Mak
3 Yon lòt fwa ankò, li antre nan yon sinagòg, e gen yon mesye ki gen yon men pòk* ki te la+. 2 Epi, Farizyen yo t ap suiv li pou yo wè si l ap geri mesye a jou saba a pou yo ka akize l. 3 Li di mesye ki gen men pòk la*: “Leve, vin nan mitan nou.” 4 Apre sa, li di yo: “Èske jou saba yon moun gen dwa fè sa ki bon oubyen li gen dwa fè sa ki pa bon? Èske l gen dwa sove yon vi* oubyen touye l+?” Yo pa reponn. 5 Apre l fin gade yo tout avèk endiyasyon, li vin tris anpil lè l wè jan kè yo di+. Epi, li di mesye a: “Lonje men w.” Mesye a lonje men l, e men an geri. 6 Lè sa a, Farizyen yo sot deyò, e tousuit yo met tèt yo ansanm ak patizan Ewòd yo+ pou yo touye l.
7 Men, Jezi ansanm ak disip li yo retire kò yo, y al bò lanmè a, e gen yon gwo foul moun ki soti Galile ak Jide ki suiv li+. 8 Te gen yon bann moun ki soti menm Jerizalèm, Idime, pa lòtbò Rivyè Jouden an ak nan zòn Ti ak Sidon ki te tande pale de tout sa l t ap fè yo ki vin jwenn li. 9 Epi, li di disip li yo pou yo toujou met yon ti bato pre pou li pou l ka monte ladan l, yon fason pou foul moun yo pa kwense l. 10 Piske li te geri anpil moun, tout moun ki te gen gwo maladi yo te anvayi l pou yo manyen l+. 11 Menm movèzespri yo+, chak fwa yo wè l, yo met ajenou devan l epi yo di byen fò: “Ou se Pitit Bondye a+.” 12 Men anpil fwa, li pase yo lòd byen klè pou yo pa fè moun konnen kiyès li ye+.
13 Li monte sou yon mòn, li rele kèk nan disip li yo+, e y al jwenn li+. 14 Epi, li fòme* yon gwoup ki gen 12 gason, li ba yo non apot. Li te chwazi yo pou yo ka ret ansanm avè l e pou l ka voye yo preche. 15 Epi, li ba yo pouvwa pou yo chase demon+.
16 Gwoup 12 disip+ li te chwazi yo te gen ladan l Simon, li te ba l non Pyè tou+, 17 te gen Jak, pitit Zebede a, ansanm ak Jan, frè Jak la (li te bay mesye sa yo non Bwanègès tou, ki vle di “Pitit loray+”), 18 te gen Andre, Filip, Batèlmi, Matye, Toma, Jak ki pitit Alfe a, Tade, Simon yo rele Kananeyen an*, 19 ak Jida Iskaryòt ki t apral trayi Jezi pi devan.
Apre sa, Jezi antre nan yon kay. 20 Twouve, foul moun yo te rasanble yon lòt fwa ankò. Se sa k fè, Jezi ak disip li yo pa t menm gen tan pou yo manje. 21 Men, lè fanmi l aprann sa, yo deplase pou yo vin pran l pou y al avè l, paske yo t ap di: “Tèt li pati+.” 22 Espè nan Lalwa ki te desann sot Jerizalèm yo t ap di tou: “Li gen Beyèlzeboub*, chèf demon yo, sou li, e se grasa li l ap chase demon+.” 23 Lè sa a, li rele yo vin jwenn li, epi li ba yo yon egzanp, li di: “Kòman Satan ka fè chase Satan? 24 Si yon wayòm gen divizyon ladan l, wayòm sa a pap ka ret kanpe+. 25 E si gen yon kay kote moun ki ladan l yo ap goumen youn ak lòt, kay sa a ap kraze. 26 Menm jan an tou, si Satan leve kont tèt li e wayòm li an* vin divize, li pap ka ret kanpe, e lafen l ap rive. 27 Anfèt, pa gen pèsonn ki antre nan kay yon gason vanyan ki kapab vòlè bagay misye gen nan kay la si l pa mare gason vanyan an anvan. Se lè l fin fè sa, l ap ka piye kay la. 28 Anverite m ap di nou sa: Y ap padone lèzòm tout bagay, kèlkeswa peche yo fè, kèlkeswa move pawòl yo di. 29 Men, nenpòt moun ki di move pawòl sou lespri sen, moun sa a pap janm jwenn padon+, peche li fè a ap la pou toutan+.” 30 Li di yo sa paske yo t ap di: “Li gen yon movèzespri sou li+.”
31 Twouve, manman l ak frè l yo+ vini, e pandan yo kanpe deyò a, yo voye yon moun rele l anndan an+. 32 Kòm te gen yon foul moun ki te chita toutotou l, yo di l: “Gade! Men manman w ak frè w yo deyò a ap mande pou ou+.” 33 Men, li reponn yo: “Ki moun ki manman m e ki moun ki frè m?” 34 Epi, lè l fin gade moun yo ki te chita e ki te toutotou l, li di: “Gade! Men manman m ak frè m+! 35 Kèlkeswa moun ki fè volonte Bondye, se moun sa a ki frè m, ki sè m, ki manman m+.”