Sòm

119 Byennere moun ki san repwòch* nan fason y ap viv,

Moun ki mache selon lwa Jewova yo+.

 2 Byennere moun ki suiv rapèl li yo+,

Ki chèche l ak tout kè yo+.

 3 Moun konsa pa pratike anyen ki mal,

Yo mache nan chemen l yo+.

 4 Ou ban nou lòd

Pou nou byen obeyi kòmandman w yo+.

 5 Mwen swete m ap toujou kenbe fèm*+

Pou m ka obeyi lwa w yo.

 6 Konsa, mwen pap wont+

Lè m ap egzamine tout kòmandman w yo.

 7 M ap fè louwanj pou ou ak yon kè ki dwat

Lè m aprann jijman w yo ki jis.

 8 M ap obeyi lwa w yo.

Mwen swete w pa janm lage m nèt.

 9 Ki jan yon jèn gason ka mennen yon vi ki pwòp?

Se lè li veye pou l aji dapre pawòl ou+.

10 Mwen chèche w ak tout kè m.

Pa kite m abandone kòmandman w yo+.

11 Mwen konsève sa w di yo nan kè m+

Pou m ka pa peche kont ou+.

12 Se pou yo fè louwanj pou ou, o Jewova.

Aprann mwen lwa w yo.

13 Avèk bouch mwen, m ap fè konnen

Tout jijman w pwononse yo.

14 Rapèl ou yo fè kè m kontan anpil+.

Yo fè m kontan plis pase nenpòt lòt bagay ki gen valè+.

15 M ap reflechi sou* lòd ou yo+,

M ap kite je m fikse sou chemen w yo+.

16 Mwen renmen kòmandman w yo.

Mwen pap bliye pawòl ou yo+.

17 Byen boule ak sèvitè w la

Pou m ka kontinye viv e pou m ka obeyi pawòl ou yo+.

18 Ouvri je m pou m ka wè

Bèl bagay ki gen nan lwa w yo byen klè.

19 Se yon etranje m ye nan peyi a+,

Pa kache kòmandman w yo pou mwen.

20 Mwen* toujou swaf jijman w yo,

E sa gen yon gwo efè sou mwen.

21 Ou disipline moun ki pran dwa ki pa pou yo,

Moun malediksyon tonbe sou yo akoz yo vire do bay kòmandman w yo+.

22 Fè yo sispann derespekte m, fè yo sispann meprize m,

Paske mwen suiv rapèl ou yo.

23 Menm lè chèf yo chita ansanm ap pale m mal,

Mwen menm, sèvitè w la, m ap kontinye reflechi sou* lwa w yo.

24 Mwen renmen rapèl ou yo anpil+,

Se yo menm ki ban m konsèy+.

25 Men m* kouche nan pousyè a+,

Fè m ret an vi jan w te di sa a+.

26 Mwen te fè w konnen tout sa m fè e w te reponn mwen.

Aprann mwen lwa w yo+.

27 Fè m konprann sans* lòd ou yo

Pou m ka reflechi sou* gwo aksyon w fè yo+.

28 Mwen tèlman ap soufri mwen* pa ka dòmi.

Ban m fòs jan w te di sa a.

29 Pa kite m viv nan manti+,

E fè m favè lè w anseye m lwa w yo.

30 Mwen chwazi mache nan chemen fidelite+.

Mwen rekonèt jijman w yo bon.

31 Mwen ret kole ak rapèl ou yo+.

O Jewova, pa kite m wont+.

32 M ap prese* suiv kòmandman w yo

Paske w fè plas pou yo nan kè m*.

33 O Jewova+, aprann mwen lòd ou yo,

E m ap suiv yo jiska lafen+.

34 Ban m bon konprann

Pou m ka obeyi lwa w yo,

Pou m ka suiv yo ak tout kè m.

35 Dirije m pou m ka suiv* kòmandman w yo+,

Paske m pran plezi ladan yo.

36 Fè kè m renmen rapèl ou yo

Olye pou l gen tanta*+.

37 Pa kite je m ret ap gade sa k pa vo anyen+,

Fè m mache nan chemen w yo pou m ka ret an vi.

38 Reyalize pwomès ou fè* sèvitè w la

Pou sèvitè w la ka gen lakrentif pou ou*.

39 Pa kite dezonè tonbe sou mwen, mwen pè sa,

Paske jijman w yo bon+.

40 Gad jan m swaf pou m suiv lòd ou yo,

Fè m ret an vi grasa jistis ou.

41 Fè m benefisye lanmou fidèl ou genyen an, o Jewova+,

Delivre m jan w pwomèt* sa a+.

42 Lè sa a, m ap ka reponn moun k ap pwovoke m nan,

Paske, mwen met konfyans mwen nan pawòl ou.

43 Pa retire pawòl verite a nan bouch mwen

Paske, mwen met espwa m nan* jijman w yo.

44 M ap toujou obeyi lwa w yo,

Wi, pou tout tan gen tan+.

45 M ap mache yon kote m santi m an sekirite*+

Paske m chèche konn lòd ou yo.

46 M ap pale de rapèl ou yo menm devan wa,

E mwen pap wont+.

47 Mwen renmen kòmandman w yo,

Wi, mwen renmen yo+.

48 M ap leve men m pou m priye w paske m renmen kòmandman w yo+,

E m ap reflechi sou* lwa w yo+.

49 Sonje pawòl ou te di* sèvitè w la,

Pawòl ki fè m gen espwa a*.

50 Se sa ki ban m konsolasyon nan tristès mwen+,

Paske, sa w di yo fè m ret an vi.

51 Moun ki pran dwa ki pa pou yo meprize m anpil,

Men, mwen pap kite lwa w yo+.

52 Mwen sonje jijman w te pwononse nan tan lontan yo+, o Jewova,

E mwen jwenn konsolasyon nan yo+.

53 Mwen fache anpil akoz mechan yo

Ki abandone lwa w yo+.

54 Lwa w yo tankou chante pou mwen,

Kèlkeswa kote m rete a*.

55 Lannuit mwen sonje non w, o Jewova+,

Yon fason pou m ka obeyi lwa w yo.

56 Mwen gen abitid sa a

Paske mwen obeyi lòd ou yo.

57 Jewova se pòsyon pa m+.

Mwen pwomèt pou m obeyi pawòl ou+.

58 M ap sipliye w* ak tout kè m+,

Fè m favè+ selon pwomès ou fè a*.

59 Mwen egzamine fason m ap viv

Yon fason pou m retounen suiv rapèl ou yo+.

60 Mwen fè vit, mwen pa pran tan

Pou m obeyi kòmandman w yo+.

61 Kòd mechan yo antoure m,

Men mwen pa bliye lwa w yo+.

62 Mwen leve a minui pou m di w mèsi+

Pou jijman w yo ki jis.

63 Mwen se zanmi tout moun ki gen lakrentif pou ou

Ak moun ki obeyi lòd ou yo+.

64 O Jewova, lanmou fidèl ou genyen an plen tè a+.

Aprann mwen lwa w yo.

65 O Jewova, ou byen boule ak sèvitè w la

Jan w te di sa a.

66 Montre m ki jan pou m gen bonsans ak konesans+,

Paske, mwen met konfyans mwen nan kòmandman w yo.

67 Anvan m te vin ap soufri a, mwen te fè sa k pa bon*,

Men kounye a, mwen suiv pawòl ou+.

68 Ou bon+ e aksyon w fè yo bon.

Anseye m lwa w yo+.

69 Moun ki pran dwa ki pa pou yo bay manti sou mwen,

Men, mwen obeyi lòd ou yo ak tout kè m.

70 Kè yo pa sansib*+,

Men mwen menm, mwen renmen lwa w yo+.

71 Soufri m ap soufri a bon pou mwen+,

Sa fè m aprann lwa w yo.

72 Lwa ou bay yo bon pou mwen+.

Yo pi bon pou mwen pase plizyè milye pyès lò ak ajan+.

73 Se ak men w ou fè m e w ban m fòm.

Se pou w ede m gen bon konprann

Pou m ka aprann kòmandman w yo+.

74 Moun ki gen lakrentif pou ou yo kontan lè yo wè m,

Paske, se pawòl ou ki ban m espwa*+.

75 O Jewova, mwen konnen jijman w yo jis+

E se paske w fidèl ki fè w disipline m+.

76 Tanpri, konsole m akoz lanmou fidèl ou genyen an+,

Jan w te pwomèt* sèvitè w la sa a.

77 Fè m mizèrikòd pou m ka ret an vi+,

Paske, mwen renmen lwa w yo+.

78 Se pou lawont tonbe sou moun ki pran dwa ki pa pou yo,

Paske, yo aji mal avè m san m pa fè yo anyen*.

Men, mwen menm, m ap reflechi sou* lòd ou yo+.

79 Se pou moun ki gen lakrentif pou ou yo retounen bò kote m,

Moun ki konnen rapèl ou yo.

80 Se pou m suiv lwa w yo ak tout kè m+

Pou lawont pa tonbe sou mwen+.

81 Se pa ti tann m ap tann ou delivre m+,

Paske, se pawòl ou ki ban m espwa*.

82 Mwen swaf pou m wè sa w di yo reyalize+.

Men sa m ap mande: “Ki lè w ap konsole m+?”

83 Paske, mwen tankou yon bidon ki fèt ak po bèt lafimen ratresi.

Men, mwen pa bliye kòmandman w yo+.

84 Pandan konbyen tan pou sèvitè w la tann ankò?

Ki lè w ap jije moun k ap pèsekite m yo+?

85 Moun ki pran dwa ki pa pou yo,

Wi, moun ki meprize lwa w yo, fouye twou pou mwen.

86 Tout kòmandman w yo merite pou nou fè yo konfyans.

Gen moun k ap pèsekite m san rezon. Pote m sekou+!

87 Yo te prèske efase m sou tè a,

Men mwen pa t abandone lòd ou yo.

88 Fè m ret an vi akoz lanmou fidèl ou genyen an

Pou m ka kontinye suiv rapèl ou bay yo.

89 O Jewova, pawòl ou ap la pou toutan

Menm jan syèl la la pou toutan+.

90 Fidelite w ap la jenerasyon apre jenerasyon+.

Ou fè tè a byen chita kote l ye a, se sa k fè l ap kontinye rete la+.

91 Yo* la jis jodi a grasa jijman w yo,

Paske yo tout se sèvitè w yo ye.

92 Si m pa t renmen lwa w yo,

Tristès t ap deja pote m ale+.

93 Mwen pap janm bliye lòd ou yo

Paske se grasa yo ou fè m rete vivan+.

94 Se pou ou m ye, sove m+,

Paske, mwen chèche obeyi lòd ou yo+.

95 Mechan yo ap chèche detwi m,

Men mwen byen egzamine rapèl ou yo.

96 Mwen wè tout bon bagay gen yon limit,

Men kòmandman w yo pa gen limit*.

97 Se pa ti renmen mwen renmen lwa w yo+!

Mwen reflechi sou* yo tout lajounen+.

98 Kòmandman w yo fè m vin pi saj pase ènmi m yo+,

Paske, se yo ki toujou dirije m.

99 Mwen gen plis bon konprann pase moun k ap anseye m yo+,

Paske, mwen reflechi sou* rapèl ou yo.

100 Mwen aji ak plis bon konprann pase ansyen yo,

Paske, mwen obeyi lòd ou yo.

101 Mwen pa aksepte pran okenn move chemen+

Yon fason pou m ka obeyi pawòl ou.

102 Mwen pa vire do bay jijman w yo,

Paske, se ou menm ki anseye m.

103 Ala dous sa w di yo dous nan bouch mwen!

Yo pi dous pase siwo myèl+.

104 Grasa lòd ou yo, mwen aji avèk bon konprann+.

Se sa k fè mwen rayi tout move chemen+.

105 Pawòl ou se yon lanp pou pye m

E li se yon limyè pou wout mwen+.

106 Mwen fè sèman m ap obeyi jijman w yo ki jis

E m ap respekte sa m di a.

107 M ap soufri anpil+,

O Jewova, prezève lavi m jan w te di sa a+.

108 Tanpri, pran plezi nan louwanj m ap ofri w ak tout kè m yo+, o Jewova.

Anseye m jijman w yo+.

109 Se toutan lavi m an danje*,

Men mwen pa bliye lwa w yo+.

110 Mechan yo tann pyèj pou mwen,

Men mwen pa abandone lòd ou yo+.

111 Mwen konsidere rapèl ou yo kòm byen pa m toutan*,

Paske, yo fè kè m kontan+.

112 Mwen detèmine* pou m toujou obeyi lwa w yo,

Wi, jiskaske m mouri.

113 Mwen rayi moun ki pa met tout kè yo nan sa y ap fè*+,

Men mwen renmen lwa w yo+.

114 Ou se refij mwen e w se boukliye m+.

Paske, se pawòl ou ki ban m espwa*+.

115 Nou menm mechan yo+, rete lwen m

Pou m ka obeyi kòmandman Bondye m nan.

116 Ede m jan w pwomèt sa a*+

Pou m ka rete an vi.

Se nan ou mwen met konfyans mwen, pa kite m wont+.

117 Ede m pou m ka jwenn delivrans+,

Konsa, m ap toujou ret konsantre sou lwa w yo+.

118 Ou vire do bay tout moun ki abandone lwa w yo+,

Paske, se mantè yo ye e y ap twonpe moun.

119 Ou elimine tout mechan yo sou tè a kòmsi se rejè yo te ye+.

Se sa k fè mwen renmen rapèl ou yo.

120 Tout kò* m ap tranble tèlman mwen gen laperèz pou ou.

Jijman w yo fè m gen lakrentif.

121 Mwen fè sa ki jis ak sa ki dwat.

Pa lage m anba men moun ki vle toupizi m yo.

122 Fè tout bagay mache byen pou sèvitè w la,

Pa kite moun ki pran dwa ki pa pou yo toupizi m.

123 Je m febli tèlman m ap tann ou vin delivre m+,

Tèlman m ap tann bon pwomès ou fè a* reyalize+.

124 Fè sèvitè w la wè lanmou fidèl ou gen pou li+.

Anseye m lwa w yo+.

125 Mwen se sèvitè w, ban mwen bon konprann+

Pou m ka konprann rapèl ou yo.

126 Lè a rive pou w aji, o Jewova+,

Paske, moun yo pa obeyi lwa w yo.

127 Vrèmanvre, mwen renmen kòmandman w yo.

Mwen renmen yo plis pase lò, menm pase pi bon lò a*+.

128 Se sa k fè mwen konsidere tout enstriksyon w bay* yo bon+.

Mwen rayi tout move chemen+.

129 Rapèl ou yo estrawòdinè,

Se sa k fè mwen* obeyi yo.

130 Pawòl ou fè nou konnen yo ban nou limyè+,

Yo fè moun ki manke eksperyans yo vin gen bon konprann+.

131 Mwen tèlman swaf tande kòmandman w yo+,

Mwen ouvri bouch mwen byen laj epi m plenn*.

132 Vire gade m epi fè m favè+,

Jan w te deside w ap fè sa pou moun ki renmen non w yo+.

133 Sèvi ak pawòl ou pou w byen gide chak pa m ap fè*,

Pa kite okenn move bagay gen pouvwa sou mwen+.

134 Delivre* m anba men moun k ap toupizi m yo,

E m ap obeyi lòd ou yo.

135 Fè sèvitè w la favè*+,

Anseye m lwa w yo.

136 Dlo ap kouri nan je m tankou rivyè

Akoz moun ki pa obeyi lwa w yo+.

137 Ou jis, o Jewova+,

E jijman w yo jis+.

138 Rapèl ou bay yo jis

E yo merite pou n fè yo konfyans nèt.

139 Mwen tèlman renmen w, se kòmsi m gen yon dife k ap boule anndan m+

Lè m wè ènmi m yo bliye pawòl ou yo.

140 Pawòl ou yo bon nèt+,

E sèvitè w la renmen yo+.

141 Mwen pa anyen e moun meprize m+,

Men, mwen pa bliye lòd ou yo.

142 Jistis ou ap la pou toutan+,

E lwa w yo se verite+.

143 Menm lè m ap soufri e mwen gen pwoblèm,

Mwen toujou renmen kòmandman w yo.

144 Rapèl ou yo ap toujou jis.

Ban mwen bon konprann+ pou m ka ret an vi.

145 Mwen rele w ak tout kè m, o Jewova, reponn mwen.

M ap obeyi lwa w yo.

146 Mwen rele w, sove m non!

M ap kontinye suiv rapèl ou yo.

147 Mwen leve douvanjou* pou m rele w, pou m mande w sekou+,

Paske, se pawòl ou ki ban m espwa*.

148 Mwen leve nan mitan lannuit

Pou m ka reflechi sou* pawòl ou+.

149 Tanpri, koute vwa m akoz lanmou fidèl ou genyen an+.

O Jewova, prezève lavi m akoz jistis ou.

150 Moun ki gen move konduit* yo vin bò kote m.

Yo rejte lwa w yo.

151 Ou toupre m, o Jewova+,

Tout kòmandman w yo se laverite+.

152 Depi lontan m tande pale de rapèl ou yo,

M aprann ou bay yo pou yo rete la pou toutan+.

153 Gade jan m ap soufri epi sove m+,

Paske mwen pa bliye lwa w yo.

154 Defann mwen* epi sove m+.

Prezève lavi m jan w pwomèt sa a*.

155 Mechan yo pap jwenn delivrans nan men w,

Paske, yo pa chèche obeyi lwa w yo+.

156 Mizèrikòd ou estrawòdinè, o Jewova+.

Prezève lavi m akoz jistis ou.

157 Moun k ap pèsekite m yo anpil, advèsè m yo anpil+.

Men, mwen pa vire do bay rapèl ou yo.

158 Mwen pa vle wè trèt yo

Akoz yo pa obeyi sa w di+.

159 Gade jan m renmen lòd ou yo!

O Jewova, prezève lavi m akoz lanmou fidèl ou genyen an+.

160 Se tout pawòl ou nèt ki laverite+.

Tout jijman w yo jis e y ap la pou toutan.

161 Yon seri chèf ap pèsekite m+ san rezon,

Men anndan kè m mwen gen gwo respè pou pawòl ou+.

162 Pawòl ou yo fè m kontan+

Tankou yon moun ki jwenn anpil bon bagay.

163 Mwen rayi manti, wi, mwen gen degoutans pou sa+,

Men mwen renmen lwa w yo+.

164 Mwen fè louwanj pou ou sèt fwa pa jou

Paske jijman w yo jis.

165 Moun ki renmen lwa w yo se yo menm k ap viv nan lapè+.

Pa gen anyen* ki ka fè yo bite.

166 Mwen gen espwa w ap aji pou w sove m, o Jewova.

Mwen obeyi kòmandman w yo.

167 Mwen* obeyi rapèl ou yo,

Mwen renmen yo anpil+.

168 Mwen obeyi lòd ou yo ak rapèl ou yo

Paske w konn tout sa m fè+.

169 Lè m rele w pou m mande w sekou, se pou rèl mwen fè a rive jwenn ou, o Jewova+.

Jan w te di sa a, fè m gen bon konprann+.

170 Se pou w tande m lè m mande w fè m favè.

Sove m, jan w pwomèt sa a*.

171 Se pou m sèvi ak bouch mwen pou m ba w anpil louwanj+,

Paske ou fè m konnen lwa w yo.

172 Se pou m sèvi ak bouch mwen pou m chante konsènan pawòl ou+,

Paske, tout kòmandman w yo jis.

173 Se pou w pare pou w ede m+

Paske mwen chwazi pou m obeyi lòd ou yo+.

174 Mwen pa ka tann pou w delivre m, o Jewova,

E mwen renmen lwa w yo+.

175 Prezève lavi m* pou m ka fè louwanj pou ou+.

Se pou jijman w yo ede m.

176 Mwen pèdi wout mwen tankou yon mouton ki pèdi+. Vin chèche sèvitè w la,

Paske, mwen pa bliye kòmandman w yo+.