1 Samyèl

20 Apre sa, David kouri kite zòn Nayiyòt, nan Rama, epi l al jwenn Jonatan, li di l: “Ki sa m fè+? Ki peche m fè e ki mal mwen fè papa w pou l ap chèche touye m?” 2 Lè sa a, Jonatan di l: “Sa pa gendwa rive+! Ou pap mouri. Gade! Papa m pa janm fè anyen, piti kou gwo, pou l pa di m. Poukisa pou l ta kache m sa? Non, sa pa gendwa fèt.” 3 Men, David fè sèman, epi li di l: “Papa w byen konnen jan w apresye m+, e li ka di: ‘Jonatan pa dwe konn bagay sa a pou sa pa fè l lapenn!’ Menm jan li klè Jewova vivan, mwen fè sèman ni devan Bondye ni devan w* mwen ka mouri nenpòt ki lè+!”

4 Apre sa, Jonatan di David: “Nenpòt sa w* mande m, m ap fè l pou ou.” 5 David reponn Jonatan: “Demen, ap gen nouvèl lin+, se sèten wa a ap tann mwen vin manje avè l. Ou dwe voye m ale, mwen pral kache nan rak bwa a rive jis apre demen nan aswè. 6 Si papa w wè m pa la, w ap di l: ‘David te sipliye m pou m ba l pèmisyon pou l kouri al Betleyèm+, vil kote li moun nan, paske gen yon sakrifis tout fanmi l fè la chak ane+.’ 7 Si l reponn ou: ‘Pa gen pwoblèm’, konnen li anpè avèk mwen menm, sèvitè w la. Men, si l ta vin fache, ou mèt kwè li deside fè m mal. 8 Se pou w montre lanmou ki fidèl ou gen pou sèvitè w la+, paske w te fè yon alyans+ devan Jewova ak sèvitè w la. Men, si m koupab+, ou mèt touye m. Ou pa bezwen lage m nan men papa w.”

9 Lè sa a, Jonatan di: “Mwen pa t ap janm panse fè w yon bagay konsa! Si m ta konnen papa m deside fè w mal, èske w pa panse m t ap di w sa+?” 10 Epi, David di Jonatan: “Ki jan m ap fè konnen si papa w mal reponn ou?” 11 Jonatan di David: “Vini, ann al nan rak bwa a.” Se konsa, yo toule de al nan rak bwa a. 12 Epi, Jonatan di David: “Se pou Jewova, Bondye Izrayèl la, sèvi m temwen. Demen, vè lè konsa, oswa apre demen, mwen pral chèche wè sa papa m panse. Si l pa gen pwoblèm avè w, m ap fè w jwenn nouvèl la pou w ka konn sa. 13 Men, si papa m gen nan lide l pou l fè w mal, se pou Jewova pini m, e se pou l pini m ankò, si m pa fè w konn sa e si m pa kite w ale anpè! Mwen swete pou Jewova avè w+ menm jan li te avèk papa m nan+. 14 Èske w pap montre w gen lanmou ki fidèl pou mwen pandan m vivan an, e menm apre lanmò m, menm jan w gen lanmou ki fidèl pou Jewova+? 15 Menm lè Jewova elimine tout ènmi w yo sou tè a, se pou w toujou montre ou gen lanmou ki fidèl pou fanmi m+.” 16 Se konsa, Jonatan te fè yon alyans ak moun lakay David yo, li te di: “Jewova ap fè ènmi David yo peye sa yo fè.” 17 Epi, Jonatan te fè David fè sèman ankò sou baz lanmou l gen pou li, paske li te renmen David menm jan li te renmen pwòp tèt li*+.

18 Apre sa, Jonatan di David: “Demen, ap gen nouvèl lin+, y ap wè w pa la paske plas ou a ap ret vid. 19 Apre demen, y ap remake w pa la pi rèd. Ou dwe al nan zòn ou te kache lòt jou a, epi ou dwe rete la a toupre wòch la. 20 E m ap tire twa flèch nan yon sèl bò wòch la, kòmsi se yon bagay m ap vize. 21 Lè m voye sèvitè m nan, m ap di l: ‘Al chèche flèch yo.’ Si m di l: ‘Gade! Flèch yo toupre w la, al pran yo’, sa vle di tout bagay anfòm pou ou, lè sa a ou mèt tounen, paske menm jan li klè Jewova vivan, mwen fè sèman pa gen okenn danje. 22 Men, si m di jennonm nan: ‘Gade! Flèch yo depase kote w ye a’, lè sa a, ou mèt ale, paske se Jewova ki voye w ale. 23 Kanta pou pwomès mwen menm avè w te fè+ youn lòt la, se pou Jewova sèvi nou temwen pou toutan+!”

24 Se konsa, David t al kache nan rak bwa a. Lè nouvèl lin nan rive, wa a chita pou l manje+. 25 Wa Sayil te chita bò mi an, kote l te konn abitye chita a. Jonatan te chita anfas wa a e Abnè+ te chita bò kote wa a, men, plas David la te ret vid. 26 Sayil pa t di anyen jou sa a, paske li te di tèt li: ‘Petèt, gen yon bagay ki pase ki fè misye pa pwòp*+. Se sa. Se pwòp li pa pwòp.’ 27 Epi, demen, apre nouvèl lin nan, sou dezyèm jou a, plas David la te toujou ret vid. Lè sa a, Sayil mande Jonatan, pitit gason l lan: “Poukisa pitit gason Jese a+ pa vin manje ni yè ni jodi a?” 28 Jonatan reponn Sayil: “David te sipliye m pou m ba l pèmisyon pou l al Betleyèm+. 29 Li te di m: ‘Tanpri, kite m ale, paske fanmi m ap fè yon sakrifis nan vil la, e se yon frè m ki voye rele m. Si w dakò, kite m fè yon ti deplase pou m al wè frè m yo.’ Se sa k fè li pa vin manje sou tab ak wa a.” 30 Lè sa a, Sayil vin fache anpil sou Jonatan, li di l: “Ou se pitit yon fanm ki rebèl! Ou genlè panse m pa konnen si w chwazi pran pou pitit gason Jese a! Sa se yon wont pou ou e se yon wont pou manman w*! 31 Toutotan pitit gason Jese a vivan sou tè a, ni ou menm ni wayòm ou an pap an sekirite+. Kounye a, voye yon moun al chèche l ban mwen, paske fòk li mouri*+.”

32 Men, Jonatan di Sayil, papa l: “Poukisa w vle touye l+? Ki sa l fè?” 33 Menm kote a, Sayil voye yon lans dèyè Jonatan pou l touye l+. Se lè sa a Jonatan vin wè jan papa l deside touye David+. 34 Menm moman an, Jonatan leve kite tab la, li te fache anpil e li pa t manje anyen apre nouvèl lin nan, nan dezyèm jou a, paske li te nan lapenn pou David+ poutèt papa l te imilye l.

35 Nan demen maten, Jonatan t al nan rak bwa kote l te gen randevou ak David la, e li te gen yon jèn sèvitè avè l+. 36 Epi, li di sèvitè l la: “Tanpri, kouri al chèche flèch m ap tire yo.” Sèvitè a kouri, epi Jonatan tire yon flèch ki al pi lwen sèvitè l la. 37 Lè sèvitè a rive kote Jonatan te tire flèch la, Jonatan rele l, li di l: “Èske flèch la pa pi lwen w?” 38 Jonatan di sèvitè a byen fò: “Fè vit! Ale rapid! Pa pèdi tan!” Epi, sèvitè Jonatan an pran flèch yo e li retounen vin jwenn mèt li. 39 Sèvitè a pa t konprann anyen nan sa k t ap pase a. Se sèl Jonatan ak David ki te konnen sa sa vle di. 40 Apre sa, Jonatan bay sèvitè l la zam li yo, epi li di l: “Ale, pote yo al nan vil la.”

41 Lè sèvitè a ale kite Jonatan, David soti kote l te ye a, toupre a, nan sid. Li met ajenou e li bese fas atè twa fwa. Youn bo lòt e youn kriye pou lòt. Men, David te kriye plis. 42 Jonatan di David: “Ale anpè, piske nou toule de te fè sèman+ nan non Jewova, lè nou te di: ‘Se pou Jewova temwen ant ou menm avè m, ant desandans* pa w ak desandans* pa m pou toutan+.’”

Apre sa, David leve, l ale, epi Jonatan retounen nan vil la.