Lik
4 Apre sa, Jezi, ki te ranpli ak lespri sen, kite Rivyè Jouden an, e lespri a mennen l pasipala nan dezè a+ 2 pandan 40 jou, e Dyab la te tante l nan dezè a+. Epi, li pa t manje anyen nan jou sa yo. Konsa, lè 40 jou yo fin pase, li te grangou. 3 Lè sa a, Dyab la di l: “Si w se yon pitit Bondye, di wòch sa a pou l tounen yon pen.” 4 Men, Jezi reponn li: “Men sa ki ekri: ‘Se pa manje sèlman moun bezwen pou yo viv+.’”
5 Apre sa, Dyab la fè l monte yon kote ki wo, epi, nan yon ti moman, li montre l tout wayòm ki sou tè a+. 6 Epi, li di l: “M ap ba w tout pouvwa sa a ak tout glwa wayòm sa yo genyen, paske yo ban mwen pouvwa sa a+ e mwen bay moun mwen vle l. 7 Donk, si ou menm, ou fè yon jès pou w adore m, yo tout ap pou ou.” 8 Jezi reponn li: “Men sa ki ekri: ‘Se Jewova*, Bondye w la, ou dwe adore, e se li menm sèl ou dwe bay yon sèvis sakre+.’”
9 Apre sa, li mennen l Jerizalèm, li fè l kanpe sou tèt mi tanp lan*, epi li di l: “Si w se yon pitit Bondye, ret kote w ye a lage kò w anba+, 10 paske men sa ki ekri: ‘L ap bay zanj li yo lòd pou yo pwoteje w.’ 11 E men sa ki ekri ankò: ‘Y ap pote w nan men yo pou w pa frape pye w nan okenn wòch+.’” 12 Jezi reponn li: “Men sa ki ekri tou: ‘Nou pa dwe teste Jewova*, Bondye nou an+.’” 13 Apre sa, lè Dyab la fin tante l, li kite l annatandan l jwenn yon lòt bon okazyon+.
14 Kounye a, anba pouvwa lespri a, Jezi retounen Galile+. E bon pawòl yo t ap di sou li yo te gaye nan tout peyi ki ozalantou yo. 15 Li te kòmanse anseye nan sinagòg yo, e tout moun te onore l.
16 Apre sa, l al Nazarèt+, kote li te grandi a. Epi, li antre nan sinagòg la+ e li kanpe pou l li, jan li abitye fè sa jou saba yo. 17 Epi, yo lonje woulo pwofèt Ezayi a ba li, li ouvri l e l al kote ki ekri: 18 “Lespri Jewova* sou mwen, paske li chwazi m pou m anonse moun ki pòv yo bon nouvèl la. Li voye m pou m fè prizonye yo konnen y ap lib e pou m fè avèg yo konnen y ap wè ankò. Li voye m pou m libere moun y ap toupizi yo+, 19 pou m preche konsènan ane Jewova* apwouve a+.” 20 Apre sa, li woule woulo a, li lonje l bay sèvitè a, epi l al chita. Je tout moun nan sinagòg la te fikse sou li. 21 Lè sa a, li kòmanse di yo: “Jodi a, pasaj nan Ekriti a nou sot tande la a akonpli+.”
22 Epi, yo tout te kòmanse pale an byen de li, yo te sezi pou bèl pawòl ki t ap sot nan bouch li+ e yo t ap di: “Èske se pa pitit Jozèf la+?” 23 Lè sa a, li di yo: “Siman, pawòl ki di: ‘Doktè, geri tèt ou’ a, nou pral di l pou mwen, e konsa, n ap di m: ‘Bagay nou tande w fè Kapènawòm yo, fè yo nan pwòp peyi w tou+.’” 24 Se sa k fè li di yo: “Anverite m ap di nou sa: Yo pa janm aksepte yon pwofèt nan pwòp peyi l+. 25 Pa egzanp, sa m ap di nou an se laverite: Te gen anpil vèv ann Izrayèl nan epòk Eli a lè lapli te fè twazan sis mwa li pa t tonbe a, sa ki te lakòz yon gwo grangou tonbe sou tout peyi a+. 26 Epoutan, Bondye pa t voye Eli al jwenn okenn nan medam sa yo. Se kot yon vèv nan vil Safat nan peyi Sidon Bondye te voye l+. 27 Mete sou sa, te gen anpil moun ki te gen lèp ann Izrayèl nan epòk pwofèt Elize a. Epoutan, pa t gen youn ki te geri, men se Naaman, moun peyi Siri, ki te geri+.” 28 Lè tout moun nan sinagòg la tande bagay li di yo, yo vin an kòlè+, 29 yo leve, yo kouri al pa deyò vil la avè l, yo mennen l sou tèt mòn kote vil yo a te bati a pou yo ka lage l tèt anba. 30 Men, li pase nan mitan yo l ale+.
31 Apre sa, li desann Kapènawòm, yon vil nan Galile. Epi, li t ap anseye moun yo yon jou saba+, 32 e yo te ret bouch ouvè devan fason l anseye+ paske li te pale tankou yon moun ki gen otorite. 33 Twouve, nan sinagòg la, te gen yon mesye ki te gen yon movèzespri sou li. Mesye a di byen fò+: 34 “O! Ki rapò nou gen avè w, Jezi, moun Nazarèt+? Èske w vini pou w detwi nou? Mwen konnen trè byen kiyès ou ye, ou se Sila a ki sen Bondye voye a+.” 35 Men, Jezi pale di avè l, li di l: “Pe bouch ou. Sot sou mesye a!” Epi, demon an lage mesye a atè nan mitan moun yo, e li sot sou li san l pa fè l anyen. 36 Lè sa a, tout moun yo sezi, e youn kòmanse di lòt: “Gad ki jan l ap pale! Apa li pase movèzespri yo lòd ak otorite e avèk pisans, epi yo soti!” 37 Konsa, nan tout kafou nan peyi ki ozalantou yo, yo t ap pale de li.
38 Apre sa, li leve, li soti nan sinagòg la, l al kay Simon. Twouve, bèlmè Simon t ap soufri anba yon gwo lafyèv. Yo mande Jezi pou l fè yon bagay pou li+. 39 Li panche sou li, li pase lafyèv la lòd, e lafyèv la tonbe. Menm kote a, bèlmè a leve, li resevwa yo.
40 Men, lè solèy la t apral kouche, tout moun ki te gen moun yo k ap soufri anba tout kalite maladi te mennen malad sa yo ba li. Li poze men l sou yo chak, li geri yo+. 41 Te gen demon tou ki te soti sou anpil nan yo. Etan yo t ap soti, yo t ap di byen fò: “Ou se Pitit Bondye a+.” Men li menm, li te reprimande yo, li pa t kite yo pale+, paske yo te konnen li se Kris la+.
42 Men, lè l vin jou, li soti, l al yon kote ki izole+. Men, foul moun yo kòmanse chèche l, e y al jis kote l te ye a, yo t ap eseye anpeche l al kite yo. 43 Men, li di yo: “Mwen dwe al anonse bon nouvèl Wayòm Bondye a nan lòt vil yo tou, paske se pou sa Bondye te voye m+.” 44 Se poutèt sa, li te kontinye preche nan sinagòg ki nan Jide yo.