Sòm

37 Pinga w fache* poutèt moun k ap fè mechanste yo

Ni pinga w rayi sò moun k ap fè sa ki mal yo+.

 2 Y ap fennen byen vit tankou zèb+,

Y ap seche tankou zèb vèt.

 3 Mete konfyans ou nan Jewova epi fè sa ki bon+.

Abite sou tè a*, epi aji avèk fidelite+.

 4 Pran tout plezi w* nan Jewova

E l ap ba ou tout sa w swete nan kè w.

 5 Kite Jewova dirije wout ou*+.

Met konfyans ou nan li e li menm l ap ede w+.

 6 L ap fè jistis ou parèt klè tankou limyè,

L ap fè jistis ou parèt klè tankou solèy midi.

 7 Ret an silans devan Jewova+,

Ret tann li ak espwa l ap ede w*.

Pinga w fache lè yon moun

Reyalize move plan li gen nan tèt li+.

 8 Pinga w fè kòlè, pinga w move+,

Pinga w fache epi w al lage kò w nan fè sa ki mal*.

 9 Paske, moun k ap fè mechanste yo ap disparèt+,

Men moun ki mete espwa yo nan Jewova ap posede tè a+.

10 Talè konsa, mechan yo pap la ankò+,

W ap gade kote yo te ye yo,

Ou pap jwenn yo+.

11 Men, moun ki gen imilite yo ap posede tè a+,

E y ap kontan anpil akoz yo pral viv nan yon lapè total+.

12 Mechan an fè konplo sou do moun ki jis la+

E l ap manje dan.

13 Men Jewova ap ri l,

Paske L konnen jou pou l mouri a pa lwen+.

14 Mechan yo rale epe yo e yo pare banza* yo

Pou yo lage ni moun y ap toupizi yo ni pòv malere yo atè

E pou yo touye moun k ap mache dwat yo.

15 Men, pwòp epe yo ap antre nan pwòp kè yo+

E banza yo ap kase.

16 Ti sa moun ki jis la posede a pi bon

Pase pakèt bagay mechan yo posede yo+.

17 Bra mechan yo ap kase,

Men, Jewova ap soutni moun ki jis yo.

18 Jewova konnen sa moun ki san repwòch yo ap pase*.

Eritaj yo a ap la pou toutan+.

19 Lawont pap tonbe sou yo lè yo nan pwoblèm,

Lè gen grangou, y ap gen manje an kantite.

20 Men, mechan yo ap peri+,

Ènmi Jewova yo ap disparèt tankou bèl patiraj,

Y ap disparèt tankou lafimen.

21 Mechan an prete, men li pa remèt,

Men, moun ki jis la donan*, li renmen bay+.

22 Moun Bondye beni yo ap posede tè a,

Men, moun li lage madichon sou yo ap peri+.

23 Lè Jewova pran plezi nan fason yon moun ye+,

Li montre moun sa a kote pou l met pye l*+.

24 Moun sa a kapab bite, men li pap tonbe plat atè+

Paske Jewova kenbe men l*+.

25 Mwen te jèn yon lè, e kounye a mwen vin granmoun,

Men, mwen pa janm wè Bondye abandone yon moun ki jis+,

Ni mwen pa janm wè pitit li ap mande charite+.

26 Li toujou prete lòt moun san grate tèt+.

Pitit li yo ap jwenn benediksyon.

27 Si w sispann fè sa ki mal e w fè sa ki byen+,

W ap rete pou toutan.

28 Paske, Jewova renmen jistis

E li pap lage moun ki fidèl ak li yo+.

Y ap toujou jwenn pwoteksyon+,

Men, desandan mechan yo ap peri+.

29 Moun ki jis yo gen pou yo posede tè a+

E yo gen pou yo viv sou li pou toutan+.

30 Se pawòl sajès ki soti nan bouch moun ki jis la*,

E moun sa a pale sa ki jis+.

31 Lwa Bondye l la nan kè l+,

Pye l pap glise+.

32 Mechan an ap gade moun ki jis la

E l ap chèche touye l.

33 Men, Jewova pap lage moun ki jis la nan men mechan an+,

Ni li pap kondane l lè y ap jije l+.

34 Met espwa w nan Jewova epi mache nan chemen l yo.

L ap fè lwanj pou ou e w ap resevwa tè a kòm byen pa w.

Lè yo disparèt mechan yo+, w ap wè sa+.

35 Mwen wè yon moun ki san pitye, ki mechan,

K ap ouvè kò l tankou bèl pyebwa ki grandi nan tè l te pouse a+.

36 Men, bridsoukou li peri e li pa la ankò+.

Mwen plede chèche l, men mwen pa ka jwenn li+.

37 Gade moun ki san repwòch* la byen,

Gade moun ki dwat la+,

Paske moun sa a gen pou l viv anpè+.

38 Men, tout moun k ap pratike peche yo ap peri.

Mechan yo pa gen okenn avni+.

39 Se Jewova k ap sove moun ki jis yo+.

Li se yon fòtrès pou yo nan moman difisil yo+.

40 Jewova ap ede yo, l ap delivre yo+.

L ap retire yo anba men mechan yo e l ap sove yo,

Paske se nan li yo pran refij+.