire gad dèyè, yo wè yon sèl lafimen k ap sot nan vil la monte nan syèl la, yo pa t gen fòs pou yo kouri al okenn kote. Lè sa a, Izrayelit ki te kouri pou y al nan dezè a tounen pou yo koresponn ak mesye Ayi yo ki t ap kouri dèyè yo. 21 Lè Jozye ak tout Izrayelit ki te avè l yo wè mesye ki te nan anbiskad yo pran vil la e yo wè lafimen k ap monte sot nan vil la, yo retounen e yo atake mesye Ayi yo. 22 Izrayelit ki te pran vil la soti kite vil la pou y al rankontre yo, konsa yo sènen mesye Ayi yo. Te gen Izrayelit sou yon bò e te gen Izrayelit sou yon lòt bò. Yo touye tout mesye Ayi yo, pa gen youn ki rete vivan oswa ki chape poul li+. 23 Men, yo pran wa Ayi a+ vivan e yo mennen l bay Jozye.

24 Apre Izrayelit yo fin touye tout moun Ayi ki t ap kouri dèyè yo nan dezè a, e yo touye yo tout nèt ak kout epe, tout Izrayelit yo retounen Ayi e yo detwi rès moun ki te nan vil la ak kout epe. 25 Yo te touye tout moun Ayi yo jou sa a. Te gen 12 000 moun ki mouri, gason kou fi. 26 Jozye te kite men li te kenbe lans lan+ tou lonje jiskaske moun ki te avè l yo te fin touye tout moun ki abite Ayi+. 27 Men, Izrayelit yo te pran bèt yo ak bagay yo te jwenn nan vil la apre lagè a, dapre lòd Jewova te bay Jozye+.

28 Apre sa, Jozye boule Ayi, e vil la vin tounen yon pil dekonm+ ki rete la jis jodi a. 29 Li pann wa Ayi a sou yon poto* e li kite l la pou jis aswè. Epi, kòm solèy t apral kouche, Jozye bay lòd pou yo desann kadav la sou poto a+. Apre sa, yo voye l jete devan pòtay vil la e yo mete yon gwo pil wòch sou li, ki la jis jodi a.

30 Lè sa a, Jozye bati yon lotèl pou Jewova, Bondye Izrayèl la, sou Mòn Ebal+, 31 jan Moyiz, sèvitè Jewova a, te bay Izrayelit yo lòd pou yo fè sa e jan sa te ekri nan liv Lalwa Moyiz la+: “N ap bati yon lotèl ki fèt ak wòch yo pa t taye ak okenn zouti an fè+.” Se sou li yo te fè sakrifis yo te boule nèt pou Jewova ansanm ak sakrifis kominyon yo+.

32 Epi, Jozye te kopye Lwa Moyiz+ te ekri a sou wòch yo, devan Izrayelit yo+. 33 Tout pèp Izrayèl la, ansyen yo, moun ki gen otorite yo ak jij yo te kanpe toule de bò lach alyans Jewova a, devan Levit ki prèt yo ki t ap pote Lach la. Moun ki abite kòm etranje pami Izrayelit yo te ansanm ak Izrayelit yo+. Mwatye nan moun yo te kanpe anfas Mòn Gerizim e lòt mwatye a te kanpe anfas Mòn Ebal+ (dapre lòd Moyiz, sèvitè Jewova a, te bay la+), pou prèt yo beni pèp Izrayèl la. 34 Apre sa, Jozye li tout pawòl ki nan Lwa a byen fò+, ni benediksyon yo+, ni malediksyon yo+, selon tout sa k te ekri nan liv Lalwa a. 35 Pa gen yon pawòl nan tout lòd Moyiz te bay yo Jozye pa t li byen fò devan tout pèp Izrayèl la+, ki te gen fi ak timoun ansanm ak etranje+ ki t ap viv* pami pèp la+.