Ezekyèl

3 Apre sa li di m: “Pitit lòm, manje sa ki devan w lan*. Manje woulo sa a epi ale. Al pale ak pèp Izrayèl la+.”

2 Vrèmanvre, mwen ouvri bouch mwen epi li fè m manje woulo a. 3 Apre sa, li di m: “Pitit lòm, manje woulo sa a mwen ba ou a, plen vant ou ak li.” Vrèmanvre, mwen te kòmanse manje l e li te dous nan bouch mwen tankou siwo myèl+.

4 Epi li di m: “Pitit lòm, al nan mitan pèp Izrayèl la epi fè yo konnen pawòl mwen yo. 5 Se pa kote yon pèp ki pale yon lang ou pa ka konprann oswa ki pale yon lang ou pa konnen mwen voye w, men, se kot pèp Izrayèl la. 6 Mwen pa voye w kot yon pakèt moun ki pale yon lang ou pa ka konprann oswa yon lang ou pa konnen. Si se kote moun sa yo mwen te voye w, yo t ap koute w+. 7 Men, pèp Izrayèl la li menm pap vle koute w, paske yo pa vle koute m+. Tout moun ki nan pèp Izrayèl la se yon bann moun tèt di ki pa vle chanje+. 8 Gade! M ap ba w fòs pou w kanpe tennfas devan yo menm jan yo menm yo kontinye ap fè tèt di avè m+. 9 Mwen fè fwon w vin tankou yon dyaman, mwen fè l vin pi di pase wòch silèks+. Pinga w pè yo, ni pinga w pè figi yo+, paske yo se yon pèp ki rebèl.”

10 Apre sa, li di m: “Pitit lòm, se pou w koute tout sa m di w yo e se pou w kenbe yo nan kè w. 11 Ale nan mitan moun nan pèp ou a*+ ki ann egzil yo epi pale avèk yo. Lè w ap pale avèk yo, kit yo koute w kit yo pa koute w+, se pou w di yo: ‘Men sa Jewova, Seyè ki Souvren an, di.’”

12 Apre sa, gen yon fòs*+ ki ale avè m epi mwen tande yon gwo bri ansanm ak yon vwa dèyè m nan ki di: “Se pou yo fè lwanj pou glwa Jewova kote ki pou li a.” 13 Mwen te tande bri zèl kreyati vivan yo t ap fè pandan zèl sa yo t ap fwote youn ak lòt+, mwen te tande bri wou yo ki bò kote yo+ e yon lòt fwa ankò, mwen te tande yon gwo bri k ap gwonde. 14 Fòs la te pran m li ale avè m. Pandan m t aprale a mwen te boulvèse, mwen pa t kontan menm. Pisans Jewova te poze sou mwen avèk fòs. 15 Se konsa, mwen t al Tèlabib nan mitan moun ki ann egzil ki t ap viv bò Rivyè Keba yo+ e mwen te rete la kote yo t ap viv la. Mwen te rete nan mitan yo pandan sèt jou tankou yon moun ki gaga+.

16 Apre sèt jou, Jewova pale avè m, li di m:

17 “Pitit lòm, mwen chwazi w pou w sèvi kòm moun k ap veye pou pèp Izrayèl la+. Lè m di w yon bagay, se pou w avèti yo pou mwen+. 18 Lè mwen di yon moun ki mechan: ‘W ap mouri kanmenm,’ men ou pa ba l avètisman an, ou pa di anyen pou w avèti moun ki mechan an pou l sispann fè move bagay l ap fè yo pou l ka ret an vi+, l ap mouri pou peche l fè paske li mechan+, men m ap mande w san l*+. 19 Men, si w avèti moun ki mechan an e li pa sispann fè move bagay l ap fè yo, li pa kite move chemen li pran an, l ap mouri pou peche l fè, men ou menm, se sèten w ap sove lavi w*+. 20 Lè yon moun ki jis sispann fè sa ki dwat e li vin ap fè sa ki mal*, m ap met obstak devan l pou m fè l tonbe e l ap mouri+. Si w pa t avèti l, l ap mouri pou peche l fè e yo pap sonje bon bagay li te konn fè yo, men ou menm, m ap mande w san l*+. 21 Men, si w te avèti moun ki jis la pou l pa fè sa ki mal, e li pa fè sa ki mal, se sèten l ap ret an vi paske ou te avèti l+, e ou menm w ap sove lavi w*.”

22 Pisans Jewova vin sou mwen pandan m la a e li di m: “Leve, ale nan vale a. Se la m ap pale avè w.” 23 Vrèmanvre, mwen leve, m al nan vale a epi gade, glwa Jewova te la+, menm jan ak glwa mwen te wè bò Rivyè Keba a+. Lè sa a, mwen tonbe fas atè. 24 Apre sa, lespri Bondye antre nan mwen epi li fè m kanpe sou de pye m+. Apre sa, Bondye pale avè m, li di m:

“Ale, fèmen kò w anndan lakay ou. 25 Kanta pou ou, o pitit lòm, y ap mare w ak kòd yon fason pou w pa ka soti al nan mitan yo. 26 E m ap fè lang ou kole anndan bouch ou, w ap vin bèbè e w pap kapab blame yo. Paske, yo se yon pèp ki rebèl. 27 Men, lè m pale avè w, m ap ouvri bouch ou e se pou w di yo+: ‘Men sa Jewova, Seyè ki Souvren an, di.’ Se pou moun k ap koute a koute+ e se pou moun ki pap koute a pa koute, piske yo se yon pèp ki rebèl+.